“Heydər Əliyev və Azərbaycanda gənclər siyasəti”

Bakı Dövlət Universitetində “Heydər Əliyev və Azərbaycanda gənclər siyasəti” mövzusunda konfrans keçirilmişdir.

Konfransda universitetin rektoru, professor Abel Məhərrəmov, millət vəkili Fəttah Heydərov, Bakı Şəhər Gənclər və İdman Baş İdarəsinin rəisi Raqif Abbasov, BDU-nun və digər ali məktəblərin müəllim və tələbə kollektivləri iştirak etmişdir.

Tədbiri giriş sözü ilə açan universitetin rektoru Abel Məhərrəmov Azərbaycanda gənclər siyasətinin əsasının müstəqil dövlətimizin memarı və qurucusu, ümummilli lider Heydər Əliyev tərəfindən qoyulduğunu, gənclərin inkişafına və onların təhsilinə ulu öndərin daim böyük önəm verdiyini vurğulamışdır.

Mərasimdə çıxış edən Bakı Şəhər Gənclər və İdman Baş İdarəsinin rəisi Raqif Abbasov gənclərimizin bir fərd, əsl Azərbaycan vətəndaşı kimi formalaşmasında ümummilli lider Heydər Əliyevin danılmaz əməyi, misilsiz xidmətlərinin olduğunu, ulu öndərin zəngin və möhtəşəm dövlətçilik fəaliyyətində gənclər siyasətinin hər zaman xüsusi yer tutduğunu bildirmişdir. Natiq 1994-cü ildə dövlət gənclər siyasətini həyata keçirmək və müxtəlif gənclər təşkilatları arasında mərkəzləşmiş koordinasiyanı təmin etmək məqsədilə Gənclər və İdman Nazirliyinin yaradılması, 1996-cı il fevralın 2-də isə ulu öndər Heydər Əliyevin iştirakı ilə Ümumrespublika Gənclərinin I Forumunun keçirilməsindən, gənclər siyasəti ilə bağlı ümummilli lider tərəfindən imzalanmış fərman və sərəncamların mahiyyətindən ətraflı danışmışdır.

Daha sonra Ağsaqqallar Şurasının sədri, millət vəkili Fəttah Heydərov ulu öndər Heydər Əliyevin azərbaycançılıq ideyası və bu ideyanın layiqli davamçısı ölkə Prezidenti cənab İlham Əliyevin daxili və xarici siyasətindən müəllim və tələbələrə geniş məzmunlu nitq söyləmişdir.

Tədbirin sonunda təhsildə, idmanda, intellektual yarışlarda fərqlənmiş tələbələrə diplom, hədiyyə və tələbə kartları təqdim olunmuşdur.

Leyla QURBANOVA

Xalq qəzeti.- 2013.- 4 aprel.- S. 3.