Nəsimi rayonunda əlillərin cəmiyyətə inteqrasiyası mövzusunda “dəyirmi masa”

Nəsimi Rayon İcra Hakimiyyəti Milli Qeyri-Hökumət Təşkilatları Forumu və Əmək və Əhalinin Sosial Müdafiəsi Nazirliyi ilə birgə əlillərin cəmiyyətə inteqrasiyası mövzusunda “dəyirmi masa” keçirmişdir.

Tədbiri Nəsimi Rayon İcra Hakimiyyətinin başçısı Nəsib Məhəməliyev açdı. O, müzakirə edilən mövzunun vacibliyini vurğulayaraq bildirdi ki, əlillərin və sağlamlıq imkanları məhdud olan insanların maddi-rifah halının yaxşılaşdırılması və onların hüquqlarının təmin edilməsinə dəstək cəmiyyətin bütün üzvlərinin borcudur. Bu istiqamətdə ölkəmizdə lazımi tədbirlər həyata keçirilir və əlillərin sosial-məişət problemlərinin həlli, onların cəmiyyətə inteqrasiyası dövlətimizin daim diqqət verdiyi məsələlərdəndir.

Xüsusu qayğıya ehtiyacı olan bütün insanlar kimi, əlillərə də diqqət və qayğı möhtərəm Prezidentimiz cənab İlham Əliyevin daim önəm verdiyi məsələdir. Ölkəmizdə bu kateqoriyadan olan insanların problemlərinin həlli istiqamətində bütün zəruri tədbirlər həyata keçirilir və tam əminliklə demək olar ki, Azərbaycanda hər bir əlil vətəndaş dövlər qayğısı ilə əhatə olunub.

N.Məhəməliyev bildirdi ki, Nəsimi rayonunda da əlillərin sosial müdafiəsi istiqamətində bütün zəruri işlər həyata keçirilir, bu insanların bütün müraciət və xahişlərinə həmişə diqqətlə yanaşılır. Son beş ildə 33 əlil ailəsi mənzillə təmin olunmuşdur. Bu müddət ərzində 27 əlilə pulsuz avtomobil verilmiş, 199 nəfər sanatoriya-kurort putyovkaları ilə təmin edilmişdir. Sosial yardım alan 8847 nəfərdən 573-ü əlildir. Rayonda ümumilikdə 7330 nəfər əlilliyə görə əmək pensiyası və sosial müavinət alır.

Əlillərin sosial-məişət problemlərinin həlli, onlara hərtərəfli qayğı Heydər Əliyev Fondunun əsas fəaliyyət istiqamətlərindəndir. Fondun prezidenti, Milli Məclisin deputatı Mehriban xanım Əliyeva hər il Nəsimi rayonundakı 268 saylı xüsusi məktəbə gəlir, burada uşaqların təhsil şəraiti ilə tanış olur və məktəbin maddi-texniki bazasının möhkəmləndirilməsinə kömək edir.

Sonra Milli Qeyri-Hökumət Təşkilatları Forumunun prezidenti Rauf Zeyni, Əmək və Əhalinin Sosial Müdafiəsi Nazirliyinin sektor müdiri İsgəndər Mustafayev, Nəsimi Rayon Qarabağ Müharıbəsi Veteranları, Əlilləri və Şəhid Ailələri İctimai Birliyinin sədri Azər Quliyev, Nəsimi Rayon Çernobıl Cəmiyyətinin sədri Xələf Həsrətov və başqaları çıxış etdilər. Bildirildi ki, Azərbaycanda əlillərin sosial müdafiəsinin gücləndirilməsi, onların reabilitasiyası, pulsuz müalicəsi, bu insanların özlərini cəmiyyətin tamhüquqlu üzvü hiss etmələri , müvafiq işlə təmin olunmaları məqsədilə çoxsaylı proqram və layihələr həyata keçirilir, qanunlar qəbul edilir. Dövlətimizin iqtisadi qüdrətinin artması, davamlı inkişafın təmin olunması əlillərin sosial müdafiəsinin daha da möhkəmləndirilməsinə zəmin yaradır.

Ayaz HƏMİDOĞLU

Xalq qəzeti.- 2013.- 13 aprel.- S. 6.