Azərbaycan Milli Olimpiya Komitəsində “Qadınlar idmanda” mövzusunda seminar keçirilmişdir

Aprelin 15-də Azərbaycan Milli Olimpiya Komitəsində (MOK) “Qadınlar idmanda” mövzusunda seminar keçirilmişdir.

AzərTAc xəbər verir ki, seminarı ABŞ-ın ölkəmizdəki səfirliyinin dəvəti ilə Azərbaycanda səfərdə olan Birləşmiş Ştatların ESPN Televiziya Xəbərləri şəbəkəsinin aparıcı idman jurnalisti, Kolumbiya Universitetinin jurnalistika üzrə professoru, peşəkar roller derbi idmançısı xanım Ceyn MakManus aparmışdır.

Əvvəlcə MOK-un əməkdaşı, “İnkişaf naminə idman” İctimai Birliyinin rəhbəri Mehman Kərimov Azərbaycan idmançılarının qazandığı nailiyyətlərdən söz açmış, seminarın əhəmiyyətini yüksək qiymətləndirmişdir.

Bildirmişdir ki, MOK-da məşhur idmançı, idman mütəxəssisi və bu sahənin jurnalistləri ilə görüşlər artıq adət halını almışdır. Ötən il İngiltərə Futbol Assosiasiyasının sabiq direktoru və BBC telekanalının idman reportyoru Devid Devisin iştirakı ilə Azərbaycan jurnalistləri üçün seminar təşkil olunmuşdu. Bu kimi silsilə tədbirlərin keçirilməsində məqsəd ölkədə idman jurnalistikasını inkişaf etdirmək, həmçinin ictimaiyyətin diqqətini qadın və qızların bədən tərbiyəsi və idmanla fəal iştirakına cəlb etməkdir.

C.MakManus ABŞ-da qadın idmanının inkişaf tarixindən, hazırda bu ölkədə qadınların idmana cəlb olunması istiqamətində görülən işlər barədə məlumat vermişdir. Bildirmişdir ki, qadınlar arasında idmanın kütləviliyinin təmin olunması istiqamətində ABŞ-da bir neçə qanun qəbul edilmişdir. 1972-ci ildə qəbul edilən “IX başlıq” adlı qanunla ABŞ-da qadınlara təhsil almaq hüququ verildi ki, bununla da qadınların idmanla məşğul olması üçün münbit şərait yarandı. İlk dəfə ABŞ-da kişi və qadın arasında yarış idmanın tennis növü üzrə keçirilmişdir. Həmin görüşdə xanım Billi Jean King rəqibi Bobbi Riggsə qalib gəlmişdir.

Qonaq C.MakManus ABŞ-ın tanınmış qadın idmançılarından olan sürətli maşın sürücüsü Danila Patrik, basketbolçu Britniy Griner, tennisçi Serrena Uilyams və qaydasız döyüşlə məşğul olan Ronda Rouseri barədə seminar iştirakçılarına məlumat vermiş və onların qazandığı nailiyyətlərdən danışmışdır. Vurğulamışdır ki, hazırda dünyada qadınlar məşğul olduqları idman sahələrində əlavə böyük gəlir əldə edirlər. Dünyaca məşhur qadın idmançılar bir çox şirkətlərin, brendlərin və məhsulların siması seçilir və bundan böyük mənfəət qazanırlar.

Sonda C.MakManus seminar iştirakçılarının suallarını cavablandırmışdır.

Xalq qəzeti.- 2013.- 16 aprel.- S. 6.