Nəsimi rayonunda ümummilli lider HEYDƏR ƏLİYEVİN 90 illiyi ilə bağlı tədbir

Nəsimi rayonunda xalqımızın ümummilli lideri Heydər Əliyevin 90 illiyi ilə bağlı tədbir keçirilib. Heydər Əliyev sarayında keçirilmiş tədbiri Nəsimi Rayon İcra Hakimiyyətinin başçısı Nəsib Məhəməliyev açaraq məruzə ilə çıxış etmişdir. Natiq bildirmişdir ki, bu günlər xalqımız ulu öndər, dahi insan, müstəqil Azərbaycan dövlətinin qurucusu və memarı Heydər Əliyevin 90 illiyini böyük təntənə ilə qeyd edir. Hazırda Azərbaycanın mövcudluğu, inkişafı və tərəqqisi bu dövlətin ümummilli liderimiz tərəfindən yaradılmış özülünün möhkəmliyi ilə əlaqədardır.

Bu dahi şəxsiyyətin Azərbaycan xalqı qarşısında müstəsna xidmətləri olub. O, rəhbərlik etdiyi birinci mərhələdə Azərbaycanı geridə qalmış aqrar diyardan inkişaf etmiş sənaye respublikasına çevirdi. Xalqımızın təkidli tələbi ilə hakimiyyətə qayıdandan sonra isə o vətəndaş müharibəsinin başladığı, iqtisadi xaos içərisində boğulan, bir dövlət kimi dünya xəritəsindən silinmək təhlükəsi ilə üzləşmiş Azərbaycanın xilaskarı və müstəqil dövlətimizin qurucusu oldu. O, ölkəmizin inkişafının əsasını qoyan neft strategiyasının müəllifi oldu və Azərbaycanı regionun iqtisadi cəhətdən lider dövlətinə çevirdi. Ümummilli liderimiz parlaq zəkası, müdrik siyasəti və titanik fəaliyyəti sayəsində qüdrətli Azərbaycanı yaradıb və onu yeni uğurlara aparan strategiyasını müəyyən edib. Azərbaycanda demokratik, hüquqi dövlət quruculuğu, vətəndaş cəmiyyətinin təşəkkülü, milli-mənəvi dəyərlərə qayıdış, elmin, təhsilin, mədəniyyətin inkişafı Heydər Əliyevin adı ilə bağlıdır. Ümummilli liderimizin müəyyənləşdirdiyi siyasət, formalaşdırdığı dövlət və dəyərlər bu gün də fəaliyyətdədir və Azərbaycan xalqına xidmət edir. Heydər

Əliyev xalqımızın milli həmrəylik və birlik simvovlu, qürur mənbəyidir.

Əsası ümummilli liderimiz Heydər Əliyev tərəfindən qoyulmuş və Azərbaycanın hərtərəfli inkişafına yönəlmiş müdrik siyasət bu gün möhtərəm Prezidentimiz cənab İlham Əliyev tərəfindən müvəffəqiyyətlə davam etdirilir və bizi yeni uğurlara aparır.

Sonra 23 saylı tam orta məktəbin şagirdlərinin ifasında ümummilli liderimiz Heydər Əliyevin həyat və fəaliyyətinə həsr olunmuş ədəbi-bədii kompozisiya nümayiş etdirildi.

Tədbirdə Milli Məclisin deputatları Fəttah Heydərov, Məlahət İbrahimqızı, Aytən Mustafayeva, Ziyad Səmədzadə və Hadı Rəcəbli iştirak edirdilər.

Ayaz HƏMİDOĞLU

Xalq qəzeti.- 2013.- 21 aprel.- S. 5.