Nizami rayonunda payız-qış mövsümünə hazırlığın vəziyyəti müzakirə olundu

Son zamanlar havaların nisbətən mülayim keçməsinə baxmayaraq, yerlərdə payız-qış mövsümünə hazırlığın vəziyyəti ciddi müzakirə olunur, qarşıya çıxan problemlərin vaxtında aradan qaldırılması üçün müvafiq tədbirlər həyata keçirilir.

Bakı Şəhəri Nizami Rayon İcra Hakimiyyətində Fövqəladə Hallar Nazirliyinin Bakı Regional Mərkəzi ilə birgə "Payız-qış mövsümünə hazırlığın yekunları" və "Yanğınların profilaktikasında və yanğın hadisələri zamanı əhaliyə düzgün davranış vərdişlərinin aşılanmasında yerli icra hakimiyyətləri və yerli özünüidarəetmə orqanlarının rolu" mövzusunda keçirilən müşavirədə də bu barədə ətraflı danışıldı.

Tədbiri giriş sözü ilə açan Nizami Rayon İcra Hakimiyyətinin başçısı Tahir Budaqov iştirakçıları müşavirənin gündəliyi ilə tanış edərək onları payız-qış mövsümünə hazırlıqla bağlı işlərin müzakirəsində fəal iştirak etməyə səslədi.

Fövqəladə Hallar Nazirliyi Bakı Regional Mərkəzinin rəis müavini, polkovnik Cəfər Məmmədovun yanğın təhlükəsizliyi qaydaları barədə məlumatından sonra "Fövqəladə Hallar Nazirliyinin fəaliyyət istiqamətləri və struktur bölmələri" və "Dəm qazı ilə zəhərlənmə hallarının qarşısının alınması" barədə video-material nümayiş etdirildi.

Sonra Nizami Rayon İcra Hakimiyyəti başçısının birinci müavini Qərib Məmmədov "2012-2013-cü illərin payız-qış mövsümünə hazırlıqla bağlı rayonun təsərrüfat və xidmət sahələri tərəfindən görülmüş işlər barədə" hesabat məruzəsi ilə çıxış etdi. Qeyd olundu ki, Nizami rayonunun yaşayış fondu 730 binadan ibarətdir ki, bundan da 515-i mərkəzi istilik sistemi vasitəsilə 215-i isə divar sobaları ilə qızdırılır. 2012-2013-cü illərin payız-qış mövsümünə hazırlıqla əlaqədar rayon icra hakimiyyəti başçısının müvafiq sərəncamı ilə təsdiq olunmuş tədbirlər planına uyğun olaraq 17 nəfərdən ibarət qərargahın yaradıldığını diqqətə çatdıran məruzəçi qeyd etdi ki, ötən müddətdə mərkəzi istilik sisteminin, su və kanalizasiya xətlərinin, istilik məntəqələri və qazanxanaların, soba və tüstü bacalarının normal fəaliyyətini təmin etmək məqsədilə müvafiq profilaktik tədbirlər görülmüş, təmir-bərpa işləri aparılmışdır. Belə ki, "Azəristilik" ASC-nin 4 və 16 saylı istilik sistemləri istismar sahələrinin balansında olan qazanxanalarda 31 ədəd qazan əsaslı, 100 qazan isə cari təmir edilmiş və digər profilaktik işlər görülmüş, istismar dövrünü başa vurmuş avadanlıqlar dəyişdirilmiş və ya yeniləri ilə əvəz olunmuşdur. Hesabat dövründə 8581 paqonometr magistral və məhəllədaxili istilik boruları əsaslı təmir edilmiş, 14 yaşayış binasının aşağı paylayıcı istilik xətlərində təmir işləri aparılmışdır. Bundan əlavə, "2011-2013-cü illərdə Bakı şəhərinin və onun ətraf qəsəbələrinin sosial-iqtisadi inkişafına dair Dövlət Proqramı" çərçivəsində rayonun təhsil və səhiyyə müəssisələrinin payız-qış mövsümündə istiliklə təminatının yaxşılaşdırılması üçün müvafiq işlər görülmüşdür.

Nizami Rayon Enerji Təchizatı və Satışı İdarəsinin xidməti ərazisində 4 ədəd zəif transformator güclüsü ilə əvəz edilmiş, 13 ədəd transormator məntəqəsində isə avadanlıqlar cari təmir olunmuş, hava və kabel xətləri dəyişdirilmiş, rayon ərazisində yerləşən yarımstansiyalarda bir sıra yenidənqurma işləri aparılmışdır. Rayon sakinlərinin "mavi yanacaq" la təminatının yaxşılaşdırılması məqsədilə hesabat dövründə Nizami Qaz İstismar Sahəsi tərəfindən lazımi işlərin görüldüyünü diqqətə çatdıran Q. Məmmədov bildirdi ki, hazırda "8-ci kilometr əsas" qaz kəmərinin yenidən qurulması, fərdi yaşayış evlərindən məhəllədaxili ərazilərdən qaz xətlərinin çıxarılması, eləcə də mövcud qaz kəmərlərinin yenidən qurulması ilə əlaqədar müxtəlif tədbirlər həyata keçirilmişdir. Növbəti payız-qış mövsümünə hazırlıq tədbirləri çərçivəsində rayon sakinlərinin içməli su təminatının və kanalizasiya xidmətlərinin səviyyəsini yaxşılaşdırmaq üçün 856 paqonometr kanalizasiya və 5037 paqonometr su xətləri, eləcə də 282 paqonometr yağış su xətti çəkilmiş, mövcud şəbəkələrdə bir sıra yenidənqurma işləri aparılmışdır.

Məruzəçi qeyd etdi ki, ötən müddətdə Nizami Rayon Mənzil-Kommunal Təsərrüfatı Birliyi mövsümə hazırlıqla əlaqədar olaraq balansında olan binaların dam örtüklərini, binadaxili istilik və elektrik xətlərini təmir etmiş, ümumi istifadə yerlərini şüşələmiş, giriş qapı və pəncərələri dəyişdirmiş, tüstü bacaları və havalandırma kanallarını təmizləmişdir. Bununla yanaşı, qarlı-şaxtalı günlərdə nəqliyyatın hərəkətini tənzimləmək və piyadaların gediş-gəlişini asanlaşdırmaq məqsədilə müvafiq işlər görülmüş, maşın və mexanizmlər işlək vəziyyətə gətirilmişdir. Rayonun təhsil və səhiyyə müəssisələri üzrə payız-qış mövsümünə hazırlıqla bağlı mühüm işlərin görüldüyünü diqqətə çatdıran natiq qeyd etdi ki, hesabat dövründə 4 orta məktəb, 1 uşaq bağçası və 3 səhiyyə müəssisəsi əsaslı təmir olunmuşdur. Ayrı-ayrı təhsil və səhiyyə müəssisələrində 13080 paqonometr müxtəlif diametrli istilik borusu, 3860 metr qapı və pəncərə blokları və 4110 kvadratmetr şüşə dəyişdirilmiş, 12180 kvadratmetr dam örtüyü təmir olunmuşdur. Natiq bu işlərin hazırda da davam etdirildiyini diqqətə çatdırdı.

Daha sonra Fövqəladə Hallar Nazirliyi Bakı Regional Mərkəzinin şöbə rəisi, daxili xidmət mayoru Elgün Ələkbərovun "Yanğının başvermə səbəbləri və yanğın zamanı hərəkət qaydaları" mövzusunda məruzəsi dinlənildi. Məruzəçi 2011 və 2012-ci illərin doqquz ayında baş vermiş yanğın hadisələri və onların acı nəticələri, eləcə də dəm qazı nəticəsində qeydə alınmış ölüm və zəhərlənmə hallarının statistikasını açıqladı. Onların səbəbləri barədə tədbir iştirakçılarına ətraflı məlumat verən E. Ələkbərov bu cür xoşagəlməz hadisələr zamanı tələb olunan hərəkət qaydalarından bəhs etdi.

Məruzələr ətrafında çıxışlar dinlənildikdən sonra rayon icra hakimiyyətinin başçısı Tahir Budaqov müşavirəyə yekun vurdu. Payız-qış mövsümünə hazırlıqla bağlı görülmüş işləri qənaətbəxş hesab edən başçı bəzi nöqsan və çatışmazlıqların üzərində geniş dayandı, onların təcili surətdə aradan qaldırılması ilə əlaqdar müvafiq qurumların rəhbərlərinə konkret tapşırıqlar verdi.

Mirbağır YAQUBZADƏ

Xalq qəzeti.- 2012.- 25 noyabr.- S.3