"Kəlamlar" Almaniyada nəşr olunmuşdur

İstənilən insan öz ölkəsi, Vətəni, xalqı və dövləti barədə xarici aləmdən hər hansı xəbəri eşidərkən təkcə sevinmir, eyni zamanda, öz xalqı və ya adi bir soydaşı ilə fəxr edir. Hətta bir yapon şairi yazırdı ki, mən Finlandiyada, Misirdə və İndoneziyada çap olunmuş dünya xəritələrində Yaponiyanın adını görəndə sevincimdən gözüm yaşarırdı. Bundan, yəni xəritədə ölkənin adının görünməsindən adi bir hal yoxdur. Heç kəs xəritədən hansısa ölkənin adını silə bilməz. Söhbət milli təəssübkeşliyin miqyasından gedir. Bu təəssübkeşliyə heç bir hədd, hüdud yoxdur. Bu hiss bizdə daha güclüdür.

Yazıçı-filosof, dörd beynəlxalq akademiyanın akademiki, Azərbaycan, Rusiya və Türkiyə Yazıçılar birliklərinin, eləcə də Avrasiya Yazıçılar Liqasının üzvü Hacı Fərhad Mirzənin "Kəlamlar" kitabının dünyanın müxtəlif ölkələrində çap olunması və geniş yayılması da bizim hər birimizin sevincinə və məmnunluğuna səbəb olur. Öncə "Vektor" Beynəlxalq Elm Mərkəzinin xətti ilə müxtəlif illərdə Bakıda, sonra Türk Dünyası Araşdırmaları Beynəlxalq Elmlər Akademiyasının təşkilatçılığı ilə Ankarada (2009-cu il) böyük tirajla çap olunub yayılan bu kitab "Türkiyədə ilin kitabı"elan edildi. Çox çəkmədi ki, "Kəlamlar" rusiyalı mütəxəssislərin də diqqətini cəlb etdi. Rusiya Federasiyası Yazıçılar İttifaqı Moskva Şəhər Təşkilatının xətti ilə rus dilinə tərcümə edilib Moskvada çap olunan "Kalamı" (2009-cu il) kitabı öz müəllifinə daha böyük nüfuz qazandırdı. Rusiya Yazıçılar İttifaqının xətti ilə Kanadada və Ukraynada keçirilən Beynəlxalq kitab sərgilərinə göndərilən bu kitab soydaşımızın daha geniş miqyasda tanınmasına səbəb oldu. Məhz həmin sərgilərdən sonra Hacı Fərhad Mirzə Avropa Təbiyyat Elmləri Akademiyasının akademiki və Roma şəhərinin fəxri vətəndaşı seçildi. Az sonra isə Birləşmiş Millətlər Təşkilatı yanında İctimai Təltiflər Şurası "Kəlamlar" müəllifini "Puşkin adına Qızıl medal"a layiq gördü.

Bu günlərdə isə Almaniyanın Frankfurt şəhərindən şad xəbər alınmışdır. Rusiya Federasiyası Yazıçılar Birliyi Moskva Şəhər Təşkilatının, Türk Dünyası Araşdırmaları Beynəlxalq Elmlər Akademiyasının, Avropa Təbiyyat Elmləri Akademiyasının və "Vektor" Beynəlxalq Elm Mərkəzinin birgə təşkilatçılığı ilə "Kəlamlar" kitabı Frankfurt şəhərindəki "BMP Balta Media & Print" nəşriyyatında ingilis dilində, böyük tirajla çap olunmuşdur. Yeni kitab "Vektor" Beynəlxalq Elm Mərkəzinin prezidenti, filologiya elmləri doktoru, professor Elçin İskəndərzadənin kəlamın və "Kəlamlar" kitabının mahiyyətinin Avropa oxucuları üçün nəzərdə tutulan şərhi ilə açılır. Sonra isə Türk Dünyası Araşdırmaları Beynəlxalq Elmlər Akademiyası Ankara Bürosunun sədri, professor Xeyrəddin İvginin, Avropa Təbiyyat Elmləri Akademiyasının prezidenti Vladimir Tıminskinin, Rusiya Federasiyası Yazıçılar Birliyi Moskva Şəhər Təşkilatının sədri, Rusiyanın əməkdar mədəniyyət işçisi, şair Vladimir Boyarinovun və fəlsəfə elmləri doktoru, professor Əli Abbasovun Hacı Fərhad Mirzənin ədəbi-fəlsəfi yaradıcılığı, xüsusən, kəlamları barədə əhatəli elmi məqalələri verilir.

İlk dəfədir ki, avropalı oxuculara təqdim olunan yeni nəşrin üstün cəhətləri odur ki, buraya müəllifin 1997 - 2012-ci illəri əhatə edən, təxminən 300 mövzuya aid kəlamları daxil edilmişdir. Yəni burada 2009-cu ildəki Moskva nəşrinə düşməyən yüzlərlə kəlam vardır. Daha bir yenilik isə odur ki, yeni kitab beynəlxalq mütəxəssislər tərəfindən dərslik kimi təqdim olunur. Əhatə olunan mövzuların siyahısı verilməklə yanaşı, əlifba ilə hansı kəlamın hansı səhifədən tapılmasını asanlaşdıran ikinci bir göstərici də tərtib olunmuşdur. "Lent.az" internet saytının 2010-cu ilin aprelində Bakının 8-ci kilometr qəsəbəsindəki ticarət mərkəzində yanğın söndürüldükdən sonra dağıntılar arasından heç bir zərər çəkməmiş "Kəlamlar" kitabının tapıldığını göstərən şəkilli xəbəri də kitabın ön səhifələrində avropalı oxuculara təqdim olunur.

"Kəlamlar"ın yeni nəşrinin redaktorları Cens Şristensen və Murat Mümtaz Kök, ingilis dilinə tərcümə edəni Firudin Ağazadə, rəyçi professor Tofiq Bakıxanov, korrektor Səidə Sultan, texniki tərtibatçısı isə Sənan Orucdur. Soydaşlarımıza yeni uğurlar arzu edirik.

Natəvan İSMAYILLI

Xalq qəzeti.- 2012.- 28 aprel.- S. 10.