Azərbaycan gəncliyi dövlətimizin daha da qüdrətlənməsinə xüsusi töhfələr verir

Bakıda keçirilən “Cənubi Qafqaz və Mərkəzi Asiya: 2020-ci ilə baxış” adlı beynəlxalq forum bunu bir daha təsdiq etdi

Ulu öndər Heydər Əliyev respublikamıza birinci dəfə rəhbərlik etdiyi illərdə olduğu kimi, 1993-cü ilin yayındakı möhtəşəm qayıdışından sonra da gənclərlə iş məsələsini dövlətin əsas siyasətinin mühüm tərkib hissələrindən biri kimi qəbul edirdi.

Təsadüfi deyildi ki, hələ ötən əsrin 70-ci illərində Azərbaycan gəncliyinin irili-xırdalı bütün problemlərinin həll edilməsi istiqamətində çoxsaylı tədbirlər reallaşdırılmışdı. Xüsusən milli kadrlar ordusunun yetişdirilməsi məqsədiylə o zamankı müttəfiq respublikaların əksəriyyəti üçün əlçatmaz olan layihələrə imza atılırdı. Azərbaycan gəncliyi xoşbəxtdir ki, tarixi 15 İyun Qurtuluşundan sonra da ölkəmizdə bu tendensiya özünəməxsus templə davam etdirildi. Ümummilli liderimizin bilavasitə Ali Sovet sədri seçildiyi gün – iyunun 15-də, axşamdan xeyli keçmiş ölkənin gənclər təşkilatlarının nümayəndələri ilə görüşməsi sübut edirdi ki, o böyük tarixi şəxsiyyət problemlər məngənəsində sıxılan Azərbaycanı ağ günə çıxarmaq üçün yaşlı nəslin təcrübə və biliyindən istifadə etməklə yanaşı, gəncliyin tükənməz enerjisindən də yetərincə bəhrələnmək fikrindədir. Təsadüfi deyil ki, politoloq və ekspertlər həmin görüşü Azərbaycan gəncliyinin yolunda yandırılan yaşıl işıq kimi qiymətləndirirlər.

Bu işıq 2003-cü ilin oktyabrından sonra daha möhtəşəm bir xarakter aldı və bizim gənc nəslin qarşısında qaranlıq sayılacaq heç bir məqam qalmadı. Prezident İlham Əliyev 1997-ci ildən – Milli Olimpiya Komitəsinin prezidenti kimi fəaliyyət göstərməyə başladığı gündən yaxın dostluq və əməkdaşlıq etdiyi Azərbaycan gəncliyinin daha böyük uğur və nailiyyətlərə imza atması üçün lazım olan bütün addımları atdı. Cəmiyyət həyatının elə bir sahəsi qalmadı ki, orada gənclərin fəallığı nümayiş etdirilməsin. Xüsusən gənclərin təşkilatlanması, bu sahədə fəaliyyət göstərən qeyri-hökumət təşkilatlarının yaradılması, Azərbaycan gəncliyinin beynəlxalq aləmə inteqrasiyasının sürətləndirilməsi istiqamətində böyük uğurlarla nəticələnmiş addımlar atıldı. İlham Əliyev bu prosesdə bizim gənclərimizin türkdilli ölkələrin gəncləri, xüsusən, Türkiyə gəncləri ilə daha sıx təmasda ictimai-siyasi, elmi-mədəni fəaliyyət göstərməsini tövsiyə edirdi. Bununla yanaşı, ən böyük Azərbaycan diasporunun fəaliyyət göstərdiyi Rusiya Federasiyasında yaşayan gənc soydaşlarımızın bir araya gətirilməsi də mühüm vəzifə kimi qarşıya qoyulurdu.Bu baxımdan hazırda Azərbaycanın hüdudlarından kənarda olan Rusiyanın Azərbaycanlı Gənclər Birliyi bizim ən fəal gənclər təşkilatımız kimi tanınır. RAGB-nin bu fəallığı aprelin 7-də Bakıda keçirilən beynəlxalq tədbirdə özünü daha aydın şəkildə göstərdi. Xatırladaq ki, aprelin 7-də Bakıda Dünya İqtisadi Forumunun (Davos Forumu) Qlobal Gənclər Birliyinin “Cənubi Qafqaz və Mərkəzi Asiya: 2020-ci ilə baxış” mövzusunda beynəlxalq forumu keçirilmişdir. Yuxarıda qeyd etdiyimiz kimi,Heydər Əliyev Fondunun vitse-prezidenti, Rusiyanın Azərbaycanlı Gənclər Birliyinin sədri Leyla xanım Əliyeva öz çıxışında Cənubi Qafqaz və Mərkəzi Asiyanın dünyanın zəngin təbii ehtiyatlarını, habelə infrastrukturun qeyri-adi yüksəlişini və texniki inkişafı özündə birləşdirən regionlardan biri olduğunu vurğulayaraq demişdir ki, bu və digər amillərin sayəsində dünya bizim regionda ilk neft bumlarından birinin şahidi olmuşdur. Bu region siyasi təfəkkür və dövlətçilik ənənələri, incəsənətin, mədəniyyətin və elmin tərəqqisi ilə bəşər tarixinin bir hissəsinə çevrilmişdir. Eyni zamanda, şairlərimizin və filosoflarımızın əsərləri bütün dünyada milyonlarla insanın qəlbini və zəkasını fəth etmişdir.

Heydər Əliyev Fondunun vitse-prezidenti bəzi problemlərin qlobal səviyyədə həll olunması zərurətini yada salaraq qeyd etmişdir ki, onların həlli üçün ümumi dəyərlər işlənib hazırlanmalıdır. Qlobal problemlərin müvəffəqiyyətlə həllinə dəstək göstərəcək münasibətlər modelini belə dəyərlər olmadan yaratmaq mümkün deyildir. Biz inanırıq ki, sərhədləri aşıb keçən məsələlərin həlli üçün əməkdaşlıq siyasəti lazımdır. Məhz belə siyasət müxtəlif region və mədəniyyətlərin maraqlarını müvafiq şəkildə nəzərə alıb milli iqtisadiyyatların inkişafını əlaqələndirə bilər.

Rusiyanın Azərbaycanlı Gənclər Birliyinin sədri forum iştirakçılarının və dünya ictimaiyyətinin diqqətinə çatdırmışdır ki, bu gün beynəlxalq aləmdə istənilən uğura imza atmaq üçün gənclər çox mühüm intellektual, mədəni və peşəkar potensialdır. Dünya dövlətlərinin taleyi gənclərin həyatının və inkişafının keyfiyyətindən asılıdır. Natiq qeyd etmişdir ki, Azərbaycan dövlətinin gənclər siyasəti cəmiyyətin bu zümrəsinin hərtərəfli inkişafını təmin etməsi ilə yanaşı, həm də dövlətin qüdrətləndirilməsində gənclərin gücündən maksimum istifadə olunur.

Forumda Azərbaycan gəncliyini təmsil edən Leyla xanım Əliyeva bizim gənclərin cəmiyyət həyatının bütün sahələrində fəallıq nümayiş etdirdiyini xatırladaraq qeyd etmişdir ki, biz beynəlxalq aləmdə hamının probleminə çevrilmiş ekoloji tarazlığın bərpa olunmasına töhfə vermək məqsədiylə ərsəyə gətirdiyimiz “Yaşıl Azərbaycan” proqramını başa çatdırdıq. Bu proqram çərçivəsində ölkənin müxtəlif bölgələrindən 8 mindən çox məktəbli ətraf mühitin mühafizəsinə dair fakültativ məşğələlərdə iştirak etmişdir. Bundan əlavə, məhz IDEA Kampaniyasının təşəbbüsü ilə ətraf mühitin mühafizəsi üzrə dərslər 2013-cü ilin sentyabrından Azərbaycan məktəblərinin tədris proqramına daxil ediləcəkdir. Həmçinin, bu yaz Litva, Rusiya, Böyük Britaniya, İtaliya və Qırğızıstandan olan həmkarlarımızla birlikdə köçəri quşlar üçün yuvalar quracağıq.

Lakin biz təkcə təhsil proqramları ilə kifayətlənmirik. Biz fəaliyyətimizin miqyasını genişləndirmək üçün müxtəlif yolların axtarışındayıq. Məsələn, hazırda Azərbaycanın hüdudlarından kənarda ən fəal gənclər təşkilatı olan Rusiyanın Azərbaycanlı Gənclər Birliyi (RAGB) geniş şəkildə çoxsaylı humanitar və mədəni layihələr, habelə ətraf mühitin mühafizəsinə yönəlmiş layihələr həyata keçirir. Bütövlükdə RAGB-ın fəaliyyətinin miqyası Rusiyada gənclərin həyatının bütün sahələrini əhatə edir ki, bu da qurumdan əməkdaşlığı genişləndirmək məkanı kimi istifadə etməyə imkan verən müsbət amildir.

Təbii ki, istənilən forum, simpozium və ya konfrans özünün əsas məramı ilə parallel olaraq tədbir iştirakçılarına və dünya ictimaiyyətinə yeni imkanlar açılması baxımından da yüksək qiymətləndirilir. Adı çəkilən foruma bu prizmadan yanaşan Leyla xanım Əliyeva forumun təşkilatçılarına müraciətlə demişdir ki, ideya və planlarımızı sizə çatdırmaq imkanının verilməsinə görə bir daha minnətdarlığımı bildirmək istəyirəm. Mən gələcəyə nikbinliklə baxıram. Əminəm ki, siyasi, iqtisadi, ekoloji və mədəni mübadilə bizim nəslin nümayəndələrinə bəşəriyyətin ümumi idealları naminə gələcəyin təhdidlərini aradan qaldırmaq və sülhü qoruyub saxlamaq imkanı verəcəkdir.

Beləliklə, aprelin birinci ongünlüyündə Bakıda keçirilən möhtəşəm beynəlxalq forum və forum çərçivəsində reallaşdırılan mühüm layihələr dünyaya Azərbaycan həqiqətlərinin növbəti dəfə, olduğu kimi çatdırılması baxımından xüsusi əhəmiyyət kəsb etdi. Eyni zamanda, bu tədbirlər silsiləsi bir daha sübut etdi ki, bugünkü Azərbaycan gəncliyi təkcə özünü və ya öz dövlətini düşünmür, həm də bütövlükdə dünyanın problemlərinin həllinə özünün qətiyyətli töhfələrini verməkdə davam edir.

İttifaq MİRZƏBƏYLİ

Xalq qəzeti.- 2013.- 20 aprel.- S. 5.