“Azərsu” ASC macar şirkəti ilə əməkdaşlıq sazişi imzalamışdır

“Azərsu” Açıq Səhmdar Cəmiyyəti ilə Macarıstan Respublikasının “Budapeşt Sukanal” Səhmdar Cəmiyyəti (Waterworks of Budapest Plc. şirkəti) arasında əməkdaşlığa dair saziş imzalanmışdır.

İmzalanma mərasimində çıxış edən “Azərsu” ASC-nin sədri Qorxmaz Hüseynov Azərbaycanda su təchizatı və kanalizasiya sistemlərinin yenidən qurulması layihələri barədə məlumat verərək bu sahədə beynəlxalq maliyyə təşkilatları və nüfuzlu xarici şirkətlərlə sıx əməkdaşlıq edildiyini diqqətə çatdırmışdır. Q. Hüseynov sözügedən sistemlərin dünya standartları səviyyəsində qurulması məqsədilə layihələrin icrasında ən yeni texnologiyalardan istifadə edildiyini, su təchizatı və kanalizasiya infrastrukturlarının müasir metodlarla idarəedilməsinə üstünlük verildiyini qeyd etmişdir. Qeyd olunmuşdur ki, bu sahədə böyük təcrübəsi olan Macarıstanın “Budapeşt Sukanal” Səhmdar Cəmiyyəti ilə əməkdaşlığın geniş perspektivləri var. Bu sahədə əməkdaşlığın davam etdirilməsinin su təchizatı və kanalizasiya infrastrukturunun yenidən qurulması layihələrinin əhatə dairəsinin daha da genişləndirilməsinə təkan verəcəyini diqqətə çatdıran Q. Hüseynov bildirmişdir ki, bir müddət əvvəl “Azərsu” ASC-nin mütəxəssisləri Macarıstana ezam edilmiş və “Budapeşt Sukanal” Səhmdar Cəmiyyətinin fəaliyyəti ilə yaxından tanış olmuşlar.

“Budapeşt Sukanal” Səhmdar Cəmiyyətinin baş direktoru Csaba Haranghy Azərbaycanda infrastruktur sistemlərinin inkişafına dövlət tərəfindən böyük dəstək verildiyini qeyd etmiş, içməli su təchizatı və kanalizasiya sektorunda yeni layihələrin icrasını yüksək dəyərləndirmişdir. Qonaq Azərbaycanda içməli su təchizatı və kanalizasiya xidmətlərindən istifadənin yaxşılaşdırılması istiqamətində həyata keçirilən layihələri yaxından izlədiklərini vurğulayaraq ölkəmizdə qısa müddətdə böyük layihələrin icrasına başlanıldığını diqqətə çatdırmışdır. Rəhbərlik etdiyi şirkətin idarəetmə sistemlərinin yaradılması, müasir tipli su anbarlarının tikintisi səhəsində böyük təcrübəyə malik olduğunu bildirən C. Haranghy bu sahədə qarşılıqlı təcrübə mübadiləsinə əsaslanmaqla əməkdaşlığın geniş perspektivlərinin mümkünlüyünü vurğulamışdır. Axırda “Azərsu” ASC-nin sədri Qorxmaz Hüseynov və “Budapeşt Sukanal” Səhmdar Cəmiyyətinin baş direktoru Csaba Haranghy əməkdaşlıq sazişini imzalamışlar.

Mirbağır YAQUBZADƏ

Xalq qəzeti.- 2013.- 12 aprel.- S. 3.