Həmyerlilərimiz beynəlxalq elmi-təcrübi konfransda

Astara Pedaqoji Kolleci elmi-praktik əlaqələrini genişləndirir. İndiyə qədər Afina, Maunt-Abu, Daşkənd, Moskva, Sankt-Peterburq, Nijni-Novqorod, Çelyabinsk şəhərlərində keçirilən beynəlxalq konfrans və forumlarda kollec uğurla təmsil olunmuşdur.

Bu günlərdə Kiyevdəki M.P.Draqomanov adına Milli Pedaqoji Universitetdə keçirilmiş beynəlxalq elmi-təcrübi konfransda Astara Pedaqoji Kollecinin direktoru, fəlsəfə elmləri doktoru, əməkdar müəllim, dosent Əlihəsən Həmzəyev və kollecin müəllimi Azər Fərəməzov da iştirak etmişlər. Konfrans “Beynəlxalq diplomdan sonrakı təhsilin aktual problemləri: vəziyyəti və inkişaf perspektivləri” kimi əhəmiyyətli bir mövzuya həsr edilmişdi. 30-a yaxın xarici ölkədən və Ukraynanının 50-dən artıq ali təhsil müəssisəsindən olan görkəmli alimlər arasında iki gün ərzində mövzu ətrafında müzakirələr getmişdir. Mütəxəssislər fikirlərini bölüşmüş, praktik olaraq dərslərdə iştirak etmiş və təcrübə mübadiləsi aparmışlar.

Konfransın plenar iclasını universitetin rektoru, fəlsəfə elmləri doktoru, professor, Ukrayna Milli Pedaqoji Elmlər Akademiyasının akademiki, Ukrayna Milli Elmlər Akademiyasının müxbir üzvü V.Andryuşenko açmışdır. Fəlsəfə elmləri doktoru Əlihəsən Həmzəyevin “Qloballaşma və beynəlxalq təhsilin fəlsəfi problemləri” mövzusunda məruzə-təqdimatı dinləyicilərin böyük marağına səbəb olmuşdur. Məruzə-təqdimatda Azərbaycan və Ukrayna xalqlarının dostluq əlaqələrindən, müasir Azərbaycan dövlətinin son dövrlərdə beynəlxalq arenada əldə etdiyi uğurlardan və təhsil sahəsində qazanılan nailiyyətlərdən qeyd olunmuşdur. Məruzəçi xüsusilə vurğulamışdır ki, cəmiyyətin inkişafı konsepsiyasını və təhsil sahəsində onun innovativ modelini ilk dəfə yeni, müstəqil Azərbaycanın qurucusu və memarı ulu öndər Heydər Əliyev yaratmışdır. Ulu öndərin yolunu layiqincə davam etdirən Prezident İlham Əliyevin titanik fəaliyyəti nəticəsində böyük uğurlar əldə edilmişdir. Ə.Həmzəyev Azərbaycan təhsilinin uğurları barədə hazırlanmış video-çarxı içtirakçıların nəzərinə çatdırmışdır.

Konfransda fəal iştiraka, ən maraqlı və aktual məruzəyə görə M.P.Draqomanov adına Milli Pedaqoji Universitetin xatirə medalı və sertifikat Ə.Həmzəyevə təqdim edilmişdir

Əli NƏCƏFXANLI

Xalq qəzeti.- 2013.- 14 aprel.- S. 7.