Əbədiyyət onun alın yazısı idi

"...Qəhrəmanların ölümü Günəşin qürub etməsinə bənzəyir."

Bu fikrin kimə məxsus olduğunu unutmuşam. Əslində 20 ildən artıq jurnalist kimi çalışmağıma baxmayaraq, mənim üçün qəhrəmanlardan yazmaq qədər çətin mövzu olmadığı üçün bu fikrə üz tutdum. Amma 40 gün əvvəl müstəqil Azərbaycanın rəşadət salnaməsinə adını yazan, heç 40 yaşı tamam olmamış MTN-in zabiti, polkovnik-leytenant Elşad Quliyevin həyat tarixçəsinin epiqrafı üçün, məncə, bundan sərrast ifadə tapmaq çox çətin olardı...

Qəhrəmanımız Elşadın əxlaqının və tərbiyəsinin bünövrəsini qoyan öz valideynləri, eldə, obada səmimiyyətləri, xeyirxahlıqları, həkim peşəsinə sədaqətləri ilə ad qoymuş Vəli doktorla Kəsirə doktor olmuşdu. Yaşlarına şahid olanlar danışırlar ki, bu iki insan ucqar Zəngilan rayonuna gələn gündən sözün əsl mənasında, elin dar gününün dayağı olublar. Həmin günləri yaşayırmış kimi Kəsirə xanım oğul itkisinin acısına bir xoş xatirə şirinliyi qataraq deyir:

- Bəzən elə olurdu ki, dünyaya körpə gətirən anaya təcili yardım göstərmək üçün axşamdan ucqar bir kəndə yola düşürdük. Vəli cərrah olsa da özümlə köməyə aparırdım. O zaman ucqarlarda ginekoloq həkimlər çox az idi. Gecə yarı, bəzən səhərə yaxın evə gəlirdik. Elşad da qardaşı Elnur və bacısı Afətlə evdə qonşuların ümidinə qalırdılar. Amma bir dəfə də olsun pis bir hərəkətlərini nə gördük, nə də eşitdik. Biz vəzifə, insanlıq borcumuzu yerinə yetirirdik, onlar da bunu zəruri insani xarakter kimi özlərinə təlqin edirdilər. Yəni bizim davranışımız, cəmiyyətdə, ucqar bir rayonda insanlara münasibətimiz öz-özlüyündə onların tərbiyəsinə çevrilirdi.

Elşad Quliyevin tərbiyəsinə yoldaşları yaxşı mənada qibtə edirdilər. Deyirlər ki, elə ilk görüşdən Elşadla yoldaşlıq adamda xoş hisslər oyadırdı. Çünki son dərəcə tərbiyəli idi deyə, ətrafdakılara çox diqqət yetirərdi.

...Ümumiyyətlə, hər bir şəxsiyyətin iki tərbiyəsi olur. Bunlardan biri onun valideynlərindən, müəllimlərindən, el ağsaqqallarından aldığı tərbiyədir, digəri isə onun özünün-özünə verdiyi tərbiyədir. Elşad valideyn tərbiyəsi ilə yanaşı, ali təhsilli, ziyalı bir insan kimi də özü-özünü tərbiyə etmişdi. Heç ola bilməzdi ki, İslam dininin dəyərlərini dərindən öyrənən, ərəb dilini mükəmməl bildiyi üçün müqəddəs Qurani-Kərimi orijinaldan oxuyub dərk edən, ədəbiyyatı sevə-sevə oxuyan, gözəl musiqi duyumu olan bir insan kamilliyin sirlərini bilməmiş olsun...

Qəhrəmanımızın çalışdığı Azərbaycan Respublikası Milli Təhlükəsizlik Nazirliyindən bizə təqdim edilmiş xidmət tarixçəsində yazılır: Polkovnik-leytenant Elşad Vəli oğlu Quliyev 1972-ci il dekabrın 19-da Zəngilan şəhərində anadan olmuşdur. 1989-cu ildə Zəngilan şəhər 1 saylı orta məktəbi bitirdikdən sonra əmək fəaliyyətinə başlamışdır. 1992-ci ilin fevralından sentyabr ayına qədər Zəngilan özünümüdafiə batalyonunun tərkibində Dağlıq Qarabağ uğrunda gedən döyüşlərdə iştirak etmişdir. 1990-cı ildə Azərbaycan Texniki Universitetinə daxil olmuş və 1995-ci ildə həmin universitetin energetika fakültəsini bitirmişdir. İdmanın ağır atletika və kikboks növləri ilə məşğul olmuşdur.

1995-ci ildə Elşad Quliyev Azərbaycan Respublikası Milli Təhlükəsizlik Nazirliyinin Xüsusi Əməliyyat İdarəsinə həqiqi hərbi xidmətə qəbul edilmiş, 1998-2012-ci illər ərzində baş zabit, bölmə və şöbə rəisi vəzifələrinə yüksəlmişdir. E.Quliyev milli təhlükəsizlik orqanlarında xidmət etdiyi müddətdə özünü bacarıqlı və intizamlı hərbçi kimi göstərmiş, işə məsuliyyətli münasibəti, təvazökarlığı, sadəliyi və səmimiliyi ilə kollektivin hörmətini qazanmışdır. Tapşırıqların yerinə yetirilməsi üçün hər zaman yüksək təşəbbüskarlıq və fədakarlıq göstərmişdir...

Məxfi bir qurumda çalışan təhlükəsizlik orqanının zabiti haqqında bundan artıq məlumat çətin ki, verilsin. Müdriklərdən biri demişdir ki, "insanın ilk borcu öz şərəf və ləyaqətinə olan borcudur". Biz onu ləkəsiz saxlamağa məsuliyyət daşıyırıq. Elşadın borcu onun həyatı ilə eyni vaxtda başlamışdı. Kəsirə xanım deyir ki, uşaqlıqda bir işi düz görməyəndə deyirdim "səndən yaxşı əsgər olmaz". Ananın hər bir yumşaq "qınağı" Elşadı öz əsgər qəhrəmanlığına doğru addım-addım yaxınlaşdırırdı.

Elşad düşünürdü ki, hər bir insan öz Vətəninin əsgəri olmalıdır. Gənc yaşlarından, Qarabağda savaş başlayandan, doğma Zəngilan düşmən hücumlarına məruz qalandan onun da yuxusu ərşə çəkilmişdi. Bakıda Texniki Universitetdə təhsil alsa da, əsgər borcunu bir an belə unutmurdu. Özünü sanki yağı düşmənlə döyüşlərə hazırlayırmış kimi, fiziki hazırlığını mübarizə ruhunun səviyyəsinə qaldırmağa çalışırdı. İmkan tapan kimi Zəngilana yollanır, səngərlərdə düşmənlə üz-üzə dayanan dostlarının, tanışlarının köməyinə, Vətənin müdafiəsinə tələsirdi.

Özünü bütün varlığı ilə Vətəninə məxsus hesab edən bu insan istənilən məqamda bütün keyfiyyətlərini borcuna qurban verib, şərəfini uca tutmağı bacarırdı. Bu təkcə ailədən gələn keyfiyyət deyildi. Zabit yoldaşları deyirlər ki, Elşad ulu öndərimiz Heydər Əliyevin vurğunu idi. Onun həyat və fəaliyyətini, xüsusilə DTK-dakı xidmətlərini, iştirak etdiyi əks-kəşfiyyat əməliyyatlarını əzbər bilirdi.

Xidmət tarixçəsindən: Elşad Quliyev MTN tərəfindən həyata keçirilən bir sıra əməliyyat tədbirlərində fəal iştirak etdiyi üçün Azərbaycan Respublikası Prezidentinin sərəncamları ilə "Vətən uğrunda" və "İgidliyə görə" medalları ilə, milli təhlükəsizlik nazirinin əmrləri ilə "Azərbaycan Respublikası Milli Təhlükəsizlik orqanlarının 90 illiyi (1919-2009)" və "Qüsursuz xidmətə görə" 3-cü dərəcəli medalları ilə təltif edilmişdir.

Əlbəttə, Milli Təhlükəsizlik Nazirliyinin Xüsusi Əməliyyat İdarəsində adi əməliyyatlar olmur. Axı, milli təhlükəsizlik-millətin vəziyyətinin göstəricisidir. Elə bir göstərici ki, daxili və xarici zərərli amillər onun həyatının keyfiyyətini aşağı sala bilməsin və onun varlığı üçün təhlükə yaratmasın. Elşad məhz dövlətin bu siyasətinə xidmət göstərirdi və 2005-ci ildə növbəti antiterror əməliyyatında fərqləndiyi üçün Azərbaycan Prezidenti İlham Əliyev şəxsən özü "İgidliyə görə" medalını onun döşünə taxanda ömründə ilk dəfə cəsarətin və mərdliyin gətirdiyi böyük qürurun dadını bilmişdi...

Elşad həyatda öz təyinatını bilən insanlardan idi. O, təkcə özü, ailəsi haqqında düşünsəydi, qəhrəman ola bilməzdi. Mərdin, şərəfini və Vətənə borcunu uca tutanın təyinatı nə ola bilərdi ki? Sadəcə yaşamaq yox, yaşadığı ömürdə özgələrini, insanlığı, millətini yaşatmaq.Elşad gözlə qaş arasında olan ölümü görə-görə borcun və şərəfin çağırışına getdi. Və sonda bunun qəhrəmanı oldu...

Elşadı yaşadığı və işlədiyi cəmiyyətdən bir boy yüksəyə qaldıran məhz bu müqəddəs borca sədaqəti idi. Ölüm o zirvəyə qalxmağa acizdir. Ölüm olsa-olsa o zirvəyə, ucalığa həsədin, paxıllığın amansız qəniminə çevrilir və bununla kiçilir.

...Vəli doktorun oğul kədərinin ağır yükünə tab gətirməyən qaməti əyilmişdi. İçində çəkdiyinin təsəllisini bircə Elşadın bütün ömründən öz qəlbinə topladığı şirin xatirələr idi. Aram- aram danışır və sanki bununla oğlunun ömrünü uzadırdı. "Cəsarət Elşadın qəlbinin, xarakterinin bənzərsiz keyfiyyəti idi,"- deyir Vəli doktor. Əslində, cəsarətsiz heç bir xeyirxah əməl, gözəl fikir, müstəqil xarakter ola bilməzdi axı, ay Vəli doktor. Elşad cəsarəti ilə şücaət göstərib qəhrəmanlıq zirvəsini fəth etmişdi. Son əməliyyatında da belə oldu. O, təhlükə haqqında düşünmədi, bu təhlükənin miqyasının böyüməsinin qarşısını aldı...

Rəsmi məlumat: "...Gəncə şəhərində ictimai-siyasi sabitliyi pozmaq, əhali arasında vahimə yaratmaq məqsədi ilə təxribat-pozuculuq və terror aktları planlaşdıran silahlı qrup Azərbaycan Respublikası Milli Təhlükəsizlik Nazirliyinin "Qartal" xüsusi təyinatlı dəstəsi tərəfindən yüksək peşəkarlıqla həyata keçirilmiş əməliyyat nəticəsində zərərsizləşdirilmişdir..."

Bu, Elşadın iştirak etdiyi və şücaət göstərdiyi son əməliyyat oldu. "Vətən sağ olsun" deyib, dövlətinin və millətinin təhlükəsizliyi naminə doğmalarına, iki məsum körpəsinə-oğlanları Əmmara və Naimə, ailə səadətinin ən şirin çağlarını yaşayan həyat yoldaşı Sevincə "qıydı", ölümü ilə onların göz yaşını axıtdı. Elşadsızlığın kədəri dostlarını üzdü. Amma kim bilir nahaqdan qanı axacaq nə qədər insanı terrorun amansız ölüm caynağından qurtardı Elşad...

Xidmət tarixçəsindən: Elşad Quliyev 2012-ci ilin aprelində xüsusilə təhlükəli silahlı birləşmənin üzvlərinin tərkisilah olunması və tutulması üçün MTN-in həyata keçirdiyi antiterror əməliyyatı zamanı həlak olmuşdur. Azərbaycan Respublikası Prezidentinin sərəncamı ilə ölümündən sonra "Azərbaycan Bayrağı" ordeni ilə təltif edilmişdir.

-Yəni doğrudanmı hər şey bitdi, -deyə Kəsirə ana Elşadın qayıtmayacağına hələ də inanmaq istəmir. Gözlərini 2005-ci ildə növbəti antiterror əməliyyatı zamanı fərqləndiyi üçün "İgidliyə görə" medalı ilə təltif olunarkən Elşadın Azərbaycan Prezidenti İlham Əliyevlə çəkdirdiyi şəklə zilləyir. Üzgün baxışlarından, yaralı qəlbindən nələr keçdiyini görə bilməsəm də, bir istəyinin olduğunu duydum...

Belə məqamlarda təsəlli verməyə aciz idim. Bir də jurnalistin təsəllisi yazısından başqa nə ola bilərdi ki?

İlqar RÜSTƏMOV

Xalq qəzeti.- 2012.- 15 may.- S. 6.