Dünya Turizm Təşkilatının VII Ümumdünya konqresi

Məlum olduğu kimi, Dünya Turizm Təşkilatının təşəbbüsü və təşkilatçılığı ilə Andorra knyazlığında keçirilən "Qar və dağ turizmi: - müvəffəqiyyət üçün yeni strategiyalar" mövzusuna həsr olunan VII Ümumdünya konqresi öz işini uğurla yekunlaşdırmışdır.

La Massano şəhərində gerçəkləşən konqresə dünyanın 30 ölkəsindən 4 nazir, o cümlədən nüfuzlu turizm müəssisələrinin nümayəndə və ekspertləri qatılmışdılar. Bu tədbirdə ölkəmizi Azərbaycan Turizm İnstitutunun rektoru, tarix elmləri doktoru, professor Cəfər Cəfərov təmsil etmişdir.

C.Cəfərov səfərlə bağlı təəssüratlarını bizimlə bölüşərkən bildirdi ki, "iki günlük tədbirdə 18 məruzə dinlənildi. İnformasiya-kommunikasiya texnologiyaları əsasında dağ turizminin inkişaf strategiyası, yay mövsümü üçün nəzərdə tutulan məhsul və xidmətlərin yeni çeşidlərinin təqdim olunması, dağ turizmi destinasiyasının aşkarlanması və s. mövzular müzakirə predmeti idi". O səfər etdiyi ölkə haqqında daha sonra əlavə olaraq qeyd etdi ki, Andorra knyazlığı cənub-qərbi Avropada yerləşir. İspaniya və Fransa ilə həmsərhəddir. Qışı qarlı və şaxtalı keçir. Qar fırtınaları və uçqunlar bu ərazi üçün səciyyəvi sayılır. Əhalisinin sayı 75.000 nəfər olsa da, hər il Andorra knyazlığına on milyon turist axın edir. Bask dilində "boş yer" mənası verən Andorra cazibədar turizm məkanı kimi dəyərləndirilir. VII Ümumdünya konqresinin növbəti toplantısının müzakirəyə çıxarılan mövzusundan da bilinir ki, qar və dağ turizmi bu ölkəni məşhurlaşdıran, dünyanın hər yerindən turistləri özünə cəlb edən başlıca amildir. Sonda o, tədbirin axırıncı günündə Valnordakı xizək kurortunda keçirilən mədəni toplantının bütün iştirakçıların böyük marağına səbəb olduğunu bildirdi.

Z. BƏŞİRQIZI

Xalq qəzeti.- 2012.- 25 aprel.- S. 7.