Bəhruz Kəngərliyə həsr olunmuş elmi konfrans

Naxçıvan Muxtar Respublikası Ali Məclisi sədrinin "Görkəmli rəssam Bəhruz Kəngərlinin 120 illik yubileyinin keçirilməsi haqqında" 12 yanvar 2012-ci il tarixli sərəncama müvafiq olaraq AMEA Naxçıvan Bölməsində Naxçıvan Dövlət Universiteti ilə birgə "Azərbaycan realist rəssamlıq məktəbinin banisi" adlı elmi konfrans keçirilib.

Elmi konfransı giriş sözü ilə AMEA Naxçıvan bölməsinin sədri, akademik İsmayıl Hacıyev açaraq rəssamlıq sənətimizdə boyakarlıq, qrafika, dəzgah boyakarlığının təşəkkülü, portret və mənzərənin müstəqil janr kimi formalaşmasında böyük xidmətləri olan ilk Azərbaycanın realist rəssamı Bəhruz Kəngərlinin keçdiyi ömür yolu haqqında, rəssamın təsviri sənətimizdə tutduğu mövqe barədə ətraflı bəhs etmişdir. Akademik cəmi 30 il yaşamış görkəmli rəssamın cəmi 7 il yaradıcılıqla məşğul olmasına baxmayaraq, 2000-dən çox dəyərli sənət əsərləri yaratdığını bildirmişdir ki, bunlardan da 500-ə qədəri bizə gəlib çatmışdır. Qeyd olunub ki, çox acınacaqlı bir həyat yaşamış rəssamın akvarel, karandaş, kömür və tuşla çəkdiyi müxtəlif janrlara aid rəsm əsərləri var ki, bu əsərlərin də bir çoxu eskiz və etüdlərdən ibarətdir. Naxçıvanın tarixi-memarlıq abidələri ilə yanaşı, rəssam 1918-1920-ci illərdə ermənilər tərəfindən azərbaycanlıların öz dədə-baba torpaqlarından deportasiya edilməsi nəticəsində Naxçıvana pənah gətirmiş qaçqınların portretlərindən ibarət "Qaçqınlar" silsiləsini fırçaya alıb ki, bu əsərlər həm də tarixi sənət kimi dəyərlidir.

Tədbirdə ümummilli lideri Heydər Əliyev tərəfindən Bəhruz Kəngərli yaradıcılığı çox yüksək qiymətləndirildiyi bildirilərək qeyd olunub ki, müstəqil Azərbaycan naminə apardığı yorulmaz, məqsədyönlü fəaliyyətində hər zaman incəsənətimizə böyük qayğı göstərən ulu öndərin tövsiyəsi ilə 2002-ci ildə Naxçıvan şəhərində Bəhruz Kəngərlinin xatirəsini əbədiləşdirmək məqsədi ilə rəssamın ev muzeyi fəaliyyətə başlanıb. Bu gün Naxçıvan Muxtar Respublikası Ali Məclisi sədrinin imzaladığı sərəncam da Bəhruz Kəngərli yaradıcılığına göstərilən diqqət və qayğının davamıdır.

Xüsusi olaraq qeyd edilib ki, bu gün realist rəssamın yaradıcılığı tədqiqatçılarımız tərəfindən müasir dövrün tələbinə uyğun olaraq araşdırılmalı, rəssamın yaradıcılığı hərtərəfli təbliğ edilməlidir.

Elmi konfransda AMEA Naxçıvan Bölməsinin İncəsənət, Dil və Ədəbiyyat İnstitutunun direktoru, AMEA-nın müxbir üzvü, professor Əbülfəz Quliyevin "Bəhruz Kəngərlinin həyat və yaradıcılığı", Naxçıvan Dövlət Universitetinin baş müəllimi, p.ü.f.d. Mahir Xəlilovun "Bəhruz Kəngərlinin yaradıcılığında portret janrı", İncəsənət, Dil və Ədəbiyyat İnstitutunun şöbə müdiri Nizami Aliyevin "Bəhruz Kəngərli Azərbaycanda ilk peşəkar rəssam kimi", həmin institutun böyük elmi işçisi, s.ü.f.d. Ələkbər Qasımovun "Bəhruz Kəngərlinin obrazı səhnədə" mövzusunda elmi məruzələri dinlənilmişdir.

Daha sonra AMEA Naxçıvan Bölməsinin Tarix, Etnoqrafiya və Arxeologiya İnstitutunun elmi işlər üzrə direktor müavini, AMEA-nın müxbir üzvü Qadir Qədirzadə və İncəsənət, Dil və Ədəbiyyat İnstitutunun Ədəbiyyatşünaslıq şöbəsinin aparıcı elmi işçisi, dosent Fərqanə Kazımova mövzu ilə bağlı çıxış etmişlər.

Tədbirin sonunda Azərbaycan realist rəssamlıq məktəbinin banisi Bəhruz Kəngərlinin həyat və yaradıcılığı ilə bağlı bölmə əməkdaşlarını maraqlandıran suallar cavablandırılmışdır.

AMEA Naxçıvan bölməsinin informasiya şöbəsi

Xalq qəzeti.- 2012.- 29 yanvar.- S. 7.