SƏBAİL: birinci rübün yekunları uğurludur

Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı nitqindən irəli gələn vəzifələr Səbail Rayon İcra Hakimiyyəti başçısı yanında şuranın iclasında ətraflı müzakirə olunmuşdur.

İclası giriş sözü ilə açan Səbail Rayon İcra Hakimiyyətinin başçısı Asif Əsgərov 2013-cü ilin birinci rübündə rayonda görülən işlərdən danışaraq bildirmişdir ki, ötən üç ay ərzində sənaye müəssisələri tərəfindən 5,97 milyon manatlıq məhsul istehsal edilmişdir. Əhaliyə nəqliyyat müəssisələri tərəfindən 153,4 milyon manatlıq, rabitə müəssisələri tərəfindən isə 144,5 milyon manatlıq xidmət göstərilmişdir. Bütün maliyyə mənbələri hesabına əsas kapitala 899,6 milyon manatlıq investisiya yönəldilmişdir ki, bu da keçən ilin müvafiq dövrünə nisbətən 36,7 faiz çoxdur.

İlin əvvəlindən əhaliyə 61,1 milyon manatlıq istehlak malları satılmış və ya pullu xidmətlər göstərilmişdir. Bu da ötən illə müqayisədə 22,5 faiz çoxdur. Həmin dövr ərzində xidmət müəssisələri tərəfindən əhaliyə 73,1 milyon manatlıq, yaxud 2012-ci ilin yanvar-mart aylarındakından 22,5 faiz çox əmtəə satılmışdır.

Cari ilin birinci rübündə rayonda 536 daimi yeni iş yeri açılmışdır. Ümumiyyətlə, 2009-cu ildən 2013-cü ilin mart ayına kimi Səbail rayonunda 9030 daimi iş yeri açılmışdır.

“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq 2013-cü ilin ilk 3 ayı ərzində 3 saylı vərəm əleyhinə dispanserdə, C.Hacıyev adına 3 saylı uşaq musiqi məktəbində və A.Kazımov adına 1 saylı şəhər poliklinikasında, 44 saylı uşaq bağçasında aparılan əsaslı təmir-yenidənqurma işləri başa çatdırılmış, 20-ci yaşayış sahəsində 102 və 118 saylı 35 kilovoltluq 2 yeni yarımstansiya şəbəkəyə qoşulmuş, Bibiheybət qəsəbəsində post məntəqəsi açılmışdır. Proqramın icrasına uyğun olaraq Badamdar qəsəbəsində yeni su anbarlarının tikintisi, Bibiheybət qəsəbəsində Mədəniyyət evi və qəsəbə kitabxanasının əsaslı təmir və yenidən qurulması işləri, qəsəbədəki 70 saylı uşaq bağçası üçün 2 mərtəbəli əlavə korpusun tikintisi, bağçanın köhnə binasının və 33 saylı poliklinikanın əsaslı təmiri davam edir.

Hazırda rayon ərazisində Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, “Alov qüllələri” kompleksinin, Badamdar qəsəbəsində Oksford məktəbi üçün yeni tədris korpusunun, “Azadlıq” meydanında yeraltı və Fəvvarələr meydanında yerüstü maşın dayanacaqlarının, Əhəd Yaqubov küçəsində kütləvi informasiya vasitələri işçiləri üçün yeni binanın və Müasir İstedadlar Məktəbinin, “Cənub” mehmanxanasının yerində 7 mərtəbəli yeni mehmanxananın, Qurban Abbasov küçəsində yeni iş mərkəzinin tikintisi, Dağüstü parkın ərazisinin bir hissəsində əsaslı təmir-yenidənqurma işləri və “İstiqlal” muzeyinin tikintisi, Dənizkənarı Milli Bulvarın Bayraq meydanı istiqamətində genişləndirilməsi “Qız qalası”nda bərpa və konservasiya işləri davam edir. Bu işlər çərçivəsində Azadlıq meydanı ərazisi tam şəkildə təmir edilmiş, yola yeni asfalt örtüyü çəkilmişdir.

RİH tərəfindən Dağüstü parkda rayonun ictimai təşkilatları və “Şəhidlər Xiyabanı” kompleksində çalışan texniki xidmət işçiləri üçün yeni binanın, Badamdar qəsəbəsində texniki xidmət işçiləri üçün 2 mərtəbəli yaşayış binasının inşası başa çatdırılmış, oradakı mənzillər lazımı mebel və avadanlıqla təmin olunmuşdur.

Hazırda Badamdar şosesi boyunca mağaza, ofis və iaşə obyektlərinin üzlənməsi, yol kənarlarının təmizlənməsi, hasarların rənglənməsi və ərazinin abadlaşdırılması istiqamətində işlər aparılır. Rayonun Mənzil Kommunal Təsərrüfatı Birliyi tərəfindən bir sıra binalara gedən istilik xətlərində, 7 binanın dam örtüyündə təmir işləri aparılmış, su və kanalizasiya xətləri dəyişdirilmiş, mərkəzdəki bir sıra binaların fasadı təmir olunmuş, rəngləmə və abadlıq-təmizlik işləri görülmüşdür. Badamdar qəsəbəsində hər həftənin şənbə günləri kənd təsərrüfatı məhsulları yarmarkası təşkil edilmişdir.

Cari ilin ilk 3 ayı ərzində Səbail Rayon Əhalinin Sosial Müdafiəsi Mərkəzinə Ünvanlı Sosial Yardım almaq üçün 417 ailə (1689 ailə üzvü) müraciət etmiş, onların sənədlərinə müavfiq qaydada baxılaraq orta hesabla hər ailəyə 115,49 manat sosial yardım təyin olunmuşdur.

Dövlət Sosial Müdafiə Fondu Səbail rayon şöbəsində qeydiyyatda olan 13081 nəfər təqaüdçüyə 3 ay ərzində 8.522.890,25 manat təqaüd və müavinət ödənilmişdir.

İclasda Səbail rayon MKTB-nin rəisi Elbrus Əhmədov, 1 saylı şəhər poliklinikasının baş həkimi Kübra Cabbarova, Səbail rayon Gigiyena və Epidemiologiya Mərkəzinin direktoru Sara Həsənova, Milli Məclisin üzvü Fuad Muradov və başqaları çıxış etmişlər. Tədbirdə “Yeni Azərbaycan” qəzetinin 20 illik yubileyi ilə əlaqədar qəzetin kollektivinə Səbail RİH-in təbrikləri çatıdırılmış və qiymətli hədiyyə təqdim olunmuşdur.

İclasda əldə olunmuş nailiyyətlərlə yanaşı, həm də həllini gözləyən problemlər, çatışmazlıqlar və onların aradan qaldırılması yolları, rayonda aparılması nəzərdə tutulan abadlıq işləri və vətəndaşların müraciətləri ilə bağlı görülən işlər də müzakirə olunmuşdur.

Ə.BAYRAMOV

Xalq qəzeti.- 2013.- 19 aprel.- S. 6.