Məşhur aktyorun yubileyi

Xarakterik və tipik obrazların mahir ifaçısı Məmmədağa Dadaşovoynadığı rollar ilə xalqın qəlbində özünəməxsus iz qoymuşdur. Gənc Tamaşaçılar Teatrında fəaliyyət göstərən səhnə ustası M.Dadaşov komediya, faciə, nağıl -tamaşalarda müxtəlif xarakterli obrazlar yaradıb.

"Dədə Qorqud", "Yol əhvalatı", "Köç" və digər filmlərdə də oynadığı rollar aktyorun obrazlar qalereyasının gözəl nümunələrindəndir. Bu günlərdə Mədəniyyət və Turizm Nazirliyinin təşkilatçılığı ilə Azərbaycan Dövlət Gənc Tamaşaçılar Teatrında istedadlı teatr və kino aktyoru, görkəmli sənətkar Məmmədağa Dadaşovun 100 illik yubileyi qeyd olunub. Tədbirdə iştirak edən ADGTT-nin direktoru, əməkdar artist Mübariz Həmidov onun həyat və fəaliyyətindən söhbət açaraq bildirmişdir ki, yubiley gecəsinin məhz Dövlət Gənc Tamaşaçılar Teatrında keçirilməsi heç də təsadüfi deyil. Çünki Məmmədağa Dadaşov bu mədəniyyət ocağının ilk aktyorlarından biri olub.

Gecədə Teatr Xadimləri İttifaqının sədri Azərpaşa Nemətov, xalq artisti Yasin Qarayev, əməkdar artist Cəfər Namiq Kamal yubilyarla bağlı xatirələrini bölüşdülər.

Sənətsevərlərin, vaxtilə Məmmədağa Dadaşovla eyni səhnəni paylaşan aktyorların iştirak etdiyi ədəbi-bədii gecədə istedadlı müğənni Təranə Mahmudovanın ifası, əməkdar artist Gülyaz Məmmədovanın, ADGTT-nin aktrisası Almaz Mustafayevanın, xanəndə Firuz Səxavətin, "Cəngi" rəqs ansamblının, "Təbəssüm" uşaq rəqs qrupunun, Dadaşovlar nəslinin nümayəndələri Həcər Ağayeva və Tahir Eynullayevin və digərlərinin çıxışları tədbirə əlavə rəng qatdı.

Əməkdar incəsənət xadimi, professor Tariyel Vəliyev yubiley haqqında təəssüratlarını bizimlə bölüşdü: "O, Məmmədağa Dadaşovun yüksək yumor hissinə sahib olması, oynadığı rolları xüsusi peşəkarlıqla tamaşaçılara çatdırması, həmin rolların hələ də yaddaşlarda qalmasından bəhs etdi. Biz aktyorlar, yəni mənim nəslim xoşbəxtdir ki, M.Dadaşov kimi sənətkarla bir yerdə işləmişik. Məmmədağa müəllim çox yüksək mədəniyyətə malik insan idi və həmişə biz gənc aktyorlara ata qayğısı ilə yanaşırdı".

Rejissor Nicat Kazımov: "Demək olar ki, bu insan Azərbaycan teatrının tarixini yazıb. Çox təəssüflər olsun ki, onun yazdıqları heç yerdə çap olunmayıb. Əslində teatr salnaməsi yazan insanlar, bizim teatr tariximizlə maraqlananlar onun yazdıqlarını izləsələr, çap etsələr, daha yaxşı olar. Məmmədağa müəllimin hələ də üzə çıxmayan əl yazısı ilə yazılmış arxivi vardır və onu ortaya çıxarmaq lazımdır. Bir şeyə təəssüf edirəm ki, onun əlyazmaları heç yerdə çap edilməyib."

Mərasimin özəlliyi ondan ibarət idi ki, aktyorun heç vaxt efirdə getməmiş müsahibəsinin lent yazısından kiçik bir hissə nümayiş olundu. Tədbirdə həmçinin Məmmədağa Dadaşovun çəkildiyi filmlərdən kadrlar nümayiş etdirildi.

Sonda aktyorun qızı, əməkdar artist Kübra Dadaşova atası ilə bağlı xatirələrini tədbir iştirakçıları ilə bölüşdü və yubileydə iştirak edən hər kəsə minnətdarlığını bildirdi.

Ülviyyə VAHİDQIZI

Xalq qəzeti.- 2012.- 24 noyabr.- S. 6.