İsmayıllı: Cavanşir yurdunun növrağı...

Bu sətirləri qələmə almağa başlayanda təkcə təbiət təsvirlərini qeyd eləmək ehtiyacını duymadım, həm də İsmayıllı baharının təmtərağını olduğu kimi təsvir edə bilməyəcəyimi etiraf etmək məcburiyyətində qaldım. Etiraf çox böyük insani dəyərdir. Bir də ki, az qala hər gün gördüyümüz bu dağa, dərəyə, çölə, meşəyə təbiət elə bir sığal çəkir ki, onu olduğu kimi təsvir etməyə təkcə mənim yox, bəlkə də, bütün həmkarlarımın qələmi aciz görünər. Üstəlik bu gün İsmayıllıda başqa bir gözəllik, cah-cəlal, təmtəraq da yaradılır.

Rayon icra hakimiyyətinin başçısı Mirdaməd Sadıqovun sakinlərlə növbəti görüşü Quşencə kəndində keçirilirdi. Görüşə təxminən 500 nəfər kənd sakini toplaşmışdı. Yeni rəhbər sakinlərin hamısının ürək sözlərini deyə bilməsi üçün onlara tam sərbəstlik vermişdi. Çox adam söz dedi, problemlərdən danışdı. Sonda çıxış edən icra başçısının dilə gətirdiyi fikirlər isə sübut etdi ki, Mirdaməd müəllim İsmayıllıda yerli sakinlərin istədiyindən də qat-qat artıq müsbət dəyişikliklərə imza atmaq fikrindədir :

- Qardaşım, deyirsən ki, yolumuz bərbad haldadır. Mən indi həmin yolla gəldim və bunun şahidi oldum. Deyirsiniz ki, elektrik dirəkləri on illərdən bəri dəyişdirilmir. Bu dirəklərin vəziyyətini biz də görürük və bura yığışanların hamısı yaxşı bilir. Ona görə də siz burada köklü problemlərdən söz açın. İnsanların dolanışığı necədir, əmək haqqınız nə qədərdir, yeni iş yerləri yaratmaq üçün hansı addımlar atılmalıdır, millətin sabahı olan təhsil müəssisələrinin maddi-texniki bazası hansı səviyyədədir, insanların sağlamlığının daha yaxşı qorunması üçün nələri etməliyik? Bu kimi məsələlərdən danışın və çəkinmədən öz təkliflərinizi verin. Mənə deyin görüm neçə nəfər quşencəli ali məktəbi bitirib və bu gün iş tapa bilmir. Bu il ölkədə informasiya- kommunikasiya texnologiyaları ili elan olunub. Gündən- günə inkişaf edən respublikamızın ümumi tərəqqisinə töhfə vermək üçün biz nələri etməliyiksə ondan danışın. Rayon rəhbərliyi bütün təklifləri dəstəkləyəcək, sizin qaldırdığınız istənilən problem bilavasitə öz iştirakınızla həll olunacaq. Biz İsmayıllını indikindən qat-qat artıq səviyyədə inkişaf etdirəcəyik. Təbii ki, sizin köməyiniz və dəstəyinizlə.

Görüşdən sonra söhbət etdiyimiz kənd sakinlərindən biri xüsusi vurğuladı ki, yaxşı ki, bu gün rayona İsmayıllının problemlərini bizdən də yaxşı bilən belə bir rəhbər gəlib. Haqlı sözdür. Əslən İsmayıllıdan olan Mirdaməd müəllim təkcə təcrübəli rəhbər işçi deyil, həm də öz doğma yurd-yuvası ilə fəxr etməyi bacaran, doğulub boya-başa çatdığı torpağı həqiqətən sidq-ürəklə sevən bir insandır. Bu gün Azərbaycanda Mirdaməd müəllimi tanımayan bir ziyalı tapmaq, demək olar ki, mümkün deyil. Bilənlər, tanıyanlar təsdiq edərlər ki, o, həqiqətən, bacarıqlı təşkilatçı, savadlı iqtisadçı olması ilə yanaşı, həm də gözəl natiqdir. İstənilən mövzuda danışsın, saatlarla qulaq assan, yorulmazsan. Bu keyfiyyətləri onun soy-kökü ilə də bağlıdır. Atası Mirsadıq kişinin halal süfrəsinin qonağı olanlar bunu yaxşı bilirlər.

Mən dəfələrlə bu evin – Mirsadıq kişinin qonağı olmuşam, çayını içmişəm, çörəyini yemişəm, bu diyarın ən nurani ağsaqqallarına xas olan söhbətlərinə qulaq asmışam. “Öz kəndini sevməyən insanın İsmayıllını sevməsi, İsmayıllıya bağlı olmayan sakinimizin Azərbaycan üçün özünü fəda etməsi heç zaman inandırıcı görünə bilməz” ifadəsini də birinci dəfə məhz ondan eşitmişəm. Mirsadıq dayıdan eşitdiyim “Adamın bütün səhvlərini bağışlamaq olar. Çörəyə haram qatılması, çörəyin itirilməsi isə heç zaman bağışlanılmayacaq bir qəbahətdir, oğul” — sözlərini uzun illərdir ki, yaddan çıxara bilmirəm ki, bilmirəm.

Sual olunur, icra hakimiyyətinin başçısı təyin olunandan sonra rayonda nə iş görülüb? Onunla görüşüb bax bu müddətin təəssüratlarını eşitmək istəyirdim. Məlum oldu ki, Mirdaməd Sadıqov İsmayıllıya gəldiyi ilk gün rayon ziyalıları ilə görüşüb. Sonra isə rayonun müvafiq sahə mütəxəssisləri ilə birgə İsmayıllının sosial-iqtisadi durumunu öyrənib, təhlil edib və inkişaf proqramı hazırlayıb. Artıq bir neçə gün əvvəl həmin proqram əsasında hazırlanmış layihələrin əsas hissəsinin təqdimatı keçirilib. Təqdimatda ağsaqqallar, gənclər, ziyalılar, iqtisadiyyat və tikinti, kənd təsərrüfatı mütəxəssisləri iştirak ediblər. Rayon rəhbəri daha sonra sahibkarlarla görüşüb, onları dinləyib, problemləri ilə maraqlanıb. Nəticədə sahibkarlıq assosiasiyası yaradılması qərara alınıb.

Ulu öndər Heydər Əliyevin çox böyük əhəmiyyət verdiyi bir məsələ - gənclərlə iş tendensiyasını əsas götürən yeni başçı rayon gəncləri ilə görüş keçirib. Həmin görüşdə mən də iştirak etmişəm. Kaş görəydiniz. Gənclər öz dərdlərini sanki ən əziz adamlarına açırdılar. Zala bir neçə yerdə mikrofon qoyulmuşdu. Burada İsmayıllının idman şərəfini ləyaqətlə qoruyanlar da vardı, ali təhsilini başa vurub, müxtəlif sahələrdə işləyənlər də. Kimi İsmayıllı futbolunun inkişaf etdirilməsi üçün stadionun təmir olunması təklifini irəli sürürdü, başqa birisi xarici dillərin öyrənilməsi üçün kursların açılmasını təklif edirdi. Başqa birisi isə işlə təmin olunmaq üçün başçıdan kömək gözləyirdi.

Bir sözlə, canlı ünsiyyət yaradılmışdı. Heç kəs sıxılmırdı, problemini rahat deyə bilirdi. Bilirdi ki, ona bu imkanı verən şəxs onun dərdini özünün dərdi, onun problemini özünün problemi bilən bir ziyalıdır, rəhbərdir.

Bu hələ harasıdır. İcra hakimiyyətinin başçısı respublikanın müxtəlif yerlərində yaşayan və fəaliyyət göstərən İsmayıllı ziyalıları və iş adamları ilə görüşməyi də yaddan çıxarmayıb. Onlarla görüş zamanı əvvəlcə rayonun səhiyyə, təhsil, mədəniyyət, tikinti-abadlıq sahəsindəki mövcud vəziyyəti barədə məlumat verilib. Rayon ictimai ağsaqqallar birliyinin sədri Fərman Bəşirov toplantı iştirakçılarına müraciət edib, müxtəlif çıxışlar dinlənilib. “Siz öz rayonumuz üçün nə edə bilərsiniz?” Hamının qarşısında bax belə bir sual qoyulub. Onlara anket paylanılıb. Artıq maraqlı təkliflər ortaya qoyulub. Mirdaməd müəllim sevinə-sevinə bildirdi ki, həmin cavabların ümumi işimizə hansı köməkliklər etdiklərinin yaxın günlərdə şahidi olacaqsınız. Təki belə olsun.

Təbii ki, rayonun bütün göstəricilərinin önündə gedən məsələ insanların rifah halının yaxşılaşdırılması, xüsusən məşğulluğun təmin edilməsidir. Bu günlərdə rayon mədəniyyət mərkəzində əmək yarmarkası keçirilib. Yarmarkaya 400 iş yeri çıxarılıb. Nəticədə 178 nəfər işlə təmin olunub.

Rayonun abadlaşdırılması və daha da yaşıllaşdırılması istiqamətində konkret addımlar atılır. Peşə tədris mərkəzinin həyətyanı sahəsində 90 ədəd şam və cökə ağacı əkilib. Ulu öndər Heydər Əliyevin 90 illik yubileyi münasibətiylə irəli sürülən təklif əsasında 90 ağac əkini aksiyası bütün inzibati ərazi dairələrində davam etdirilir. Rayon ərazisində daha çox qırıntı olan yerlərdə yeni meşələr salınır. Su-kanalizasiya şəbəkəsinin yaxşılaşdırılması layihəsinin icrasında qayda yaradılıb.

Rayon icra hakimiyyətindən öyrəndik ki, yeni icra başçısı geridə qalan ayyarımlıq müddətdə 21 dəfə yerlərdə vətəndaşları qəbul edib. Basqal və Lahıc qəsəbələri, İvanovka, Tircan, Quşencə, Xanagah, Qalınçaq, Diyallı, Təzəkənd, Aşıqbayram, Kürdmaşı və Topçu kəndlərinin sakinləri artıq rayon icra hakimiyyəti başçısı ilə görüşüb, təklif, arzu və problemlərini bildiriblər. Qəbullarda ilk növbədə Qarabağ müharibəsi əlillərinə, şəhid ailələrinə, digər imtiyazlı əhali qruplarına diqqət yetirilir. Əslində, heç kəs diqqətdən kənarda qalmır. Qəbula gələnlərə bir məsləhət də görülür, xalq sənətkarlığı sahələri və xalçaçılıq da daxil olmaqla bütün sahələr üzrə biznes-planlar işlənməli, təqdim olunmalı və kredit alınmalıdır. Ələbaxımlıq psixologiyasından əl çəkilməlidir. Hər kəsin fiziki imkanlarına uyğun iş yeri açılacaq. Qadınlar üçün ev, ailə təsərrüfatı təşkilinə imkan yaradılacaqdır.

Bu sözlər təkcə qəbullarda və görüşlərdə deyil, ümumiyyətlə, bütün ictimai-siyasi fəaliyyət prosesində hamıya dönə-dönə xatırladılır ki, yaşamaq yolu ancaq işləməkdən keçir. Bu fikirlər şəhər ərazisində - müxtəlif yerlərdə keçirilən 9 qəbulda da səsləndirilib. Ümumilikdə isə qəbullarda 4614 nəfər iştirak edib. Heç bir problem sabaha qoyulmayıb. Dərhal çözülüb, münasibət bildirilib. Bu da səbəbsiz deyil. Çünki müvafiq idarə, müəssisə və xidmət təşkilatlarının rəhbərləri qəbullarda iştirak ediblər.

Sakinlərin rayon rəhbərliyi ilə əlaqələrinin yaxşılaşdırılması məqsədiylə rayon icra hakimiyyətində 164 nömrəli qaynar xətt yaradılıb. Gözəl təşəbbüsdür. Daha vətəndaşın evdən çıxıb qəbula gəlməsi heç vacib də deyil. Nömrə var, zəng vur, dərdini söylə. Dərhal reaksiya veriləcək. Bir məsələdən də danışım. Rayon icra hakimiyyətinin başçısı qısa müddət ərzində İsmayıllıya 5 ədəd 20 yerlik “İsuzu” markalı avtobus gətirilməsinə nail olub. Həmin avtobuslar artıq şəhərdaxili və kənd marşrutlarında sakinlərə xidmət edir. Rahat avtobusa əyləş, mənzil başına get...

Əhaliyə sosial xidmətin digər növlərindən biri kimi Heydər Əliyev prospekti və Zərdabi küçələrində 150 nəfərlik yüngül konstruksiyalı xeyir-şər evləri tikilir.

1975-ci ildə tikilən rayon mədəniyyət mərkəzinin əsaslı təmir olunması hamının ürəyincədir. İşlər müasir üslubda görülür. Şəhərin Şamaxı istiqamətindən girəcəyində isə yollar genişləndirilərək iki zolaqlı edilir, səkilər dəyişdirilir. Bura güllər, kollar və çəmənliklərlə bəzədiləcək. Hamı əmindir ki, İsmayıllıya gələnlər az vaxtdan sonra burada yüksək zövqün nəticəsi olan gözəlliklə rastlaşacaqlar.

Körpələrin problemləri də diqqət mərkəzindədir. Belə ki, Qəşəm Aslanov küçəsində 140, şəhərin Mican məhəlləsində isə 90 yerlik uşaq bağçalarının tikintisi aparılır.

Təmir-bərpa işləri ilə yanaşı, yeni tikinti-quruculuq işləri də nəzərdə tutulur. Belə ki, Ərəstun Mahmudov küçəsi ilə Nizami küçəsinin arasındakı ikimərtəbəli evlər istismar müddətini başa vurub. Təbii ki, əvvəlcə beşmərtəbəli yaşayış binaları tikilərək sakinlər oraya köçürüləcək, sonra isə köhnələr söküləcəkdir. Artıq beşmərtəbəli binaların birinin inşasına başlanılıb.

Heydər Əliyev prospekti, görkəmli jurnalist Rəşid Mahmudovun adını daşıyan küçə abadlaşdırılır, səkilər düzəldilir, işıqlandırma sistemi qurulur.

Bax belə. İsmayıllıda reallaşdırılması nəzərdə tutulan layihələr çox və bu diyarın təbiəti kimi rəngarəngdir. Onların həyata keçirilməsi üçün genişmiqyaslı iş aparılır. Bu layihələr həyata keçdikcə isə iş yerləri artacaq. Tamam yadımdan çıxmışdı. Bir faktı xüsusi qeyd edim. Ay yarım ərzində İsmayıllıda 800-dən çox yeni iş yeri açılıb.

Hüsnü gündən-günə gözəlləşən İsmayıllının bugünkü təmtərağı barədə qələmə aldığımız sətirləri yurd sevgisi ilə başlamışdıq, işıqla başa çatdırmaq istəyirik. Çünki İsmayıllı sözün həqiqi mənasında möhtəşəm bir işığa doğru gedir. Təəccüblənməyin. İndi artıq Mübariz Orucov küçəsindən başlayaraq İsmayıllının bütün prospekt və küçələrinin italyan üslubunda işıqlandırılmasına start verilib. Elə ona görə də biz də bu yerdə şərhsiz, filansız “Həmişə işığa doğru, İsmayıllı!” - deməklə yazımıza nöqtə qoyuruq...

İlqar HƏSƏNOV

Xalq qəzeti.- 2013.- 2 aprel.- S. 5.