Gəncliyimiz-gələcəyimiz. "Diplomatiyada da bu günün gənc kadrı sabahın peşəkarıdır"

Son illər Azərbaycanda dövlət tərəfindən gənclərə göstərilən diqqət və qayğı açıq-aşkar hiss olunmaqdadır. Prezident İlham Əliyevin bu sahənin inkişafına yönəlmiş addımları ölkəmizdə gənclər siyasətinin uğurla həyata keçirildiyini nümayiş etdirir. Şübhəsiz ki, gənclər sektoru inkişaf edirsə, deməli, Vətəninə, xalqına və milli dəyərlərinə sadiq, ümumbəşəri dəyərlərə hörmətlə yanaşan gələcəyimiz yetişməkdədir. Bu sektorun inkişaf etdirilməsinin əsas hədəflərindən biri də dövlət və hökumət strukturlarında gənclərin iştirakını təmin etməkdir. Gənc dövlət xadimlərinin, diplomatların yetişdirilməsi, dövlətçiliyimizin keşiyində duran insanlarımızın sayını artırmaq bu siyasətin tərkib hissəsidir. Bütün dövlət qurumlarında gənclərə rast gəlmək mümkündür. Ən məsuliyyətli və çətin sahələrdən biri olan Xarici İşlər Nazirliyi strukturlarında da layiqli gənclərimiz çalışmaqdadır. Belə gənclərimizdən biri - Azərbaycanın Rusiyadakı səfirliyinin məsul əməkdaşı Gültəkin Cəlilova ilə həmsöhbət olduq.

Gültəkin Sahib qızı Cəlilova 1 avqust 1980-ci ildə Zəngilanda anadan olub. 1997-ci ildə Bakı şəhəri 46 saylı orta məktəbi bitirib. 1999-2004-cü illərdə "Təfəkkür" Universitetinin filologiya (ingilis dili) fakültəsində təhsil alıb. Azərbaycan Respublikasının Xarici İşlər Nazirliyinin Konsulluq İdarəsində əmək fəaliyyətinə başlayıb.

2005-ci ilin avqust ayında öz diplomatik xidmətini Azərbaycanın Moldova Respublikasındakı səfirliyində davam etdirib.

2006-2009-cu illərdə T.Şevçenko adına Kiyev Dövlət Universitetinin iqtisadiyyat fakültəsində ikinci qiyabi təhsilini alıb. Eyni zamanda, Moldova Dövlət Universitetinin Beynəlxalq əlaqələr və siyasi administrasiya fakültəsinin məzunu kimi magistr dərəcəsini alıb.

2010-cu ildən etibarən Azərbaycanın Rusiya Federasiyasındakı səfirliyinin humanitar şöbəsində diplomatik fəaliyyətini davam etdirir.

Azərbaycan Respublikasının Xarici İşlər Nazirliyində işlədiyi müddət ərzində Misir Ərəb Respublikası, İran İslam Respublikası və Rusiya Federasiyasında təşkil olunan diplomatiya kurslarında iştirak edib. Həmçinin, Azərbaycan Diplomatik Akademiyasının Maltanın "Diplo.Foundation" Təhsil Mərkəzi ilə birgə "İkitərəfli diplomatiya" mövzusunda təşkil etdiyi onlayn(online) kurslarını bitirib.

2011-ci ildə Rusiya Federasiyasının Diplomatik Akademiyasının aspiranturasına qəbul olunub. Ailəlidir, bir oğlu var.

- Gültəkin xanım, Vətəndən kənarda diplomatiya sahəsində çalışan bir şəxs kimi, Azərbaycan həqiqətlərinin dünyaya çatdırılması məsələsi fəaliyyətinizdə nə kimi yer tutur?

- Özlərini diplomatiya peşəsinə həsr edənlər həyatlarının böyük hissəsini xarici ezamiyyətlərdə keçirir və birbaşa Vətən maraqlarının müdafiəsinə həsr edirlər. Bu nəzər nöqtəsindən Azərbaycandan kanarda olduğumuz müddətdə zəngin tariximiz və mədəniyyətimiz, ölkə iqtisadiyyatı, düşünülmüş xarici və daxili siyasət, çoxşaxəli inkişaf barədə məlumatların dünya ictimaiyyətinə çatdırılması bizim işimizin tərkib hissəsidir. Düşünürəm ki, Azərbaycan barədə həqiqətlərin çatdırılması istiqamətindəki fəaliyyətimizlə ölkə barədə düzgün rəyin formalaşmasına müsbət təsir göstərmək nəinki diplomatların, hər bir azərbaycanlının borcudur. Xidməti vəzifəmizin tələbləri baxımından biz, şübhəsiz ki,bu məsuliyyəti daha çox hiss edir və bu yolda Vətənimiz üçün nə lazımsa edirik.

- Siz Moldovada konsulluq məsələləri ilə məşğul olmusunuz. Azərbaycanla Moldovanı hansı tellər bağlayır?

- Azərbaycan və Moldova uzun müddət SSRİ-nin tərkibində olduğuna görə, xalqlarımız tarix və mədəniyyətlərimiz barədə qarşılıqlı məlumatlara malikdirlər. Müstəqillik əldə etdikdən sonra, dövlətlərimiz arasında ikitərəfli əməkdaşlığın yeni mərhələsi başlandı. Hal-hazırda iqtisadiyyat, mədəniyyət, təhsil kimi sahələrdə mövcud olan sıx əməkdaşlıq əlaqələri inkişaf etməkdədir. Bildiyimiz kimi, müstəqillik yolunda hər iki dövlət bənzər problemlərlə qarşılaşıb. Həm Azərbaycanın, həm də Moldovanın ərazi bütövlüyü pozulub, torpaqları işğal olunub. Artıq 20 ildir ki ölkəmiz Ermənistan-Azərbaycan, Dağlıq-Qarabağ münaqişəsinin sülh yolu ilə həlli üçün beynəlxalq aləmdə öz haqlı mövqeyini müdafiə edir. Moldova da Dnestryanı münaqişənin həlli istiqamətindəki fəaliyyətinə davam edir. MDB məkanında və GUAM çərçivəsində əməkdaşlıq edən Azərbaycan və Moldova bu münaqişələrin məhz ölkələrimizin ərazi bütövlüyü çərçivəsində həlli prinsipini rəsmi surətdə dəstəkləyirlər.

- Rusiyada Azərbaycan mədəniyyətinin təbliği istiqamətində səfirliyimizin dəstəyi ilə hansı işlər görülür?

- Səfirliyin mədəniyyət sahəsindəki fəaliyyəti mədəni əməkdaşlıq çərçivəsində müəyyənləşdirilmiş dövlət siyasətinin lazımı səviyyədə həyata keçirilməsinə istəqamətləndirilib. Konkret olaraq, Səfirliyin təşkilatı dəstəyi və incəsənət xadimlərimizin iştirakı ilə Moskva şəhərində və digər bölgələrdə konsert proqramları, sərgilər və s. kimi genişmiqyaslı tədbirlər mütəmadi şəkildə təşkil olunur. Bu tədbirlər yerli ictimaiyyət tərəfindən maraqla qarşılanır. Bunlardan son iki ildə həyata keçirilmiş layihələri qeyd etmək istərdim: Ötən ilin fevral ayında Rusiya Akademik "Bolşoy Teatr"ın səhnəsində Azərbaycan Dövlət Akademik Opera və Balet Teatrının artistlərinin ifasında dünya şöhrətli bəstəkarımız Qara Qarayevin "Yeddi gözəl" baleti yeni quruluşda səhnəyə qoyulmuşdur. Daha bir geniş miqyaslı tədbir Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın iştirakı ilə mayın 17-də Moskvada Dövlət Kreml Sarayında baş tutmuşdur. Heydər Əliyev Fondunun təşkilatçılığı və Azərbaycan səfirliyinin dəstəyi ilə keçirilmiş bu tədbir respublikamızın müstəqilliyinin bərpa edilməsinin 20-ci ildönümünə həsr edilmişdir. Ümumiyyətlə, Azərbaycan Respublikasının Mədəniyyət və Turizm Nazirliyinin və Heydər Əliyev Fondunun təşkilati dəstəyi ilə xarici ölkələrdə keçirilən yüksək səviyyəli layihələr ölkə mədəniyyətimizin təbliğatına əvəzsiz töhfələr verir.

Bu il də Azərbaycanın Rusiyadakı səfirliyinin təşəbbüsü, ölkələrimizin mədəniyyət nazirliklərinin dəstəyi ilə aprel ayında Moskvanın Beynəlxalq Musiqi Evinin Teatr zalında Azərbaycan cazının üç nəslini təmsil edən ifaçıların iştirakı ilə "JAZZ.AZ" konserti keçirilmişdir.

- Azərbaycanın haqq səsinin dünyaya çatdırılması və ölkəmizin təbliğatı sahəsində səfirliklərimiz və Azərbaycan diasporaları arasındakı əməkdaşlıq hansı səviyyədədir?

- Əvvəldə qeyd etdiyim kimi, ölkə və millət barədə müsbət rəyin formalaşması üçün nəinki diplomatlar, xaricdə yaşayan bütün həmvətənlərimiz var güclərini səfərbər etməlidirlər. Sözsüz ki, Azərbaycanın bütün diplomatik nümayəndəlikləri və xalq diplomatiyasının nümayəndələri sayılan diaspor təşkilatları Vətənimizin layiqli şəkildə təmsil olunması istiqamətindəki fəaliyyətlərini əlaqələndirməlidirlər. İşlədiyim ölkələrdəki diplomatik nümayəndəliklərimiz və diaspor təşkilatlarımız arasındakı davamlı əməkdaşlıq və həyata keçirilən birgə layihələr bunun bariz nümunəsi olmuşdur.

- Azərbaycan diplomatiyasında gənclərimizin təmsil olunmasının hansı müsbət tərəflərini qeyd edə bilərsiniz?

- Gənclik gələcək və yeni baxış prizması deməkdir. Gənclər özlərinə məxsus dünyagörüşü ilə, hər sahədə olduğu kimi, diplomatiya aləminə də müsbət yeniliklər gətirə bilərlər. Gələcəkdə səmərəli fəaliyyət göstərmək üçün gənclər diplomatiya sahəsindəki biliklərini artırmalı, öz üzərlərində daim işləməlidirlər. Bu məqsədlə, Azərbaycan diplomatiyasına peşəkar kadrların yetişdirilməsi üçün dünya təcrübəsinə əsaslanaraq gənc əməkdaşlar müxtəlif ölkələrdə təşkil olunan diplomatik kurslara göndərilir. Azərbaycan Diplomatik Akademiyasının aparıcı xarici təhsil mərkəzlərindən cəlb etdiyi professor və tələbə heyətinin iştirakı ilə həyata keçirilən tədris layihələri gənc diplomatların ixtisaslaşdırılmasında vacib yer tutur. Hər sahədə olduğu kimi, diplomatiyada da bu günün gənc kadrı sabahın peşəkarıdır. Azərbaycan diplomatiyasında gənclərimizin müsbət rolu ondan ibarətdir ki, dövlətimizin düşünülmüş xarici siyasəti və haqlı mövqeyi gələcəkdə də dərin biliklərə, müasir dünyagörüşünə və daxili mədəniyyətə sahib diplomatlar tərəfindən təmsil olunacaq.

Müsahibəni apardı: Anar TURAN

Xalq qəzeti.- 2012.- 18 may.- S. 8.