Qubadlı rayon təhsil işçilərinin konfransı keçirildi

Konfransda rayon təhsil şöbəsinin müdiri Afət Allahverdiyeva geniş məruzə ilə çıxış etdi.O qeyd etdi ki, rayon müəllimlərinin ənənəvi sentyabr konfransının keçirilməsində əsas məqsəd təhsilin ölkənin və millətin həyatında həlledici amil olduğunu vurğulamaqla yanaşı, ötən bir il ərzində əldə olunan nailiyyətləri qeyd etmək, mövcud problemləri geniş təhlil edərək, növbəti dərs ilində onların həlli istiqamətində irəliyə doğru atılacaq addımları müəyyənləşdirməkdən ibarətdir.

Bu gün Azərbaycan dövlətinin, ən başlıcası, dövlət başçısı cənab İlham Əliyevin milli təhsilin inkişafına göstərdiyi qayğı nəticəsində ölkədə təhsilin davamlı inkişafı təmin edilmişdir.Təhsil sahəsində aparılan islahatlar Qubadlı rayonunda da təhsilin ildən-ilə inkişafına öz müsbət təsirini göstərmişdir.Bunu konkret misallarla göstərmək olar. Son 10 ildə rayon icra hakimiyyətinin yaxından köməyi ilə 12 məktəb üçün bina tikilmiş və rayon təhsil şöbəsinin balansına verilmişdir. Məktəblərimiz yeni avadanlıqlarla, kitabxana, laboratoriya və informasiya texnologiyaları ilə təmin olunmuşdur. Bütün bunlar möhtərəm Prezidentimizin "Uşaqlar yaxşı məktəbdə oxumalı, müəllimlər də yaxşı məktəbdə işləməlidirlər" tələbinin real nəticələridir.

Sonra A.Allahverdiyeva son 10 ildə rayon məktəblərində baş verən yeniliklərdən danışdı. Qeyd etdi ki, bu illər ərzində təhsilin məzmunu yeniləşmiş, islahatlar öz müsbət nəticəsini vermişdir. O, bildirdi ki, təhsil işçiləri hər zaman rayon rəhbərliyinin diqqət mərkəzində olmuş, bütün problemlərimizin həllində yaxından kömək göstərmişdir.

Məruzəçi onu da bildirdi ki, mərkəzləşdirilmiş buraxılış imtahanlarındakı nəticələr bütün illərdə 93 faizdən yuxarı olmuşdur.

2011-2012-ci ilin ali məktəblərə qəbul göstəricilərini də qənaətbəxş hesab etmək olar.8 məktəb 50 faizdən yuxarı, 10 məktəb 30-50 faiz, 8 məktəb 10-30 faiz arası nəticə əldə etmişdir. 2 məktəbin isə buraxılış sinfi olmamışdır. Beləliklə, məktəbi bitirən 336 nəfərdən 122 nəfəri, yəni 36,3 faizi tələbə adı qazanaraq respublikanın müxtəlif ali təhsil müəssisələrinə qəbul olunmuşdur. Ən yüksək nəticəyə isə Xanlıq-2, Qəzyan məktəbləri nail olmuşlar.

Şagirdlərin dünyagörüşünün, qabiliyyət və bacarıqlarının formalaşmasında xüsusi rola malik olan məktəbdən və sinifdənxaric tədbirlər də öz rəngarəngliyi ilə fərqlənmiş, ildən-ilə hazırlanma səviyyələrinin yüksəldiyi müşahidə edilmişdir. Vətənpərvərlik, hərbi vətənpərvərlik tərbiyəsinin aşılanması istiqamətində də aparılan tədbirlər öz nəticəsini vermişdir.

Məruzədə bildirildi ki, təhsil şöbəsinin tabeçiliyində olan məktəbdənkənar müəssisələrin fəaliyyəti də nəticəsiz olmamışdır. Dəfələrlə zona yarışlarında müvəffəqiyyətlə iştirak edən müdavimlər həmişə diplom və fəxri fərmanlara layiq görülmüşlər.

Yeni dərs ilinə hazırlıq məsələlərinə toxunan natiq məktəblərin maddi bazasının möhkəmləndirilməsindən ətraflı danışdı. O dedi ki, 3 məktəbdə (Muradxanlı, Fərcan, Xanlıq ümumi) istilik sistemi quraşdırılmışdır. Bu gün rayon üzrə 32 ümumtəhsil məktəbinin 25-də xüsusi qazanxanası olan istilik sistemləri var və onların hamısı işlək vəziyyətdədir. Bu çox böyük nailiyyətdir. Yeni dərs ilinə hazırlıqla əlaqədar əksər ümumtəhsil məktəblərində daxili imkanlar hesabına xırda təmir, şəhər 1 saylı tam orta məktəbində cari təmir işləri aparılmışdır. Eyni zamanda, hər bir məktəb üçün sifariş edilmiş 51500 manat dəyərində 14 adda inventar, avadanlıq, 21950 manat dəyərində kimya, fizika və biologiya fənləri üçün laboratoriya avadanlığı, yerli büdcə vəsaiti hesabına zəif imkanlı məktəblilər üçün 18627 manat dəyərində 291 ədəd məktəbli dəsti məktəblərə verilmişdir. 23407 ədəd dərslik və digər məktəb sənədləri gətirilmiş və məktəblərə çatdırılmışdır. Hər il olduğu kimi, bu il də Qaçqın və Məcburi Köçkünlərin İşləri üzrə Dövlət Komitəsi və Heydər Əliyev Fondu tərəfindən verilmiş 825 ədəd məktəbli çantası bütün ləvazimatları ilə birgə, 767 dəst məktəbli paltarı gətirilmiş və məktəblərə verilmişdır. Hazırda 19 məktəb telefonlaşdırılmış, 7 məktəb internetə qoşulmuşdur. Cari ilin yanvar və fevral aylarında bütün məktəb rəhbərləri Təhsil Nazirliyinin göstərişi əsasında "Mədəd" təşkilatı tərəfindən İKT, eləcə də yeni tədris ilində 5-ci siniflərdə dərs deyəcək fənn müəllimləri iyun və avqust ayları kurrikulum üzrə xüsusi kurslardan keçmişlər. Hər il olduğu kimi, bu il də bütün məktəblərdə 1-ci sinfə qəbul olunacaq uşaqlar üçün pulsuz hazırlıq kursları təşkil edilmişdir.

Yüksək rəhbərlik bacarığı ilə idarə olunan Azərbaycan təhsilinin bugünkü sürətli inkişaf tempi onu deməyə əsas verir ki, çox yaxın gələcəkdə təhsildə böyük uğurlar qazanılacaq, möhtərəm Prezidentimizin neft kapitalını insan kapitalına çevirmək siyasəti özünü tələb olunan səviyyədə doğruldacaqdır. Burada ölkə Prezidentinin daha bir fikrini diqqətinizə çatdırmaq istərdim."Oxumaq hamıya lazımdır. Azərbaycanda təhsilin səviyyəsi artır və biz buna çox sevinirik. Biz istəyirik ki, gənc nəsil bilikli, savadlı olsun, eyni zamanda, vətənpərvərlik ruhunda tərbiyə alsın. Gələcəkdə həm özlərini təmin etsinlər, cəmiyyətdə özlərinin yerini tutsunlar, eyni zamanda, ölkəmizin ümumi inkişafına öz töhfələrini versinlər."

M.MÜKƏRRƏMOĞLU

Xalq qəzeti.- 2012.- 11 sentyabr.- S. 9.