"Gəncənin sürətli inkişafı ölkə Prezidentinin təşəbbüsü, qayğısı sayəsində reallaşır"

Bu fikirlər şəhər ictimaiyyəti nümayəndələrinin 2012-ci ilin birinci rübünün yekunlarına həsr olunmuş toplantısında dönə-dönə səsləndi

2012-ci ilin birinci rübü arxada qaldı. Hələ üstündən bir ay da keçdi. Artıq güllü-çiçəkli may ayı da başlayıb. Əslində, may ayı baharın ilıq nəfəsinin hər yerə hərarət verdiyi bir vaxtdır. Amma Gəncə ilin bütün fəsillərində gözəldir. Çünki bu şəhərin hər daşı-torpağı, necə deyərlər, oyanır, yeni görkəm alır. Lap bu yaxınlaradək keçdiyin küçəni tanıya bilmirsən. Genişlik, abadlıq, gözəllik, tarixiliklə müasirliyin qovuşduğu məkan səni valeh edir. Hara baxırsan bir yeniliklə qarşılaşırsan, təzə bir obyekt diqqətini cəlb edir. Elə iş yoxdur ki, başlanılsın və ona aylarla əl vurulmasın, yarımçıq qalsın. Şəhər əhalisinə nə söz verilibsə, mütləq həyata keçirilir, başa çatdırılır. Məhz bu gün Gəncədə sözlə işin möhkəm vəhdət təşkil etməsinin nəticəsidir ki, qədim Nizami yurdu dünyanın ən gözəl şəhərlərindən birinə çevrilir. Şəhər icra hakimiyyətinin başçısı Elmar Vəliyevlə bir neçə ay əvvəl söhbət edərkən soruşmuşdum ki, eyni vaxtda başladığınız bu qədər nəhəng işləri necə başa çatdıracaqsınız?

Sualıma çox soyuqqanlıqla və inamla cavab vermişdi: "Nə iş, məgər iş qalıb, qeyd etdiyiniz obyektlər hesab edin ki, hazırdır".

Cəmi bir-iki ay sonra həmin yerlərə baş çəkdim və gözlərimə inanmadım. Hamısı hazır idi. Özü də keyfiyyətli, milli ornamentlərlə bəzədilmiş, güllü-çiçəkli, fəvvarəli, al-əlvan, cəlbedici.

Sözlərimin səmimiyyətinə inanın. İndi Elmar Vəliyev sabah desə ki, min hektar bir sahədə iki ilə yeni bir şəhər salacağıq, ona inanasıyam. Əvvəla, özünün dediyi kimi, şəhərdə görülən hər bir işin arxasında ölkə Prezidenti cənab İlham Əliyev dayanır. Onun diqqəti, qayğısı, köməyi bizə belə cəsarətlə danışmağa imkan verir. Digər tərəfdən qeyd edək ki, şəhərin müvafiq strukturları, elə bütövlükdə əhali şəhər icra hakimiyyəti rəhbərliyinin hər bir təşəbbüsünə həvəslə qoşulur, işgüzarlıq göstərir.

Bölgə müxbiri kimi deyil, Gəncə şəhərinin adi bir sakini kimi adamlar tanıyıram ki, ilk vaxtlar giley-güzar etdiyi işlərdən indi ağızdolusu danışır, şəhərdə yaradılan bu ab-havadan razılıq edir, nəhəng işləri yüksək qiymətləndirir.

2012-ci ilin birinci rübünün yekunlarına həsr olunmuş yığıncaq da elə bu ruhda keçdi. Görülən işlərlə bağlı icra hakimiyyətinin başçısı Elmar Vəliyevin hesabatı ətrafında çıxış edənlər şəhərdə götürülən kursu bəyəndiklərini bildirdilər, onun davam etdirilməsinin vacib olduğunu göstərdilər. Qeyd etdilər ki, Gəncə bu gün başdan-başa ölkə rəhbərinin qayğısı ilə əhatə olunub. Gərək etimadı doğruldaq, Gəncəni daha da gözəlləşdirək. Bunun üçün bütün sahələrdə fəallıq, işgüzarlıq, təşəbbüskarlıq hökm sürməlidir. Şəhərin həyatında birinci rübün ən mühüm hadisəsinin yanvarın 21-də ölkə Prezidenti İlham Əliyevin Gəncəyə səfər etməsi, onun bir sıra obyektlərin açılışında, təməlqoyma mərasimlərində iştirak etməsi toplantıda xüsusi vurğulandı. Ümumiyyətlə, şəhərdəki ab-hava, sağlam rəqabət, işgüzarlıq mühiti iqtisadiyyatın və digər sahələrin dinamik inkişafına təkan vermişdir.

2012-ci ilin birinci rübündə şəhər iqtisadiyyatının əsas sahələrində ümumi daxili məhsulun həcmi 122 milyon manatı keçmiş və ötən ilin müvafiq dövrü ilə müqayisədə onun həcmi 37,7 faiz artmışdır. Sənayenin dinamik inkişafı davam etdirilib. Bu müddət ərzində xidmətlər də daxil olmaqla 52,5 milyon manatlıq məhsul istehsal olunmuşdur. Ümumiyyətlə, keçən ilin müvafiq dövrü ilə müqayisədə 28,4 milyon manatlıq və ya 2,1 dəfədən çox sənaye məhsulu istehsal edilmiş və xidmətlər göstərilmişdir.

Şəhərdə sənaye sürətlə inkişaf edir. Ölkə Prezidenti İlham Əliyev tərəfindən 3 mart 2008-ci ildə təməli qoyulan Gəncə DET. Al Alüminium zavodu kompleksinin illik alüminium istehsal olunan birinci fazası 21 yanvar 2012-ci ildə istifadəyə verilmiş, 640 nəfər işlə təmin edilmişdir. Kompleksin ikinci fazasında 50 min ton alüminium istehsal edəcək 84 vannadan ibarət elektroliz korpuslarının , gil-torpaq qəbulu anbarının tikintisi davam etdirilir. Cari ilin mart ayında illik istehsal gücü 850 min ton olan yeni "DRI" zavodunun və istehsal gücü 750 min ton olan yeni Polad zavodunun tikintisinə başlanılmışdır. 2013-cü ildə isə yeni Pelet zavodunun tikintisinə başlanılacaq və beləliklə, 2012-2016-cı illərdə həyata keçirilən layihələrə 630 milyon dollar investisiya qoyulacaqdır.

"Gəncə-Qənnadı" ASC-nin Süd emalı zavodunda texnoloji proses zamanı istifadə olunacaq müasir avadanlıqlar tikinti meydançasına gətirilmiş və tezliklə onların quraşdırılmasına başlanılacaqdır.

2011-ci ilin dekabrında 3 hektar ərazidə inşasına başlanılmış "ELBA" kəsim və emal fabrikinin tikintisi davam etdirilir. Müəssisənin ildə 67 min baş iri və xırda buynuzlu heyvan və 3 milyon 600 min ədəd quş ətini emal etmək imkanı olacaqdır.

"İnter Pak" MMC-də illik 0,6 min ton meyvə şirəsi və 0,4 min ton mürəbbə istehsal etmək gücünə malik meyvə və tərəvəz emalı müəssisəsinin tikintisi davam etdirilir. Müəssisədə 45 yeni iş yerinin açılması nəzərdə tutulur.

Şəhərdə abadlıq, yenidənqurma işləru bir an belə səngimir. Bu işlərin daha da sürətləndirilməsi ilə bağlı Prezidentin ehtiyat fondundan şəhərə 5 milyon manat vəsait ayrılması həyata keçirilən işləri daha da fəallaşdırmışdır.

Ölkə Prezidenti İlham Əliyevin xeyir-duası ilə təməli qoyulmuş ümummilli liderin adını daşıyan Heydər Əliyev Mərkəzinin, Azərbaycanın dahi şairi və mütəfəkkiri Şeyx Nizami Gəncəvi muzeyinin və Gəncə Dövlət Filarmoniyasının tikintisi davam etdirilir.

Cavad xan, Atatürk prospektlərində və digər ünvanlarda qəzalı vəziyyətdə olan yaşayış evlərinin sökülməsi ilə bağlı müasir memarlıq üslubunda, tam təmirli, geniş və yaraşıqlı 50 mənzilli yaşayış evinin təməli qoyulmuşdur.

Azərbaycan Respublikası Prezidentinin 2011-ci il 13 dekabr tarixli "Gəncə şəhərinin Kəpəz rayonunun inzibati ərazi bölgüsündə qismən dəyişiklik edilməsi haqqında" Azərbaycan Respublikasının Qanununa müvafiq olaraq Gəncə şəhərində Cavad xan, Məhsəti, Natəvan, Sadıllı, Şıxzamanlı yaşayış məntəqələrinə qəsəbə statusu verilmişdir.

Yeni yaradılmış qəsəbələrin müəyyənləşdirilmiş mərkəzlərində bütün infrastruktur layihələrin həyata keçirilməsi istiqamətində işlər aparılır.

Şəddadilər və Atabəylər dövlətinin paytaxtı olmuş qədim Gəncə başdan-başa yenidən qurulur. Görülən işlər müasir şəhərsalma tələblərinə uyğun, qədimliyi saxlanılmaqla aparılır. Dövlət Baş Layihə İnstitutu "Azərdövlətlayihə"nin əməkdaşları yerli mütəxəssislərin iştirakı ilə şəhərin baş planını hazırlamışlar. Bu planda 2030-cu ilədək şəhərin inkişaf strategiyası nəzərdə tutulmuşdur. İnkişaf perspektivlərinə uyğun olaraq şəhərin ərazisi təxminən iki dəfə böyüyərək 17 min hektara çatdırılacaqdır.

Əhalini narahat edən mənzil-məişət məsələlərinin həlli istiqamətində aparılan tədbirlər davam etdirilir. Qısa müddət ərzində yaşayış binalarının 2 min kvadrat- metrdən çox dam örtüyü təmir olunmuşdur.

Atatürk prospektinin M.A.Abbaszadə küçəsinin kəsişməsindən başlayaraq, onun Nizami prospekti ilə kəsişməsinə kimi olan ərazisində 8 çoxmərtəbəli ictimai binanın fasadlarının klassik memarlıq üslubunda, dam örtüklərinin metal keramiklə üzlənərək mansar formasında yenidən qurulmasına başlanılmış və işlərin sürəti günü-gündən artmaqdadır.

Dahi Azərbaycan şairi Nizami Gəncəvi adına prospektdə 3 min 500 kvadratmetrə yaxın kərpicdən 8 qədim tikilinin və məhəllə hasarının bərpasına başlanılmışdır.

Ulu öndər Heydər Əliyev prospektində aparılan yenidənqurma, abadlıq-quruculuq işləri davam etdirilir.

Çoxmərtəbəli binalarda liftlərin saz vəziyyətdə saxlanılması, onların vaxtlı-vaxtında təmiri və profilaktikası, istismar müddəti keçmiş liftlərin yeniləri ilə əvəz olunması cari ildə də nəzərdə tutulmuşdur.

Şəhərdə aparılan genişmiqyaslı abadlıq-quruculuq işlərinin əsas istiqamətlərindən biri də şəhərdaxili yolların genişləndirilməsi, təmiri və yenidənqurulması ilə bağlıdır.

Şəhərin Nizami, Həsən Əliyev prospekti ilə P.Səmədov küçələrinin kəsişməsi, M.A.Abbaszadə, 28 May küçələri genişləndirilməklə yanaşı, səkiləri düzəldilir, tikililərin milli ornamentləri bərpa olunur, işıq sistemi yeniləşir.

F.Əliyev küçəsinin H.Əliyev prospekti ilə, V.Xuluflu küçəsinin Ş.İ.Xətai prospekti ilə kəsişməsinə qədər olan 6,5 kilometr uzunluğunda yolun yenidənqurulması işləri davam etdirilir.

Şəhərin prospekt və küçələrində, meydan və parklarında 218 müasir tipli işıq dayaqları quraşdırılmışdır.

Müxtəlif məhəllədaxili ərazilərdə yaşayanların arzuları və müraciətləri nəzərə alınaraq mikrorayonlarda və yaşayış massivlərində abadlıq, səliqə-sahman işləri bu ilin əvvəlindən davam etdirilir.

Heydər Əliyev və Nizami prospektlərində, M.A.Abbaszadə, 28 May və Sənaye zonasının bəzi küçələrində 8 min 660 paqonmetr mozaika və qranit bordyur daşları quraşdırılmışdır. İlin əvvəlindən Nizami, N.Nərimanov prospektlərində, həmçinin M.A.Abbaszadə küçəsində 3 min 900 kvadratmetrdən çox tamet döşənmişdir.

2012-ci ilin ilk 3 ayı ərzində şəhərin ərazilərində 175 ədəd yeni işıqlandırıcı sistem quraşdırılmışdır.

Şəhərə giriş avtomobil yolları genişləndirilmiş, yaşıllıqların salınması, yeni müasir obyektlərin tikintisi işləri davam etdirilir.

Şəhər ərazisində müəyyən edilmiş 800-dən artıq tarixi tikililər ardıcıllıqla təmir və bərpa olunur.

Şəhərdə yaşıllıqların salınması, mühafizəsi və onlara aqrotexniki qaydada qulluq göstərilməsi daim diqqət mərkəzindədir.

Parkların, xiyabanların abadlaşdırılması və onların memarlıq baxımından yüksək səviyyədə və zövqlə yenidənqurulması, səliqə-sahman yaradılması işləri davam etdirilmişdir. Həyata keçirilən bu tədbirlər şəhər əhalisinin rahatlığına xidmət edir.

İlin əvvəlindən şəhər ərazisində 38 min 500 ədəddən çox ağac, 6 min 800 ədəd dekorativ gül və çiçək əkilmiş, 6 ədəd yeni subartezian quyusu istifadəyə verilmiş, 10-dan çoxu isə təmir olunmuşdur.

Mövcud qazon-çəmənlik sahələri genişləndirilmiş, ilin əvvəlindən 5,6 hektar yeni qazon salınmışdır.

Şəhər ərazisində əkilmiş ağacların suvarılmasında ənənəvi suvarma ilə yanaşı, ən tərəqqi üsuldan-damcılı suvarmadan istifadənin tətbiqi istiqamətində işlər aparılır.

Şəhərdə aparılan quruculuq və yenilik bütün sahələri əhatə etdiyi kimi, nəqliyyat sektoruna da öz təsirini göstərməkdədir.

Avtomobil nəqliyyatı müəssisələri və bu sahədə fəaliyyət göstərən fiziki şəxslər 3 ay ərzində 14 milyon 237 manatlıq və ya ötən illə müqayisədə 2,4 faiz çox nəqliyyat xidmətləri göstərmişdir.

2012-ci ilin birinci rübünə avtomobil nəqliyyatı ilə yük daşınması 10,9 faiz, sərnişin daşınması 72,6 faiz artmışdır. İctimai nəqliyyatdan istifadə edən sərnişinlərə təklif edilən xidmətin keyfiyyətinin yaxşılaşdırılması məqsədi ilə istismar müddətini keçmiş kiçik avtobusların yenisi ilə əvəz edilməsi cari ildə də davam etdirilmişdir.

Hesabat dövründə Cənubi Koreya istehsalı olan 11 ədəd "Hyundai" markalı avtobus gətirilərək xəttə buraxılmışdır. İlin sonuna kimi bu markalı avtobusların sayı tədricən artırılacaqdır.

Şəhərdaxili sərnişin daşınması üzrə marşrutlar müasir tələblərə uyğun və mövcud vəziyyətə uyğunlaşdırılmaqla optimal variantlar yenidən işlənilir.

Müasir nəqliyyat infrastrukturuna uyğun olaraq yaxın vaxtlarda elektron tablolu dayanacaqların quraşdırılmasına başlanılacaqdır.

Köhnə taksilərin yenisi ilə əvəz edilməsi nəzərdə tutulur və bu sahədə danışıqlar aparılır. Gəncə Beynəlxalq Hava limanı ilin birinci rübündə hava nəqliyyatı ilə 31 min 100 nəfər sərnişin, 277 ton yük daşımışdır. Sərnişin daşınması 11,9 faiz, yük göndərilməsi 1faiz artmışdır.

Şəhərdə aparılan abadlıq və quruculuq işləri ilə əlaqədar olaraq Nizami prospekti, Şəddadilər, Əziz Əliyev və İsrafil Məmmədov küçələrində 7 kilometr 515 metrdən çox hava rabitə xətləri yeraltı kabel kanalizasiya qurğuları ilə əvəz edilmişdir.

"Azərpoçt" MMC Gəncə Regional Poçt filialı müştərilərə göstərilən xidmətin səviyyəsinin günün tələbləri səviyyəsinə qaldırılması məqsədilə 1 və 3 saylı poçt şöbələri "Master Card" Beynəlxalq ödəniş sisteminə qoşulmuş, ATM cihazları quraşdırılması üçün QRX xətləri çəkilib, bütün poçt şəbəkələrində valyuta mübadiləsi əməliyyatlarının, pul köçürmələrinin qəbulu və ödənilməsi, əhalidən kommunal ödənişlərin qəbulu və digər bank xidmətlərinin göstərilməsi üçün tədbirlər həyata keçirilmişdir.

Pərakəndə ticarət dövriyyəsinin həcmi 5,1 faiz artaraq 137,6 milyon manat təşkil etmişdir. Əhaliyə göstərilən pullu xidmətlərin həcmi əvvəlki ilin səviyyəsini 10,4 faiz üstələyərək 57,6 milyon manata çatmışdır.

Əhalini dayanıqlı elektrik enerjisi ilə təmin etmək üçün 22 alçaq və yüksək gərginlikli yarımstansiyada və transformator məntəqəsində əsaslı və cari təmir işləri aparılmış və bu sahədə işlər davam etdirilir. Şəhərin ayrı-ayrı küçələrində 6 min 500 metr SİP kabel, 3 min 850 metrdən çox koaksial kabel çəkilmişdir. Hesabat dövründə istehlakçıların işlətdikləri elektrik enerjisinin uçotunun aparılması üçün 242 ədəd "Smartkart" tipli, o cümlədən 30 ədəd üç fazalı sayğac quraşdırılmışdır.

Cavad xan qəsəbəsində, "Gülüstan" yaşayış massivində, H.Əliyev, Atatürk və Nizami prospektlərində, H.Cavid, Veteranlar, Təbriz, Totanlı, P.Səmədov və digər küçələrdə elektrik enerjisi istehlakçılarının enerji təchizatının yaxşılaşdırılması məqsədilə elektrik şəbəkəsində yenidənqurma işləri aparılmışdır.

Hesabat dövründə 6,5 kilometr uzunluğunda müxtəlif gərginlikli yeni hava və kabel elektrik xətti çəkilmiş, 1,2 kilometri isə yenisi ilə əvəz olunmuşdur.

Alçaq gərginlikli elektrik şəbəkəsində cari ilin birinci rübündə 17 transformator məntəqəsi cari və əsaslı təmir edilmiş, 1,5 kilometr uzunluğunda yeni hava və kabel elektrik verilişi xətləri çəkilmiş, 1 ədəd 160 kilovoltluq kompleks transformator məntəqəsi quraşdırılmışdır.

Şəhərin enerji sisteminin yenidən qurulması ilə əlaqədar aparılan işlərin davamı olaraq müasir 10-6-04 kilovoltluq 776 ədəd metal boru və dəmir beton dayaqlar quraşdırılmış, 22,2 kilometr uzunluğunda SİP kabeli yeni dirəklərin üzərinə köçürülmüş, 13,4 kilometr uzunluğunda yeni SİP kabel xətti çəkilmişdir.

Şəhər icra hakimiyyətinin enerji sahəsində xüsusi diqqət yetirdiyi digər bir mühüm məsələ isə Gəncə əhalisinin təbii qazla tam təminatı, mövcud qaz şəbəkəsinin yenidən qurulmasıdır. Qaz şəbəkəsinin yenidənqurulması ilə əlaqədar ilin əvvəlindən M.Abbaszadə, Şəddadilər, Q.Hüseynli, Əziz Əliyev və digər küçələrdə 10 min paqonmetrə qədər orta və aşağı təzyiqli qaz dəmir boru kəmərləri polietilen boru kəmərləri ilə əvəz edilmiş, qaz itkisinin qarşısı alınmaqla yanaşı, əhalinin məişət qazına olan tələbatı yaxşılaşdırılmış, qazla təminatının etibarlığı artırılmışdır.

Hesabat dövründə 140 qaz tənzimləyici şkaf və 114 qaz siyirtməsi profilaktiki təftiş və təmir edilmiş, 64 qaz sızması aşkar edilərək qarşısı alınmışdır.

Hacıkənd qəsəbəsində əhalinin təbii qazla təmin olunması üçün 1 min 92 paqonmetr uzunluğunda yeni qaz xətti çəkilmiş, 43 ailə təbii qazla təmin edilmişdir. Bu sahədə işlər davam etdirilir.

2012-ci ilin ilk 3 ayı ərzində əhalinin mənzillərində 1 min 363 ədəd litron markalı qaz sayğacı quraşdırılaraq qeydiyyata götürülmüşdür. Aprelin 1-nə kimi 67 min 556 məişət abonenti qaz sayğacı ilə təmin edilmişdir. Bu ümumi abonentlərin 97,2 faizini təşkil edir.

İlin əvvəlindən əhaliyə istehlak edilən qazın ödənişi 87,9 faiz olmuşdur ki, bu da keçən ilin müvafiq dövründən 5 faiz çoxdur.

İstehlakçıların, xüsusən də əhalinin içməli su təchizatının və kanalizasiya xidmətlərinin yaxşılaşdırılması ilə əlaqədar ilin əvvəlindən müəyyən işlər görülmüşdür.

Ölkə Prezidentinin diqqət və qayğısı sayəsində təməli 2011-ci ilin sentyabrın 8-də qoyulmuş "Gəncə şəhərinin su təchizatı və kanalizasiya sistemlərinin yenidənqurulması" layihəsi çərçivəsində suötürücü mənbələrin, anbarların magistral su xəttinin tikintisi işləri davam etdirilir.

Gəncə "Sukanal" Törəmə Açıq Səhmdar Cəmiyyəti tərəfindən ayrı-ayrı su anbarları təmizlənmiş, məhəllədaxili nasos stansiyaları və avadanlıqları təmir edilmiş, su sızmalarının vaxtlı-vaxtında qarşısı alınmışdır.

Gəncənin dinamik inkişafı göz qabağındadır. Bu inkişaf, bu tərəqqi bütün sahələri əhatə edir. Şəhərdə ideoloji iş gücləndirilib. Tarixi şəxsiyyətlərin, milli memarlıq abidələrinin təbliği, qorunub saxlanılması üçün ardıcıl iş aparılır. Elə tək Nizami Gəncəvi ilə əlaqədar görülən işlər bunu cəsarətlə deməyə imkan verir. Məsələn, Nizami küçəsi genişləndirilərək və yenidən milli ornamentlərlə qurularaq prospektə çevrilmişdir. Gəncə Hava Limanınadək uzanan bu prospekt indi də genişləndirilməkdə davam etdirilir. Köhnə, lüzumsuz tikililər sökülür, ətraf abadlaşdırılır, qazonlar, yaşıllıqlar salınır. Nizami məqbərəsi və onun ətrafı tamamilə yeni görkəm alıb. İndi dahi şairin məqbərəsini ziyarət etməyə gələnlər əsrarəngiz bir mənzərə ilə qarşılaşırlar. Müxtəlif abidələr, fəvvarələr, istirahət guşələri, çıraqbanlar göz oxşayır. Hara baxırsan gül-çiçək, yaşıllıqdır. Yeri gəlmişkən qeyd edək ki, şəhərin lap girəcəyinə kimi yolun hər iki tərəfində uzanan bu yaşıllıq sahələri ayrı-ayrı müəssisə və təşkilatlar arasında bölüşdürülüb. İndi gəncəlilərin bir çoxu şənbə və bazar günləri və ya işdən sonra buraya gəlir, yaşıllıqlara qulluq edir, eyni zamanda, gördükləri işdən zövq alırlar. Həmin prospektdə şəhərin Hava Limanı istiqamətində Giriş qapıları da diqqəti cəlb edir. Burada da yeni yaşıllıqlar salınıb, ağac və gül kolları əkilib. Vaxtilə ticarət obyektlərinin arxasında görünməz qalan "Xəmsə" kompleksi tamamilə yenidən bərpa olunub. Bura indi adamların əsil istirahət guşəsinə çevrilib. Göründüyü kimi, tək Nizami Gəncəvi ilə bağlı şəhərdə həyata keçirilən işlər bir qəzet yazısına sığmaz. Qəzetimizin ötən saylarının birində "Gəncə, Nizami prospekti" sərlövhəli bir yazı vermişdik. Həmin məqalə ilə əlaqədar redaksiyamız çoxlu oxucu məktubu almışdı. Onların müəllifləri Gəncədə həyata keçirilən geniş abadlıq, quruculuq işlərinə yüksək qiymət verməklə yanaşı, ölməz Nizami irsinin qorunub saxlandığından məmnunluq hissi keçirdiklərini ifadə edirdilər.

Bəli, Gəncənin toylu-büsatlı günləri hələ qabaqdadır. Şəhərdə nəhəng obyektlər inşa olunur. Filarmoniya, Heydər Əliyev Mərkəzi, Nizami Gəncəvi Mərkəzi, çoxlu sosial obyektlər, zavodlar, fabriklər tikilir. Gəncə Azərbaycanın elə bir guşəsinə çevrilir ki, təkcə gəncəlilər deyil, hər bir vətəndaşımız onunla fəxr edir və edəcək.

Hamlet QASIMOV

Xalq qəzeti.- 2012.- 3 may.- S. 6.