Dünya Azərbaycanlı Gənclər Birliyinin təsis olunması ölkəmizin beynəlxalq aləmə inteqrasiyasında böyük rol oynayacaq

Azərbaycanda dövlət gənclər siyasətinin formalaşdırılması ümummilli lider Heydər Əliyevin adı ilə bağlıdır. "Azərbaycan Respublikasının Gənclər və İdman Nazirliyi haqqında" Azərbaycan Respublikası Prezidentinin 1994-cü il 26 iyul tarixli fərmanı, "Gənclər siyasəti haqqında" Azərbaycan Respublikasının Qanunu və gənclər siyasəti sahəsində digər normativ hüquqi aktlar, habelə Azərbaycan gənclərinin forumlarının keçirilməsi gənclərlə iş sahəsinin hüquqi əsaslarını və icra mexanizmini müəyyən etmişdir.

1996-cı il fevralın 2-də Bakıda Azərbaycan Gənclərinin Birinci Forumunun keçirilməsi gənclərimizin qarşısında geniş perspektivlər açdı. 1997-ci ildə ulu öndər Heydər Əliyevin imzaladığı sərəncamla hər il fevralın 2-si Gənclər Günü kimi qeyd edilir.

Ulu öndər Heydər Əliyevin müəyyənləşdirdiyi dövlət gənclər siyasəti Prezident İlham Əliyev tərəfindən uğurla davam etdirilir. Dövlət başçısının 2005-ci il 30 avqust tarixli sərəncamı ilə təsdiq edilmiş "Azərbaycan Gəncliyi Dövlət Proqramı (2005-2009-cu illər)" dövlət gənclər siyasətinin həyata keçirilməsi yolunda mühüm fəaliyyət sənədi olmuşdur. Həmin Dövlət Proqramının icrası nəticəsində dövlət gənclər siyasətinin prioritet sahələrində müsbət dəyişikliklər baş vermiş və müəyyən uğurlar əldə olunmuşdur. Gənclərin vətənpərvərlik tərbiyəsi sahəsində davamlı iş aparılmış, istedadlı və yaradıcı gənclərə dövlət qayğısı genişləndirilmişdir. Məşğulluq sahəsində beynəlxalq təcrübəyə və gənclərin təşəbbüskarlığına əsaslanan fəaliyyətlər inkişaf etdirilmiş, regionlarda yaşayan gənclərin fəallığını stimullaşdıran tədbirlər həyata keçirilmişdir. Ölkənin ictimai-siyasi həyatında, həmçinin nüfuzlu beynəlxalq tədbirlərdə gənclərin yaxından iştirakı üçün lazımi şərait yaradılmış və bu sahədə irəliləyişlərə nail olunmuşdur. Dövlətin qayğısı sayəsində gənclər təşkilatlarının dövlət gənclər siyasətində iştirakını təmin edən hüquqları genişləndirilmiş, onların layihə və proqramlarına mütəmadi dəstək verilmişdir. Gəncliyin inkişafında növbəti mərhələnin təmin edilməsi məqsədilə "Azərbaycan gəncliyi 2011-2015-ci illərdə" Dövlət Proqramının həyata keçirilməsi zərurəti yaranmışdır. Dövlət Proqramının əsas vəzifələri gənclərin hərtərəfli inkişafı üçün şəraitin yaradılması, gənclərin gələcəyin tələblərinə cavab verən təhsil almaları üçün bərabər imkanların təmin edilməsi, gənclərin məşğulluğunun artırılması, dövlət qulluğunda və idarəetmədə peşəkar və bilikli gənclərin sayının artırılması, alim və tədqiqatçıların sosial təminatının gücləndirilməsi və məişət problemlərinin həll edilməsi, gənclərin vacib ictimai təşəbbüslərinin dəstəklənməsi üçün təşkilati, maddi və məlumatlandırma mexanizmlərinin inkişaf etdirilməsi, gənclərdə müasir düşüncə tərzinin formalaşdırılması, onların idarəetmə və tədqiqat yönlü fəaliyyətə cəlb edilməsi, gənclərin regionların sosial-iqtisadi və mədəni inkişafından bəhrələnməsi üçün tədbirlərin həyata keçirilməsi, özünüidarə və iqtisadi baxımdan təminetmə bacarıqlarının inkişaf etdirilməsi, o cümlədən gənc əlillərin sosial müdafiəsinin gücləndirilməsi, gənclərin və gənclər təşkilatlarının ictimai həyatda təşəbbüskarlığının və iştirakının stimullaşdırılması, beynəlxalq mübadilə və mədəniyyətlərarası dialoqda iştirakının dəstəklənməsi və digər amillərdir.

Gənclərimiz beynəlxalq əməkdaşlıq sahəsində daim təşəbbüskarlıq və davamlı fəaliyyət nümayiş etdirmişlər. 2010-cu ilin noyabrında Almaniyanın Frankfurt şəhərində Dünya Azərbaycanlı Gənclərinin I Konqresinin keçirilməsi və Konqresdə Dünya Azərbaycanlı Gənclər Birliyinin yaradılması ideyası bir daha təsdiqlədi ki, gənclərimizin dünya birliyindəki mövqeləri getdikcə möhkəmlənir. Bu günlərdə Bakıda Dünya Azərbaycanlı Gənclər Birliyinin təsis qurultayının keçirilməsi və bu qurultayda Birliyin yaradılması böyük əhəmiyyət kəsb edir. Dünya Azərbaycanlı Gənclər Birliyinin yaradılması ilə çoxmilyonlu Azərbaycan gəncliyinin sıraları daha da genişlənəcək. Bu qurum həm dünya azərbaycanlı gənclərini birləşdirəcək, həm də Azərbaycan dövlətinin gənclər siyasətini uğurla həyata keçirilməsində fəal iştirak edəcək. Azərbaycan Prezidenti gənclərə inandığını, güvəndiyini daim bildirmiş və onların inkişafı üçün bütün imkanlardan istifadə olunacağını xüsusi qeyd etmişdir. Bu istiqamətdə həyata keçirilən mühüm əhəmiyyətli tədbirlər də gəncliyin inkişafının dövlətin diqqət mərkəzində olmasından xəbər verir. Azərbaycan həqiqətlərinin dünya ictimaiyyətinə olduğu kimi çatdırılmasında gənclərimizin rolu böyükdür. Dünya azərbaycanlı gənclərinin təşkilatlanması istiqamətində bundan sonra da mütəmadi olaraq əhəmiyyətli tədbirlər keçiriləcək, gənclərimizin dünyanın ən mötəbər tədbirlərində iştirakı, səslərinin yüksək tribunalardan eşidilməsi üçün bütün imkanlardan istifadə olunacaq. Bütün bunlarla yanaşı, ölkə gənclərinin vətənpərvərlik, azərbaycançılıq və dövlətçilik prinsipləri əsasında tarixi-mədəni irsimizə, milli-mənəvi və ümumbəşəri dəyərlərə hörmət ruhunda tərbiyə olunması, cəmiyyətin ictimai-siyasi, sosial-iqtisadi, mədəni həyatında onların intellektual və yaradıcı potensiallarının ümummilli məsələlərin həllinə yönəldilməsi müasir dövrün mühüm tələbi olaraq qalır.

Əliqismət BƏDƏLOV

Xalq qəzeti.- 2012.- 16 mart.- S. 3.