Lələ düzü
Yurdumuzda Arazqırağı örüş, otlaq, arxac, dölçək, sərdən deyilən yerlər ta qədimdən "Lələ düzü" adlanır. Elat bu yerlərdə qoyun-quzu, ilxı naxır, dəvə sürüləri saxlayıb. Novruzdan qırx gün keçənə "qara yaz" deyiblər. Çünki mal-qaranın dölü düşənədək ruzi-yavanlığının tükənən ayıdır. Hətta il sərt gələndə əgər mal-qaraya ehtiyat ot-ələf saxlamayıbsansa, Lələ düzündə birdən "qış imtahanı" olur. Çiçəkli yaza boranlı çovğun gəlir. Küzdə mələşən oğlaq-quzular, pəyələrdəki sürülər naəlac qalar. Xalq şairi Səməd Vurğunun -
Muğan Muğan olsa, biri üç eylər,
Muğan tufan olsa, üçü heç eylər
misraları Lələ
düzünə də
aiddir. Belə boran, covğun,
alçaplovlu günlər
uzansa sürülərdə
tələfat olar.
Odur ki, "qara yaza" mütləq ehtiyat yem saxlanmalıdır.
Yoxsa
"Allah aman, sarı
saman, oğlaq qıran, qarının borcu" məsəli şumda toxum cücərən kimi cücərər. Qarının borcu da o deməkdir
ki, iki-üç keçisi üzünük
düşüb, oğlağı
ilə birlikdə belə boran-çovğunda
ot-ələf olmadığından
tələf olar, necə deyərlər, təbiət qarının
da "borcundan çıxar". Əlac
sarı samana qalar, o da tapılsa...
Lələ düzünün də öz tarixçəsi
var. Yaddaşlarda yaşayan
budur ki, Arazqırağı tərəkəmə
elatının binələnən
arxac komalarında bir gəlinin övladı olmurmuş. Bunu özünə
dərd eləyibmiş.
Axırda nənni, yüyürük
asır. Bir qara daşı uşaq əvəzi bələyib
nənniyə qoyub yürgələyir, gumuldana-gumuldana
təsəllini bu qara daşdan tapır. Sənəyi çiyninə alıb
Arazdan su gətirməyə gedir.
Qayıdanda baxır ki,
nənnidəki qara daş dönüb olub oğlan uşağı. Uşaq
"anasını" görcək
dilə gəlir:
Lələyəm mən, başdan
mən,
Yemərəm hər aşdan mən.
Nə atam var, nə
anam,
Yaranmışam daşdan mən...
O gün-bu gün Arazqırağı elat yerlərinə "Lələ
düzü" də
deyilir. Naxçıvan torpağında qədim
"Dəvə düzü"
deyilən Arazqırağı
yerlərə də
"Lələ düzü"
deyilir. "Dəvə düzü"ndə
yazı gürşad yağışı gələn
torpaqlarda bəzən
taxıl "bulud"
kimi cücərər.
Vağaniyən zəmilərə xəlbir atsan, yerə düşməz.
Ancaq ili
quraq gələndə
"Lələ düzü"ndən
dölü birtəhər
başa çatdırıb
yaylaqlara üz tutarlar.
Lələnin niskili hələ də ürəklərdə
yaşayır. Lələ adına hörmət
də qoyurlar. Ziyadxan oğlu Kərimin lələsi, yəni pasibanı, könül sirdaşı olub. Hazırda Şirvanda, Cəncəbasar
tərəflərdə istək
mənasında bir-birinə
"Lələ" deyənlər
də olur. Körpə uşağı anası döyəndə uşaq
"Ay lələ, ay lələ!"
çağırar. Lələ ədəbiyyatımıza
da daxil olub. Şair Kürqıraqlı Arazqırağı
tərəkəmə düzlərinə
şeir də qoşub:
İstəsən ki, eşq oduna yanasan,
Ya Məcnun
ol, ya Kərəm
ol, ya Lələ.
Kürqıraqlı, çıx bu yerin seyrinə,
Çətin düşər aran
yerdə yal ələ...
Lələ düzünün sınağı
bir el məsəli də yaradıb: "Lələ hu". Bir adamın əli aşağı düşəndə, pərgarı
pozulanda, var-dövlətini
itirəndə, məsəldi
deyirlər: - "Qalıb
Lələ hu", yəni ta heç
nəyi yoxdu.
Novruzdan 40 gün keçənə
"qırxlı yaz"
da deyərlər. Qırxlı uşaq kimi olar. Gündə neçə dəfə
tutulub-açılar, küsülü
ər-arvad kimi neçə dəfə barışar. Çərək
istər yar-yavanlıqda,
istərsə də
mal-heyvanın ehtiyat ot ələfində
Lələ düzünün
"Lələ hu"
məsəli yaddan çıxmaya. Elə ki qara yaz bitdi, dağ
yamaclarında da cüt-kotan işləri çıxdı, ta onda dayanmağın vaxtı deyil. Atalar deyəni: "Yayda başı qaynayanın, qışda aşı qaynayar". Nə səpdinsə, daraq dişi kimi cücərib gələr.
Qaşdar ƏLİYEV,
fenoloq,
Azərbaycan
Jurnalistlər
Birliyinin üzvü,
Naxçıvan MR,
Şahbuz rayonu
Xalq qəzeti.- 2012.- 28 mart.- S. 6.