Yeni Azərbaycan Partiyasının yaradılmasının 20-ci ildönümü münasibətilə Dövlət Sosial Müdafiə Fondunda tədbir keçirilmişdir

Yeni Azərbaycan Partiyasının yaradılmasından 20 il ötür. Bu münasibətlə Dövlət Sosial Müdafiə Fondunda geniş toplantı keçirilmişdir. Tədbirdə çıxış edən Yeni Azərbaycan Partiyasının Yasamal rayon təşkilatının İdarə Heyətinin üzvü, DSMF-nun sədri Səlim Müslümov müstəqilliyimizin ilk illərində ölkədə baş verən ictimai-siyasi prosesləri xatırladaraq həmin dövrdə xarici qüvvələrin təzyiqi və daxili hakimiyyət çəkişmələrinin Azərbaycan dövlətini parçalanmaq təhlükəsi ilə üz-üzə qoymasından danışmışdır.

Fondun sədri bildirmişdir ki, elə bir vəziyyətdə xalqı ağır durumdan çıxarmağa, onun sabaha inamını qaytarmağa qadir olan siyasi partiyanın yaradılması zamanın tələbi idi və ümummilli lider Heydər Əliyev xalqın istək və arzularına uyğun olaraq yeni bir siyasi qüvvənin - Yeni Azərbaycan Partiyasının yaradılmasını reallığa çevirdi. S.Müslümov xüsusi olaraq vurğulamışdır ki, Yeni Azərbaycan Partiyası yarandığı ilk gündən o dövrün haqsızlıqlarına sinə gərərək öz sivil mübarizə metodları ilə mübariz təşkilat kimi formalaşmağa başlamış və xalqın partiyası adını qazanmışdır. İlk gündən mühüm addımlar atan Yeni Azərbaycan Partiyası müstəqilliyimizin əbədi olmasına, dövlətçiliyimizin möhkəmlənməsinə və inkişafına nail olmuşdur: "Ulu öndərimiz Heydər Əliyevin adı ilə birbaşa bağlı olan Yeni Azərbaycan Partiyası xalqımızın və respublikamızın müstəqilliyi istiqamətində böyük mübarizə yolu keçmişdir. Yeni Azərbaycan Partiyası qısa müddətdə təşkilatlanaraq ölkənin ən mütəşəkkil siyasi qüvvəsinə çevrilmişdir".

DSMF sədri nitqində ulu öndər Heydər Əliyevin müəyyən etdiyi siyasi kursun uğurla davam etdirildiyini və bu gün Azərbaycan dövlətinin dünya dövlətləri arasında özünməxsus yer tutduğunu diqqətə çatdırmışdır: "Hazırda üzvlərinin sayı 600 minə yaxınlaşan Yeni Azərbaycan Partiyasının hər bir üzvü təmsil olunduğu siyasi partiyanın bu inkişafdakı rolu ilə fəxr edir. Biz görürük ki, ulu öndər Heydər Əliyev siyasətinin layiqli davamçısı, Azərbaycan Respublikasının Prezidenti cənab İlham Əliyevin uğurlu daxili və xarici siyasəti nəticəsində regionun lider dövlətinə çevrilən ölkəmiz daha da güclənməkdə davam edir".

Yeni Azərbaycan Partiyası Yasamal rayon təşkilatının sədri Fikrət İsmayılov çıxışı zamanı 1992-ci il oktyabrın 14-də Milli Elmlər Akademiyasında "Əlincə" Xeyriyyə Cəmiyyətinin toplantısının keçirildiyini xatırlatmışdır. O, bildirmişdir ki, bu toplantıda yeni partiya yaradılması və ona Naxçıvan Ali Məclisinin sədri Heydər Əliyevin rəhbərlik etməsi qərara alınmışdır: "Həmin toplantıda Heydər Əliyevə müraciət qəbul olunmuşdu. Bu müraciət 1992-ci il oktyabrın 16-da "Səs" qəzetində çap edilmişdi. Ulu öndər Heydər Əliyev ziyalıların bu müraciətini cavabsız qoymadı. Nəhayət, 1992-ci il noyabrın 21-də çətin şəraitdə Yeni Azərbaycan Partiyasının təsis konfransı keçirildi".

F.İsmayılov onu da qeyd etmişdir ki, 1993-cü il fevralın 20-də Yeni Azərbaycan Partiyası Yasamal rayon təşkilatının ilk təsis konfransı keçirilmişdir. Bu günə qədər təşkilatın 8 konfransı keçirilmişdir və partiya üzvlərinin sayı 26 minə yaxındır.

Sonra Bakı Metropoliteninin rəisi, Yeni Azərbaycan Partiyası Yasamal rayon təşkilatının sədr müavini Tağı Əhmədov çıxış edərək vurğulamışdır ki, Azərbaycanın ictimai-siyasi həyatında çoxşaxəli fəaliyyəti ilə xüsusi yer tutan Yeni Azərbaycan Partiyası 20-ci ildönümünü qeyd edir və tarixə nəzər salarkən, bu 20 ilin heç də asan keçmədiyini müşahidə etmiş oluruq. Ulu öndər Heydər Əliyev demokratik, hüquqi dövlət, vətəndaş cəmiyyəti quruculuğunda siyasi partiyanın rolunu rəhbərə xas olan uzaqgörənliklə qiymətləndirərək 1992-ci il noyabrın 21-də yaradılmış Yeni Azərbaycan Partiyasının sədri olmaq məsuliyyətini üzərinə götürmüşdü. Azərbaycan xalqının təkidli tələbi ilə ikinci dəfə hakimiyyətə gələn ümummilli lider 1993-cü ildə sədri olduğu Yeni Azərbaycan Partiyasını iqtidara gətirmişdir. Məhz, Yeni Azərbaycan Partiyasının yarandığı, təşəkkül tapdığı, inkişaf etdiyi və ümumxalq partiyasına çevrildiyi illər ərzində ulu öndər Heydər Əliyevin siyasi təcrübəsi və iradəsi nəticəsində respublikamızda siyasi böhrana, vətəndaş müharibəsi təhlükəsinə, separatçılıq meyillərinə, dövlət çevrilişi cəhdlərinə, terror aktlarına son qoyuldu, vətəndaş həmrəyliyi təmin edildi, ölkə daxilində ictimai-siyasi sabitlik bərqərar edildi.

Azərbaycan Respublikası Dövlət Sosial Müdafiə Fondunun ictimaiyyətlə əlaqələr sektorundan bildirmişlər ki, tədbirdə Yeni Azərbaycan Partiyasının ictimai-siyasi həyatında fəal iştirak etdiklərinə görə və partiyanın 20 illiyi münasibətilə təşkilatın fəal üzvlərindən bir neçəsinə fəxri fərmanlar verilmişdir.

Yeni Azərbaycan Partiyasının 20 illik yubileyinə həsr olunmuş toplantının sonunda Aqil Abbasın ssenarisi əsasında çəkilmiş, Qarabağ müharibəsində Vətən uğrunda son nəfəsinə qədər döyüşən Azərbaycan oğullarının qəhrəmanlığından bəhs edən "Dolu" bədii filmi nümayiş etdirilmişdir.

Z.BƏŞİRQIZI

Xalq qəzeti.- 2012.- 4 noyabr.- S. 3.