İMİŞLİ: uğurlu nəticələr inkişafdan xəbər verir

İmişli rayonunda 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclas keçirildi. Rayon icra hakimiyyətinin başçısı Vilyam Hacıyev məruzə edərək bildirdi ki, 2013-cü ilin birinci rübündə İmişli rayonunun sosial-iqtisadi inkişafında bir sıra uğurlu nəticələr əldə olunmuşdur. İqtisadiyyatın əsas sahələri üzrə 70 milyon manatlıq məhsul istehsal edilmiş və ya xidmət göstərilmişdir. Ümumi daxili məhsul istehsalı ötən ilin müvafiq dövrü ilə müqayisədə 2,1 faiz artmış, həmin artım ticarətdə 42,4 faiz, kənd təsərrüfatında 28 faiz, rabitədə 6,9 faiz, nəqliyyatda isə 4,1 faiz təşkil etmişdir.

Rüb ərzində ümumi daxili məhsul istehsalı struktur tərkibinə görə, sənaye üzrə 37 faiz, kənd təsərrüfatı üzrə 23,9 faiz, tikinti üzrə 18,6 faiz, ticarət üzrə 18 faiz, nəqliyyat üzrə 2,3 faiz, rabitə üzrə isə 0,2 faiz təşkil etmiş, rayon iqtisadiyyatında əsas yeri sənaye və kənd təsərrüfatı məhsullarının istehsalı tutmuşdur.

“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrası ilə bağlı 2013-cü ilin birinci rübündə dövlət vəsaiti hesabına inşa olunan 180 şagird yerlik Hacıbabalı kənd ümumi orta məktəbinin yeni binasının tikintisi davam etdirilmiş, Cavadxanlı, Buludlu kənd tam orta, Cəfərli 1 saylı tam orta məktəblərində bərpa-gücləndirmə, həmçinin, Sarıxanlı 1 saylı kənd tam orta məktəbində bərpa-gücləndirmə və əlavə sinif otaqlarının tikintisinə, 960 şagird yerlik şəhər 5 saylı məktəb-liseyin isə əsaslı təmir olunmasına başlanılmışdır. İmişli Regional Ədliyyə şöbəsi üçün dördmərtəbəli inzibati binanın tikintisi davam etdirilmiş, tikinti işlərinin avqust ayına kimi başa çatdırılması nəzərdə tutulmuşdur.

İmişli şəhərində inşa olunan “Gənclər Mərkəzi”nin də tikintisi başa çatmışdır.

Rayon Tarix-Diyarşünaslıq muzeyinin əsaslı təmir işləri nəticəsində dam örtüyü dəyişdirilmiş, bina ağ layla üzlənmişdir. Sahəsi 200 kv.m, 2 zaldan ibarət olan muzeyin daxili tərtibatı yenidən qurulmuş, eksponatların sayı 4 min ədədə çatdırılmışdır.

V.Hacıyev qeyd etdi ki, Azərbaycan Respublikası Prezidentinin Ehtiyat Fondundan ayrılmış vəsait hesabına Rayon Mərkəzi Xəstəxanasının əsaslı təmiri başa çatmış, xəstəxana müasir tibbi avadanlıqlarla təchiz olunmuşdur. Burada martın 28-dən “Dializ” şöbəsi fəaliyyətə başlamışdır.

İmişli şəhərinin su təchizatının yenidən qurulması və kanalizasiya sisteminin yaradılması ilə əlaqədar “Milli su təchizatı və kanalizasiya xidmətləri üzrə ikinci layihə” çərçivəsində tikinti işləri davam etdirilir. Hazırda Beyləqan rayonunun Aşıqlılar kəndi ərazisində qazılması nəzərdə tutulmuş 5 ədəd artezian quyusundan 1 ədəd kəşfiyyat quyusu qazılıb istismara tam hazır vəziyyətdədir, 4 ədəd quyuda isə qazma işləri aparılır. 630 mm-lik polietilen boru ilə 29,5 km-lik Beyləqan-İmişli magistral su xəttinin tikintisi başa çatmış, magistral su xətti üzərində yerləşən Şahverdili, Göbəktala, Məhəmmədli və Rəsullu kəndlərini içməli su ilə təmin etmək üçün 100 mm-lik borular vasitəsilə çıxışlar qoyulmuşdur. Magistral xətt üzərində nəzərdə tutulan müxtəlif təyinatlı bütün quyuların və suqəbuledici kameranın tikintisi başa çatdırılmışdır. Layihədə nəzərdə tutulmuş 1 ədəd 1500 kubmetrlik və 2 ədəd 2500 kubmetrlik su anbarının tikintisi başa çatdırılmış, 630 mm-lik polietilen boru ilə 4039,4 p/m kanalizasiya kollektor xətti çəkilmişdir. Şəhərdaxili 5,6 km kanalizasiya xəttində, 148,5 km içməli su xəttində tikinti işləri başa çatmış, kanalizasiya xətti çəkilərkən 230 ədəd dəmir-beton quyular, su xətti çəkilərkən 428 ədəd yanğın hidrantı və 24 ədəd su kameraları inşa olunmuş, 2691 evə su xətti birləşdirilmiş, 595 ədəd “SMART – kart” tipli sayğaclar quraşdırılmışdır.

Ötən dövr ərzində heyvandarlıq və quşçuluq sahələrinin inkişaf etdiyini diqqətə çatdıran natiq vurğuladı ki, rayon üzrə mal-qaranın sayı 89504 başa, qoyunların sayı 240464 başa, quşların sayı isə 1304662 başa çatmış, ötən ilin müvafiq dövrü ilə müqayisədə iribuynuzlu mal-qara 1712 baş, qoyunlar 5575 baş, quşlar isə 32741 baş artmışdır. Ət istehsalı (diri çəkidə) 2739,2 ton, süd istehsalı 11267,5 ton, yumurta istehsalı isə 26563,2 min ədəd olmuş, ötən ilin müvafiq dövrü ilə müqayisədə bütün heyvandarlıq məhsullarının istehsalı artmışdır. 1 aprel 2013-cü il tarixə kimi 10757 hektar sahədə buğda, 5199 hektar sahədə arpa, 191 hektar sahədə kartof, 11 hektar sahədə bostan, 139 hektar sahədə tərəvəz, 1 hektar sahədə dən qarğıdalı, 420 hektar sahədə isə şəkər çuğunduru əkilmişdir. Bu sahədə işlər davam etdirilir.

Qarabağ müharibəsi əlilləri və şəhid ailələrinin mənzil şəraitinin yaxşılaşdırılması məqsədilə Əmək və Əhalinin Sosial Müdafiəsi Nazirliyi tərəfindən İmişli şəhərində 6 mərtəbəli 54 mənzilli ictimai yaşayış binasının tikintisi nəzərdə tutulmuş, bunun üçün torpaq sahəsi ayrılmışdır. Rayon ərazisində məskunlaşmış məcburi köçkün ailələrinin mənzil şəraitinin yaxşılaşdırılması üçün 550 məcburi köçkün ailəsinə fərdi yaşayış evlərinin tikintisi üçün Bəhrəmtəpə qəsəbəsində 100 hektar torpaq sahəsi ayrılmış, hazırda 325 məcburi köçkün ailəsi üçün fərdi yaşayış evlərinin və 360 şagird yerlik 2 mərtəbəli yeni məktəb binasının tikintisi başa çatmış, 50 yerlik uşaq bağçası, inzibati bina, klub, feldşer-mama məntəqələrində isə tikinti işləri davam edir.

Son illər rayonda emal sənayesinin inkişafı üçün bir sıra işlər görülmüş, “Azərbaycan Şəkər İstehsalat Birliyi” MMC-nin Kəllə qənd, Qarışıq Yem, Bitki Yağları, Spirt emalı, Çuğundur yem qurutma zavodları, Bəhrəmtəpə qəsəbəsində 50 min tonluq taxıl anbarı, Qaragüvəndikli kəndində damazlıq yumurta istehsal edən “Araz Damazlıq quşçuluq” MMC istifadəyə verilmişdir.

2013-cü ilin birinci rübü ərzində Ağsu-Kürdəmir-Bəhrəmtəpə, İmişliyə giriş və Hacıqabul-Bəhrəmtəpə-Mincivan avtomobil yolunun bəzi yerlərində təmir işlərinin aparıldığını deyən rayon rəhbərinin məlumatına əsasən 36 saylı yol istismarı idarəsi tərəfindən 110 min manat məbləğində iş həcmi yerinə yetirilmiş, Hacıqabul-Bəhrəmtəpə və İmişli-Biləsuvar avtomobil yolu, müvafiq olaraq Türkiyənin “Kolin” və Azərbaycanın “AzərStar” şirkətləri tərəfindən əsaslı təmir olunur. Hazırda Hacıqabul-Bəhrəmtəpə avtomobil yolunun 101-103-cü km-də torpaq yatağının və əsasın tikilməsi işləri aparılır.

Rüb ərzində rayon ərazisindəki magistral avtomobil yollarının ətrafına 19,5 min ədəd müxtəlif növ ağaclar əkilmişdir. Həmçinin, 36 saylı Yol İstismar İdarəsi tərəfindən Xəlfəli-Hacalmuradlı avtomobil yolu avtoqreyderlə hamarlanmışdır.

2013-cü ildə şəhərin 20 Yanvar küçəsi, rayonun Çahar, Bəcirəvan və Cəfərli kəndlərinə giriş yolları üçün 22949 kv.m həcmində, 790 min manat məbləğində əsaslı təmir işlərinin aparılması nəzərdə tutulmuş, I rüb ərzində layihə-smeta sənədləri hazırlanmışdır. Rüb ərzində şəhərin 20 Yanvar, Bayraq meydanı, Mərkəzi Rayon Xəstəxanasının qabaq hissəsi, Həsənoğlu və A.Ələsgər küçəsində yerləşən məhəllələrdə, M.Əsədov küçəsindəki 13 və 14 saylı binaların ətrafında 260,9 min manat məbləğində abadlıq işləri görülmüşdür. Həmçinin ötən müddət ərzində şəhərin Heydər Əliyev prospekti, 20 Yanvar, M.Əzizbəyov, H.Aslanov və S.Ağamalıoğlu küçələrində yenidənqurma işləri aparılmış, müasir tipli elektrik dirəkləri və işıqforlar quraşdırılmış, park və meydanlar abadlaşdırılmışdır.

İmişli şəhərində 0,4 kv-luq elektrik veriliş xətlərinin SİP kabeli ilə əvəz olunması, qabaqcadan ödənişli SMARTkart tipli sayğacların və elektrik dirəklərinin quraşdırılması işləri başa çatmış, 2013-cü ilin birinci rübü ərzində rayon ərazisində 2715 metr məsafəyə SİP kabeli, 12110 metr məsafəyə isə naqil xətləri çəkilmiş, 956 ədəd elektron tipli enerqomer sayğaclar quraşdırılmışdır. Rüb ərzində 22 ədəd müxtəlif gücdə olan transformatorlar təmir edilmiş, 28 ədəd istismara yararsız ağac dayaqlar yeniləri ilə əvəz olunmuş, 35 ədəd dəmir-beton dayaqlar basdırılmışdır. Həmçinin, 9 ədəd istismara yararsız dayaqlar, 15 ədəd metal dayaqlarla əvəz olunmuş, çürümüş ağac dayaqların dibinə 5 ədəd ağac dayaq, 4 ədəd dəmir beton kötüklər basdırılmışdır.

Sonda məruzəçi dedi: – 2013-cü ilin birinci rübünün sosial-iqtisadi inkişafının yekunlarının təhlili göstərir ki, rayonda iqtisadiyyatın bir çox sahələrinin inkişafı təmin edilmiş, İmişli şəhərində abadlıq-quruculuq işləri həyata keçirilmiş, qarşıya qoyulan vəzifələrin icrası istiqamətində yaxşı nəticələr əldə olunmuşdur.

Biz bundan sonra da ümummilli liderimiz Heydər Əliyev siyasi kursunun layiqli davamçısı, möhtərəm Prezidentimiz cənab İlham Əliyevin qarşımıza qoyduğu vəzifələrin öhdəsindən ləyaqətlə gəlməyə çalışacaq, dövlətçiliyimizin möhkəmləndirilməsi, iqtisadiyyatımızın gücləndirilməsi istiqamətində bütün qüvvəmizi sərf edəcəyik.

Səməd HÜSEYNOĞLU

Xalq qəzeti.- 2013.- 21 aprel.- S. 6.