"SEPAH" dostluğa, qonşuluğa və beynəlxalq əməkdaşlığın prinsiplərinə uyğun gəlməyən əməllərdən əl çəkmir

Milli Təhlükəsizlik Nazirliyinin həyata keçirdiyi tədbirlər nəticəsində dövlətə xəyanətdə və digər ağır cinayətlərdə ittiham edilən şəxslər ifşa olunmuşlar

Paradoksal bir haldır. İran İslam Respublikasının dövlət rəsmiləri Azərbaycanla dostluq, qardaşlıq və mehriban qonşuluq münasibətlərini davam etdirmək niyyətləri barədə dəfələrlə açıqlamalar versələr də, qonşu ölkənin hərbçiləri və xüsusi xidmət orqanları Azərbaycana qarşı bəd niyyətli əməllərdən əl çəkmək istəmirlər ki, istəmirlər. Beynəlxalq aləmdəki bütün kütləvi informasiya vasitələri və aparıcı beyin mərkəzləri dönə-dönə bəyan edirlər ki, Azərbaycan rəhbərliyi öz ölkəsindən İrana qarşı hansısa bir təsir, təhdid və hərbi əməliyyat üçün istifadə edilməyəcəyi barədə bəyanatlar verir və buna əməl edir. Amma bunun müqabilində İran rəsmilərinin Azərbaycanla dostluq və mehriban qonşuluq barədə verdiyi bəyanatlar İranın xüsusi xidmət orqanları və hərbçiləri tərəfindən qulaqardına vurulur.

Milli Təhlükəsizlik Nazirliyi təxminən bir ay əvvəl Azərbaycanda terror və başqa cinayətlər törətmək üçün İranda hazırlanıb Bakıya göndərlən silahlı qrupu ifşa etmişdi. Ondan bir az əvvəl isə ali rütbəli İran hərbçiləri Azərbaycana qarşı açıq hədə-qorxular səsləndirmişdilər. Qonşu ölkənin kütləvi informasiya vasitələrinin və "xırda siyasətçilərin" Azərbaycana qarşı səsləndirdiyi təhqir, şantaj, hədə-qorxu və alçaldıcı ifadələrə isə ümumiyyətlə, heç bir qoruq-qadağa yoxdur.

Bir müddət əvvəl Prezident Administrasiyasının ictimai-siyasi məsələlər şöbəsinin müdiri Əli Həsənovun İrana səfəri zamanı adı çəkilən məsələlər də müzakirə olunmuş və müvafiq razılaşmalar əldə edilmişdi. Azərbaycan tərəfi həmin razılaşmalara böyük hörmət və ehtiramla yanaşsa da, İran mətbuatında bu ehtiramın ömrü cəmi 3 gün oldu. Bundan başqa, İran İslam Respublikası, Türkiyə Cümhuriyyəti və Azərbaycan Respublikası xarici işlər nazirlərinin lap bu yaxınlarda Naxçıvanda keçirilən görüşündə də çoxsaylı məsələlər müzakirə olunmuş, münasibətlərdəki bəzi məqamları nizamlamaq üçün Naxçıvan Bəyannaməsi imzalanmışdı. Nazirlərin Naxçıvan görüşündən sonra - martın 9-da kütləvi informasiya vasitələrinin təmsilçilərini dəvət edərək mətbuat konfransı keçirən səfir Məmmədbağır Bəhramzadə jurnalistlərin suallarını cavablandırarkən çox nikbin idi. Suallardan biri belə idi: - Sizcə, nazirlərin Naxçıvan görüşündən sonra Tehranla Bakı arasındakı nota mübadilələri adlı böhran aradan qalxacaqmı? Cavab: - Tehranla Bakı arasında heç bir problem yoxdur və heç bir böhrandan söz gedə bilməz.

Bu sətirlərin müəllifi də həmin mətbuat konfransında iştirak edirdi və səmimiyyətlə qeyd edim ki, cənab səfirin həmin nikbinliyi hər iki ölkədən olan jurnalistlərin gözündə açıq şəkildə görünən bir sevincə çevrildi. Amma...

Yuxarıda qeyd etdiyimiz kimi, bu gün İranda dövlətin siyasəti ilə xüsusi xidmət orqanlarının əməlləri arasında çox böyük təzad vardır. Biz bunun təsdiqini Milli Təhlükəsizlik Nazirliyinin ictimai əlaqələr şöbəsinin martın 14-də yaydığı geniş məlumatda növbəti dəfə görürük. Məlumatda bildirilir ki, İran İslam Respublikasının xüsusi xidmət orqanı olan "İslam İnqilabının Mühafizəçiləri Korpusu - "SEPAH" Azərbaycan vətəndaşlarından ibarət böyük bir qrup insanı pul və digər şirnikləndirici vasitələrlə ələ almış, onları terrorçu səviyyəsində hazırlayaraq Bakıya göndərmişdir. 1999-cu ildən 2011-ci ilə qədər davam edən bu proses nəticəsində 22 nəfər Azərbaycan vətəndaşı ələ alınaraq gənc müstəqil respublikamızın suverenliyi və dövlət təhlükəsizliyi zərərinə casusluq etməyə sövq edilmişdir. "SEPAH" onları peşəkar terrorçular üçün lazım olan bütün "keyfiyyətlərlə" - Vətənə xəyanət, milli təəssübkeşliyin itirilməsi, amansızlıq, qan tökülməsini adi hal kimi qarşılamaq, insan həyatına acımamaq, beynəlxalq əməkdaşlıq normalarını ayaq altına atmaq və sairə - elə silahlandırıb ki, bu adamlar maddi gəlir əvəzində Azərbaycanın nüfuzunu ayaq altına atmağa hazır idilər. Ancaq bu rəzil hərəkətlərin qarşısı uğurla alınıb.

"SEPAH" Azərbaycanın nüfuzunu öz vətəndaşlarımızın əli ilə ayaq altına atmaq üçün hansı planları cızmışdı? Məlumatda bildirilir ki, "SEPAH"-ın Əkbər Pakraveş və Vəhid adlı əməkdaşları dini həmrəylik pərdəsi altında İrana dəvət etdikləri Azərbaycan vətəndaşlarını Tehran şəhərindəki məxfi görüş mənzillərində yerləşdirmiş, onlarla 4-5 gün xüsusi söhbət aparmışlar. Əsas məqsəd onları Azərbaycan Respublikasının ərazisində ABŞ, İsrail və Qərb dövlətlərinin səfirlikləri, nümayəndəlikləri və təşkilatlarına qarşı gələcəkdə həyata keçirilməsi nəzərdə tutulan terror-təxribat aktlarına hazırlamaq idi. MTN-in məlumatında adı çəkilən azərbaycanlılara sonradan Tehran və Kərəc şəhərlərinin yaxınlığında yerləşən hərbi düşərgələrdə peşəkar təlimatçıların rəhbərliyi altında müxtəlif odlu silahlardan - xüsusən, avtomat silahlardan və tapançalardan atəş açmağı, partlayıcı maddələrdən və qurğulardan, topoqrafik xəritələrdən istifadə etməyi öyrətmişlər. Potensial terrorçu kimi hazırlanan soydaşlarımıza piyada və avtomobillə məxfi müşahidələr aparmaq, məxfi müşahidələrdən yayınmaq və mühafizə olunan qapalı tikililərə gizli yolla daxil olmaq kimi vərdişlər öyrədilmişdir. Təlimlər başa çatdıqdan sonra həmin adamların hər birindən məxfi əməkdaşlıq barədə iltizam alınmış və hər birinə terrorçu ləqəbi (təxəllüs) verilərək Azərbaycana göndərilmişlər. Əkbər Pakraveş və Vəhid öz "qonaqlarını" Azərbaycana yola salarkən onlara külli miqdarda ABŞ dolları və məhz ABŞ-ın Azərbaycandakı təşkilatlarına qarşı terror əməlləri törətmək üçün tapşırıqlar vermişlər.

Geridə qalan illərdə "SEPAH"ın tam təchiz olunmuş məxfi əməkdaşı olan "azərbaycanlı terrorçular" öz "vəzifələrini" yerinə yetirərək Bakıdakı səfirliklərin, nümayəndəliklərin, təşkilatların, iqtisadi sahədə fəaliyyət göstərən şirkətlərin, o cümlədən "Soxnut" adlı yəhudi qurumunun bir neçə təhsil müəssisəsinin, "Amerikan Fast - food" restoranının, "bp - Azərbaycan" neft şirkətinin baş ofisinin və digər obyektlərin dəqiq ünvanlarını, yerləşmə proyeksiyalarını müəyyənləşdirərək müşahidələr aparmış, burada işləyən şəxslər barədə əldə etdikləri məlumatları İranda Əkbər Pakraveş və Vəhidə çatdırmışlar. Yəni açıq şəkildə casusluqla məşğul olmuşlar.

Milli Təhlükəsizlik Nazirliyinin yaydığı məlumatda ifşa olunan casuslardan götürülmüş silahların adı və miqdarı göstərilir. O qədər silahlarla bəlkə də işğal olunmuş rayonlarımızın hansınısa azad etmək mümkün olardı. Amma İran tərəfində Azərbaycanın Qarabağ probleminin ədalətli həlli barədə kiminsə düşündüyünü gözləmək bəlkə də sadəlövhlük olardı. Onları tamamilə başqa məsələlər düşündürür. Amma rəsmi Tehrana beynəlxalq təzyiqlər artdıqca cənub qonşumuzun Azərbaycanda bu qəbildən olan fəaliyyəti genişləndirməsi İran rəsmilərini bir az başqa istiqamətdə də düşündürməlidir. Onlar nəzərə almalıdırlar ki, Bakı öz ərazisindən İrana qarşı heç bir təzyiqə, təhdidə və başqa müdaxiləyə yol verməyəcəyi barədə vədlərinə sədaqətlə əməl edir. Bəs Tehran? Yeri gəlmişkən, "SEPAH"ın rəhbərləri ifşa olunmuş casuslar barədə məlumatlara dərhal reaksiya versələr də faktı təkzib etmək qeyri-mümkündür.

O ki qaldı "SEPAH"ın casusuna çevrilmiş soydaşlarımıza, onlara xatırladırıq ki, bu torpağın suyunu içib, çörəyini yeyən yaşıdlarınız arasında Mübariz İbrahimov kimi tarixə düşən oğullar var. Siz də tarixə düşdünüz - satqın, xain, casus kimi. Öz imkanlarınızdan erməni işğalçılarına qarşı istifadə etsəydiniz, tarixə başqa şəkildə də düşə bilərdiniz.

İttifaq MİRZƏBƏYLİ

Xalq qəzeti.- 2012.- 16 mart.- S. 6.