Azərbaycanda qeyri-neft sektoru dinamik
inkişaf edir
Ölkəmizdə son illər sənayenin
qeyri-neft sektorunun lokomotivinə çevrilməsi istiqamətində
ardıcıl və sistemli tədbirlər həyata
keçirilir. İqtisadiyyatda inkişaf meyillərini
müşahidə edərkən, sözsüz ki, sənayenin
yüksək inkişaf dinamikasını aydın görmək
mümkündür. Hazırda Azərbaycanda ümumi daxili məhsulun
tərkibində əsas yer sənaye məhsullarının
payına düşür. Bu gün Azərbaycan sənayenin
sürətli inkişafına görə MDB dövlətləri
içərisində nəhəng sənaye komplekslərinə
malik Rusiya və Ukrayna ilə rəqabətə davam gətirir.
İstehsal
proseslərində yeni texnologiyaların tətbiqində,
keyfiyyətli və rəqabətqabiliyyətli yerli
istehsalın formalaşmasında və ölkə
iqtisadiyyatının qlobal bazarlara inteqrasiyasında xüsusi əhəmiyyət
kəsb etməsi, həmçinin qeyri-neft sektorunun daha da
inkişaf etdirilməsi, regionların sosial-iqtisadi vəziyyətinin
daha da yaxşılaşdırılması və əhalinin
rifah səviyyəsinin daha da yüksəldilməsində yeni
sənaye müəssisələrinin yaradılması ölkəmizdə
reallaşdırılan iqtisadi siyasətin prioritetlərindən
hesab olunur.
Bunun bariz
ifadəsi kimi Alternativ və Bərpa Olunan Enerji Mənbələri
üzrə Dövlət Agentliyi tərəfindən
Sumqayıtda inşa olunmuş Azgüntex zavodunu misal göstərmək
olar. Xatırladaq ki, aprelin 24-də Prezident İlham Əliyev həmin
müəssisənin açılışında iştirak
etmişdir. Burada dövlət başçısına məlumat
verilmişdir ki, Azgüntex zavodunda iki istehsal xətti - Günəş
modulları və LED lampaları xətləri fəaliyyət
göstərəcəkdir. İnşasına ötən ilin
yanvarından başlanılan və Avropa ölkələrinin
aparıcı şirkətlərinin ən müasir
texnologiyaları əsasında yaradılan Günəş
modulları xətti istifadəyə tam hazırdır.
Həmçinin
bildirilmişdir ki, zavodun inzibati binası bütün
lazımi avadanlıq və inventarlarla təchiz olunmuşdur.
Burada işçilərin səmərəli fəaliyyəti
üçün hər cür imkan vardır. Zavod tam kompyuterləşdirilmiş,
"Wi-Fi" şəbəkəsi
yaradılmışdır. İşçilərin istirahəti
üçün ayrıca sağlamlıq zalı da fəaliyyət
göstərir.
Dövlət
başçısı binanın foyesində zavodda hazırlanan
günəş panellərinin nümunələrinə
baxmışdır. Vurğulanmışdır ki, müəssisədə
hər birinin gücü 42 vatdan 250 vata qədər olan və
60 fotoelementlə təchiz edilən bu panellər beynəlxalq
standartlar səviyyəsində hazırlanacaq və sabit enerji
verəcəkdir. Yaşayış binalarının,
küçələrin, meydanların, müxtəlif iaşə
və sosial obyektlərin daha səmərəli
işıqlandırılması və enerji təminatının
yaxşılaşdırılması üçün zavodda
LED yüksək texnologiyalı lampaların istehsalı da nəzərdə
tutulmuşdur.
Prezident
İlham Əliyevə "min ev - min elektrostansiya" layihəsi
barədə də məlumat verilmişdir. Qeyd olunmuşdur
ki, əsasən yaşayış binaları üçün
nəzərdə tutulan bu layihə hər bir evin müstəqil
şəkildə günəş enerjisini elektrik enerjisinə
çevirən, ekoloji cəhətdən təmiz və təhlükəsiz
kiçik elektrik stansiyası ilə təchizinə yönəlmişdir.
Bu elektrostansiyalardakı günəş panelləri vasitəsilə
əldə olunan sabit enerji dəyişən enerjiyə
çevrilərək istehlakçıların istifadəsinə
veriləcəkdir. Artıq qalan enerji şəbəkəyə
ötürüləcək, gecə saatlarında isə şəbəkədən
alınacaqdır. İlk mərhələdə yığcam
şəkildə salınan qəsəbələr
üçün nəzərdə tutulan bu layihənin gələcəkdə
daha da genişləndirilməsi imkanları
böyükdür. Körpülərin, ticarət obyektlərinin
üzərində də günəş panellərinin
qurulması, enerjidoldurma məntəqələrinin
inşası da mühüm əhəmiyyət kəsb edən
layihələrdəndir.
Prezident
İlham Əliyev Sumqayıta səfəri çərçivəsində
zavodun Günəş modulları istehsalı xətti ilə
də tanışlığı zamanı bildirilmişdir ki,
hazırda müəssisədə bir növbədə 33 nəfər
işləyir. Üçnövbəli iş rejiminə
keçdikdən sonra işçilərin sayı 130 nəfərə
çatdırılacaqdır. Alternativ və bərpa olunan
enerji sahəsində dünyanın məşhur şirkətlərinin
istehsal etdikləri ən müasir texnologiyalarla təmin olunan
zavodda ekoloji normalara ciddi əməl edilir. Burada işçilərin
sağlam və təhlükəsiz fəaliyyəti
üçün yüksək şərait
yaradılmışdır.
Sonra
Prezident İlham Əliyev Alternativ və Bərpa Olunan Enerji Mənbələri
üzrə Dövlət Agentliyinin Sumqayıtda yaradılacaq
Yüksək Texnologiyalar Parkının layihəsi ilə
tanış olmuşdur. Dövlət başçısına
məlumat verilmişdir ki, parkın ərazisində alternativ və
bərpa olunan enerji və enerjidən səmərəli istifadə
texnologiyasına əsaslanan 15 zavodun inşası
planlaşdırılır. Parkın ərazisində
yaradılacaq optik linzalar, şüşə və bazalt liflər,
akkumulyator istehsalı və digər zavodlar alternativ enerjinin əldə
edilməsində və istifadəsində lazım olan
avadanlığın ölkəmizdə istehsalına şərait
yaradacaqdır. Bu, həm tələb olunan
avadanlığın daha ucuz başa gəlməsinə, həm
də onların tətbiqinin xeyli asanlaşmasına imkan verəcəkdir.
Alternativ enerjinin tətbiqi zamanı istifadə olunan əsas
materiallardan biri də LED lampalarıdır. Hazırda sürətlə
yayılan və yeni nəsil işıqlandırma sistemi hesab
olunan LED lampaları enerjiyə qənaəti və uzun
müddət istifadəyə yararlılığı ilə
seçilir. Bu məqsədlə parkın ərazisində
lampa zavodunun inşası da nəzərdə tutulur.
Prezident
İlham Əliyev Sumqayıt Texnologiyalar Parkında (STP) polimer
məhsulları istehsalı zavodunun genişləndirilməsi
işləri ilə də tanış olmuş, ağır
maşınqayırma və dəqiq emal mərkəzləri
zavodlarının açılışında iştirak
etmişdir. Dövlət başçısına məlumat
verilmişdir ki, 17 zavoddan ibarət olan STP-də respublika əhəmiyyətli
müxtəlif çeşidli məhsullar, o cümlədən
kabellər, transformatorlar, yüksək gərginlikli
avadanlıq, hidroturbinlər, su nasosları, elektrik mühərrikləri,
borular, texniki qazlar istehsal edilir. Bu sənaye nəhənginin
istifadəyə verilməsi nəticəsində yüzlərlə
yeni iş yeri açılmışdır.
Qeyd
edilmişdir ki, STP kabel zavodunun tikintisinin üçüncü
mərhələsi çərçivəsində yüksək
gərginlikli kabellərin izolyasiya xətlərinin
quraşdırılacağı qüllədə 500 kilovoltluq
güc kabellərinin iki izolyasiya xətti yerləşəcəkdir.
Bu layihə MDB məkanı və Yaxın Şərqdə
yalnız Azərbaycanda reallaşdırılır. Qüllənin
yeraltı hissəsi 40 metr dərinlikdədir. Ümumi
uzunluğu 124,5 metr olan qüllənin tikintisinə 2009-cu ilin
sonunda başlanmışdır. Tikinti işləri və
avadanlığın quraşdırılması 2012-ci ilin
sonunadək başa çatdırılacaqdır.
Ölkə
Prezidentinə məlumat verilmişdir ki, 2009-cu ildə
polietilen və polipropilen borular istehsal edən zavod istehsala
başlayan zaman burada cəmi beş xətt var idi. Genişləndirmə
işlərindən sonra bu xətlərin sayı
artırılaraq ümumilikdə 25-ə
çatdırılmışdır. Müxtəlif təyinatlı
boruların istehsalı üzrə ixtisaslaşan zavod
hazırda nəinki respublikamızın, o cümlədən
regionun ən perspektivli müəssisələrindəndir.
Peşəkar kadrların çalışdığı bu
müəssisədə ölkəmizdə və beynəlxalq
bazarda kəskin ehtiyac duyulan qaz, su, kanalizasiya və digər məqsədlər
üçün istifadə olunan alüminium təbəqəli
çoxqatlı polietilen və polipropilen borular istehsal edilir.
Zavodun
ümumi ərazisi 2,8 hektardır. Hazırda burada 400 nəfər
işlə təmin edilmişdir. Zavod sutkada 396 ton polietilen
boru istehsal etmək gücünə malikdir. Burada quraşdırılan
yeni xətlərdə diametri 16 millimetrdən 800 millimetrədək
olan borular istehsal etmək mümkündür. Zavodun məhsulları
müasir tələblərə cavab verir. Polietilen borular
yüksək təzyiqə davamlı olmaqla yanaşı,
korroziyaya uğramır və onlara 50 il zəmanət verilir.
Buradakı xətlərin hər biri saatda 1300 kiloqram polietilen
boru emal etmək gücünə malikdir. Zavodda diametri 50
millimetrdən 250 millimetrədək olmaqla istehsal edilən
drenaj boruları, həmçinin qızdırıcı xətlərin
çəkilməsi üçün nəzərdə tutulan
polipropilen borular da ən müasir tələblərə
uyğun şəkildə, yüksək keyfiyyətlə
istehsal olunur.
Müəssisədə
Almaniya istehsalı olan və ən son texnoloji yeniliklərə
cavab verən avadanlıq quraşdırılmışdır.
Bunun sayəsində müəssisədə yüksək
keyfiyyətli və rəqabətə davamlı məhsul
istehsal edilir. MDB-də bənzəri olmayan bu zavod daxili tələbatı
tam ödəməklə yanaşı, məhsullarını
bir sıra xarici ölkələrə də ixrac etməyi nəzərdə
tutur. Müəssisənin idarə edilməsi tam
avtomatlaşdırılmışdır. Gələcəkdə
zavodun fəaliyyəti daha da genişləndiriləcəkdir.
Yaxın günlərdə burada diametri 1200 millimetr olan
kanalizasiya borularının istehsalına da
başlanılacaqdır. Xammalı Almaniyadan alan zavod
polipropilendən stadionlar üçün tamaşaçı
oturacaqları və xüsusi sifarişlə bir sıra digər
məhsullar istehsal etmək imkanına malikdir.
Azərbaycan
Prezidenti STP-nin ağır maşınqayırma zavodunda olarkən,
diqqətə çatdırılmışdır ki, tikintisinə
2010-cu ildə başlanan müəssisə xammalı Rusiya,
Türkiyə və digər ölkələrdən alır.
Ümumi sahəsi 4,5 hektar olan zavodda dünyanın bir sıra
aparıcı şirkətlərinin avadanlıqları
quraşdırılmışdır. Zavodda 900 nəfər
işlə təmin olunmuşdur. Müəssisədə
yaradılan şəraitlə tanış olan dövlət
başçısına məlumat verildi ki, burada elektrik
stansiyalarının inşası üçün metal konstruksiyalar
və müxtəlif hissələr istehsal edilir. Zavodda, həmçinin
10, 110, 220 və 330 kilovoltluq elektrikötürücü xətlərin
dayaqları hazırlanır. Burada, həmçinin energetika
avadanlığının təmiri həyata keçiriləcəkdir.
Zavodun
illik istehsal gücü 50 min tondur. Bu cür gücə malik
zavod Cənubi Qafqazda yalnız Azərbaycandadır. Gələcəkdə
müəssisənin fəaliyyətinin daha da genişləndirilməsi
nəzərdə tutulur. Zavod məhsullarını xarici
bazarlara çıxarmağı da planlaşdırır.
STP-nin dəqiq
emal mərkəzləri zavodunun açılışında
da iştirak edən Prezident İlham Əliyevə
bildirilmişdir ki, müəssisə maşın və
mexanizmlərin işlək detallarının dəqiq emalı
və hazırlanması sexindən və bu sexin tərkibində
olan pəstah, xüsusi təyinatlı avadanlığın
işlək hissələrinin emalından və avadanlığın
işlək detallarının dəqiq emalı sahələrindən
ibarətdir. Pəstah sahəsində detalların
hazırlanması üçün lazım olan materiallar
universal frez və torna dəzgahları vasitəsilə
müvafiq ölçülərə gətirilir. Xüsusi təyinatlı
avadanlığın işlək hissələrinin emalı
sahəsində isə hidroturbin, alternativ enerji
qurğularının hissələri yüksək dəqiqliklə
və keyfiyyətlə istehsal olunur. Avadanlığın
işlək detallarının dəqiq emalı sahəsində
müxtəlif ölçülü valların, reduktor hissələrinin
hazırlanması həyata keçirilir.
Zavodda
dünyanın inkişaf etmiş ölkələrinin
aparıcı şirkətlərinin istehsal etdiyi 58 dəzgah
quraşdırılmışdır. Bu dəzgahlarda energetika,
maşınqayırma və neft sənayesi sektoruna aid bir
çox detalların emalı mümkündür. Burada, həmçinin
plastik injektorlu qəliblərin, ştampların layihələndirilməsi,
hissələrin emalı, yığımı yerinə
yetirilir. Zavodda kabel istehsalı üçün müxtəlif
ölçülü kalibrlər, matrisa və s. istehsal
olunur. Müəssisədə, həmçinin STP-nin polimer məhsulları
istehsalı və kabel zavodları üçün də
müxtəlif ölçülü detallar hazırlanır.
Zavod İsveçrə, İsveç və Almaniyanın
tanınmış şirkətləri ilə əməkdaşlıq
edir. Gələcəkdə fəaliyyətini genişləndirəcək
bu müəssisənin işçiləri bir sıra ölkələrdə
ixtisasartırma kurslarında iştirak edirlər. Daxili
bazardakı tələbatı ödəyən zavod məhsullarını
xarici ölkələrə də ixrac edəcəkdir.
Göründüyü
kimi, regionlarda mövcud potensialdan səmərəli istifadə
etməklə iqtisadiyyatın ayrı-ayrı sahələrinin
inkişafı, iqtisadiyyatın diversifikasiyası, tarazlı
regional və davamlı sosial-iqtisadi inkişaf, istehsal müəssisələrinin
fəaliyyətinin daha da genişləndirilməsi,
ixracyönümlü məhsul istehsalının
stimullaşdırılması, əhalinin həyat səviyyəsinin
daha da yaxşılaşdırılması, məşğulluğun
səviyyəsinin, xüsusilə gənclərin faydalı əməklə
məşğulluğunun artırılması istiqamətində
mühüm uğurlar əldə edilir.
Vaqif BAYRAMOV
Xalq qəzeti.- 2012.- 28 aprel.- S. 1.