Nərimanov rayonu: Abadlıq-quruculuq işləri yeni vüsət alır

Ölkəmizdə aparılan uğurlu islahatların müsbət nəticələri getdikcə artır. Məhz bu islahatların nəticəsidir ki, hazırda Azərbaycan Respublikası regionun ən sabit inkişaf edən ölkəsinə çevrilmişdir. Son illər ölkəmizin maliyyə gücünün xeyli artması paytaxt Bakıda, eləcə də regionlarda mühüm infrastruktur layihələrinin reallaşdırılmasına imkan yaratmışdır. Dövlət başçısı İlham Əliyevin xüsusi diqqət və qayğısı nəticəsində hazırda ölkənin hər yerində geniş quruculuq və abadlıq işləri aparılır, şəhər və rayonlarımız yeni görkəm alır, insanların həyat səviyyəsi getdikcə yaxşılaşdırılır. Ölkədə həyata keçirilən uğurlu sosial-iqtisadi siyasət Bakı şəhərinin mərkəzi rayonlarından olan Nərimanov rayonunun da hərtərəfli inkişafına təkan vermişdir. Elə bu ilin ötən döqquz ayında da Nərimanov rayonunun sosial-iqtisadi sferasında yüksək nailiyyətlər əldə edilmiş, rayonun tarixində bir sıra əlamətdar hadisələr baş vermişdir.

Makroiqtisadi göstəricilər yüksəkdir

Son illər sosial-iqtisadi inkişaf sahəsində əldə etdiyi yüksək nailiyyətlər Nərimanov rayonunu paytaxtın, eləcə də ölkənin qabaqcıl rayonlarından birinə çevirmişdir. Təsadüfi deyil ki, indi rayon bütün statistik göstəricilərinə görə ölkə üzrə öncül sıralarda qərarlaşmışdır. Sevindirici haldır ki, bu inkişaf və tərəqqi meyilləri cari ilin ötən dövründə də davam etmiş, rayon özünün inkişaf salnaməsinə yeni səhifələr yazmışdır. Elə sosial-iqtisadi inkişafı təmin edən ayrı-ayrı sahələr üzrə son doqquz ayda görülmüş işlər, həyata keçirilmiş tədbirlər də bunu bir daha təsdiq edir. 2012-ci ilin yanvar-sentyabr aylarında rayon iqtisadiyyatının əsasını təşkil edən sənayenin dinamik inkişafı nəticəsində xidmətlər də daxil olmaqla 1 milyard 373,5 milyon manatlıq məhsul istehsal olunmuşdur. Hesabat dövründə istehlakçılara 1 milyard 384,9 milyon manatlıq sənaye məhsulu göndərilmişdir. İlin ötən dövründə rayonun sənaye kompleksində işləyənlərin sayı 9227 nəfər təşkil etmiş, onların orta nominal əmək haqqı 10,3 faiz artaraq 410,3 manat olmuşdur. Nərimanov rayonunda məşğulluq strategiyasının reallaşdırılması, sakinlərin işlə təminatı da xüsusi diqqət mərkəzində saxlanılmışdır. Bu ilin doqquz ayında Nərimanov Rayon Məşğulluq Mərkəzinə 1185 nəfər işaxtaran vətəndaş müraciət etmişdir ki, onlardan da 726 nəfəri müxtəlif iş yerləri ilə təmin olunmuşdur. Bütövlükdə isə yanvar-sentyabr aylarında rayonda yeni müəssisələrin açılması, mövcud müəssisələrin fəaliyyətinin bərpa edilməsi nəticəsində 1992 daimi iş yeri yaradılmışdır.

Sürətli inkişafı təmin edən başlıca şərtlərdən biri də investisiya fəallığı ilə bağlıdır. Təqdirəlayiq haldır ki, Nərimanov rayonunda bu sahədə də ciddi artım müşahidə edilmişdir. Təkcə onu demək kifayətdir ki, cari ilin doqquz ayında rayon üzrə bütün mənbələr hesabına əsas kapitala 89,8 milyon manatlıq investisiya qoyulmuşdur ki, bu da ötən ilin müvafiq dövrünə nisbətən 3,1 dəfə çoxdur. Son zamanlar rayonun tikinti kompleksində müşahidə olunan canlanma bu ilin ötən dövründə də müşahidə olunmuş, tikinti təşkilatları tərəfindən öz gücləri ilə 609,5 milyon manatlıq inşaat işləri həyata keçirilmişdir. Bu isə 2011-ci ilin müvafiq dövrünə nisbətən 74,1 faiz çoxdur. İqtisadiyyatın başqa sahələrində olduğu kimi, əhalinin həyat səviyyəsini xarakterizə edən əsas göstəricilərdən biri olan pullu xidmətlərin həcmi də xeyli artmışdır. Belə ki, son doqquz ayda rayon əhalisinə 201,3 milyon manatlıq pullu xidmətlər göstərilərək ötən ilin eyni dövrünə nisbətən 2,5 faiz artım əldə edilmişdir.

Ölkədə əlverişli biznes mühitinin yaradılmasının, azad sahibkarlığa və təşəbbüskarlığa geniş meydan verilməsinin nəticəsidir ki, son illər Nərimanov rayonunda müasir standartlara cavab verən çoxsaylı kiçik və orta müəssisələr yaradılmışdır. Hazırda həmin müəssisələrdə yüksək keyfiyyətli yeyinti məhsulları, məişət avadanlıqları, tikinti materialları və digər məhsullar istehsal olunur, əhaliyə nümunəvi xidmətlər göstərilir. Müasir standartlara uyğun yaradılmış müəssisələrdə istehsal olunan mallar isə daxili bazarda məhsul bolluğunun təmin edilməsi ilə yanaşı, ixraca da yönəldilir. Bütün bunlar isə öz növbəsində rayonda ticarət sahəsinin xeyli inkişaf etməsinə səbəb olmuşdur. Bu ilin doqquz ayında Nərimanov rayonunda ticarət üzrə pərakəndə əmtəə dövriyyəsinin həcmi 673,5 milyon manat təşkil etmiş, əhaliyə 39,8 milyon manatlıq ictimai iaşə xidməti göstərilmişdir. Müqayisə üçün deyək ki, bu sahələrdə əldə edilən göstəricilər ötən ilin eyni dövrünə nisbətən müvafiq olaraq 16,1 faiz və 61,1 faiz artmışdır.

Abadlıq-quruculuq işləri geniş vüsət alır

Ölkə Prezidenti İlham Əliyevin Bakının və ətraf qəsəbələrin sosial-iqtisadi inkişafına dair təsdiq etdiyi müvafiq proqramlar, imzaladığı sərəncamlar, verdiyi tapşırıqlar Nərimanov rayonunun da sürətli inkişafına, infrastruktur sahələrinin bərpası və genişləndirilməsinə, sosial-mədəni obyektlərin yaradılmasına, bununla da, əhalinin layiqli həyat tərzinin təmin olunmasına müstəsna töhfələr vermişdir. Son illər Nərimanov rayonunun geniş quruculuq məkanına çevrilməsinin ən başlıca səbəblərindən biri ölkəmizin bütün bölgələri kimi, bu rayona da dövlət başçısı İlham Əliyev tərəfindən xüsusi diqqət və qayğı göstərilməsidir. Elə cari ilin ötən doqquz ayı ərzində ölkə Prezidentinin müxtəlif açılış və təməlqoyma mərasimlərində iştirak etmək üçün səkkiz dəfə bu rayonda olması da bunu təsdiq edir. Belə ki, dövlət başçısı fevralın 8-də əsaslı təmir və yenidənqurma işlərindən sonra 305 nömrəli körpələr evi-uşaq bağçasında yaradılan şəraitlə, martın 9-da Tofiq Bəhramov adına Respublika stadionunda həyata keçirilən əsaslı təmir və yenidənqurma işlərinin gedişi ilə tanış olmuş, martın 16-da "Bakıelektrikşəbəkə" ASC-nin "Gənclik" yarımstansiyasının və tədris mərkəzinin açılışında iştirak etmişdir. Aprelin 19-da Teymur Əliyev küçəsində yeni inşa edilən tibb məntəqəsində tikinti işlərinin gedişi, 10 aprel və 6 may tarıxlərində isə Heydər Əliyev Mərkəzində aparılan inşaat işlərinin gedişatı ilə tanış olan Prezident İlham Əliyev G. Qədirbəyova və İ. Həsənoğlu küçələrinin kəsişməsində yeni çəkilmiş yolun açılışında da iştirak etmişdir.

Azərbaycan dövlətinin qurucusu və memarı, ulu öndər Heydər Əliyevin adının əbədiləşdirilməsinə, onun ideyalarının reallığa çevrilməsinə ən böyük töhfə sayılan və Azərbaycanın yeni simvoluna çevrilən, nadir memarlıq abidəsi olan Heydər Əliyev Mərkəzi ümummilli liderin doğum günü ərəfəsində istifadəyə verilmişdir. Təntənəli açılış mərasimində ölkə Prezidenti İlham Əliyev, respublikamızın birinci xanımı, YUNESKO və İSESKO-nun xoşməramlı səfiri, Heydər Əliyev Fondunun prezidenti, millət vəkili Mehriban Əliyeva, Heydər Əliyev Fondunun vitse-prezidenti Leyla Əliyeva, respublikanın rəsmi dövlət və hökumət nümayəndələri iştirak etmişlər. Açılış günündə mərkəzdə ümummilli liderimiz Heydər Əliyevin anadan olmasının 89-cu ildönümü və Heydər Əliyev Fondunun fəaliyyətə başlamasının səkkiz illiyi münasibətilə təntənəli mərasim keçirilmişdir. Yeri gəlmişkən, Heydər Əliyev Mərkəzi istifadəyə verildiyi gündən beynəlxalq və respublika səviyyəli mühüm tədbirlərin keçirildiyi məkana çevrilmişdir. Belə ki, iyunun 30-da Heydər Əliyev Mərkəzində Krans Montana Forumunun rəsmi açılışı olmuş, ölkə Prezidenti İlham Əliyev və xanımı Mehriban Əliyeva mərasimdə iştirak etmişlər. İyulun 3-də isə burada Prezident İlham Əliyev və xanımı Mehriban Əliyevanın iştirakı ilə London şəhərində keçiriləcək XXX Yay Olimpiya Oyunlarında Azərbaycanı təmsil edən nümayəndə heyətinin rəsmi yolasalma mərasimi keçirilmişdir. Avqustun 16-da Tofiq Bəhramov adına Respublika stadionunun əsaslı təmir və yenidənqurmadan sonra istifadəyə verilməsi ilə bağlı keçirilən açılış mərasimində ölkə başçısı İlham Əliyev iştirak etmişdir. Sentyabrın 21-də Azərbaycan Diplomatik Akademiyasının yeni tədris kompleksinin açılışında iştirak edən Prezident və xanımı sentyabrın 22-si və oktyabrın 13-də Tofiq Bəhramov adına Respublika stadionunda futbol üzrə 17 yaşlı qadınlar arasında keçirilən dünya çempionatının təntənəli açılış, eləcə də final oyunu və bağlanış mərasimlərinə qatılmışlar.

"2011-2013-cü illərdə Bakı şəhərinin və onun qəsəbələrinin sosial-iqtisadi inkişafı Dövlət Proqramı"nda Nərimanov rayonu üzrə nəzərdə tutulmuş tədbirlər də uğurla reallaşdırılır. Xatırladaq ki, proqramda rayon əhalisinin elektrik enerjisi, qaz, istilik, içməli su təminatı ilə bağlı 31 tədbir nəzərdə tutulmuşdur. Artıq bu tədbirlərdən 15-i icra olunmuş, qalanlarının icrası isə davam etdirilir.

Rayonda yol infrastrukturunun yeniləşdirilməsi istiqamətində mühüm tədbirlər həyata keçirlimişdir. Cari ilin ötən dövrü ərzində Xətai, Azadlıq prospekti, Akademik Həsən Əliyev, Əliyar Əliyev və Əhməd Rəcəbli küçələrinin yenidən qurulması işləri başa çatdırılmışdır. Gənclik meydanında yeraltı yol ötürücülərinin və yeraltı avtomobil dayanacağının inşa edilməsi, metronun "Gənclik" stansiyasının ətrafında yerləşən binaların fasadlarının milli memarlıq üslubunda yenidən qurulması, Vaqif prospektinin genişləndirilməsi, Ziya Bünyadov prospektinin yenidən qurulması, şəhərin baş planına uyğun digər layihələrin reallaşdırılması ilə bağlı tədbirlər də davam etdirilmişdir. Koroğlu Rəhimov, Ə.Əbdürrəhimov küçələrində istismar müddətini keçmiş, yararsız hala düşmüş yaşayış binalarının, qeyri-yaşayış obyektlərinin sökülərək başqa ərazilərə köçürülməsi istiqamətində müvafiq tədbirlər görülmüş və bu işlər hazırda da davam etdirilir. Sökülməsi nəzərdə tutulmuş binalarda yaşayan sakinlər üçün həmin əraziyə yaxın yerdə yeni, müasir, milli memarlıq üslubunda, tam təmirli, geniş və yaraşıqlı binalar inşa edilmişdir. Artıq hər biri 48 mənzildən ibarət olan üç yaşayış binası, 20 mənzildən ibarət bir yaşayış binası və hər biri 30 mənzildən ibarət olan üç yaşayış binası sakinlərin istifadəsinə verilmişdir. Bu tədbirin həyata keçirilməsi nəticəsində 253 ailə və yaxud 1000 nəfərə yaxın sakin öz mənzil və məişət şəraitini əhəmiyyətli dərəcədə yaxşılaşdırmışdır. Rayonun digər ünvanlarında da şəhərimizin ümumi görkəminə xələl gətirən, yararsız və qəzalı vəziyyətə düşən binalarda yaşayan sakinlərin tam təmirli, sahəsi əvvəlki mənzillərinin sahəsindən 20-30 faiz artıq olan yeni mənzillərə köçürülməsi təmin edilmişdir. Hazırda bu layihələrin davamı olaraq Heydər Əliyev prospektində 78 mənzilli yeddi mərtəbəli yaşayış binasının tikintisi davam etdirilir.

Nərimanov rayonu və onun sakinləri üçün böyük əhəmiyyət kəsb edən digər bir layihənin - "Dədə Qorqud " parkının yenidən qurulması və əsaslı təmiri işlərinə başlanmışdır. Bu layihənin həyata keçirilməsi nəticəsində rayon sakinlərinin mənalı istirahəti üçün milli xüsusiyyətləri özündə saxlamaqla ən müasir park salınacaqdır. Bütün bunlarla yanaşı, ötən dövrdə mövcud yaşıllıqlara yüksək səviyyədə aqrotexniki qulluq göstərilmiş və əlavə yaşıllıq zolaqları salınmışdır. "Nərimanov rayonunda sosial-iqtisadi inkişafın surətləndirilməsi" proqramının icrası ilə əlaqədar bir sıra ünvanlarda məhəllədaxili yollara təxminən 36350 kvadratmetr asfalt örtüyü salınmışdır.

Sevindirici haldır ki, 2012-ci ilin doqquz ayı ərzində Nərimanov Bələdiyyəsi də rayon əhalisinin maddi rifah halının yüksəldilməsi, aztəminatlı ailələrin sosial durumlarının yaxşılaşdırılması, küçə və məhəllələrin abadlaşdırılması istiqamətində həyata keçirilmiş tədbirlərdə yaxından iştirak etmişdir. Belə ki, rayonun yerli özünüidarəetmə orqanı tərəfindən 21 ailə himayəyə götürülmüş, 53 ailəyə birdəfəlik maddi yardım edilmişdir. İlin əvvəlindən bələdiyyə "abad həyət" aksiyasında da fəal iştirak etmiş, 12 ünvanda bu layihə çərçivəsində həyətlər abadlaşdırılaraq sakinlərin istifadəsinə verilmişdir. Rayon ərazisində ayrı-ayrı binaların həyətlərinə asfalt örtüyü salınmış, Çaykovski küçəsi, 4 ünvanında yaşayan sakinlərin çoxsaylı müraciətləri nəzərə alınaraq həmin ünvanda yerləşən "Xeyir-şər" evi üçün əlavə bina tikilmiş və mövcud bina əsaslı təmir edilmişdir.

Rayonun xidmət sahələri uğurlu fəaliyyəti ilə seçilir

Növbəti payız-qış mövsümünə hazırlıq işlərinin yüksək səviyyədə aparılması, sakinlərin istilik, elektrik enerjisi, qaz və içməli su ilə təminatının yaxşılaşdırılması məqsədilə rayonun xidmət sahələri tərəfindən çoxsaylı tədbirlər həyata keçirilmişdir. İlin ötən dövründə 5 saylı İstilik Sistemləri İstismar Sahəsi tərəfindən müxtəlif diametrli 1115 paqonometr boru dəyişdirilmiş və korroziyaya qarşı izolyasiya qatı çəkilmiş, 42,4 kilometrlik istilik kəmərləri yuyulmuşdur. Bununla yanaşı, siyirtmələr, nasoslar, qazanxanalar, eləcə də bir sıra binalara gedən mərkəzi istilik xətləri əsaslı təmir olunmuşdur.

Nərimanov Rayon Enerji Təchizatı və Satışı İdarəsi tərəfindən 1203 metr 0,4 kv-luq və 46590 metr 6 kv-luq kabellər çəkilmiş, 1050 paqonometr yeni kabel qoyulmuş və 1740 metr uzunluğunda kabellər yenisi ilə əvəz olunmuşdur. Həmçinin hava xətlərində köhnə naqillər dəyişdirilmiş, kompleks transformator məntəqələrindən SİP kabellər çəkilimiş, 1 ədəd 400 KVA gücündə transformator quraşdırılmışdır.

Rayon Sukanal Departamentinin su şəbəkələri və qurğularının istismarı xidməti tərəfindən cari ilin doqquz ayında 151 ədəd nasos, 127 ədəd mühərrik və 261 ədəd siyirtmə təmir olunmuş, 11596 paqonometr boru dəyişdirilmiş, 19 ədəd su anbarı yuyulmuşdur. Bundan əlavə, rayondakı mövcud kanalizasiya şəbəkələri və yağış barmaqlıqları təmizlənmişdir.

Nərimanov Rayon Qaz İstismar Sahəsi tərəfindən rayon ərazisindəki tənzimləyici şkaf və qurğular, məntəqələr təftiş edilmiş, mövcud qaz kəmərləri boyanmışdır. Hesabat dövründə həmçinin 5591,5 kilometr yeraltı və 318 kilometr yerüstü qaz kəmərlərinə profilaktiki xidmət göstərilmiş, 9632,15 paqonometr yeni magistral qaz xətti çəkilmiş, 1487 yeni mənzil və 64 qeyri-yaşayış obyekti qazlaşdırılmış, 9327 ədəd "smart-kart" tipli sayğac quraşdırılmışdır.

Təhsil, mədəniyyət və səhiyyə sahələrində fərəhli nəticələr çoxdur

Əvvəlki illərdə olduğu kimi, cari ilin ötən dövründə də rayonda təhsil, mədəniyyət və səhiyyə sahəsində bir sıra uğurlara imza atılmışdır. Yeni dərs ilinin başlanması ərəfəsində 34, 45, 82, 177, 200, 202 və 207 nömrəli tam orta məktəblər əsaslı təmir olumuş, 258 nömrəli tam orta məktəbin 32 sinif otaqlı əlavə korpusunun tikintisi başa çatdırılaraq istifadəyə verilmişdir. Ölkə Prezidentinin "Ən yaxşı ümumtəhsil məktəbi" və "Ən yaxşı müəllim" mükafatlarının təsis edilməsi haqqında" sərəncamına uyğun olaraq keçirilən ənənəvi müsabiqələr ümumilikdə orta ümumtəhsil sisteminin inkişafına təkan verir, tədris ocaqlarının və müəllimlərin fəaliyyətinə əlavə stimul yaradır. Dövlət başçısının 20 iyun 2012-ci il tarixli sərəncamına əsasən 2011/2012-cı tədris ilində "Ən yaxşı ümumi təhsil müəssisəsi" müsabiqəsində Nərimanov rayonunun 36, 45 və 178 nömrəli tam orta məktəbləri müvəffəqiyyət qazanmış və 10 min manat məbləğində birdəfəlik pul mükafatı ilə mükafatlandırılmışlar. Eyni zamanda, adı çəkilən sənədə əsasən 2011/2012-cı tədris ilində "Ən yaxşı müəllim" müsabiqəsində rayonun 13 müəllimi müvəffəqiyyət qazanaraq 5 min manat məbləğində birdəfəlik pul mükafatına layiq görülmüşdür. Əldə olunmuş uğurlar özünü ali məktəblərə qəbulun dinamikasında da göstərmişdir. Belə ki, 2011-2012-ci tədris ilində Nərimanov rayonunun 1748 məzunundan 935 nəfəri müxtəlif ali təhsil müəssisələrinə qəbul olunmuşdur. Rayon üzrə 3 məzun orta məktəbi qızıl medalla bitirmiş, ali məktəblərə qəbul imtahanında 42 nəfər 600-dən, 9 nəfər isə 650-dən artıq bal toplamış, 3 nəfər Prezident təqaüdünə layiq görülmüşdür.

Ötən müddətdə mədəniyyət və səhiyyə sahələrində də yenidənqurma işləri davam etdirilmişdir. 35 saylı musiqi məktəbində əsaslı təmir və yenidənqurma işləri başa çatdırılaraq istifadəyə verilmişdir. Hazırda 23 saylı musiqi məktəbində əsaslı təmir işləri davam etdirilir. 7 saylı yoluxucu uşaq xəstəlikləri xəstəxanasında isə təmir işləri yekunlaşdırılmışdır. Səhiyyə sahəsində əldə edilmiş nailiyyətlər və bu sahədə çalışan işçilərin xidmətləri də, həmişə olduğu kimi, diqqət mərkəzində saxlanmışdır. Belə ki, Prezident İlham Əliyevin sərəncamı ilə ölkə səhiyyəsinin inkişafındakı xidmətlərinə görə 8 saylı şəhər poliklinikasının həkimi, Nərimanov Rayon Səhiyyə İşçilərinin Həmkarlar İttifaqı Komitəsinin sədri Musa Musayev "Tərəqqi" medalına, 6 saylı uşaq xəstəxanasının baş həkimi Rumiyyə Sultanova isə "əməkdar həkim" fəxri adına layiq görülmüşdür.

Əhalinin həyat səviyyəsinin yüksəldilməsinə diqqət artır

Bu ilin ötən dövründə rayon əhalisinin sosial-müdafiəsinin gücləndirilməsi, onların həyat səviyyəsinin yaxşılaşdırılması, yoxsulluğun azaldılması məqsədilə xidmət sahələri və idarələri tərəfindən ardıcıl tədbirlər həyata keçirilmişdir. Belə ki, Dövlət Sosial Müdafiə Fondunun rayon şöbəsi sosial sahədə dövlət proqramlarını uğurla həyata keçirmişdir. Ölkə Prezidentinin 30 dekabr 2008-ci il tarixli sərəncamı ilə təsdiq edilmiş "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı"nda nəzərdə tutulan vəzifələrdən biri kimi əmək pensiyalarının mütərəqqi üsullarla ödənilməsi sisteminin daha da inkişaf etdirilməsi üçün lazımi işlər görülmüşdür.

Nərimanov Rayon Əhalinin Sosial Müdafiəsi Mərkəzi də ötən doqquz ayda əhalinin sosial müdafiəsi sahəsində bir sıra işlər görmüşdür. Hesabat dövründə ünvanlı dövlət sosial yardımı proqramı 2781 ailənin 11530 üzvünə şamil edilmiş, orta hesabla hər bir ailəyə 135 manat olmaqla hər ay ərzində 435 min manat məbləğində yardım ödənilmişdir. Bundan əlavə, mərkəz tərəfindən 13 nəfər Milli Qəhrəman ailəsinə hər ay 600 manat, 16 nəfər 20 Yanvar şəhidi ailəsinə 300 manat, 242 nəfər şəhid ailəsinə orta hesabla 143 manat məbləğində Prezident təqaüdü ödənilmiş, digər kateqoriyalardan olan şəxslərin də müavinətləri vaxtlı-vaxtında çatdırılmışdır.

Sakinlərin müraciətlərinə həssaslıqla yanaşılır

Son illər ölkə vətəndaşlarının həyat səviyyəsinin yüksəldilməsinə, insanların üzləşdikləri ən xırda məişət problemlərinin həllinə xüsusi diqqət göstərilir. Təsadüfi deyil ki, dövlət başçısı İlham Əliyev dəfələrlə bəyan etmişdir ki, bizim siyasətimizin əsasında insan amili dayanır. Məhz bunun nəticəsidir ki, vətəndaşların müraciətlərinin araşdırılması, onların sosial problemlərinin həlli rayon icra hakimiyyəti rəhbərliyinin başlıca fəaliyyət istiqamətlərindən birinə çevrilmişdir. Rayon rəhbərliyi tərəfindən cari ilin doqquz ayında 1423 nəfər sakinin iştirakı ilə 19 səyyar qəbul və görüş keçirilmişdir. Görüş və qəbullar zamanı edilən 140 müraciətdən 131-i həll edilmiş, 9-u isə nəzarətə götürülmüşdür. Bundan əlavə, 2012-ci ilin doqquz ayı ərzində rayon icra hakimiyyəti başçısı yanında keçirilmiş 21 şura iclasında 21 məsələ müzakirə olunmuş və məsələlərin icrası ilə əlaqədar aidiyyəti üzrə qərar və tapşırıqlar verilmişdir. Rayon icra hakimiyyətində ərizə və şikayətlərə baxılması işi də günün tələbləri səviyyəsində qurulur. Yeri gəlmişkən, son zamanlar rayon icra hakimiyyətinə edilən müraciətlərin məzmunu tamamilə dəyişərək, əsasən, torpaq sahəsinin ayrılması, ev və ya sığınacaqla təminat, dövlət əhəmiyyətli binaların tikintisi ilə əlaqədar olaraq vətəndaşların başqa mənzillərə köçürülməsi ilə əlaqədar, maddi yardım, məhəllələrin abadlaşdırılması, işlə təminat, ad və ya soyadların dəyişdirilməsi, eləcə də kommunal problemlərlə bağlı olmuşdur.

Göründüyü kimi, bu ilin ötən dövründə Nərimanov rayonu ölkəmizin dinamik sosial-iqtisadi inkişafının təmin olunmasına mühüm töhfəlr vermişdir. Qarşıda rayonin daha da abadlaşdırılması, quruculuq işlərinin davam etdirilməsi, sakinlərin firavan yaşamaları, çalışmaları və istirahətlərinin səmərləi təşkili ilə bağlı mühüm və ciddi vəzifələr durur. Həmin vəzifələrin yerinə yetirilməsi, dövlət başçısı İlham Əliyevin müəyyən etdiyi kursun inamla davam etdirilməsi sahəsində görülən hər bir iş isə Nərimanov rayonunun sosial-iqtisadi inkişafının bir qədər də sürətlənməsinə, rayonun simasının daha da gözəlləşməsinə səbəb olacaqdır...

Mirbağır YAQUBZADƏ

Xalq qəzeti.- 2012.- 25 oktyabr.- S. 7.