Binəqədi rayonunda ulu öndər Heydər Əliyevin 90 illik yubileyi münasibətilə ağacəkmə kampaniyası keçirilmişdir

Binəqədi Rayon İcra Hakimiyyətinin təşəbbüsü ilə ulu öndər Heydər Əliyevin anadan olmasının 90 illik yubileyi münasibətilə təşkil olunan silsilə tədbirlər çərçivəsində metronun “Dərnəgül ” stansiyası yaxınlığındakı parkın ərazisində ağacəkmə kampaniyası keçirilmişdir. Kampaniyada rayon icra hakimiyyətinin başçısı Xaləddin İsgəndərov, Milli Məclisin deputatları Madər Musayev, Rafael İsgəndərov və ictimaiyyət nümayəndələri iştirak etmişlər.

Tədbirdə idarə, müəssisə və təşkilatların nümayəndələri, xüsusilə, gənclər yüksək fəallıq nümayiş etdirmişlər.

Kampaniyada ulu öndər Heydər Əliyevin əziz xatirəsinə ehtiram olaraq 500 ədəd ağac, çoxlu sayda gül kolları əkilmişdir.

Rayon icra hakimiyyətinin məsul işçisi Tamilla Hacıyeva xatırlatmışdır ki, ümummilli liderimiz Heydər Əliyev Azərbaycana rəhbərliyinin bütün dövrlərində respublikamızda ətraf mühitin mühafizəsinə, ekoloji durumun yaxşılaşdırılmasına, xüsusilə, yaşıllaşdırmaya mühüm önəm vermiş, bu məqsədlə geniş və çoxşaxəli proqramlar qəbul olunmuş, irimiqyaslı tədbirlər həyata keçirilmişdir. Dahi rəhbərin müəyyən etdiyi ekoloji siyasət bu gün Prezident İlham Əliyevin rəhbərliyi ilə öz real bəhrəsini verir. Dövlətimizin başçısının təşəbbüsü ilə 2010-cu ilin ölkəmizdə “Ekologiya ili” elan edilməsi, habelə son dövrlər davamlı olaraq genişmiqyaslı ağacəkmə aksiyalarının keçirilməsi birbaşa ətraf mühitin qorunmasına və yaşıllaşdırmaya xidmət göstərir.

Qeyd edək ki, rayon icra hakimiyyəti rəhbərliyinin dəstəyilə son bir ildə ətraf mühitin yaşıllıq zonasına çevrilməsi, vətəndaşların sağlam həyatının təmin olunması məqsədilə ayrı - ayrı sahələrdə vaxtaşırı ağacəkmə kampaniyası keçirilmiş, yüzlərlə ağac əkilmiş, təmizlik və abadlıq işləri aparılmışdır. Rayonun bütün idarə, müəssisə və təşkilatları iməciliklərdə fəal iştirak etmişlər.

Vaqif BAYRAMOV

Xalq qəzeti.- 2013.- 7 aprel.- S. 11.