Binəqədi rayonunda görkəmli oftalmoloq alim, akademik Zərifə xanım Əliyevanın xatirəsi anıldı

Bu münasibətlə rayondakı Zərifə xanım Əliyevanın adını daşıyan parkda anım mərasimi keçirildi. Rayon icra hakimiyyətinin təşkilatçılığı ilə reallaşan tədbirdə dövlət qurumlarının, qeyri-hökumət təşkilatlarının nümayəndələri, tanınmış ziyalılar iştirak edirdilər.

Tədbir iştirakçıları parkda Zərifə xanım Əliyevanın abidəsinin önünə gül dəstələri düzdü, xatirəsini dərin ehtiramla yad etdilər.

Rayon icra hakimiyyəti başçısının müavini Vüsal İsmayılov bizimlə söhbətində Zərifə xanım Əliyevanın oftalmologiya elminin inkişafındakı xidmətlərindən söz açdı. Bildirdi ki, Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin tarixinə parlaq səhifələr kimi yazılmışdır. Görkəmli alim Azərbaycanda traxomanın kökünün kəsilməsinə böyük əmək sərf etmiş, xəstəliyin müxtəlif mərhələlərinin öyrənilməsi və müalicə metodlarının tapılması məqsədilə dəyərli elmi axtarışlar aparmışdır.

Zərifə xanım Əliyeva müstəqil Azərbaycan dövlətinin memarı və qurucusu, ömrünü Vətəninin və xalqının tərəqqisinə həsr etmiş dahi şəxsiyyətin, ümummilli lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olmuşdur. Vaxtilə Əziz Əliyevin ailəsində görüb-götürdükləri ölkənin birinci şəxsinin xanımı olduğu zamanlarda köməyinə çatmışdır. Zərifə xanım Əliyeva qədirbilən övlad, məşhur alim, istedalı insan və qayğıkeş ana idi.

Vaqif BAYRAMOV

Xalq qəzeti.- 2013.- 16 aprel.- S. 10.