ADPU yubileyi uğurlarla qarşılayır

Azərbaycan Dövlət Pedaqoci Universiteti 90 illik yubileyinə böyük elmi-pedaqoci uğurlarla gedir. Ali və orta ixtisas təhsili müəssisələrində 2011/2012-ci tədris ilinin qış imtahan sessiyasında tələbələrin biliyinin qiymətləndirilməsində şəffaflığı və obyektivliyi təmin etmək, yarana biləcək neqativ halları dərhal aradan qaldırmaq və digər müvafiq tədbirləri həyata keçirmək məqsədilə Azərbaycan Dövlət Pedaqoci Universitetində xeyli iş görülmüşdür.

Bununla əlaqədar təhsil naziri Misir Mərdanovun "Ali və orta ixtisas təhsili müəssisələrində 2011-2012-ci tədris ilinin qış imtahan sessiyasının təşkili və keçirilməsi barədə" əmri diqqət mərkəzində saxlanmışdır.

2006-cı ilin aprelindən Azərbaycan Dövlət Pedaqoci Universitetinə AMEA-nın müxbir üzvü, əməkdar elm xadimi, fizika-riyaziyyat elmləri doktoru, professor Yusif Məmmədovun rəhbərliyə gəlməsi ilə islahatlar dövrünün əsası qoyulmuşdur. Bu dövrdən ölkəmizdə bütövlükdə təhsil sisteminin qloballaşan dünyanın tələblərinə uyğunlaşması prosesi gedir. Bu baxımdan Boloniya sisteminə qoşulan universitetimizdə bütün fakültələr kredit təhsil sisteminə keçmiş və tədris planları yeniləşmişdir. Tədris prosesinin bütün mərhələlərində yeni təlim texnologiyalarının tətbiq olunmasına başlanılmışdır. İmtahan prosesinin obyektiv, çevik və şəffaflığını təmin edən Kompyuter mərkəzi və bütün fənlər üzrə test bankı yaradılmışdır. Bu barədə respublika mətbuatı dəfələrlə yazmış, qəzet müxbirlərinə müsahibə verilmişdir.

Universitetdə yaranmış sağlam mühiti saxlamaq üçün hamıdan - həm müəllimlərdən, həm də tələbələrdən obyektivliyin qorunması tələb olunmuşdur. Bu da müsbət nəticələrə gətirib çıxarmışdır.

Təsadüfi deyildir ki, son üç ildə olimpiadalarda tələbələrimiz iştirak edərək I, II, III yerləri tutmuş, Təhsil Nazirliyinin mükafatına layiq görülmüşlər. Bu da tədrisin keyfiyyətinə müsbət təsir etmiş, tələbələr və məzunların böyük əksəriyyəti "əla" və "yaxşı" qiymətlərlə semestri və universiteti başa vurmuşlar.

Yeri gəlmişkən, imtahan qaydalarının gözlənilməsi, baş verə biləcək neqativ halların vaxtında qarşısının alınması, eləcə də tələbələrin ərizə və şikayətlərinin operativ şəkildə araşdırılıb cavablandırılması məqsədilə universitet rəhbərliyinin müvafiq əmri ilə həmişə olduğu kimi, sessiyadan əvvəl 9 nəfərdən ibarət "Qaynar xətt" yaradılmışdır. "Qaynar xətt"in tərkibinə universitetin ən nüfuzlu professor və müəllimləri daxil edilmişdir. Bundan əlavə, bütün fakültələrdə münaqişə komissiyaları fəaliyyət göstərmişdir.

Hər bir imtahan zalında 2 saat 15 dəqiqə ərzində 30-40 magistr yazılı imtahan verir. Hər magistrə imtahan verdiyi fəndən 5 sual təqdim olunur. Tələbənin düzgün cavablandırdığı hər sual 10 ballıq sistemlə müvafiq balla qiymətləndirilir. Beləliklə də, tələbənin imtahanqabağı topladığı balla imtahanın nəticəsi toplanaraq yekun qiymət müəyyənləşdirilir.

Artıq bir neçə ildir ki, universitetimizdə bütün imtahanlar tam obyektiv və şəffaf keçirilir. İndi sözün əsl mənasında, biliyin yeganə meyar olduğuna əmin olan tələbələrimiz imtahanlara daha böyük səy və həvəslə hazırlaşırlar. "Qaynar xətt"in normal fəaliyyəti üçün bütün zəruri tədbirlər həyata keçirilmişdir. "Qaynar xətt"in sədri və üzvləri yazılı və test imtahanlarının keçirildiyi zalları gəzir, prosesdən əvvəl tələbələrlə lazımi söhbətlər aparır, onlara qərargahın, eləcə də ərizə və şikayət qutularının yerləri barədə məlumat verirlər. Eyni zamanda, imtahan qaydalarına tam əməl etmələri də onlara ətraflı izah edilir. Bütün bunlar imtahan sessiyalarının obyektiv keçirilməsini təmin edir. Yeri gəlmişkən, son zamanlar şikayətlərin məzmunu tamamilə dəyişilmişdir. İndi "qaynar xətt"ə daxil olan şikayətlər də neqativ, xoşagəlməz hallarla bağlı deyil, yalnız imtahan suallarının tərtibi ilə əlaqədar meydana çıxan müəyyən anlaşılmazlıqlardır. Onu da deyim ki, "qaynar xətt"ə daxil olan bütün ərizə və şikayətlər çevik və operativ şəkildə araşdırılıb dərhal cavablandırılır.

Əlavə edim ki, ADPU-da imtahanlar həm yazılı, (magistrlər, bakalavr qiyabi şöbə III, IV, V kurslar) həm də elektron qaydada (bakalavr əyani - bütün kurslar, qiyabi I və II kurslar) götürülür.

Məsələn, ötən qış imtahan sessiyası ərzində "qaynar xətt"ə daxil olan 800-ə qədər müraciətdən 152-si tələbələrin xeyrinə həll olunmuşdur.

Bütün bunlar göstərir ki, ölkəmizdə haqlı olaraq, pedaqoci təhsilin flaqmanı sayılan Azərbaycan Dövlət Pedaqoci Universiteti özünün 90 illik şanlı yubileyini təhsil prosesinin təkmilləşdirilməsi və kadr hazırlığı sahəsində yeni-yeni uğurlarla qarşılayır.

Süleyman MƏMMƏDOV,

əməkdar elm xadimi,

professor

Xalq qəzeti.- 2012.- 11 mart.- S.6.