Azərbaycanın
yeni neft strategiyasının uğurları
"Ümid"
strukturunda 10 saylı kəşfiyyat quyusunda qazma işləri
vaxtından dörd ay əvvəl başa
çatdırılmışdır
Əsası ulu öndər Heydər
Əliyev tərəfindən qoyulmuş yeni neft
strategiyasının uğurları ilbəil artır. Xatırladaq
ki, 1994-cü il sentyabr ayının 20-də Xəzər dənizinin
Azərbaycan sektorunda yerləşən "Azəri-Çıraq-Günəşli"
yataqlarının birgə işlənməsinə dair
nüfuzlu xarici şirkətlərlə Azərbaycan
Respublikası Dövlət Neft Şirkəti arasında
imzalanmış "Əsrin müqaviləsi" ölkəmizin
neft sənayesinin, bütövlükdə
iqtisadiyyatının sürətli inkişafına imkan
yaratmışdır.
"Əsrin müqaviləsi" XXI əsrdə Azərbaycan xalqının inkişafı, firəvan həyatı, müstəqil Azərbaycan dövlətinin suverenliyinin daha da möhkəmlənməsi üçün qoyulmuş təməl, bütün sahələrdə olduğu kimi, neft sənayesinin vacib sahələrindən olan qazma işlərində də yeni mərhələnin əsasını qoydu. Azərbaycan Respublikası Dövlət Neft Şirkəti istər xarici tərəfdaşlarla birlikdə, istərsə də müstəqil olaraq Xəzərin dərinsulu hissələrində yerləşən mürəkkəb qaz strukturlarında kəşfiyyat və qazma işlərini uğurla həyata keçirməyə başladı. Uzun fasilədən sonra "Ümid" perspektivli strukturunda daxili resurslar hesabına başlanmış kəşfiyyat işləri 2010 cu-ilin payızında böyük müvəffəqiyyətlə nəticələndi. Dənizin 58 metr dərinliyində quraşdırılmış stasionar özüldən qazılan 8 saylı birinci quyuda güclü qaz axını alındı və beləliklə də, Xəzərin Azərbaycan sektorunda yeni bir qaz-kondensat yatağının mövcudluğu rəsmən təsdiqləndi. İlkin hesablamalara görə, yatağın ehtiyatı 200 milyard kubmetr qaz və 40 milyon ton kondensat həcmində qiymətləndirilir.
Azərbaycanın dövlət müstəqilliyini bərpa etdikdən sonra kəşf edilmiş ilk yataq olan "Ümid"də alınan nəticələr, həm də Xəzərin Azərbaycan sektorunda məhsuldarlıq perspektivlərini yüksəltmiş, yeni lay və yataqların açılması ehtimalını artırmışdır. Ən son texnika və texnologiyaların inteqrasiyasından bəhrələnən Azərbaycan qazmaçıları "Ümid" strukturunda 10 saylı kəşfiyyat quyusunda qazma işlərini vaxtından 4 ay əvvəl başa çatdıraraq daha bir tarixi uğura imza atmışlar.
Xatırladaq ki, "Ümid" sahəsi dənizin açıq hissəsində, sahildən 80 kilometr aralı, Bakı arxipelaqının şimal hissəsində, Xərə-Zirə adasından 45 kilometr cənub-şərqdə yerləşir. İlk dəfə Pliosen çöküntülərinə görə şimal-şərq istiqamətində uzanan "Ümid" antiklinal qırışığı (Andreyev küpəsi) 1953-cü ildə "əks olunan dalğa" üsulu ilə müəyyən edilmişdir. Sonrakı illərdə aparılmış seysmik işlər nəticəsində qırışığın morfologiyası dəqiqləşdirilmişdir. 1977-ci ildə sahədə dərin axtarış-kəşfiyyat qazmasına başlanılmış və 1996-cı ilə qədər strukturda 9 quyu qazılmışdır. Bu quyulardan üçü məhsul qatın V və VII horizontlarına çatdırılmışdır. Lakin, həmin quyular lazımi nəticələr vermədikləri üçün ləğv olunmuşdur.
"Azərbaycan Respublikasının yanacaq-enerji kompleksinin inkişafı (2005-2015-ci illər) üzrə Dövlət Proqramı"nı nəzərə alaraq ARDNŞ-in prezidenti Rövnəq Abdullayev "Ümid" perspektivli strukturunda axtarış kəşfiyyat işlərinin bərpa edilməsi barədə 168 nömrəli 7.12.2007-ci il tarixli əmr imzalamışdır. Əmrin icrası ilə əlaqədar strukturda qazılmış quyuların faktiki geoloji-geofiziki məlumatları aparıcı mütəxəssislər tərəfindən kompleks şəkildə yenidən araşdırılmış, açılmış kəsilişlər yaxınlıqda yerləşən "Bulla-dəniz" yatağındakı quyuların kəsilişləri ilə müqayisə edilmişdir.
Alınmış nəticələr əsasında qırışığın şimal-şərq qanadının tağa yaxın hissəsində 1 saylı özüldən 8 saylı axtarış quyusu məhsuldar qatın V və VII horizontlarının karbohidrogen potensialının qiymətləndirlməsi, sahənin tektonikasını və litoloji-stratiqrafik kəsilişini dəqiqləşdirmək məqsədilə 6500 metr dərinliyə layihələndirilərək 2009-cu il sentyabrın 12-də qazılmağa başlanmış və 2010 - cu il noyabrın 24-də qazma işləri uğurla başa çatdırılmışdır. Quyuda aparılmış kompleks geofiziki ölçü işlərinə əsasən məlum olmuşdur ki, yataq yüksək karbohidrogen potensialına malikdir .
Əldə olunmuş yeni geofiziki məlumatlara və Dövlət Neft Şirkətinin birinci vitse-prezidenti Xoşbəxt Yusifzadə tərəfindən 13.1.2011-ci il tarixdə təsdiq olunmuş protokola əsasən, 1 saylı özüldən qazılmış 8 saylı axtarış quyusunun üzərindən irəli çəkməklə , maili-istiqamətləndirici qazma üsulu ilə "Ümid" strukturunun şimal-şərq qanadının tağa yaxın hissəsində 10 saylı kəşfiyyat quyusu 6500 metr dərinliyə layihələndirilmişdir. Ötən il iyul ayının 1-də ikinci quyuda qazma işlərinə başlanılmış, quyu istismar kəməri 6400 metr dərinliyə endirilib sementlənmişdir. Quyu ağzına kəmər başlığı quraşdırılmış və 1050 atmosfer təzyiqə kipliyə yoxlanılaraq aktlaşdırılmışdır.
Bu il aprel
ayının 10-da quyu qazmadan qurtarmışdır. İyunun
8-də isə quyu perforasiya olunmuş və mənimsənilmişdir.
Xatırladaq ki, quyu 6336-6356 metr intervalında məhsuldar
qatın VII horizontunun (fasilə lay dəstəsinin analoqu)
aşağı hissəsindən işə
salınmışdır. Quyunun gündəlik verimi 1 milyon 200
min kubmetr qaz, 150 ton kondensat təşkil edir. Bu quyunun məlumatları
"Ümid" yatağının zənginliyini və
"Şahdəniz"dən sonra ölkəmizin ən
böyük qaz ehtiyatına malik yataq olduğunu bir daha əyani
şəkildə sübut etmişdir. Təsadüfi deyil ki,
"Ümid" qaz yatağının açılmasına
həsr olunmuş mərasimdə ölkə Prezidenti İlham
Əliyev demişdir: "Ümid" yatağının
aşkarlanması xüsusi məna daşıyır. Bu, onu
göstəriri ki, Azərbaycanda neft-qaz sahəsində
bütün işlər uğurla aparılır... Mən
çox şadam ki, "Ümid" yatağı ümidlərimizi
doğrultdu. Bir müddət bundan əvvəl
"Ümid"də gedən kəşfiyyat işlərinin
ilkin nəticələri haqqında mənə məlumat
verilmişdir. Gözləyirik ki, bu məlumat tam dəqiqləşsin,
ondan sonra biz bu kəşfiyyat haqqında bəyanat verək və
elan edək ki, Azərbaycanda Azərbaycan neftçiləri tərəfindən
ən böyük qaz yatağı aşkar olundu".
Artıq "Ümid" yatağındakı zəngin qaz
ehtiyatlarının rəsmən təsdiq olunması, eləcə
də digər yataqlar üzrə aparılan uğurlu işlər
Azərbaycanın dünyanın potensial qaz ölkəsi
olduğunu tam təsdiq etmişdir. Təsadüfi deyil ki,
hazırda dünyada reallaşdırılmaqda olan qaz ixracı
layihələrinin iştirakçıları da ölkəmizin
zəngin qaz ehtiyatlarına böyük ümidlə
yanaşırlar.
Yeri gəlmişkən,
"Ümid" strukturunda quraşdırılmış 1
saylı platforma son illər sürətlə inkişaf edən
Azərbaycan neft sənayesinin təntənəsidir.
Xatırladaq ki, platforma 6 qaz quyusunun qazılması
üçün nəzərdə tutulmuşdur. Burada qazma
işləri ABŞ və Çin Xalq Respublikasından
alınmış müasir texniki-texnoloji tələblərə
cavab verən, "top drive" mexanizmi ilə təchiz
olunmuş, dünya qazmaçılarının son nailiyyətlərindən
olan müasir ZJ 70/4500DZ qurğusu vasitəsilə həyata
keçirilir. "Ümid" strukturunda yerinə yetirilən
bu layihə Dövlət Neft Şirkəti tərəfindən
həyata keçirilən qaz proqramının vacib
buraxılış obyektlərindəndir. Bu platforma milli
sektorda Azərbaycan neftçilərinin öz gücü ilə
quraşdırdıqları ilk unikal qurğudur. Platformada
"Azəri Mİ" Drillinq Fluids LTD şirkəti ilə
birlikdə neft əsaslı məhluldan istifadə etməklə
qazma işi aparılır. Burada
quraşdırılmış ötürmə qurğusu ilə
16 sayda parametr ARDNŞ-in və Kompleks Qazma İşləri
Trestinin informasiya mərkəzinə verilir. "Ümid-1"
platforması təkcə texnoloji proseslərin dünya
standartlarına uyğunluğu, yeni texnologiyaların tətbiqi
ilə deyil, işçilərin yaşayış şəraitinin
ən yüksək səviyyədə təşkil
olunması ilə də diqqəti cəlb edir. Belə ki,
platformadakı otaqlarda müasir rabitə, televiziya, kompyuter,
kondisioner sistemi, idman zalı fəaliyyət göstərir. Dəniz
suyunu şirinləşdirən qurğu da işçi heyətin
sərəncamına verilmişdir.
Yeri gəlmişkən,
hazırda Kompleks Qazma İşləri Tresti üzrə
axtarış-kəşfiyyat və istismar qazma işləri
ARDNŞ tərəfindən təsdiqlənmiş plan-qrafikə
müvafiq olaraq ölkəmizin quru və dəniz əraziləri
üzrə Quba-Xəzəryanı, Aşağı Kür
çökəkliyi və Abşeron neftli-qazlı
rayonlarında, eləcə də dəniz akvatoriyasında
Bakı və Abşeron arxipelaqları üzrə 25 strukturda
həyata keçirilir. İlin sonunadək quru və dəniz
sahələrində 142768 metr qazma işi aparılmalı, 78
quyu qazma ilə başlamalı, 85 quyu qazma ilə
qurtarmalı, 88 quyu isə sifarişçiyə təhvil
verilməlidir.
Cari ilin
beş ayı ərzində planda nəzərdə tutulmuş
55730 metr əvəzinə, 56094 metr qazma işi
görülmüş və plan-tapşırığına
100,7 faiz əməl olunmuşdur. Hesabat dövründə
sifarişçiyə 32 quyu təhvil verilmişdir ki, bu da
ötən ilin müvafiq dövrünə nisbətən 2
quyu çoxdur.
Yaxın
vaxtlarda Kompleks Qazma İşləri Tresti tərəfindən,"Qoşadaş"
strukturunda "Xəzər-6" üzən qazma qurğusu
vasitəsilə Mezazoy (Təbaşir+Yura)
çöküntülərinə layihə dərinliyi 3500
metr olan 1 saylı axtarış quyusunun başlanılacaq.
Xatırladaq ki, "Qoşadaş" strukturu Bakı şəhərindən
50 kilometr məsafədə, Abşeron arxipelaqının
şimal-qərb hissəsində yerləşir. Hələ
ötən əsrin ortalarında bu rayonun Mezo-Kaynazoy
çöküntülərinin neft-qazlılıq
perspektivliyi tədqiqatçıların diqqətini cəlb
etmişdir. 1945-1952-ci illərdə Xəzəryanı-Abşeron
rayonunun akvatoriyası və Abşeron arxipelaqının
şimal-qərb hissəsi geoloji-geomorfoloji və aerofotoplanalma
ilə əhatə olunmuşdur. 1957-1977-ci illərdə burada
seysmik-kəşfiyyat işləri aparılaraq ümumi dərinlik
nöqtəsi üsulu ilə rayonun tektonikası öyrənilmişdir.
"Qoşadaş" strukturunda ilk quyuda qazma işlərinin
uğurla aparılması və Mezozoy çöküntülərinin
neftlilik-qazlılığının öyrənilməsi neft
sənayesi üçün son dərəcə vacib məsələdir.
Bundan əlavə,
Bakı arxipelaqında kəşf olunmuş yataqlar içərisində
zənginliyi və gələcək axtarış-kəşfiyyat
işlərinin perspektivliyi baxımından mühüm əhəmiyyət
kəsb edən "Bulla-dəniz" sahəsində də
Kompleks Qazma İşləri Tresti tərəfindən
yaxın zamanlarda 29 saylı dərin dəniz
özülündən layihə dərinliyi 5800 metr olan 90
saylı kəşfiyyat quyusunda da qazma işlərinə
başlanılacaqdır.
Mirbağır YAQUBZADƏ
Xalq qəzeti.- 2012.- 12 iyun.- S. 4.