Akademik Zərifə xanım Əliyevaya həsr olunmuş səyyar mərasim

Respublikamızda tibb elminin inkişafına mühüm töhfələr vermiş görkəmli oftalmoloq, akademik Zərifə xanım Əliyevanın 90 illik yubileyi paytaxtımızın mərkəzi rayonu olan Səbaildə də geniş qeyd olunur. Rayonun elm, təhsil və səhiyyə müəssisələrində görkəmli alimin xatirəsinə həsr olunmuş tədbirlər keçirilir, sərgi və aksiyalar təşkil olunur.

Səbail Rayon İcra Hakimiyyətinin təşkilatçılığı, orta məktəb şagirdlərinin iştirakı ilə növbəti tədbirin daha maraqlı və yaddaqalan olması üçün məkan Xəzər dənizinin Bakı buxtası seçilmişdi. Məktəblilər əvvəlcə Dənizkənarı Milli Parkda “Yaxt-klub”a gəlmiş, burada “Vətən” gəmisinə minərək Bakı buxtasına səyahətə çıxmışlar. Onların bir çoxu ilk dəfə belə gəzintiyə çıxırdı. Uşaqlar gəminin göyərtəsində akademik Zərifə Əliyevaya həsr olunmuş fotosərgi, kitab və nəşrlər, rayon məktəblilərinin rəsmləri, müxtəlif materiallardan hazırlanmış əl işləri və inşa yazı nümunələri ilə tanış olmuşlar.

Səbail Rayon İcra Hakimiyyəti başçısının birinci müavini Xalidə Bayramova Azərbaycanın görkəmli alimi və təbibi Zərifə xanım Əliyevanın həyat və fəaliyyəti barədə məktəblilərə geniş məlumat vermişdir. O bildirmişdir ki, Zərifə xanım respublikamızda tibb elminin inkişafına mühüm töhfələr vermiş, oftalmologiyanın aktual problemlərinə dair sanballı tədqiqatları ilə nəinki keçmiş SSRİ məkanında, həmçinin dünya miqyasında böyük şöhrət qazanmışdır. Onun elmi-pedaqoji və ictimai fəaliyyəti həkimlərin yeni nəslinin yetişməsinə və Azərbaycanda oftalmologiya elminin inkişafına güclü təsir göstərmişdir. Ümummillli lider Heydər Əliyevin ömür-gün yoldaşı Zərifə xanım həm də fəal ictimai xadim, qayğıkeş ana olmuşdur.

Məktəblilər Zərifə xanım Əliyevaya, anaya, Azərbaycan qadınına, Vətənimizə həsr olunmuş şeir və mahnılarla, bədii kompozisiyalarla çıxış etmiş, rəqslər ifa etmişlər.

Dəniz gəzintisi zamanı məktəblilər və onların müəllimləri Bakı buxtasından əzəmətli Dövlət Bayrağı Meydanını, “Kristall-Hall” zalını, yeniləşən Bakı bulvarını, şəhərin ümumi mənzərəsini seyr etmişlər.

R.TAHİR

Xalq qəzeti.- 2013.- 16 aprel.- S. 9.