Sumqayıt Dövlət Universitetində beynəlxalq konfrans

Sumqayıt Dövlət Universitetində (SDU) bu ali məktəbin yaranmasının 50 illik yubileyi ilə bağlı silsilə tədbirlər keçirilir. "Ekologiya və həyat fəaliyyətinin mühafizəsi" VII Beynəlxalq Konfransı da bu qəbildən idi. Tədbiri SDU-nun rektoru, professor Nadir Qəhrəmanov açaraq konfrans barədə məlumat verdi, onun önəmindən danışdı. Konfransda dünyanın bir çox ölkələrindən daxil olmuş məruzələrin dinləniləcəyini diqqətə çatdıran rektor bildirdi ki, universitetdə bu kimi konfranslar 2000-ci ildən keçirilir.

Sonra AMEA-nın Radiasiya Problemləri İnstitunun direktoru, AMEA-nın müxbir üzvü Adil Qəribov çıxış edərək konfrans materiallarının ölkəmizdə müvafiq sahənin inkişafına təkan verəcəyinə inamını ifadə etdi. Professor A.Qəribov regional miqyasda radiasiya məsələsinə toxunaraq Ermənistanın "Metsamor" atom stansiyasının bölgə üçün ciddi təhlükə törətdiyini diqqətə çatdırdı.

Konfransda Beynəlxalq Ekoenergetika Akademiyasının prezidenti, professor Fəqan Əliyevin "Azərbaycanda bərpa olunan enerji mənbələrinin ehtiyatları və ekoloji qiymətləndirmə metodları", Sumqayıt Ekoloji Reabilitasiya Mərkəzinin direktoru Arif İslamzadənin "Ekoloji informasiyanın tətbiqi və geoinformasiya sisteminin tətbiqi", Bakı Dövlət Universitetinin müəllimi, professor Rövşən Xəlilovun "Maqnit nanohissəciklərin biogen yolla formalaşması və tibdə istifadəsi perspektivləri" mövzularında çıxışları dinlənildi.

Konfrans ertəsi gün bölmə iclaslarında davam etdirildi, bölmə rəhbərlərinin hesabatı dinlənildi, dünya və ölkə ekologiyası ilə bağlı təkliflər nəzərdən keçirildi.

Əli NƏCƏFXANLI

Xalq qəzeti.- 2012.- 1 iyul.- S. 7.