Azərbaycanda regional turizm peşə məktəbləri şəbəkəsi yaradılır

Azərbaycan Turizm İnstitutunda ATİ və Almaniya Beynəlxalq Əməkdaşlıq Cəmiyyətinin (GİZ) birgə təşkilatçılığı ilə "Şəki-Zaqatala regionunda turizm peşə kadrlarının hazırlığı" mövzusunda seminar keçirildi. Təqdimat-dinləmələr şəklində keçirilən toplantıda ATİ-nin rektoru, tarix elmləri doktoru, professor Cəfər Cəfərov tədbir iştirakçılarını salamladı və bu gün ölkə iqtisadiyyatının dinamik inkişafında turizm sektorunun əhəmiyyətini açıqladı.

C.Cəfərov çıxışında ATİ-də ixtisaslı kadr hazırlığı istiqamətində görülən tədris - təlim - tədqiqat işlərindən və qazanılan nəticələrdən ətraflı bəhs edərək qeyri-neft sektorunda müstəsna rol oynayan turizm sənayesinin böyük perspektivindən danışdı. Ölkə Prezidenti cənab İlham Əliyevin bütün sahələrə olduğu kimi, turizm sahəsinə xüsusi diqqət ayırdığını, müddətli dövlət proqramına dair sərəncam imzaladığını tədbir iştirakçılarının nəzərinə çatdırdı. Rektor çıxışı zamanı xüsusi olaraq vurğuladı ki, digər sahələrlə müqayisədə turizmi etibarlı, daimi sahə kimi dəyərləndirmək lazımdır. O, əmək bazarında ali təhsilli turizm ixtisaslı kadrlarla yanaşı xidmət personalına da böyük ehtiyac olduğunu konkret faktlarla isbatladı.

Azərbaycan Turizm İnstitutunun nəzdində Bakı Turizm Peşə Məktəbinin fəaliyyətə başlamasını günün reallığı kimi səciyyələndirdi. Ölkənin şimal- qərb regionunda turizm peşə məktəbinin yaranmasının əhali tərəfindən böyük razılıqla qarşılandığını diqqətə çatdırdı. Natiq çıxışında digər regional peşə məktəblərinin yaradılması ilə bağlı tədqiqatlar aparılacağının gündəmdə olduğunu, hətta Qusarda bu istiqamətdə işə artıq start verildiyini bildirdi. Bir daha xatırlatdı ki, regional turizm peşə məktəbləri hələlik müəyyən rayonlarda - Qusarda, Zaqatalada, Şəmkirdə, Göygöldə, Masallıda fəaliyyət göstərəcək.

Rektor ATİ və Almaniya Beynəlxalq Əməkdaşlıq Cəmiyyətinin birgə təşkilatçılığı ilə ölkənin 6 rayonunda (Şəki, Balakən, Oğuz, Qəbələ, Qax və Zaqatala) keçirilən sorğu-tədqiqatlar barədə tədbir iştirakçılarını məlumatlandırdı. Sonra Turizm və Regional İnkişaf üzrə ekspert cənab Ayke Ottonun, ATİ-nin Tədqiqat və İnkişaf Şöbəsinin baş məsləhətçisi cənab Julius Arneggerin, Avropa İttifaqının Peşə təhsili üzrə Tvinninq layihəsinin rəhbəri cənab Rudiger Heyniqin təqdimatları dinlənildi. Seminarın sonunda təqdimatlar ətrafında fikir mübadiləsi aparıldı və sorğu nəticələrinin gələcək planların icrası zamanı nəzərə alınacağı qeyd edildi.

"Şəki - Zaqatala iqtisadi rayonunda aparılmış sorğu nəticələrinin ictimaiyyətə təqdimatı" mövzusunda keçirilən seminarda Azərbaycan Respublikası Mədəniyyət və Turizm Nazirliyinin və Azərbaycan Respublikası Təhsil Nazirliyinin məsul işçiləri iştirak edirdilər.

Z. BƏŞİRQIZI

Xalq qəzeti.- 2012.- 25 oktyabr.- S. 10.