Azərbaycan və
Türkiyənin birgə mübarizəsi zəfər
çaldı
"Bizim
münasibətlərimiz güclənibdir və demək olar
ki, bütün sahələrdə uğurlu işbirliyi, əməkdaşlıq
var. Siyasi, iqtisadi, mədəni, bütün digər sahələrdə
işbirliyimiz örnək, nümunə ola bilər. Bizi
bağlayan tarixi köklər əsasında qurulmuş yeni
münasibətlər bölgədə mühüm rol
oynayır. Bölgənin inkişafı üçün,
Qafqazın inkişafı üçün Türkiyə - Azərbaycan
münasibətləri müstəsna rol oynayır".
İlham ƏLİYEV,
Azərbaycan
Respublikasının Prezidenti
"Biz iki dövlət, bir millət
olduğumuz kimi, eyni zamanda da,
tək ürəyik... İnşallah, İlham Əliyev qardaşımla bizim aramızdakı bu həmrəyliyi,
bu qardaşlığı bütün
dünyaya bir nümunə
olaraq qoruyacağıq və bir nümunə olaraq
göstərməyə davam edəcəyik.
Əl-ələ, çiyin-çiyinə, ən mühümü də, qəlb-qəlbə bu regionda sabitliyi
və rifahı, inşallah,
yaradacağıq".
Rəcəb TAYYİB ƏRDOĞAN,
Türkiyə Cümhuriyyətinin
Baş naziri
Fransa Senatının bu il
yanvarın 23-də qəbul etdiyi "Qanunla
tanınmış soyqırımların mövcudluğunun təkzib
edilməsinə görə cəza nəzərdə
tutan"Qanun qəbul etməsi ölkəni
çıxılmaz vəziyyətə salmışdı.
Çünki həmin qanuna əsasən qondarma "erməni
soyqırımı"nı tanımayanları bir il müddətinə
cəza və ya 45 min avro məbləğində cərimə
gözləyirdi. Az qala bütün dünyaya "demokratiya dərsi"
keçmək iddiasında olan bir ölkənin Senatı tərəfindən
belə bir qanunun qəbul olunması həmin ölkənin
demokratik dəyərlərə necə önəm verməsini
göz önünə gətirirdi. Fransa Prezidenti Nikola Sarkozi
artıq açıq şəkildə etiraf edirdi ki, belə
bir qanunun qəbul olunması onun istəyindən irəli gəlib.
Özünü dünyada demokratik ölkə kimi tanıdan
Fransa bu antidemokratik addımı ilə Avropada gülünc vəziyyətinə
düşmüşdü.
Fransa
Senatının qondarma "erməni
soyqırımı"nı tanımayanların cəzalandırılması
ilə əlaqədar qəbul etdiyi qərarı Avropa məkanında
demokratiyanın əsasını təşkil edən söz
və ifadə azadlığı prinsiplərinə qətiyyən
uyğun deyildi. Belə bir antidemokratik addım Fransanın
götürdüyü insan hüquqları və əsas
azadlıqlar kimi demokratik dəyərlərə hörmət
etmək öhdəliyi ilə ziddiyyət təşkil edirdi.
Artıq Fransa Senatının bir sıra üzvləri də
belə bir qanunun qəbuledilməz olduğunu açıq
şəkildə bəyan edirdilər. Xəbər verildiyi
kimi, fransalı senatorlar qondarma "erməni
soyqırımı"nın inkarına görə cinayət
məsuliyyəti nəzərdə tutan qanunun ləğv edilməsi
üçün 77 imza toplayaraq bu qanunun ləğv edilməsi
məqsədilə Konstitusiya Şurasına müraciət
etmişdilər. Görünür, fransalı senatorlar bu yolla
öz ölkələrinin demokratiya imicini qoruyub saxlamaq istəyirdilər.
Həmin senatorların qətiyyəti, eləcə də
Türkiyə və Azərbaycanın birgə
apardığı məqsədyönlü siyasət nəticəsində
bədxah insanların həmin planları alt-üst oldu.
Dünya növbəti dəfə haqqın qələbəsinin
şahidinə çevrildi.
Fransa
ATƏT-in Minsk qrupunun həmsədr dövlətlərindən
biridir.Uzun illərdir ki, bu qurum Ermənistan - Azərbaycan,
Dağlıq Qarabağ münaqişəsinin nizamlanmasında
vasitəçilik missiyasını öz üzərinə
götürüb. Çox təəssüf ki, son 20 ildə
Minsk qrupu bu sahədə qətiyyətli addım atmayıb.
Minsk qrupunun fəaliyyətsizliyi dövlət rəsmiləri
tərəfindən də ən yüksək tribunalardan dəfələrlə
səsləndirilib. Əgər münaqişə bu gün də
davam edirsə, demək ədalətli tələb hələ
də yerinə yetirilməyib. Bu da ondan irəli gəlir ki,
Minsk qrupunun həmsədrləri problemin aradan
qaldırılmasında ədalətli yanaşma yolunu tapa bilməyiblər.
Hadisələrin gedişi göstərir ki, əslində bu
qurum Dağlıq Qarabağ münaqişəsinin obyektiv
şəkildə, beynəlxalq hüququn norma və prinsipləri
əsasında aradan qaldırılmasında maraqlı deyil. Azərbaycanın
ərazisinin 20 faizinin hələ də işğal altında
saxlanılmasının görməməzliyə vurulması,
"zavallı ermənilərin" "pozulmuş
hüquqlarının" daha çox diqqət mərkəzində
saxlanılması və həmsədr dövlət tərəfindən
qondarma "erməni soyqırımı"nın
tanınması Fransanın üzərinə
götürdüyü missiyaya qeyri-obyektiv yanaşmasından
xəbər verir. Odur ki, Azərbaycan xalqı Fransanın
Dağlıq Qarabağ münaqişəsinin həllində
obyektiv, tərəfsiz mövqe tutacağına daha inanmır.
Fransa Milli Assambleyası və Senatı qondarma "erməni
soyqırımı"nı inkar edənlərin cəzalandırılması
ilə əlaqədar qanun qəbul etməsi bu inamı
artıq reallaşdırmışdı. Bu qanunun qəbulundan
sonra Fransanın "demokratiyanın beşiyi"
adlandırılması çox gülünc
görünürdü.
Fransa
Avropa Birliyinin aparıcı dövlətlərindəndir.Bu
ölkənin qondarma "erməni soyqırımı"nın
tanınması ilə əlaqədar canfəşanlıq
göstərməsi Avropa Birliyinin də imicini zərbə
altında qoymuşdu. Bununla yanaşı, adı çəkilən
sənəd Qərb demokratiyasına,orada insan hüquq və
azadlıqlarının qorunmasına şübhə
yaradırdı. Tarixi faktları, əsl həqiqətləri
təhrif edən, öz maddi maraqlarının təmin
olunması üçün hər cür rəzil hərəkətlərə
yol verən qondarma siyasətçilərin cılız hissləri
heç bir ölkəyə şərəf gətirməz. Təəssüf
ki, bütün bunların başında növbəti dəfə
prezident seçkilərində qələbə qazanmaq arzusunda
olan Fransanın indiki Prezidenti Nikola Sarkozi dayanırdı. O, rəqiblərini
sıradan çıxarmaq üçün min fitnə-fəsada,
şər və böhtana əl atır. Yəqin ki, Fransada
keçiriləcək növbəti prezident seçkilərinə
qatılmaq istəyən Beynəlxalq Valyuta Fondunun sabiq
prezidentinin başına gətirilən çirkin oyundan
çoxları xəbərdardır. Fransada müxalifət
partiyası kimi tanınan Sosialist Partiyasından olan prezidentliyə
namizədin tərəfdarları qarşısında
çıxışı zamanı Sarkozinin himayədarları
tərəfindən "un atəşinə"tutulması
da Fransanın hazırkı prezidentinin demokratik dəyərlərə
necə "önəm verməsini" təsdiqləyən
faktlardır. Bütün bunlar bir daha təsdiqləyir ki,
Fransa Prezidenti Nikola Sarkozi bu il Fransada keçiriləcək
prezident seçkilərindən çox narahatdır. Ona
görə də o, hakimiyyəti yenidən əlində
saxlamaq üçün müxtəlif antidemokratik üsullara əl
atır. Qondarma "erməni soyqırımı"nı
inkar edənlərin cəzalandırılması ilə əlaqədar
qəbul edilən "Qanunla tanınmış
soyqırımların mövcudluğunun təkzib edilməsinə
görə cəza nəzərdə tutan"qanunun qəbul
edilməsi də məhz bu məqsədlər üzərində
köklənib.Əslində Sarkozi bu
"lütfkarlığı" ilə Fransada yaşayan 500
minədək erməninin səsini qazanmaq istəyirdi.
Fransada
çox güclü erməni lobbisi fəaliyyət göstərir.
Hətta bu lobbi hakimiyyət dairələrinə də təsir
göstərmək iqtidarındadır. Erməni lobbisinin əsas
təsir vasitələrindən biri senatorları pulla ələ
almaqdır. Qondarma "erməni soyqırımı"nı
tanıyan Fransa senatorlarından birinin bu yaxında da
rüşvət alarkən lentə alınan
görüntülərinin bütün dünyaya
yayımlanması da bunu təsdiqləyir. İnsan hüquq və
azadlıqlarının qorunmasından ağızdolusu
danışan Fransa prezidenti və bu ölkənin parlamentinin
üzvləri nədənsə Azərbaycanin işğal
olunmuş əraziləri, Xocalı soyqırımı və
1 milyondan artıq azərbaycanlı qaçqın və məcburi
köçkünün taleyi ilə maraqlanmır, bu
haqsızlığa münasibətini bildirmir.Yüz il əvvəl
baş vermiş hadisələri şişirdilmiş şəkildə
tez-tez xatırlayan Fransa lap yaxın illərdə ermənilərin
Azərbaycanın Xocalı şəhərində törətdikləri
analoqu olmayan soyqırımı barəsində bu vaxta qədər
bir kəlmə belə danışmır. Fransa parlamentinin
qondarma "soyqırımı" məsələsinin
müzakirəyə çıxarılması tarixlə
bağlı olan hadisələrin siyasiləşdirilməsidir.
Əslində bu məsələ ilə bağlı
tarixçilər araşdırma aparmalı və tarixi
faktları olduğu kimi dünya ictimaiyyətinə təqdim
etməlidirlər.
Fransa
Senatında qondarma "soyqırımı" məsələsinin
müzakirəyə çıxarılması ölkəmizlə
dövlətlərarası münasibətlərə heç
də müsbət çalar gətirməyəcəkdi.
Çünki Azərbaycan hər zaman Türkiyə ilə dostluq,qardaşlıq
münasibətləri nümayiş etdirib. Təbii ki,
Fransanın bu ədalətsiz qərarı haqlı olaraq ciddi
etirazlarla qarşılandı. Bu, hər bir Azərbaycan vətəndaşının
Fransaya olan münasibətinə ciddi təsir göstərdi.
Türkiyə - Azərbaycan münasibətləri tarix boyu
yüksələn xətt üzrə inkişaf edib. Hətta ən
mötəbər beynəlxalq tədbirlərdə də
Türkiyə Azərbaycanı, Azərbaycan isə Türkiyəni
müdafiə edib. Bütün dünyaya bəlli olub ki,
Türkiyə - Azərbaycan dostluğu və
qardaşlığı sarsılmazdır. Bu dostluğun daimi
və əbədi olmasını Azərbaycan
Respublikasının Prezidenti İlham Əliyev və Türkiyə
Cümhuriyyətinin Baş naziri Rəcəb Tayyib Ərdoğan
dəfələrlə vurğulayıblar.
Fransa
Senatının əslində Türkiyəyə yönəldilmiş
məlum qanunun qəbulundan dərhal sonra Azərbaycanın
dövlət rəsmiləri, ictimaiyyəti etiraz səsini
qaldırdı. Azərbaycan Respublikasının Milli Məclisi,
Xarici İşlər Nazirliyi və digər dövlət
qurumlarının nümayəndələri öz
etirazlarını kəskin şəkildə bildirdilər. Hətta
qardaş ölkənin mətbuatında belə bir etiraf səsləndi
ki, Fransa siyasətçilərinin məlum qərarına
Türkiyəyə nisbətən Azərbaycan daha çox təpki
göstərdi. Bu günlərdə ölkəmizdə səfərdə
olmuş Fransa - Qafqaz dostluq qrupunun sədr müavini, Fransa - Azərbaycan
işçi qrupunun rəhbəri, senator xanım Natali Qulenin
başçılıq etdiyi parlament nümayəndə heyətini
qəbul edən Azərbaycan Prezidenti İlham Əliyev Fransa
Senatında müzakirə olunan bu qanunu tarixi təhrif edən,
demokratiyaya, söz azadlığına zidd olan, yalan və
saxta məlumatlara əsaslanan təşəbbüs kimi dəyərləndirərək
onun qüvvəyə minməyəcəyinə ümidvar
olduğunu bildirmişdi. Azərbaycanın birinci
xanımı, Heydər Əliyev Fondunun prezidenti Mehriban Əliyeva
Fransa Senatının nümayəndə heyəti ilə
görüşü zamanı bu ölkənin parlamentində
qondarma "erməni soyqırımı"nın inkar edilməsinə
görə cəza nəzərdə tutan qanunun qəbul edilməsinin
Azərbaycan cəmiyyətində narazılıq
doğurduğunu vurğuladı. Azərbaycanın birinci
xanımı bu qanunun müzakirəsi zamanı tutduqları ədalətli
mövqeyə görə senatorlara təşəkkür
etmiş, ümidvar olduğunu bildirmişdir ki, Konstitusiya
Şurası demokratiyaya və söz azadlığına zidd
olduğuna görə bu qanunun qüvvəyə minməsinə
imkan verməyəcəkdir. Bütün bunlar Fransa
Senatının ədalətsiz və qeyri-obyektiv qərarına
Azərbaycanda dövlət səviyyəsində edilən
etirazlar idi. Eyni zamanda Azərbaycanın bütün məsələlərdə
Türkiyə ilə bir yerdə olmasını təsdiqləyən
faktlardır.
Onu
da qeyd edək ki, Fransa senatorlarının ermənipərəst
qanuna qarşı çıxmasında Azərbaycanın
birinci xanımı, Heydər Əliyev Fondunun prezidenti Mehriban
xanım Əliyevanın rolu böyük olmuşdur. Azərbaycan
- Fransa parlamentlərarası dostluq qrupuna Mehriban Əliyeva rəhbərlik
edir. Məhz Mehriban xanım Əliyevanın böyük
nüfuz sahibi olması və onun rəhbərliyi altında
işçi qrupunun yüksək səviyyəli təbliğatı
sayəsində Fransa senatorlarının bir hissəsi ermənipərəst
qanuna qarşı çıxdı. Fransa prezidenti bundan
çox ciddi narahat olmuşdu. Onun
narahatçılığı artıq özünü
büruzə verdi. Fransa Konstitusiya Şurası Senatın qəbul
etdiyi qondarma "erməni soyqırımı"nı inkar
edənlərin cəzalandırılmasını nəzərdə
tutan qanunu ləğv etdi. Məlum olduğu kimi, senator Jak
Mezarın təşkilatçılığı ilə 77
imza toplanmışdı. Lazım olan imza sayını
artıqlaması ilə əldə edən deputatlar və
senatorlar Fransa Konstitusiyasının 33-cü maddəsinə və
ifadə azadlığına zidd olduğuna görə qanunun
ləğvini tələb etmişlər. Konstitusiya
Şurası ədalətli qərar qəbul etməklə
demokratiyanın beşiyi hesab edilən Fransanı bu
rüsvayçılıqdan xilas etdi.
Sona MƏMMƏDBƏYOVA,
Azərbaycan Respublikasının
Prezidenti
yanında Dövlət İdarəçilik
Akademiyasının
mətbuat
xidmətinin rəhbəri,
filologiya üzrə fəlsəfə
doktoru,
"Qızıl qələm"
mükafatçısı
Xalq qəzeti.- 2012.- 1 mart.- S. 3.