Vladimir DOROXİN: Bu musiqi bayramı uzun illər yaşayacaq və dünyanın diqqətini hər il Qəbələyə yönəldəcəkdir

Heyrətamiz məkan, gözəl insanlar və əla musiqi. Belə bir tədbirdə iştirakımdan çox məmnunam. Bu musiqi bayramı hələ uzun illər yaşayacaq və dünyanın diqqətini hər il Qəbələyə yönəldəcəkdir.

Bu fikirləri Heydər Əliyev Fondunun təşkilatçılığı ilə keçirilən Qəbələ IV Beynəlxalq Musiqi Festivalında "Moskva solistləri" kamera orkestrinin konsertini izləyən Rusiyanın Azərbaycandakı səfiri Vladimir Doroxin jurnalistlərə müsahibəsində demişdir. Bildirmişdir ki, bu bayram özündə dünyanın hər yerindən görkəmli musiqiçiləri və tamaşaçıları birləşdirir.

Səfir demişdir: "Gözəl meşələrin, dağların əhatəsində klassik musiqini dinləmək insana unudulmaz duyğular yaşadır. Burada tamaşaçılar tərəfindən festival iştirakçılarına qarşı çox səmimi münasibət vardır. Yerli tamaşaçılar savadlıdır, klassik musiqini yaxşı dərk edir və musiqiçiləri ürəkdən alqışlayırlar. Festivalın proqramı da olduqca zəngindir. Burada dahi rus bəstəkarlarının klassik əsərlərini dinlədim. Rusiyanın tanınmış musiqiçilərindən Yuri Başmetin, Boris Berezovskinin, Qriqori Kovalevskinin, Aleksandr Akimovun, Aleksandr Çaykovskinin, Andrey Yaroşinskinin və başqalarının bu festivalda böyük ustalıqla çıxışı məni fərəhləndirir. Tamaşaçıların rəğbətini qazanan gözəl ifalarına görə onları təbrik edirəm".

AzərTAc

Xalq qəzeti.- 2012.- 4 avqust.- S. 4.