Avrasiya İqtisadi Zirvə Toplantısında Azərbaycanın İKT sahəsində uğurları diqqət mərkəzində olmuşdur

Mərmərə Qrupu Sosial və Strateji Araşdırmalar Vəqfinin təşkilatçılığı ilə İstanbulda keçirilən Avrasiya İqtisadi Zirvə Toplantısında Azərbaycanın informasiya-kommunikasiya texnologiyaları (İKT) sahəsində uğurları diqqət mərkəzində olmuşdur.

Zirvə toplantısında çıxış edən Azərbaycanın rabitə və informasiya texnologiyaları naziri Əli Abbasov təbii ehtiyatları ilə zəngin olan və regionun lider dövlətinə çevrilmiş Azərbaycanda neft və qaz gəlirlərindən asılılığın azaldılması üçün ardıcıl islahatlar aparıldığını demişdir. Bu kontekstdə İKT-nin inkişafı mühüm əhəmiyyət kəsb edir. İnformasiya-kommunikasiya texnologiyaları iqtisadiyyatın digər sahələrinin də inkişafını müəyyən edən bir amilə çevrilmişdir. Hökumətimizin bu sahəyə diqqətinin nəticəsidir ki, bu gün Azərbaycanda internet istifadəçilərinin sayı sürətlə artmaqdadır. Genişzolaqlı internet şəbəkəsinin inkişaf etdirilməsi üçün böyük məbləğdə vəsait ayrılmışdır.

Nazir vurğulamışdır ki, torpaqlarının 20 faizinin Ermənistan tərəfindən işğal olunduğu Azərbaycan regionda infrastruktur layihələrinin həyata keçirilməsini diqqət mərkəzində saxlayır. Lakin işğal siyasətinin davam etməsi tam əməkdaşlığa əngəllər törədir. Bununla belə, regionda internet və İKT sahəsində inkişafa nail olmaq üçün Azərbaycan hökumətinin təşəbbüsü ilə BMT tərəfindən “Trans-Avrasiya super informasiya magistralı” (TASİM) ilə bağlı 2 qətnamə qəbul edilmişdir.

Ə.Abbasov əlavə etmişdir ki, ölkəmiz dövlətlərin təhlükəsizliyi baxımından mühüm məsələ olan kibercinayətkarlıqla mübarizəyə də böyük diqqət yetirir, bu sahədə əməkdaşlığa hər zaman açıqdır.

Oqtay BAYRAMOV

Xalq qəzeti.- 2013.- 11 aprel.- S. 4.