Salyan sürətlə yeniləşir

2012-ci ilin birinci yarısı Salyan rayonu üçün sosial-iqtisadi inkişaf tempinin daha da sürətləndirilməsi ilə yadda qaldı.

Belə ki, məhsul buraxılışının həcmi ötən ilin müvafiq dövrünə nisbətən 14 milyon 885 min manat (20,2 faiz) artaraq 88 milyon 721 min manat, sənaye məhsulunun ümumi həcmi 11 milyon 178 min manat (82,4 faiz) artaraq 19 milyon 733 min manat, kənd təsərrüfatı məhsullarının ümumi həcmi 1 milyon 989 min manat (3,8 faiz) artaraq 40 milyon 974 min manat, tikinti-quraşdırma işlərinin həcmi 1 milyon 394 min manat (68,8 faiz) artaraq 2 milyon 219 min manat, rabitə işlərinin həcmi 49 min manat (28,9 faiz) artaraq 220 min manat, nəqliyyat işlərinin həcmi 95 min manat (20,7 faiz) artaraq 557 min manat, pərakəndə ticarət dövriyyəsi 6 milyon 889 min manat (3,7 faiz) artaraq 68 milyon manat, əhaliyə göstərilən pullu xidmət 352 min manat (1,8 faiz) artaraq 20 milyon 39 min manat çox olmuşdur. Əsas kapitala yönəldilən investisiya 21 milyon 185 min manat olmuşdur. Bir nəfərə düşən orta aylıq əmək haqqı 195 manat, ümumi məhsul buraxılışının həcmi 698 manatdır.

2012-ci ilin birinci yarısında 312-si daimi olmaqla 529 yeni iş yeri yaradılmışdır.

Bu rəqəmlər 2012-ci ilin birinci yarısı üçün Salyan rayonunun sosial-iqtisadi inkişafının yekunlarına və qarşıda duran vəzifələrə həsr edilmiş yığıncaqda səsləndi. Rayon icra hakimiyyətinin başçısı Tahir Kərimov geniş məruzə edərək bildirdi ki, bu dövrdə küçələrə 20082 kvadratmetr üzlük daşı döşənmiş, səki kənarına 21452 metr bardür düzülmüş, 5649 kvadratmetr sahəyə tava-plitə döşənmiş, 640 metr uzunluğunda 1920 kvadratmetr istinad divarı çəkilmişdir. 11 kommunal evin fasadı və 37 çoxmərtəbəli yaşayış evinin dam örtüyü əsaslı təmir olunmuşdur.

Eyni zamanda şəhərin Heydər Əliyev, N.Nərimanov, Q.Səmədov, Ə.Qasımzadə, Y.Zərgərli, M.Ağazadə, Ə.Zeynalov, T.Xəlilbəyli, Ə.Kürçaylı və Şəhriyar küçələrinə 90400 kvadratmetr asfalt basılmışdır. Son günlər Arbatan kəndində 2800 metr, E.İmanov küçəsində 800 metr, A.Ağabəyli küçəsində 600 metr asfalt basılmışdır.

Şəhərdə 630 müasir işıqlanma dirəyi quraşdırılmış, kommunal binaların, ticarət şəbəkələrinin və digər sosial obyektlərin fasadları işıqlandırılmışdır.

Şəhər 1,2, 3,4,7 saylı tam orta məktəblərdə və Uşaqların Texniki Yaradıcılıq Məkəzində yeni istilik qazanxanası tikilmişdir.

Qaz təchizatının yaxşılaşdırılması üçün görülmüş işlərdən danışan icra başçısı qeyd etdi ki, şəhərin Ə.Hüseynzadə, H.Z.Tağıyev, A.Ağazadə, X.R.Ulutürk, Ə.Hüseynov və T.Xəlilbəyli küçələrində yeraltı qaz borularının əsaslı təmiri məqsədi ilə 381 metr polietilen boru çəkilmiş, 20 Yanvar küçəsində qaz xətləri yeniləri ilə əvəz edilmişdir. Şəhəri təbii qazla təmin edən 159 millimetrlik orta təzyiqli, daşıyıcı qaz kəmərinin Ə.Hüseynov və Ə.Zeynalov küçələrindən keçən 2800 metrinin və "Mərkəzi qazanxanalar" qaz kəmərinin eyni küçələrdən keçən hissəsinin yenidən qurulması məqsədi ilə yeni boru xətti çəkilmişdir. "Ələt-Astara" avtomobil yolunun 62-ci kilometrində, Salyan şəhərinin girəcəyində "Bəydilli-Salyan" 280-200 millimetrlik orta təzyiqli polietilen yeraltı daşıyıcı qaz kəməri üzərində yeni ölçü qovşağı tikilmişdir.

Bundan başqa, şəhərin Ə.Qasımzadə, T.Davudzadə, M.Ə.Rəsulzadə, H.Z.Tağıyev küçələrinə diametri 100 millimetr olan 1512 metr uzunluğunda yeni ortatəzyiqli, M.Ə.Sabir, E.İmanov və Y.Zərgərli küçələrinə diametri 159 millimetr olan 2927 metr, Çuxanlı kəndinə 9300 metr, Arbatan kəndinə 4400 metr uzunluğunda qaz xətti çəkilmişdir. 32 kilometr kənddaxili qaz xətləri isə ikitərəfli çəkilmiş və 600 ədəd yeni sayğac quraşdırılmışdır.

Parça-Xalac, Seydan, Cəncəli və Piratman kəndlərinin qaz təchizatı bərpa olunmuşdur. 21 yaşayış məntəqəsinin birpilləli sistemdə qaz təminatının bərpa olunması üçün 23 kilometr uzunluqda 315 millimetrlik qaz kəməri çəkilmişdir.

Hazırda ölkədə ən iri layihələrdən biri olan 6 rayonun içməli su xəttinin çəkilişinə başlanmışdır. Prezident İlham Əliyevin 20 iyun 2007-ci il tarixli sərəncamına uyğun olaraq Salyanın 24 yaşayış məntəqəsində modul tipli sutəmizləyici qurğular qurulmuşdur. Hazırda Dayıkənd və Beştalı kəndlərində sutəmizləyici qurğuların tikintisi aparılır. Quraşdırılmış sutəmizləyici qurğular, ümumilikdə, 50 min nəfərdən çox kənd əhalisini ekoloji cəhətdən təmiz içməli su ilə təmin etmişdir.

Bu il rayonda hər hektardan məhsuldarlıq 31,7 sentner olmaqla 15330 hektardan 48533 ton taxıl istehsal olunmuşdur ki, bu da ötən ilin müvafiq dövrü ilə müqayisədə 2973 ton çoxdur. Ümumilikdə, əkinlər ötən ilin müvafiq dövrü ilə müqayisədə 500 hektar çox - 43369 hektar təşkil edir.

18 ərazi komissiyasında 11159 nəfər kənd təsərrüfatı məhsulları istehsalçısına 33889 hektar əkin sahəsinə görə 1 milyon 355 min 573 manat subsidiyanın hesablandığını deyən natiq əlavə etdi ki, yeni istehsal və emal sənayesi sahələrinin yaradılması istiqamətində də işlər aparılır. Hazırda Çuxanlı kəndində "Şəfa" Quşçuluq ASC-nin istehsal gücü 450 min ədəd yumurta olan inkubatorun, Qaraçala qəsəbəsində fəaliyyət göstərən "Hacı-Camalxan" kəndli fermer təsərrüfatı tərəfindən 10 min tonluq taxıl anbarının tikintisi başa çatdırılmış, beynəlxalq standartlara uyğun 2400 başlıq süd-əmtəə kompleksinin və Qırxçıraq qəsəbəsində "Ələddin-Fermer" MMC tərəfindən illik istehsal gücü 600 ton olan quru meyvə istehsalı müəssisəsinin, Kürsəngi kəndində istehsal gücü 100 min dekalitr olan şərab zavodunun tikintisi davam etdirilir.

Rayonda təhsil, səhiyyə və mədəniyyət sahələrinin inkişafı ilə əlaqədar da müəyyən işlər görülmüşdür. 360 yerlik Yolüstü kənd tam, 480 şagird yerlik Qarabağlı-1 kənd orta, 240 şagird yerlik Boranıkənd kənd orta, 80 şagird yerlik Quyçu kənd ümumi orta məktəb binalarının və Təhsil Şöbəsinin inzibati binasının tikintisi davam etdirilir. Uşaqların Texniki Yaradıcılıq Mərkəzi və Uşaq Kitabxanası tikilib istifadəyə verilmişdir. 3 qruplu 60 yerlik 2 saylı uşaq bağçasının binasında isə əsaslı təmir işləri başa çatdırılmışdır.

Sonda rayon rəhbəri salyanlılar adından ölkə başçısını əmin etdi ki, bundan sonra da Salyan ölkədəki sürətli yeniləşmə prosesinin qabaqcıllarından olacaq.

Səməd HÜSEYNOĞLU

Xalq qəzeti.- 2012.- 25 iyul.- S. 5.