Nəsimi rayonunda Şuşanın işğalının 20-ci ildönümü ilə əlaqədar tədbir keçirilib

Azərbaycan Respublikasının Prezidenti İlham Əliyevin "Şuşa şəhərinin Ermənistan silahli qüvvələri tərəfindən işğalının 20-ci ildönümü haqqında" 9 aprel 2012-ci il tarixli sərəncamının icrası məqsədilə Nəsimi rayonunda tədbirlər planı təsdiq edilmişdir.

Həmin planın icrası ilə əlaqədar rayonun məktəbəqədər, ümumtəhsil, mədəniyyət müəssisələrində, idarə və təşkilatlarında tədbirlər keçirilmişdir. Həmin tədbirlərin yekunu olaraq rayon icra hakimiyyətində yığıncaq keçirilib.

Tədbiri Nəsimi Rayon İcra Hakimiyyətinin başçısı Nəsib Məhəməliyev açmışdır. O bildirmişdir ki, 1992-ci il mayın 8-də Azərbaycanın əzəli torpağı, milli mədəniyyətimizin mərkəzlərindən biri, musiqimizin beşiyi Şuşa erməni qəsbkarları tərəfindən işğal edilmişdir. Şuşanın işğalına o zamankı dərin siyasi-iqtisadi böhran, Milli Ordumuzun formalaşmaması səbəb olmuşdu. Təpədən dırnağadək silahlanmış erməni silahlı qüvvələrinə qarşı azsaylı könüllü özünümüdafiə qüvvələri döyüşürdü. Onların qəhrəmancasına müqavimət göstərmələrinə baxmayaraq, qüvvələrin bərabər olmaması şəhərin itirilməsi ilə nəticələndi. Lakin biz hamımız əminik ki, Şuşa da daxil olmaqla erməni tapdağı altında olan bütün torpaqlarımız tezliklə azad ediləcək və ədalət bərpa olunacaqdır. Möhtərəm Prezidentimiz cənab İlham Əliyevin bu istiqamətdəki fəaliyyəti və qətiyyəti bu inamı gündən-günə artırır.

Nəsimi Rayon İcra Hakimiyyəti başçısının müavini Zahid Xəlilov məruzə ilə çıxış etdi. O, Şuşanın tarixi, işğal ərəfəsində Azərbaycanda yaranmış ictimai-siyasi vəziyyət, şəhərin tutulması zamanı yaşanan hadisələr barədə ətraflı danışdı. Natiq bildirdi ki, Azərbaycanın incisi olan Şuşanın inkişafınıın ən yüksək mərhələsi ümummilli liderimiz Heydər Əliyevin ölkəmizə birinci dəfə rəhbərlik etdiyi dövrə təsadüf edir. 1977-ci ildə Heydər Əliyevin təşəbbüsü ilə qəbul edilmiş "Şuşa şəhərinin tarixi hissəsini tarixi memarlıq qoruğu elan etmək haqqında" qərarından sonra şəhərdə quruculuq işləri vüsət almış, Molla Pənah Vaqifin məqbərəsi ucaldılmış, Üzeyir bəy Hacıbəylinin, Xurşudbanu Natəvanın, Bülbülün ev muzeyləri yaradılmışdır.

Erməni qəsbkarlarının Şuşanı işğal etməsi nəticəsində 22 ümumtəhsil məktəbi, 7 məktəbəqədər müəssisə, mədəni-maarif texnikumu, 8 mədəniyyət evi, 14 klub, 20 kitabxana, 3 muzey, turist bazası, sanatoriya, Şərq musiqi alətləri mərkəzi, avtobaza və digər mədəniyyət ocaqları, inzibati binalar dağıdılmışdır. İşğal zamanı 195 soydaşımız həlak olmuş, 165-i yaralanmış, 121-i itkin düşmüşdür. Lakin biz tam əminik ki, gözəl Şuşamız və işğal olunmuş bütün torpaqlarımız azad olunacaq və şəhidlərimizin qisası alınacaqdır.

133 nömrəli orta məktəbin direktoru Füzuli Həsənov, 19 nömrəli orta məktəbin direktoru Məmməd Qəmbərov və başqaları çıxış etdilər. Nəsimi Rayon İcra Hakimiyyətinin başçısı Nəsib Məhəməliyev tədbirə yekun vurdu.

Ayaz HƏMİDOĞLU

Xalq qəzeti.- 2012.- 8 may.- S. 10.