Böyük qurtuluşa aparan yol

Azərbaycan xalqı qarşısında xidmətimiz ondan ibarətdir ki, biz xalqımızı bütün bu çətin mərhələlərdən keçirmişik və respublikamızın dövlət müstəqilliyini qorumuşuq, saxlamışıq, onu daha da möhkəmləndirmişik.

Heydər ƏLİYEV,

Ümummilli lider

Ötüb keçən hər gün, yaşadığımız və qeyd etdiyimiz hər bir hadisə bizi Azərbaycanın 1991-ci ildən sonrakı tarixinə, bunun fonunda isə Heydər Əliyev fenomeninə daha geniş nəzər salmağa, bu böyük şəxsiyyətin tariximizdəki və taleyimizdəki rolunu bir daha göz önünə gətirməyə sövq edir. 1993-cü il iyunun 9-da xalqın tələbi ilə Naxçıvandan Bakıya gələn Heydər Əliyevin qayıdışı böyük qurtuluşun başlanğıcı idi.

19 il öncə iyunun 4-də Gəncədə başlanan hadisələr Heydər Əliyev şəxsiyyətinin böyüklüyünü əyani şəkildə göstərən meyar kimi qəbul edilə bilər. Bu hadisələrlə bağlı hər şey, o cümlədən Heydər Əliyevin 19 il öncə oynadığı tarixi rol məlumdur. Ölkə o vaxt faktiki olaraq başsız qalmış və Azərbaycan xalqı məhz bu hadisələrin fonunda Heydər Əliyev dühasının əzəmətini bir daha görmüşdü.

AXC-Müsavat dəstəsinin səriştəsiz fəaliyyəti ucbatından yaranmış total böhran iyunun 4-də Gəncədə qardaş qırğınının baş verməsi ilə nəticələnmək həddinə qədər dərinləşmiş və qarşısıalınmaz olmuşdu. O dövrdə cəmiyyət haqlı olaraq belə qənaətə gəlmişdi ki, bu fəlakətin qarşısını Heydər Əliyevdən başqa heç kim ala bilməz, günbəgün, saatbasaat dərinləşən böhranı ümummilli liderdən başqa heç kəs aradan qaldırmağı bacarmaz. Sosial-iqtisadi fəlakət ölkənin siyasi coğrafiyasının dəyişdirilməsi, Azərbaycanın bir neçə yerə parçalanması və öz dövlət müstəqilliyini itirməsi təhlükəsi ilə çulğaşmışdı.

Belə vəziyyətdə respublikanı bu təhlükələrdən çıxarmaq məsuliyyətini öz üzərinə götürməyə hazır və qadir olan heç bir qüvvə yox idi. Xalq nəzərlərini məhz belə çıxılmaz vəziyyətdə ümummilli lider Heydər Əliyevə dikdi.

Azərbaycan xalqı milli dövlətçiliyinin dağılmaq təhlükəsi qarşısında qaldığını gördüyü və artıq ən ağır günlərini yaşadığı bir zamanda 1993-cü ilin iyununda mövcud hakimiyyətin dəyişilməsini təkidlə tələb etdi və həmin vaxtdan taleyini yenə Heydər Əliyevə etibar etdi. Xalqının darda qaldığını görüb onun təkidli dəvətini qəbul edən dahi şəxsiyyət Azərbaycanda yenidən böyük siyasətə qayıtdı. Xalq Heydər Əliyevin bu qayıdışını ümid və sevinclə qarşıladı, həmin günü isə Milli Qurtuluş Günü kimi müstəqil Azərbaycanın tarixinə yazdı.

Azərbaycan xalqı və dövləti 19 il bundan qabaq ağır sınağa çəkilmişdi. 19 il bundan əvvəl bugünkü günlərdə Gəncədə qardaş qırğını baş vermiş, ölənlər və yaralananlar olmuş, dövlətə külli miqdarda maddi ziyan dəymişdi. Ən ağır itki isə xalqın yaşadığı ağır anlar, cəmiyyətə və xalqa vurulan ağır psixoloji zərbə, dövlətin imicinə dəyən zərər, itirdiyimiz hərbçilər və mülki vətəndaşlar, yaralılar idi. 4 iyun hadisələri böhranın, süqutun, tənəzzülün ən təhlükəli nöqtəsi, süqut edən qüvvə isə bu gün də hakimiyyət iddiasında olanlar idi.

Belə ağır günlərdə, yaranmış ağır durumda "Azərbaycan xalqının tarixi nailiyyəti olan Azərbaycan Respublikasının dövlət müstəqilliyini qorumağı, möhkəmləndirməyi, inkişaf etdirməyi özüm üçün ən əsas vəzifələrdən biri hesab edirəm" deyən Heydər Əliyev Bakıya qayıtdı.

Görkəmli dövlət xadimi Naxçıvan Muxtar Respublikası Ali Məclisinin sədri Heydər Əliyev xalqın tələbi və xahişi ilə iyunun 9-da Naxçıvandan Bakıya gəldi. Bu, möhtəşəm bir qayıdış idi. Dövlət müstəqilliyinin qorunmasına, Azərbaycanın bir dövlət kimi mövcudluğuna, gələcəyinin təmin edilməsinə verilən zəmanət idi. Heydər Əliyev Azərbaycanı məhv olmaqdan xilas etməyə, onu qorumağa gəlmişdi.

Azərbaycanın son 75 ildəki tarixini nəzərdən keçirəndə, demək olar ki, 9 iyun müstəqil Azərbaycan Respublikasının tarixinə dövlət müstəqilliyinin mahiyyəti baxımından həlledici məqamlardan biri kimi daxil olub.Azərbaycanın müstəqil dövlət kimi tarixi əslində, həmin gündən başlayır. Azərbaycanın xilaskarı olan Heydər Əliyev iyunun 15-də Ali Sovetin sədri seçildi, iyunun 24-də isə Milli Məclisin qərarı ilə Azərbaycan Prezidentinin səlahiyyətlərini həyata keçirməyə başladı, iyunun 9-dan 15-dək isə 4 iyun dövlət böhranının nəticələrinin aradan qaldırılması, qardaş qırğınının qarşısının alınması, Azərbaycanın o zamankı əfəl iqtidarının antimilli və xəyanətkar əməllərinin ucbatından yaranmış vəziyyətdən çıxış yollarının tapılması işi ilə məşğul oldu.

Dahi rəhbər nitqlərindən birində həqiqəti belə açıqlayır: "Hesab edirəm ki, Azərbaycanın müstəqilliyinin qorunub saxlanmasında 1993-cü il tarixi əhəmiyyət kəsb edir. Mən tam məsuliyyətlə deyirəm ki, 1993-cü ilin iyun ayında Azərbaycan parçalanmaq və məhv olmaq təhlükəsi altında idi. Bu həqiqətdir. Çünki Azərbaycanın müstəqil dövlət kimi yaşamasını, inkişaf etməsini xaricdəki düşmənlərimiz heç vəchlə istəmirlər. Bir tərəfdən, Ermənistan Azərbaycana qarşı ərazi iddiası edir, başqa ölkələrin də bəzi dairələri Azərbaycanı öz tabeliyində saxlamaq istəyirlər. Onların bəziləri üçün müstəqil, bütöv, sərbəst və uğurla inkişaf edən Azərbaycan sərfəli deyildir. 1993-cü ilin iyunundakı və sonrakı aylardakı hadisələr təkcə ayrı-ayrı silahlı dəstələrin çıxışının və eyni zamanda hakimiyyətinin fəaliyyətsizliyinin nəticəsi deyildi. Bu, həm də xarici xidmət orqanlarının Azərbaycanı dağıtmaq, parçalamaq planları idi. Biz bu planları dağıtdıq, onların qarşısını aldıq. Azərbaycanın dövlət müstəqilliyini qoruyub saxlaya bildik.

Məlumdur ki, ondan sonrakı dövr də Azərbaycanın müstəqilliyini qoruyub saxlamaq üçün asan olmamışdır. 1994-cü ilin oktyabr hadisələri və dövlət çevrilişinə cəhd xatirinizdədir. Yalnız və yalnız xalqın dövlətə, hakimiyyətə, dövlət başçısına inamı və etibarı, etimadı o faciənin qarşısını aldı".

Ümummilli liderin tarixi sözləri ürəyimizdə dərin iftixar hissi doğurur: "1995-ci ilin noyabrında çoxpartiyalı sistem əsasında demokratik, sərbəst seçkilər vasitəsilə Azərbaycanın ilk parlamenti seçildi. Beləliklə, Azərbaycanın xalq tərəfindən seçilmiş hakimiyyəti, xalq tərəfindən bəyənilmiş və təsdiq olunmuş Konstitusiyası, xalq tərəfindən seçilmiş parlamenti, xalq tərəfindən seçilmiş prezidenti vardır".

Vətənin yaşaması üçün çörək, ordu və inam böyük şərəfdir. İftixarla deyə bilərik ki, müstəqil Azərbaycanın ordu quruculuğu ümummilli liderimiz Heydər Əliyevin layiqli varisi, möhtərəm Prezidentimiz, Ali Baş Komandan İlham Əliyev tərəfindən uğurla davam etdirilir. Cənab Prezident Naxçıvan Muxtar Respublikasında səfərdə olarkən burada yerləşən "N" hərbi hissəsində olmuş və çıxış etmişdir. Onun söylədiyi nitq sübut edir ki, ölkəmizin, eləcə də onun müstəqilliyinin qarantı olan Silahlı Qüvvələrin sükanı düzgün idarə olunur. Bu nitqin mahiyyəti əsası Heydər Əliyev tərəfindən qoyulan ordu quruculuğu prosesinin təməl prinsipləri üzərində gələcək fəaliyyətin, qarşıda duran vəzifələrin strateji konturlarını bəyan edən nikbin ruhla aşılanmışdır. "Bizim ordumuz istənilən vaxtda torpaqlarımızı düşməndən azad etməyə qadirdir. Amma biz istəyirik ki, ordumuz daha güclü olsun. Orduda xidmət edən əsgərlərin şəraiti daha yaxşı olsun", - deyən Ali Baş Komandan bu məqsədə aparan fəaliyyətin istiqamətlərini də dəqiq nişan verdi: "Yalnız iqtisadi cəhətdən güclü olan ölkələr güclü orduya malik olurlar. Bizim də vəzifəmiz budur. Biz ölkəmizi gücləndirəcəyik. Ölkəmiz sürətlə inkişaf edəcək və yaranmış iqtisadi potensial, bəlkə də, ilk növbədə ordu quruculuğuna sərf olunacaqdır: Əgər biz görsək ki, danışıqların heç bir nəticəsi yoxdur, bütün vasitələrdən istifadə edib torpaqlarımızı azad edəcəyik. Bunu etmək üçün güclü ordu lazımdır, vətənpərvərlik ruhu lazımdır, xalqın birliyi, iradəsi lazımdır. Bunların da hamısı bizdə var".

Hazırda Prezident İlham Əliyevin ölkədə apardığı işin leytmotivinin sistemlilik, iqtisadi inkişafa dinamizm gətirmək, xalqın rifahını yüksəltmək kimi mühüm vəzifələr təşkil edir. O, hamımıza bir-biri ilə uzlaşmayan, biri digərini tamamlamayan, pərakəndə həyata keçirilən tədbirlərlə iqtisadiyyata dinamizm gətirməyin mümkün olmadığını anladır. İlham Əliyev bəyan edir ki, Azərbaycanın uğurlu gələcəyi regionların inkişafı ilə bağlıdır.

Bu deyilənləri bizə müasir Azərbaycan dövlətinin banisi Heydər Əliyev öyrətmişdir. Sözləri və əməlləri ilə. Bu xətti qoruyub saxlamaq və inkişaf etdirmək harada yaşamasından asılı olmayaraq, hər bir azərbaycanlının milli borcu, şərəf işidir.

Fikrət MÜTƏLLİMOV,

Əmək və Əhalinin Sosial

Müdafiəsi Nazirliyinin

həkim-ekspert terapevti

Xalq qəzeti.- 2012.- 9 iyun.- S. 3.