Yeni Azərbaycan Partiyası təkcə ölkəmizin deyil, həm də Cənubi Qafqazın ən mütəşəkkil və güclü siyasi təşkilatıdır

Yarandıqdan bu günə qədər partiyamız çox böyük, şərəfli və uğurlu yol keçmişdir. Bu gün sıralarımızda 600 minə yaxın üzv vardır. Partiyamızın xarici əlaqələri çox genişdir və bu əlaqələr gündən-günə genişlənir. Ölkə daxilində mövqelər çox möhkəmdir. Partiyamız demək olar ki, cəmiyyətimizin bütün təbəqələrini, bütün yaş qruplarını birləşdirir. Yeni Azərbaycan Partiyası, sözün əsl mənasında, ümumxalq partiyasıdır. Əminəm ki, növbəti illərdə də partiyamız liderlik qabiliyyətini özündə saxlayacaqdır. Bu gün partiyamız Cənubi Qafqazın ən böyük siyasi qüvvəsidir.

İlham ƏLİYEV,

Azərbaycan Respublikasının Prezidenti

Bu gün hər bir azərbaycanlı fəxr edir ki, onun ölkəsi - "Odlar yurdu" Azərbaycan bir sıra məsələlərdə region dövlətlərinə nümunədir. Hər bir azərbaycanlı yaxşı bilir ki, respublikamızın əldə etdiyi möhtəşəm nailiyyətlər ulu öndər Heydər Əliyevin həyata keçirdiyi məqsədyönlü daxili və xarici siyasətin bu günün reallıqlarına uyğun yeni meyarlarla zənginləşdirilməsi sayəsində əldə edilmişdir. Biz onu da bilirik ki, dünayaya Azərbaycan modeli təqdim edən respublikamızın 21 illik müstəqillik tarixinin 20 ili məhz Yeni Azərbaycan Partiyası ilə bağlıdır.

Birmənalı şəkildə deyə bilərik ki, 1992-ci il noyabrın 21-də yaradılan Yeni Azərbaycan Partiyası zamanın çağırışlarına cavab vermək məqsədiylə, ölkədəki və regiondakı ictimai-siyasi proseslərin əks-sədası olaraq, ən başlıcası isə xalqın arzu və istəklərinin reallaşdırılması üçün siyasət meydanında böyük nüfuz qazanmışdır. YAP-ın yaradılması ilk öncə zamanın tələbi idi. Hər birimiz yaxşı xatırlayırıq ki, Azərbaycan Respublikası müstəqillik əldə etdikdən sonra böyük sınaqlarla qarşı-qarşıya qalmışdı. Həmin dövrdə hakimiyyətdə olan xalqdan uzaq düşmüş bacarıqsız insanlar müstəqilliyi qoruyub saxlamaq iqtidarında deyildilər. Bununla bərabər, Rusiyadakı bəzi dairələrdən dəstək alan Ermənistan Respublikası təcavüzkar hərəkətlərini davam etdirir, Azərbaycan torpaqlarını işğal edirdi. Cəbhədəki hərbi uğursuzluqlar cəmiyyətdə kəskin etirazlara səbəb olur, qaçqın və məcburi köçkünlərin sayının durmadan artması yeni-yeni problemlərin ortaya çıxmasına rəvac verirdi. 1992-ci ilin mayında Şuşa və Laçının işğala məruz qalması ölkədə iqtidar dəyişikliyinə gətirib çıxardı. "Qarabağ kartı" ilə hakimiyyətə gələnlər isə ölkəni daha da bərbad vəziyyətə saldılar. Təcrübəsizlik, səriştəsizlik və xəyanət AXC-Müsavat iqtidarının da sonunu tezləşdirirdi. Ölkədə xaos, anarxiya, hərki-hərkilik hökm sürür, xarici maraqlı dairələrin daxildəki xəyanətkarlarla işbirliyi nəticəsində dağıdıcı-separatçılıq hərəkətləri təhlükəli həddə çatırdı. Bütün bunlarla yanaşı, sosial-iqtisadi vəziyyətin günbəgün ağırlaşması nəticəsində insanların gələcəyə inamı tükənmişdi. Ölkədə un və ərzaq çatışmazlığı əhalinin aclıq təhlükəsi ilə üzbəüz qalmasına səbəb olurdu. Məhz belə bir şəraitdə - 1992-ci ilin oktyabrında cəmiyyətimizin parlaq simaları, ziyalılar, ictimaiyyət arasında böyük hörmətə malik olan insanlar - 91-lər Yeni Azərbaycan Partiyası kimi problemləri həll edəcək, xalqa, millətə, dövlətə dəstək olacaq bir siyasi qurumun yaradılması üçün o vaxt Naxçıvan Muxtar Respublikasının Ali Məclisinin sədri olan Heydər Əliyevə müraciət ünvanladılar. Onlar bu müraciəti ünvanlayarkən inanırdılar ki, Vətənini canı qədər sevən ulu öndər bu çağrışa biganə qalmayacaq, çox ağır vəziyyətə düşən Azərbaycanın fəlakətlərdən xilası üçün cəhdlərini əsirgəməyəcək. Ulu öndər Heydər Əliyevin müraciətə cavabında Yeni Azərbaycan Partiyasının yaradılması obyektiv zərurətdən doğan addım kimi dəyərləndirildi, belə partiyanın Azərbaycanın ictimai-siyasi həyatında fəal iştirak edərək yeni, müstəqil Azərbaycan dövlətinin möhkəmləndirilməsində və inkişafında tarixi rol oynaya biləcəyi bildirildi: "Azərbaycan Respublikasının dövlət müstəqilliyi əldə etməsi tarixi hadisədir və şübhəsiz ki, bütün Azərbaycan vətəndaşlarını hədsiz dərəcədə sevindirir. Eyni zamanda, bu əlamətdar hadisə müstəqil Azərbaycan dövləti, Azərbaycan xalqı qarşısında çox məsul, mürəkkəb, çətin vəzifələr qoyur. İndi əsas vəzifə dövlətçiliyin, müstəqilliyin bərqərar olunmasını, milli-demokratik dövlətin formalaşmasını, müstəqil Azərbaycanın suverenliyini, təhlükəsizliyini təmin etmək və vətəndaşlara azad, xoşbəxt, firavan həyat şəraiti yaratmaqdan ibarətdir. Bu xeyirxah və şərəfli işə hər bir vətənpərvər öz layiqli töhfəsini verməlidir". Beləliklə, 1992-ci il noyabrın 21-də Naxçıvanda Yeni Azərbaycan Partiyasının təsis konfransı keçirildi. Bu məqamda xatırlatmaq yerinə düşər ki, bu gün özünü demokrat adlandıran, ancaq 20 il ərzində demokratiyanın nə olduğunu anlamayan o vaxtkı iqtidar bu demokratik prosesin paytaxtda baş tutmasına imkan vermədi, təsis konfransının Bakıda keçirilməsinə şərait yaratmadı. Bundan sonra Heydər Əliyev YAP-ın yaradılması barədə müraciətə müsbət cavab verəndən sonra - 1992-ci il oktyabrın 24-də Naxçıvandakı AXC-Müsavat funksionerləri dövlət çevrilişinə cəhd göstərdilər. Lakin bundan xəbər tutan xalq Heydər Əliyevin müdafiəsində dayandılar, dövlət çevrilişinə cəhd edənləri tərkisilah etdilər. Bütün bunları isə "demokratlar" özlərinin "demokrat" liderlərinin göstərişinə əsasən edirdilər. Buna baxmayaraq, partiyanın ideyaları, ulu öndərin müdrikliyi, onun cəmiyyətdəki nüfuzu və rolu bütün maneələri üstələdi. Qısa müddət ərzində Yeni Azərbaycan Partiyası ümumxalq partiyasına çevrildi.

Həmin illərdə ölkəmizdə hadisələrin gözlənilən gedişi vəziyyətin gərginləşməsi ilə nəticələndi. "Gözlənilən" deyirik, çünki idarəçilik səriştəsi olmayanların atdığı addımların doğuracağı qarşıdurmalar, toqquşmalar gözlənilən idi. 1993-cü ildə Gəncədə baş verən hadisələr isə xalqın səbrini daşıran son damla oldu. Bundan sonra xalq kütlələri Heydər Əliyevin Bakıya gəlməsini və Azərbaycanı bu ağır vəziyyətdən xilas etməsini təkidlə tələb edirdilər. Azərbaycan cəmiyyəti dövlət başçısı vəzifəsində qətiyyətli, cəsarətli, mətanətli və heç bir təhlükədən çəkinməyən, eyni zamanda siyasi prosesləri layiqincə qiymətləndirməyi bacaran, dövlət idarəçiliyində təcrübəsi olan bir insanı görmək istəyirdi. Bu insan Heydər Əliyev idi. Həmişə xalq ilə bir yerdə olan ulu öndər ictimaiyyətin səsinə səs verərək ikinci dəfə siyasi hakimiyyətə qayıtdı. Xalq onu siyasi hakimiyyətə dəvət etməklə milli dövlətçiliyimizə qurtuluş, ölkə əhalisinə nicat, regiona sabitlik, Yeni Azərbaycan Partiyasına isə möhtəşəm bir nüfuz qazandırmış oldu. Ulu öndərin siyasi hakimiyyətə qayıdışı ilə ölkədə daxili sabitlik yarandı, xalqın dövlətə inamı bərpa edildi, cəbhədə atəşkəsə nail olundu, yeni neft strategiyasının icrası reallaşdı, gənc müstəqil dövlətimizin beynəlxalq aləmə inteqrasiyası sürətləndirildi, cəmiyyət həyatının bütün sahələrində köklü islahatlara start verildi. Bütün bu proseslərin fonunda Yeni Azərbaycan Partiyası ümumxalq partiyasına çevrildi. Mühasirə şəraitində yaşayan Naxçıvan Muxtar Respublikasında yaradılan Yeni Azərbaycan Partiyası qısa bir müddət ərzində yüz minlərin partiyasına çevrildi.

Digər bir məsələyə toxunaraq qeyd etmək istərdik ki, bəzi ekspertlər belə düşünürlər ki, istənilən ölkədə yaranmış siyasi partiyanın fəaliyyəti ölkə daxilində reallaşdırılır və ancaq bu məhdud məkanı əhatə edir. Ancaq zaman sübut edir ki, həmin yanaşma kökündən yanlışdır. Çünki partiya öz məramnaməsində qarşıya qoyduğu vəzifələri reallaşdırmaq üçün mütləq regionda və dünyada gedən prosesləri nəzərə almalı, reallıqlara əsaslanmalıdır. Fəxrlə deyə bilərik ki, bu sahədə də Yeni Azərbaycan Partiyası özünəməxsus nümunələr göstərmişdir. Əvvəla, Yeni Azərbaycan Partiyasını yaratmaq ideyasını ortaya atanlar ölkəmizdə və regiondakı bir çox siyasi partiyalardan fərqli olaraq cəmiyyətin qaymağı sayılan insanları öz ətrafında toplamışdılar. Siyasi cəhətdən yetkin olmayan, məram və məqsədi cəmiyyət tərəfindən qəbul edilməyən, ictimai-siyasi mövqeyi bilinməyən adamların formalaşdırdığı güc mərkəzlərindən fərqli olaraq Yeni Azərbaycan Partiyasının məqsədi aydın, məramı bəlli idi. Ona görə də bu quruma tanınmış ziyalılar, siyasət, diplomatiya və iqtisadiyyat sahəsində təcrübəsi olan, cəmiyyət tərəfindən qəbul edilən insanlar üz tutmuşdular.

Yeni Azərbaycan Partiyasının göstərdiyi nümunələrdən biri də partiya sədrinin liderlik məharəti və siyasi müdriklik səviyyəsi ilə bağlı idi. Bəzi xırda partiyalardan fərqli olaraq YAP-ın qısa müddətdə möhtəşəm qüdrətli bir siyasi gücə çevrilməsinin əsas səbəbi onun liderinin müdrikliyi idi. Kimsə ətrafına 50-100 adam toplayıb özünü partiya sədri elan edirdisə, Heydər Əliyevə xalqın ziyalı zümrəsi onu özünə lider seçmək üçün müraciət etmiş, yeni yaradılan partiyaya məhz onun sədrlik etməsini istəmişdi. Bu, mühüm faktor idi. Çünki ziyalılar bilirdilər ki, ölkənin və regionun həmin günlərində Yeni Azərbaycan Partiyasının qarşısında duran vəzifələri reallaşdıra biləcək yeganə şəxsiyyət məhz ulu öndər Heydər Əliyevdir. Xalqın öndə gedən insanlarının qətiyyəti özünü yüksək səviyyədə doğrultdu və ümummilli lider Heydər Əliyevin siyasi müdrikliyi nəticəsində Yeni Azərbaycan Partiyası, qısa zamanda böyük siyasi gücə çevrildi. Bir daha qeyd edək ki, Yeni Azərbaycan Partiyasının ümumxalq məhəbbəti qazanmasının, yaranmasından cəmi 6 ay sonra ölkədə siyasi hakimiyyətə gəlməsinin əsas səbəbi onun rəhbərliyində Heydər Əliyev kimi siyasət dahisinin olması idi.

Ulu öndərin "Dünənin, bu günün və gələcəyin partiyası" adlandırdığı Yeni Azərbaycan Partiyasının öz siyasi xəttinə sadiqliyi, xalq, dövlət qarşısında xidmətləri, ölkəmizin bir-birini əvəzləyən uğurlarına atdığı imzası onun cəmiyyətdəki mövqeyini daha da möhkəmləndirmiş, ümumxalq partiyası olduğunu təsdiqləmişdir. Heydər Əliyev siyasi müdrikliyinin nəticəsi idi ki, gənclərin lideri kimi qəbul edilmiş, Milli Olimpiya Komitəsinin prezidenti İlham Əliyev YAP sədrinin müavini, daha sonra isə birinci müavini seçildi. Bu seçim gənclərin Yeni Azərbaycan Partiyasına axınına səbəb oldu. Daha sonra cənab İlham Əliyevin partiya sədri seçilməsi üzvlərin sayının YAP-ın siyasi tarixində ən yüksək həddə - 600 min nəfərə çatması ilə müşayiyət olundu. Bu qədər çoxsaylı siyasi həmfikiri birləşdirən Yeni Azərbaycan Partiyası təkcə ölkəmizin deyil, eləcə də regionun və dünyanın ictimai-siyasi həyatında mühüm rol oynayır. Artıq bu partiyanın xətti ilə Bakıda bir neçə beynəlxalq tədbir keçirilib. Dünyanın aparıcı siyasi partiyaları ilə əməkdaşlıq edən Yeni Azərbaycan Partiyası özünün bütün uğurlarına görə ulu öndər Heydər Əliyevin siyasi müdrikliyinə minnətdardır.

Rauf KƏNGƏRLİ

Xalq qəzeti.- 2012.- 20 noyabr.- S. 3.