Media və sosial-iqtisadi inkişaf

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun "Yerli icra hakimiyyəti orqanları ilə kütləvi informasiya vasistələri arasında əməkdaşlıq" layihəsi əsasında növbəti konfrans Nəsimi Rayon İcra Hakimiyyətində keçirildi.

Respublikanın aparıcı media qurumlarının rəhbərləri və təmsilçilərini salamlayan Nəsimi Rayon İcra Hakimiyyətinin başçısı Nəsib Məhəməliyev ölkəmizin sosial-iqtisadi inkişafının indiki mərhələsində icra orqanları ilə kütləvi informasiya vasitələrinin əməkdaşlığının demokratik proseslərin dərinləşməsi işinə geniş informasiya dəstəyi yaratdığını vurğuladı. Başçı son vaxtlarda rayonda aparılmış quruculuq işləri, sosial-iqtisadi inkişafın ümumi mənzərəsi barədə jurnalistlərə yığcam məlumat verdi. Natiq daha sonra bildirdi ki, müsbət işlərin KİV-də obyektiv əksini tapması, nöqsanların xeyirxahlıqla işıqlandırılması, aparılan işlər barədə normal ictimai rəy yaradılması üçün icra orqanları ilə medianın sıx əməkdaşlığına bu gün daha böyük ehtiyac var.

KİVDF-in icraçı direktoru Vüqar Səfərli Azərbaycan milli jurnalistikasının demokratik və quruculuq ənənələrinin dövlət müstəqilliyi dövründə dirçəldilməsindən, KİV-də gedən demokratik proseslərdən, söz azadlığının təmin edilməsi və medianın problemlərinin həllinə dövlət dəstəyindən söz açdı. Natiq rəhbərlik etdiyi qurumun fəaliyyəti və məmur-jurnalist əməkdaşlığını genişləndirməklə bağlı həyata keçirilən layihə barədə də məlumat verdi.

Diskussiya şəraitində keçən müzakirələrdə Nəsimi rayonunda aparılan geniş quruculuq-abadlıq işlərindən məmnunluqla danışıldı, xidmət sahəsinin yeniləşdirilməsi, paytaxtın mədəni həyatının zənginləşdirilməsi, icra orqanları ilə səmərəli əlaqələrin yaradılması ilə bağlı təklif və mülahizələr səsləndi. Rayon oxucuları adından çıxış edənlər mətbuatımızın ideya, mövzu, peşəkarlıq məsələləri ətrafında düşüncələrini bölüşdülər, mediamızın cəmiyyətdə daha layiqli yer tutması üçün arzu və rəylərini səsləndirdilər.

Konfransın sonunda "Nəsimi rayonunun sosial-iqtisadi inkişafı: real vəziyyət və perspektivlər" mövzusunda Nəsimi RİH-lə KİV DF-in birgə jurnalist yaradıcılığı müsabiqəsinin şərtləri açıqlandı.

Müzakirələri yekunlaşdıran Nəsimi RİH-in başçısı Nəsib Məhəməliyev bildirdi ki, dialoqlarda səslənən fikirlər bir sıra sahələrdə yeni uğurlar qazanılmasına kömək göstərəcək. Elan olunan müsabiqədə ərsəyə gələcək çoxsaylı jurnalist yazıları isə Nəsimi rayonunun perspektiv inkişafı üçün, şübhəsiz, faydalı olacaq, media - məmur əməkdaşlığına yeni meydan açacaq.

R.TAHİR

Xalq qəzeti.- 2012.- 23 iyun.- S. 10.