Badamdarın yeni günləri

Ölkə rəhbərliyinin Bakı şəhərinə və onun ətraf qəsəbələrinə olan diqqət və qayğısı nəticəsində son vaxtlar Səbail rayonunda, onun Badamdar qəsəbəsində bir sıra işlər görülmüşdür. Badamdar qəsəbə Mədəniyyət evində Səbail Rayon İcra Hakimiyyəti qəsəbə nümayəndəliyinin 2011-ci ilin yekunlarına həsr olunmuş hesabatında ötən il görülmüş işlərdən söz açılmış, qarşıda duran vəzifələrin həyata keçirilməsi yolları müzakirə olunmuş və 2012-ci il üçün konkret tədbirlər müəyyənləşdirilmişdir.

Hesabat məruzəsi ilə çıxış edən Səbail Rayon İcra Hakimiyyəti başçısının Badamdar üzrə nümayəndəsi Natiq Bağırov bildirmişdir ki, qəsəbədə hazırda 23 500 nəfər əhali yaşayır, 2196 nəfər məcburi köçkün məskunlaşmışdır. 2011-ci il aprelin 20-də Azərbaycan Respublikasının Prezidenti İlham Əliyev Bakı şəhərinin kənd və qəsəbələrinin sosial-iqtsadi inkişafı ilə bağlı qəsəbədə görülən işlərlə tanış olmuşdur. Ölkə rəhbəri vətəndaşları narahat edən məsələlərlə maraqlanmış, onların təkliflərini dinləmişdir. Bu görüşdən dərhal sonra dövlət başçısının müvafiq sərəncamı ilə Badamdar qəsəbəsində 120 yerlik uşaq bağçası və 880 şagird yerlik orta məktəb tikintisinə başlamaq üçün vəsait ayrılmışdır. 2011-ci ilin sentyabr ayında tikintiyə başlanmış və artıq xeyli iş görülmüşdür.

May ayının 5-də ölkə Prezidentinin "2011 - 2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın təsdiq edilməsi barədə sərəncamında Badamdara da böyük yer ayrılmış, qəsəbənin qaz, elektrik enerjisi, su təchizatı və kanalizasiya; rabitə, yol, təhsil, səhiyyə və gənclər sahələri üzrə 17 bənd tədbirin həyata keçirilməsi nəzərdə tutulmuşdur. Yay aylarında Səbail Rayon İcra Hakimiyyəti tərəfindən qəsəbədəki 239 saylı orta məktəbdə cari təmir işləri aparılmışdır. Dövlət Neft Şirkətinin köməyi ilə "Könül" körpələr evi də əsaslı təmir olunmuşdur. İlin sonunda rayon icra hakimiyyəti tərəfindən qəsəbədəki Heydər Əliyev parkında əsaslı təmir işlərinə başlanmış və artıq burada xeyli iş görülmüşdür.

Səbail Rayon İcra Hakimiyyəti tərəfindən hazırlanmış "Abad həyət" layihəsi əsasında Tofiq Məmmədov və Məktəbli küçələrində sakinlər üçün istirahət guşələri yaradılmışdır. Rayon icra hakimiyyəti başçısının qəsəbədə keçirdiyi açıq qəbullar zamanı sakinlərin müraciətləri nəzərə alınaraq Badamdar qəsəbəsində tikilmiş yeni xeyir-şər yerinə bitişik 250 nəfərlik əlavə zal da inşa olunmuşdur. Obyekt hər cür avadanlıqlarla təchiz olunmuş, həyəti abadlaşdırılmış və yeni asfalt örtüyü salınmışdır. 2011-ci il ərzində qəsəbədə abadlıq, qəsəbədaxili yolların təmiri və asfaltlaşdırılmasına böyük fikir verilmişdir.

Hesabatda daha sonra bildirilmişdir ki, qəsəbə sakinlərinin içməli su ilə təminatında da dəyişikliklər baş vermişdir. 3-cü yaşayış massivində tikilmiş 2 ədəd su anbarının istifadəyə verilməsi ilə əhaliyə su verilməsi qrafiklərində dəyişikliklər edilmişdir. Gələcəkdə digər anbarların da istifadəyə verilməsindən sonra təminat daha da yaxşılaşacaqdır. 2011-ci ilin yanvar ayında "Badamdar" yarımstansiyası istifadəyə verilərək şəbəkəyə qoşulmuş, bu da qəsəbənin fasiləsiz elektrik enerjisi ilə təchizatını yüksəltmişdir. 3 yeni iritutumlu transformator quraşdırılmış, 18 fərdi transformator isə şəbəkədən açılmışdır. Əhalinin elektrik enerjisi ilə təminatının yaxşılaşdırılması məqsədi ilə 4600 metr yeni kabel xətti çəkilmişdir. "SİP" xətləri çəkilərək, tam sayğaclama işləri aparılmış, qəsəbənin mərkəzində 400 kVa-lıq transformator daha tutumlu olan 600 kVa-lıqla əvəz olunmuşdur. Müxtəlif təzyiqli yeni qaz xətləri çəkilmiş, tənzimləyici şkaflar və siyirtmələr quraşdırılmışdır.

Yığıncaqda çıxış edən Səbail Rayon İcra Hakimiyyətinin başçısı Asif Əsgərov Prezident İlham Əliyevin Bakı şəhərinin qəsəbələrinə göstərdiyi diqqət və qayğıdan, gələcəkdə Badamdar qəsəbəsinin daha da abadlaşdırılması, sakinlərin həyat şəraitinin müasir standartlara cavab verə biləcək səviyyəyə çatdırılması üçün görülməli olan işlərdən danışmışdır. O, bidirmişdir ki, "Abad həyət" layihəsi çərsivəsində digər məhəllələr də abadlaşdırılacaq, məhəllədaxili yollar təmir olunacaq. Tikilən məktəb və uşaq bağçasından əlavə, yeni xəstəxana, ATS binaları, elektrik yarımstansiyası və idman kompleksinin tikintisinə başlanacaqdır. Bu il Heydər Əliyev parkında aparılan təmir işləri də başa çatdırılacaq, burada ulu öndərin əzəmətli büstü ucaldılacaqdır.

Yığıncağın sonunda sakinləri maraqlandıran suallar cavablandırılmışdır.

R.TAHİR

Xalq qəzeti.- 2012.- 25 yanvar.- S. 7.