Ümummilli lider Heydər Əliyevin 90 illik yubileyi münasibətilə Suraxanı rayonunda tədbir keçirilmişdir

Bakı Şəhər Mədəniyyət və Turizm İdarəsi ilə Suraxanı Rayon İcra Hakimiyyətinin birgə təşkilatçılığı ilə bu rayonda Heydər Əliyev Mərkəzində ulu öndər Heydər Əliyevin 90 illik yubileyi münasibətilə tədbir keçirilmişdir.

Tədbir iştirakçıları əvvəlcə Heydər Əliyev parkında ümummilli liderin abidəsini ziyarət edərək önünə gül dəstələri düzmüş, sonra isə Heydər Əliyev Mərkəzində dahi öndərin həyatının və çoxşaxəli dövlətçilik fəaliyyətinin müxtəlif dövrlərini əks etdirən materiallar, fotoşəkillər və eksponatlarla tanış olmuşlar.

Mərkəzin elektron lektoriya zalında öz işinə başlayan tədbirdə əvvəlcə bir dəqiqəlik sükutla ulu öndərin əziz xatirəsi yad edilmişdir. Sonra rayon icra hakimiyyətinin başçısı İlqar Abbasov çıxış etmişdir. Başçı demişdir ki, Heydər Əliyev Azərbaycanın ən böyük sərvəti hesab olunan milli-mənəvi dəyərlər və mənəviyyatımızın sözün böyük mənasında hamisi olmuşdur.

İ. Abbasov qeyd etmişdir ki, mənsub olduğu xalqın tarixi keçmişinə, mədəni irsinə və mənəvi dəyərlər sisteminə böyük məhəbbət duyğularıyla yanaşan ümummilli lider həm də bu dəyərlərin qoruyucusu idi. Hələ ötən əsrin yetmişinci illərində görkəmli dövlət xadimi, müdrik şəxsiyyət kimi ulu öndər yaxşı bilirdi ki, aydın və dərk olunmuş milli ideologiya hər bir xalqın irəliyə doğru inkişafının yolgöstərəni və bələdçisidir. Milli dövlətçilik və milli-mənəvi dəyərlər sıx daxili vəhdətdədir. Yalnız milli kimliyi bəlli olan və özünü bir millət kimi dərk edən xalqın bitkin inkişaf proqramı ola bilər. Heydər Əliyev nəinki bu proqramı yaratdı, həm də onu qəbul etdirdi.

İlqar Abbasov xatırlatmışdır ki, Heydər Əliyevin mədəniyyətimizlə bağlı gördüyü işləri sayıb qurtarmaq çətindir. Nizami Cəncəvinin məqbərəsinin bərpası, Molla Pənah Vaqifə məqbərə tikilməsi, Gəncədə Cavad xan kompleksinin inşa edilməsi, Hüseyn Cavidin nəşinin uzaq Sibirdən Azərbaycana gətirilməsi, doğulduğu doğma Naxçıvanda torpağa tapşırılması və Cavidin müqəddəs ruhuna hörmət olaraq məqbərənin ucaldılması, eləcə də Bakıda bu böyük şairin adına ev muzeyinin açılması məhz Heydər Əliyevin adı ilə bağlıdır.

Bu gün Azərbaycanda onlarla sənət adamının – yazıçıların, şairlərin, musiqiçilərin, rəssamların, memarların ev muzeyləri fəaliyyət göstərir. Teatr, kino, musiqi, rəssamlıq və bir çox başqa sahələrdəki inkişaf və tərəqqi ilk əvvəl Azərbaycan dövlətinin, onun ümummilli lideri Heydər Əliyevin diqqət və qayğısının nəticəsində mümkün olmuşdur.

Tədbirdə Milli Məclisin deputatı Sevinc Fətəliyeva, Bakı Şəhər İcra Hakimiyyəti başçısının müavini Fidumə Hüseynova, Bakı Şəhər Mədəniyyət və Turizm İdarəsinin rəisi Əlikram Əliyev çıxış etmişlər. Natiqlər bir daha vurğulamışlar ki, ulu öndər Heydər Əliyevin milli-mənəvi dəyərlərimizə göstərdiyi qayğı müstəqil Azərbaycanın mənəvi həyatında əsaslı yüksəlişə səbəb olmuşdur. Qədim zəngin maddi və mənəvi mədəniyyətə malik xalqımız məhz dahi öndərimizin mədəniyyət siyasəti nəticəsində öz varlığı, mənəvi irsi, keçmişi ilə fəxr edə bilər.

Sonra mədəniyyət işçılərinin təşkil etdiyi ədəbi hissə olmuşdur. Ümummilli liderin şərəfinə yazılmış şeirlər, musiqi nömrələri səsləndirilmişdir.

Vaqif BAYRAMOV

Xalq qəzeti.- 2013.- 12 aprel.- S. 6.