Qusar - böyük arzularıngerçəkləşdiyi məkan

Tələbəlik illərindən mətbuatla sıx əlaqələrim var. Elə "Xalq qəzeti"ndə də dəfələrlə yazılarım, rəhbərlik etdiyim sahələrdən müxtəlif səpkili materiallar dərc olunub. Qusar rayonunun ən iri toxumçuluq təsərrüfatı olan Urva sovxozuna rəhbərlik etmiş, rayon icraiyyə komitəsinin sədri, icra hakimiyyəti başçısının müavini, respublika Nazirlər Kabinetində aparıcı mütəxəssis vəzifələrində çalışmışam. Üç ilə yaxındır ki, pensiyadayam. Bununla belə, ölkəmizin, rayonun ictimai, mədəni-quruculuq həyatından kənarda dura bilmirəm. Xüsusən hər kəndinə, yoluna, cığırına, dolayına yaxından bələd olduğum doğma Qusarın günü-gündən dəyişməsi, abadlaşması məni olduqca fərəhləndirir. Fikir və düşüncələrimi oxucularla, xüsusən gənclərlə bölüşməyi, ölkəmizdə gedən mühüm quruculuq işlərini, insanlarımızın rifahı naminə dövlət başçımız tərəfindən aparılan siyasəti dəstəkləməyi özümə borc bilirəm.

Azərbaycan hazırda dünyanın ən sabit və davamlı inkişaf edən dövlətlərindəndir. Son 8 ildə həyata keçirilən düzgün və düşünülmüş siyasətin nəticəsidir ki, ölkəmizdə qeyri-neft sektoru sürətlə inkişaf etmiş, valyuta ehtiyatları artmış, əhəmiyyətli sosial proqramlar reallaşdırılmışdır. Ölkəmizin iqtisadi qüdrətinin artması bölgələrimizin inkişafına da dəyərli töhfələr verir. Xüsusən də regionlarda infrastruktur layihələrinin həyata keçirilməsi, bir milyona qədər yeni iş yerinin açılması, əhalinin maddi rifahının durmadan yaxşılaşması buna misaldır.Prezident İlham Əliyevin bölgələrə ardıcıl səfərlər etməsi, əhalinin problemləri ilə maraqlanması regionların sürətli inkişafına göstərilən diqqət və qayğının bariz nümunəsidir. Oktyabrın 10-da Azərbaycan Nazirlər Kabinetinin 2012-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkə başçısı demişdir: "Regionlara səfərlərim mənə imkan verir ki, həm vəziyyətlə yaxından tanış olum, həm əlavə göstərişlər verilsin və əlavə vəsait ayrılsın. Bütün bölgələrdə canlanma, inkişaf, infrastruktur layihələrinin icrası, yeni iş yerlərinin açılması prosesi gedir".

Doğrudan da belədir. Regionların sosial-iqtisadi inkişafına dair Dövlət Proqramının uğurla icra edilməsi bölgələrimizin sürətli inkişafından xəbər verir. Bütün sosial infrastrukturun yaradılması layihəsi uğurla reallaşdırılır-xəstəxanalar, məktəblər, idman kompleksləri, mədəniyyət ocaqları müasir tələblər səviyyəsində tikilərək istifadəyə verilir. Bir sözlə, ölkə rəhbərinin həyata keçirdiyi düzgün və düşünülmüş siyasət məhz xalqımızın milli maraqlarına, onun daha yaxşı yaşamasına xidmət edir. Bu istiqamətdə həyata keçirilən genişmiqyaslı proqram və layihələr insanların yaşayış səviyyəsinin daim yüksəlməsinə, işsizlik probleminin aradan qaldırılmasına yönəlmişdir.

Prezident İlham Əliyev respublikaya rəhbərlik etdiyi müddətdə 8 dəfə Qusarda səfərdə olmuşdur. Bu ilin fevralında növbəti dəfə Qusarda olan dövlət başçısı bir sıra obyektlərin, o cümlədən Heydər Əliyev Mərkəzinin və rayon mərkəzi xəstəxana binasının, şahmat mərkəzinin açılışında iştirak etmişdir.Hər səfəri zamanı dövlət başçısının tapşırıq və tövsiyələri rayonda icra orqanlarının fəaliyyət proqramına çevrilib. Bütün rayonu əhatə edən geniş abadlıq, quruculuq və yaşıllaşdırma işləri məhz bu istiqamətdə qurulub.

İyirmi beş-otuz il qabaq macal tapıb Kislovodskə, Soçiyə, Yaltaya istirahətə gedib-gələn tay-tuşlarım təəssüratlarını bölüşərkən təəssüflə deyərdilər: "Vallah, bizim dağlarımıza, təbiətimizə çatmaz... Suyu, bulaqları, havası... Hayıf ki, buraları qiymətləndirən yoxdur..." Elə özüm də bu qənaətdə idim. Dağlarımızın mənzərələri nəinki sadaladığım istirahət məkanları, hətta Alp kurortları ilə müqayisə oluna bilərdi...Bu gözəlliyi, bu məkanı dəyərləndirən, qiymətləndirən ümummilli liderimiz Heydər Əliyevin siyasi, iqtisadi kursunun layiqli davamçısı, möhtərəm Prezidentimiz İlham Əliyev oldu.2006-cı ildə bilavasitə Prezidentimizin göstərişi ilə ölkəmizin ən böyük infrastruktur layihələrindən olan "Şahdağ" Qış-Yay Turizm Kompleksinin yaradılmasına start verildi.Kompleksin tikintisinə 2009-cu ilin sentyabrında Prezident İlham Əliyevin iştirakı ilə başlanmışdır. Rayon mərkəzindən 32 kilometr məsafədə yerləşən kompleksin ümumi ərazisi 2 min 58 hektardır. Kompleks dəniz səviyyəsindən 1300-2351 metr hündürlükdədir. Turizm kompleksinin əsas hissəsi isə dəniz səviyyəsindən 1640 metr hündürlükdəki təbii yaylaqda yerləşir.

Tikinti işləri başa çatdıqdan sonra bu kompleksdə dağ-xizək idmanı və digər qış idman növləri ilə məşğul olmaq üçün geniş imkanlar olacaqdır. Bununla yanaşı, turistlərin yayda burada dincəlmələri üçün gözəl şərait yaradılacaqdır. Şahdağ Qış-Yay Turizm Kompleksi dünyada olan bu tipli komplekslərdən öz nadirliyi və universallığı ilə fərqlənəcək, bütün il boyu fəaliyyət göstərəcəkdir. Kompleks Azərbaycan və dünya turizm sənayesində ən möhtəşəm layihələrdən biri olmaqla, dağ-xizək idmanının və digər qış idman növlərinin əsas, lakin yeganə olmayan məkanı kimi fəaliyyət göstərəcəkdir.

Dövlət başçısı rayona səfəri zamanı söylədiyi nitqdə infrastrukturun yenidən qurulması sahəsində həyata keçirilən proqramlarla bağlı demişdir: "Şahdağ" Qış-Yay Xizək Mərkəzinin tikintisi sürətlə və uğurla gedir. Qeyri-neft sektorunda ən böyük sərmayə Azərbaycanda Qusar rayonuna qoyulur. "Şahdağ" Qış-Yay Xizək Mərkəzi dünyanın ən gözəl mərkəzlərindən birinə çevriləcəkdir. Buraya gələcək turistlərin sayı hesab edirəm ki, minlərlə ölçüləcəkdir. Təbii ki, bu, rayonun inkişafına çox böyük təkan verəcək, yüzlərlə, bəlkə minlərlə yeni iş yerləri açılacaq və Qusar rayonu Azərbaycanın turizm mərkəzinə çevriləcəkdir".

Bir vaxtlar qartallar yuvası, qoyun-quzu oylağı, çobanlar məskəni olan dağlarda sakitlik pozulub. Həftədə bir-iki dəfə maşın görünən yollarda onlarca texnika-yük maşınları, ekskavatorlar, traktorlar hərəkətdədir. İri qaldırıcı kranların uzaqdan görünən siluetləri burada nəhəng tikintinin getdiyindən xəbər verir. Görülən işlərin miqyası insanı heyrətə gətirməklə bərabər, qürurlandırır da: dövlətimizin maddi durumu belə nəhəg layihələri həyata keçirməyə imkan verir!

Yol abadlıq, mədəniyyətdir, - deyirlər. Qusar kimi dağlıq rayonda isə yol həyatdır, - desəm, yanılmaram. Bunu şəxsi təcrübəmdən bilirəm. Təsərrüfat rəhbəri kimi hər gün sovxozun aranda yerləşən əkin və fermalarına getməkdən ötrü 2-3 saat vaxt sərf edir, 70-80 kilometri iki dəfə qət etməli olurdum. Rayonda obaları 75-100 kilometr uzaqda yerləşən kəndlər də vardır. Möhtərəm Prezidentimiz İlham Əliyev 2010-cu ilin avqustunda Qusarda olarkən bir sıra obyektlərin açılışında, o cümlədən 6,5 milyon manat vəsait hesabına başa gələn Samur-Həzrə yolunun açılışında iştirak etdi. Uzunluğu 23 kilometr, hərəkət hissəsinin eni 7 metr olan, 16 min nəfərə qədər əhalinin yaşadığı 27 kənd və qəsəbəni birləşdirən bu yol yerli sakinlərin arzusuna uyğun yenidən qurulmuşdu. Arzu arzudan doğar, - deyiblər.Növbəti illərdə də Qusar rayonunun problemlərinin həlli üçün bütün lazımi tədbirlərin görüləcəyinə, yeni yolların çəkiləcəyinə söz verən dövlət başçısı 22 kilometrlik Həzrə-Zuxul avtomobil yolunun yenidən qurulması məqsədi ilə vəsait ayrılması barədə sərəncam imzaladı.Artıq Həzrə-Zuxul yolunun əsaslı təmiri, asfaltlanması başa çatmışdır. Eni 3-4 metr olan yol 10-12 metrədək genişləndirilmiş, kənarlarında küvetlər qazılmış, eniş və yoxuşlarda sel və qrunt sularının axıdılması üçün qurğular, borular quraşdırılmış, Uqur və Nəcəfkənd çaylarının üstündəki körpülər əsaslı təmir edilmiş, Zuxul çayı üzərində bütün tarixi ərzində ilk dəfə körpü salınmışdır.Eyni zamanda, "Şahdağ" Qış-Yay Turizm Kompleksinin, ötən ildə başlanılmış beton əsaslı Bakı-Gəndob-Rusiya Federasiyası ilə dövlət sərhədi avtomobil yolunun rayon ərazisindən keçən 16 kilometrlik hissəsinin və 39 kilometrlik Qusar-Əniğ-Ləzə avtomobil yolunun tikintisi işləri sürətlə davam etdirilir.

Dövlətimizin önəm verdiyi gənc nəslin təhsili, sağlamlığı, vətənpərvərlik ruhunda tərbiyəsi məsələləri rayon rəhbərliyi tərəfindən daim diqqət mərkəzində saxlanılır.Respublika rəhbərliyinin təhsilə göstərdiyi diqqət və qayğının nəticəsidir ki, rayonumuzda təhsil müəssisələrinin maddi-texniki bazası yenilənmiş, son illər müxtəlif maliyyə mənbələri hesabına 4232 şagird yerlik 18 məktəb inşa olunmuş, 3720 şagird yerlik bir neçə məktəb əsaslı şəkildə təmir edilmişdir.

Azərbaycanın birinci xanımı, Heydər Əliyev Fondunun prezidenti, Milli Məclisin deputatı Mehriban Əliyevanın qayğısı və təşəbbüsü ilə tikilib istifadəyə verilmiş Balaqusar, Yuxarı Zeyxür, Xürel, Əvəcuq, Suvacal, Xuray, Yuxarı Ləgər, Aşağı Ləgər, Kirig kənd məktəblərinin sırasına daha səkkiz kənd əlavə olunmuşdur. 15 Sentyabr - Bilik Günündə rayonda 8 təzə məktəbin təntənəli açılışı olmuşdur. Əniğ, Urva, Gədəzeyxür, Gican, Əcəxür, Yuxarı Kalunxür, Cağarqışlaq və Ləgərqışlaq kəndlərinin məktəbliləri təhsillərini müasir, işıqlı, hər cür şəraitə malik məktəblərdə davam etdirəcəklər.Bundan əlavə, ümumi şagird sayı 1720 olan daha doqquz məktəbin-Piral, Həsənqala, Bədişqala, Düztahir, Zindan Muruq, Çiləgir, Kuzun, Köhnə Xudat Qazmalar və Uqur kənd məktəblərinin tikintisi davam edir.

Dövlət başçısının gənclərimizə hədiyyəsi olan Qusar Olimpiya İdman Kompleksi nəinki yerli idman həvəskarlarının sevimli məkanı, eyni zamanda mühüm beynəlxalq idman yarışlarının keçirildiyi arenadır. Burada üç dəfə universal döyüş üzrə Avropa çempionatı, dəfələrlə cüdo üzrə beynəlxalq turnirlər, nəhayət, bu ilin iyul ayında Gənclər və İdman Nazirliyinin və Azərbaycan Şahmat Federasiyasının təşkilatçılığı ilə 16 yaşadək yeniyetmələr arasında 500 nəfər idmançının iştirakı ilə Respublika Şahmat Olimpiadası keçirilmişdir.

Qusarda tikinti quruculuq, abadlıq işlərinin rəvan getməsinin, aqrar sahədə, turizmin potensialından istifadə olunmasında yaxşı nəticələrin qazanılmasının aşkar səbəblərindən biri rayon rəhbərliyinin, qusarlıların dövlət başçısının yürütdüyü siyasəti, xalqın rifahının yüksəlməsinə yönələn layihələri dəstəkləməyi, onların həyata keçirilməsinə yardımçı olmalarıdır.RİH başçısı Şair Alxasovun camaatla sıx təması, yerlərdə keçirilən səyyar görüşlər, "açıq mikrofon" tədbirləri ictimai rəyi öyrənməyə, camaatın arzu və təkliflərinə həssaslıqla yanaşmağa, bəzi məqamlarda onları sağlam məcraya yönəltməyə imkan verir. Bütün bunlar bəzi problemləri vaxtında həll etməyə, əhalinin güzəranını daha da yüksəltməyə imkan yaradır.Rayon rəhbərliyi tez-tez ağsaqqallarla, ahıl, həyat təcrübəsinə malik insanlarla görüşür, onların təklif və tövsiyələrini dinləyir, məsləhətləşmələr aparır. Rayon Müharibə və Əmək Veteranları Şurasının üzvləri Qusarda keçirilən hər bir tədbirin, məclisin fəal iştirakçılarıdır. Bir sözlə, Qusar ölkəmizin digər rayonları kimi inkişaf, tərəqqi yolundadır. Tərəqqinin bəhrələri göz önündədir. Biz bunları görür, təqdir edir, uğurlarımıza sevinir, belə bir ölkənin vətəndaşı olmağımızla fəxr edirik.

Mayıl BAĞIROV,

Qusar rayonu

Xalq qəzeti.- 2012.- 31 oktyabr.- S. 6.