Şəmkir: müasirləşmə və yeniləşmə yeni mərhələyə qədəm qoyur

Bu ilin fevralında Prezident İlham Əliyevin sədrliyi ilə “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunmuş konfransda ölkə rəhbərinin bir sıra məmurların fəaliyyəti ilə bağlı və hamının böyük marağına və razılığına səbəb olan fikirlərini, tənqidi çıxışını dinləyərkən gözlərim önündən istər-istəməz qulluq etdiyim bölgənin icra hakimiyyəti başçıları, digər məmurları gəlib keçdi.

Əksəriyyətini uzun illərdir tanıyıram. Yeniləri ilə də işlə bağlı tez-tez təmasda oluruq. Təbii ki, jurnalist-məmur dialoqları zamanı onların hər birinin keyfiyyətlərini üzə çıxarmaq çətin məsələdir. Bu işdə daha çox əhalinin ən müxtəlif təbəqələrinin fikirlərini öyrənmək, tez-tez adamlar arasında olmaq daha önəmlidir.

Hansı rayonda, şəhərdə ki, əmin-amanlıqdır, sakitlikdir, məmur özbaşınalığı yoxdur, orada inkişaf da göz qabağındadır. Şəmkir də belə rayonlardandır. Yaxın bir-iki il ərzində bu rayonu tanımaq olmayacaq. İndi küçələrindən, döngə-dalanlarından güc-bəla ilə keçdiyimiz Şəmkir suyu, kanalizasiyası, bir-birindən yaraşıqlı park və xiyabanları, gözəl binaları, hər cür kommunikasiyası olan bir məkan kimi tanınacaq.

Dəfələrlə fikir vermişəm. Necə deyərlər, səhərin gözü açılmamış yollarda xüsusi forma geyinmiş, təmizlik işləri aparan qadınları görmüşəm. Yer qazan, hörgü hörən kişilərlə rastlaşmışam. Hamısının da üzündə həvəs, ruh yüksəkliyi sezmişəm.

Bu rayonda son illər nə iş görülübsə, həm də sadəliyə, təvazökarlığa söykənib. Rayonun icra hakimiyyətinin başçısından tutmuş ən aşağı vəzifəli məmurlara kimi əhali ilə qaynayıb qarışıblar. Onların əksəriyyəti məhz öz insani keyfiyyətlərinə görə uzun illərdir ki, işləyir. Rayon icra hakimiyyətinin başçısı Nazim Veysov özü sadəliyi, istiqanlılığı, səmimiyəti və adamları ruhlandırmaq bacarığı ilə daim nümunə göstərib.

Əhalisinin sayı 200 min nəfəri keçən Şəmkirdə yuxarı orqanlara göndərilən şikayət ərizələrinin sayı da ilbəil azalır. Sənədlərlə və vətəndaşların müraciətləri ilə iş şöbəsinin müdiri Sənan Quliyev söhbət zamanı dedi ki, məmur-vətəndaş münasibətlərinin səviyyəsi istər-istəməz öz təsirini göstərir. Məsələn, keçən il rayon icra hakimiyyətinə 2011-ci illə müqayisədə 640 ədəd az müraciət daxil olmuşdur. Rayon icra hakimiyyəti başçısının səyyar qəbulları öz səmimiliyi, işgüzarlığı və operativliyi ilə yadda qalır. Rəhbərliyin sadəliyi və diqqətcilliyi adi kənd sakinlərinə öz problemlərini birbaşa söyləməyə imkan yaradır.

...Rayonda olarkən ayrı-ayrı məmurların işi ilə bir daha maraqlandıq, onların özləri ilə söhbət etdik. Təbii ki, hələ də müəyyən problemlər var, bəzən izahat-təbliğat işləri lazımınca olmur, hüquqi biliklərin təbliği zəifdir. Amma bütövlükdə Şəmkirdə məmur-əhali münasibətlərində öyrəniləsi, nümunə götürüləsi məqamlar çoxdur. Onların bir neçəsinin fikirlərini oxucularla bölüşdürürük.

M.Şıxlinski, rayon təhsil şöbəsinin müdiri:

-Son illərdə Azərbaycan Respublikasının Prezidenti cənab İlham Əliyevin qarşıya qoyduğu vəzifələrə uyğun olaraq vətəndaşların müraciətlərinə, qəbuluna və onların qaldırdıqları məsələlərin həllinə diqqət daha da artırılmışdır.

Azərbaycan Respublikasının Prezidenti Administrasiyasının rəhbərinin imzası ilə Təhsil Nazirliyinə daxil olmuş 2009-cu il, 13 mart tarixli 2/110 nömrəli məktubu əsasında “Vətəndaşların müraciətlərinə baxılması işinin yaxşılaşdırılması tədbirləri haqqında” respublika təhsil nazirinin 2009-cu il, 30 aprel tarixli əmri bu məsələ ilə əlaqədar yeni bir stimul olmuş, vətəndaş müraciətlərinin diqqətlə dinlənilməsi, şikayət ərizələrinin şikayətçinin iştirakı ilə araşdırılması, qaneedici cavabların verilməsi ön plana çəkilmişdir.

Məsələnin əhəmiyyəti nəzərə alınaraq rayon təhsil şöbəsi şurasının fəaliyyət planında ildə iki dəfə olmaqla ərizə və şikayətlərə baxılması və onların icra vəziyyəti barədə müzakirə aparılıb nəticələr təhlil edilir. Yekun olaraq ilin sonunda Təhsil Nazirliyinə hesabat təqdim edilir.

2012-ci il ərzində təhsil şöbəsinə rəsmi olaraq 785 müraciət daxil olmuşdur. Onlardan 264-ü qismən ödənişli məzuniyyət, 205-i şagird yerdəyişməsi, 86-sı ikinci iş yeri, 13-ü müəllim yerdəyişməsi, 83-ü təkrar imtahan, 17-si dublikat attestat, 61-i dərs saatının artırılması ilə əlaqədar olmuşdur. Ərizələr sırasında 25-i şikayət xarakterlidir. Bundan əlavə 21 nəfər Təhsil Nazirliynə, 4 nəfər digər orqanlara müraciət etmiş və müvafiq olaraq onların da həlli üçün təhsil şöbəsinə göndərilmişdir.

Ümumi müraciətlərin 727-si, o cümlədən 20 şikayət müsbət həll edilmiş, 45 müraciət, o cümlədən 4 şikayət ərizəsi əsassız hesab edilmiş, 13 müraciət, o cümlədən 1 şikayət obyektiv şəraitlə bağlı icradadır və bununla əlaqədar vətəndaşlara lazimi izahat verilmişdir. Ötən il ərzində 321 nəfər vətəndaş qəbul edilmiş, müraciətlər dinlənilmiş, müvafiq tədbirlər görülmüş, əsassız sayılan müraciətlər istisna olmaqla digərləri müsbət həllini tapmış, təkrar müraciət və şikayətə yol verilməmişdir.

İlin əvvəlindən indiyədək 31 nəfər qəbula gəlmiş, 103 ərizə daxil olmuşdur. Şikayət xarakterli 2 ərizədən biri müsbət həll edilmiş, ikincisi isə icradatdadır.

Həftənin 2-ci və 4-cü günləri qəbul günü olsa da, vətəndaşlar müraciət etdikləri bütün vaxtlarda dinlənilmişlər.

Hər bir zaman vətəndaşların müraciət, ərizə və şikayətlərinə baxılmasında mövcud qanunvericiliklə yanaşı, müvafiq tövsiyələr nəzərə alınmış, müraciətlərin obyektiv araşdırılması və vaxtında cavabların verilməsi təmin edilmişdir.

A. Şərifov, Dövlət Sosial Müdafiə Fondunun Şəmkir rayon şöbəsinin müdiri:

-Dövlət Sosial Müdafiə Fondunun Şəmkir rayon şöbəsi öz fəaliyyətini Azərbaycan Respublikasının qanunları, Azərbaycan Respublikası Prezidentinin fərman və sərəncamları, Nazirlər Kabinetinin qərarları, Dövlət Sosial Müdafiə Fondunun əmr və göstərişləri, Şəmkir Rayon İcra Hakimiyyəti başçısının tapşırıq və tövsiyələri əsasında qurmuşdur. Şöbənin 34 nəfər əməkdaşı 26552 pensiyaçıya, fəaliyyətdə olan 1978 sahibkarlıq fəaliyyəti ilə məşğul olan fiziki şəxsə, 253 hüquqi şəxsə və 1359 torpaq pay mülkiyyətçisinə xidmət edir. Şöbədə vətəndaşlara daha yaxşı xidmət göstərilməsi üçün şöbə müdiri, müdir müavini və sektor müdiri tərəfindən həftənin bütün günləri vətəndaşlar qəbul olunur və bunun ayrıca uçotu aparılır.

Ötən il ərzində şöbəyə 852 vətəndaş, o cümlədən 779 vətəndaş yazılı, 73 vətəndaş isə şifahi müraciət etmişdir. 779 yazılı müraciətdən 670-i pensiya təyinatı ilə, 60-ı itirilmiş pensiya plastik kartlarının yenisi ilə əvəz olunması, 49-u isə digər məsələlərlə əlaqədar olmuşdur. Şöbəyə daxil olmuş 852 müraciətdən 838-i müsbət həllini tapmış, 14-ü isə pensiya təyinatı ilə əlaqədar sənədlər qaydasında olmadığından əsassız hesab edilmişdir.

2012-ci il ərzində Dövlət Sosial Müdafiə Fondundan daxil olmuş 21 vətəndaşın sorğu xarakterli müraciəti şöbədə araşdırılmış və onlara qanuna müvafiq izahatlar verilmişdir.

İl ərzində 4 halda Azərbaycan Respublikası Baş Prokurorluğu yanında Korrupsiyaya Qarşı Mübarizə İdarəsinin “161-qaynar xətti”nə müraciət olunmuşdur. Rayon icra hakimiyyəti, dövlət idarələri və ictimai xidmət işçiləri, həmkarlar ittifaqı rayon komitəsi, habelə sözügedən fond nümayəndələrindən ibarət xüsusi komissiya tərəfindən həmin müraciətlər araşdırılmış və hamısının da böhtan xarakterli olduğu müəyyənləşdirilmişdir. Bununla əlaqədar vətəndaşların təkzib vermələri barədə müvafiq qətnamələr çıxarılmışdır.

Şöbədə məmur-vətəndaş münasibətlərinə xüsusi diqqət yetirilir. Belə ki, vətəndaşların hər bir müraciətinə əməkdaşlar tərəfindən çox həssasıqla yanaşılır və qanun əsasında bütün köməkliklər göstərilir.

Şöbənin əməkdaşları məmur-vətəndaş münasibətlərində dövlət qulluqçularının etik davranış qaydalarından kənar heç bir hərəkətə yol vermirlər.

Q.Heydərov, rayon Əhalinin Sosial Müdafiəsi Mərkəzinin direktoru:

-Əhalinin sosial müdafiəsinin yaxşılaşdırılması, ölkəmizdə insanların daha yaxşı yaşaması və onların illik gəlirlərinin artmasına dövlət dəstəyinin gücləndirilməsi hökümətin əsas prioritetlərindən biridir.

Mərkəzə müraciət edən vətəndaşlar hər biri son dərəcə nəzakətlə qarşılanır, onların müraciətlərinə diqqətlə yanaşılır. Bunun nəticəsidir ki, 2011-ci illə müqayisədə 2012-ci ildə şikayət edənlərin sayı 50 faizədək azalmışdır.

Aztəminatlı ailələrin sosial müdafiəsinin yaxşılaşdırılması məqsədilə ötən il ünvanlı sosial yardım üçün mərkəzə 3519 ailə müraciət etmişdir ki, bunun da 3179-u müsbət həll olunmuşdur.

Tələblərinin həll edilməsi mümkün olmayan vətəndaşlardan 118 şikayət daxil olmuşdur. Bunlardan 23 nəfər Korrupsiyaya Qarşı Mübarizə İdarəsinin 161 saylı qaynar xəttinə, 5 nəfər Şəmkir Rayon Prokurorluğuna, 88 nəfər Əmək və Əhalinin Sosial Müdafiəsi Nazirliyinin 142 saylı qaynar xəttinə və 2 nəfər isə Şəmkir Rayon İcra Hakimiyyətinə müraciət etmişdir.

Prezident İlham Əliyevin məlum çıxışından sonra şikayətlərin yerində həll olunması üçün mərkəzin işçilərinə dövlət qulluğu haqqında qanunda göstərilən vəzifə borcları bir daha xatırladılmış, müraciət edən vətəndaşlara izahat işlərinin daha mükəmməl aparılması tələb olunmuşdur. Bu, bizim həm vəzifə, həm də vətəndaşlıq borcumuzdur.

F.Hüseynov, icra hakimiyyəti başçısının Zəyəm-Cırdaxan kənd inzibati ərazi dairəsi üzrə nümayəndəsi:

-Zəyəm-Cırdaxan kəndi əhalisinə və ərazisinə görə rayonumuzun ən böyük kəndlərindən biridir. Kənddə 8656 nəfər yaşayır.

Gündəlik fəaliyyətində kənd sakinləri ilə müntəzəm münasibətdə olan kənd İSD üzrə nümayəndəlikdə digər vəzifələrlə yanaşı, daim diqqət mərkəzində saxlanılan məsələlərdən biri və ən əsası vətəndaş-məmur münasibətlərinin düzgün və tələb olunan səviyyədə qurulmasıdır.

Nümayəndəlik gündəlik işində bu məsələyə xüsusi fikir verir və demək olar ki, fəaliyyətini həmin istiqamətdə qurur.

Nümayəndə və müavin tərəfindən vətəndaşlar müntəzəm qəbul olunur, onların ərizə, şikayət və müraciətləri diqqətlə dinlənilir və icrası ilə bağlı xüsusi iş aparılır.

Xatırladım ki, 2012-ci ilin və bu ilin ötən ayları ərzində vətəndaşlar tərəfindən nümayəndəliyə 153 ədəd ərizə, şikayət və müraciət daxil olmuşdur. Bu müraciətlərə diqqət və qayğı ilə yanaşılmış, onların həlli istiqamətində müvafiq tədbirlər görülmüşdür.

N.Əhmədov, rayon Mərkəzi xəstəxanasının baş həkimi:

-Ötən il Mərkəzi xəstəxanada 2 min nəfərdən artıq əhali baş həkim və baş həkim müavini tərəfindən qəbul olunmuş, onların tələbləri qanun daxilində həll olunmuşdur. 2012-ci ildə 2 dəfə Dağ-cəyir, 1 dəfə Seyfəli kəndindən, 2 dəfə isə Şəmkir şəhərindən Səhiyyə Nazirliyinin nəzdində yaradılmış “Qaynar xətt”ə şikayət daxil olmuşdur. Bu şikayətlərin əsas səbəbləri şəkər ölçən aparatların testlərinin verilməməsi, vərəm əleyhinə dərmanların vaxtlı-vaxtında çatdırılmaması və s. olmuşdur.

2012-ci ildə 11 nəfər Heydər Əliyev Fonduna və Səhiyyə Nazirliyinə müraciət etmiş, onların hamısı mərkəzi xəstəxanada yaradılmış xüsusi komissiya tərəfindən qəbul olunmuş, şikayətlərin motivləri araşdırılmış və lazımi tədbirlər həyata keçirilmişdir.

Ötən il 21 nəfər respublikanın elmi-tədqiqat institutlarında müayinə və müalicə olunmaq üçün yuxarı təşkilatlara müraciət etmiş və onların hamısı profilə uyğun institutlara göndərilmişdir.

Mərkəzi rayon xəstəxanasının baş həkiminin və müavinin qəbul günləri üçün lövhələr qurulmuşdur. Müraciət edənlər hər gün (istirahət və bayram günləri istisna olmaqla) qəbul olunurlar. Onların qəbulu haqqında xəstəxanada xüsusi jurnal açılmış və qəbula gələn hər bir vətəndaşın qeydiyyatı aparılır.

...Şəmkirdə həyata keçirilən hər bir iş təkcə səfərbərlik, işgüzarlıq, təşəbbüskarlıq meyilləri ilə deyil, həm də adamlara münasibətlə ölçülür. O yerdə ki qarşılıqlı anlaşma, vəzifəli ilə vəzifəsizin bir-birinə isti münasibəti nəzərə çarpır, orada böyük iş də var, abadlıq, quruculuq da.

Hamlet QASIMOV

Xalq qəzeti.- 2013.- 14 aprel.- S. 11.