Vətənlə döyünən ürək

Oleq Krapivin 29 sentyabr 1960-cı ildə Azərbaycanın qədim şəhəri Şamaxının Şəhriyar qəsəbəsində anadan olmuşdur.O, kiçik yaşlarından tərbiyəsi və davranışı ilə həmyaşıdlarına nümunə olmuşdur. Dərsdən kənar vaxtlarda o idman klubuna gələr, saatlarla idmançıların məşqlərinə tamaşa edərdi. Bir müddətdən sonra Oleqgilin ailəsi Bakının Sabunçu, sonralar isə Bakıxanov qəsəbəsinə köçür. Oleq idmana bütün varlığı ilə bağlandığı üçün təhsilini davam etdirməklə yanaşı sərbəst güləşlə də məşğul olur. O, tanınmış idmançı, Azərbaycan güləşinin inkişafında əvəzsiz rol oynamış SSRİ idman ustası Oqtay Hüseynovun qrupunda məşq edir. Gənclər arasında respublika yarışlarında Oleq Azərbaycan çempionu adına layiq görülür.

Ancaq təəssüf ki, peşəkar idmanda fəaliyyət dövrü qısa olur. Oleq böyük idmanı tərk etdikdən sonra da sevimli idman növündən ayrıla bilmir. 2007-ci il Oleqin həyatında ən əlamətdar il olur. O, Türkiyənin İstanbul şəhərində veteranlar arasında kecirilən yarışda sərbəst güləş üzrə dünya çempionu adını qazanır. Bu yüksək göstəricilərinə görə o, respublika rəhbərliyinin mükafatına layiq görülür. Zaman keçdikcə həyat da öz hökmünü verir. Hər kəsin bir tale yazısı olduğu kimi, qürbət ellərdə yaşamaq da Oleqin tale yazısı imiş. O, doğma vətəni Azərbaycandan ayrılmaq istəməsə də mürəkkəb həyat yolları onu Ukraynaya aparır. Sahibkarlıq fəaliyyəti ilə məşğul olaraq iş adamı və xeyriyyəçi kimi bütün Ukraynada və Avropanın bir sıra ölkələrində yaxşı tanınan Oleq bu gün də həyatının mənası olan idmanla məşğul olur. O, Azərbaycan Güləş Federasiyasının vitse-prezidentidir. Oleq yaşadığı ölkənin paytaxtı Kiyev şəhərində azərbaycanlı uşaqlar üçün "Bazar günü məktəbi" təşkil etmiş, eyni zamanda uşaqların fiziki cəhətdən sağlam böyüməsi üçün idman kompleksi tikdirmişdir. "Vətən" adlı Azərbaycan milli vokal-rəqs ansamblı yaratmaq isə onun ən böyük arzularından biri idi. Nəhayət, bu ansanbl da yaranır, milli geyimdə rəqs edən uşaqlar dəfələrlə müxtəlif şəhərlərdə Azərbaycanın milli musiqi mədəniyyətini layiqincə təmsil etmişlər. Oleq doğma ana yurdu Şamaxını da yaddan çıxarmayıb, şəhərin mərkəzində gənclərin idmanla məşğul olması üçün "Şirvan" idman klubu tikdirib.Hal-hazırda "Şirvan" idman klubunda sərbəst güləşin sirlərini öyrənən idmançılar içərisində respublika yarışlarında çox yüksək nailiyyətlər əldə edən idmançılar da var. Klubun müəllimləri Qüdrət Məmmədyarov, Ağamusa Quliyev, Elşən Eminov öz tələbələrinə Oleq müəllimin keçdiyi şərəfli həyat yolunu həmişə nümunə göstərirlər.

Bütün bu xeyirxah əməllərlə yanaşı, Oleq Krapivin siyasi arenada da Azərbaycanı layiqincə təmsil edir. Məlumdur ki, Azərbaycandan kənarda yaşayan soydaşlarımızla əlaqə, onların problemləri ulu öndərimiz Heydər Əliyevi həmişə düşündürmüşdür.Hələ 1991-ci ilin dekabırında Naxçıvan MR-in Milli Məclisinin sədri olarkən hər il həmin ayın son gününün Dünya Azərbaycanlılarının Həmrəylik Günü kimi qeyd olunması təşəbbüsü ilə çıxış etmiş, bu barədə qərar vermişdı.

Krapivin yorulmadan çalışmış və Azərbaycan həqiqətlərini Ukrayna xalqına, bu respublikada fəaliyyət göstərən müxtəlif diaspor və icma təşkilatlarına çatdırır. Bütün bunlarla bərabər Oleq həm də Ukraynada azərbaycanlılarla digər millətlərin nümayəndələri arasında baş verən münaqişələrin sülh yolu ilə həll olunmasında əvəzsiz rol oynayır. Xeyirxah və vətənpərvər şəxsiyyət kimi hamı onu sevir.

Oleq Krapivinin fəaliyyəti Azərbaycan dövləti tərəfindən layiqincə qiymətləndirilir. Azərbaycan Prezidentinin Ukraynaya səfəri zamanı diaspor nümayəndələri sırasında görüşdə iştirak etmiş Oleq Krapivin hazırda Ukrayna Respublikasında fəaliyyət göstərən Azərbaycan Milli Konqresinin Kiyev bölgəsi üzrə şurasının sədridir.

O, ulu öndər Heydər Əliyevin xatirəsinə 2010-2011 -ci illərdə Ukraynanın paytaxtı Kiyev şəhərində sərbəst güləş üzrə beynəlxalq yarışın keçirilməsini təşkil etmişdir.

Mətləb BARATOĞLU

Kiyev – Şamaxı

Xalq qəzeti.- 2012.- 22 iyul.- S. 4.