Gədəbəy: təbii gözəlliyinə gözəllik gətirilən rayon

Bu yerlərə ulu Tanrı elə gözəlliklər bəxş edib ki, tamaşasına aylarla, illərlə dayanmaq olar. Sıx meşələr, büllur bulaqlar, dağlar, dərələr, qədim abidələr Gədəbəyin füsunkarlığını bütün dünyada məşhur edib. Yeraltı və yerüstü sərvətləri, havası, iqlimi heç nə ilə müqayisə olunmur.

Adamlarına da söz ola bilməz. Sadə, zəhmətkeş, istiqanlı, ədalətli... Gədəbəydə işləyən, zəhmətkeş adama hörmətlə yanaşılır. İstər bu yerlərin adamı olsun, istərsə də gəlmə. Sadəsənsə, dikbaş, yekəxana deyilsənsə, gözlərinin üstündə yerin var. Bir də ki, gərək tənbəl olmayasan. Bu rayon üçün az-çox iş görəsən. Adamların dərd-səri ilə maraqlanasan. İstər xırda məmur olsun, istərsə də ən iri ranqlı, dəxli yoxdur...

Gədəbəydə (təkcə Gədəbəydəmi? - H.Q.) adamlara qarşı bir addım atana on addım atırlar, onun səsinə səs verirlər. Son vaxtlar bu rayonda həyata keçirilən xeyirxah işlərin - yolların, körpülərin salınması, sosial obyektlərin tikintisi, qazın, suyun çəkilişi və digər tədbirlərin həyata keçirilməsinin nəticəsidir ki, gədəbəylilər Ölkə Prezidentinin daxili və xarici siyasətini dəstəkləyir, birlik, mütəşəkkillik nümayiş etdirirlər. Rayonda insan amili ön plandadır. Nə olunursa, ona görə olunur. Diqqət, qayğı var. Elə söhbətimiz də bu barədədir.

Sadəlik ən böyük ucalıqdır

- Adamlara isti münasibətin, sadəliyin, təvazökarlığın ən böyük nümunəsini elə cənab Prezidentimizin özü göstərir deyə rayon icra hakimiyyətinin başçısı Ramiz Yediyarov bu mövzuda söhbətimizə sanki bir körpü salır. - Heç uzağa getməyək. Gədəbəy camaatı hələ də cənab Prezidentin ilk səfəri zamanı Mehriban xanım Əliyeva ilə birlikdə Slavyanka kəndində kənd əhalisinin sadə nümayəndələri ilə bir çay süfrəsi arxasında əyləşməsindən, səmimi söhbət etməsindən, onlarla bir yerdə şənlənməsindən danışır.

Bilirsiniz, əslində sadəlik, təvazökarlıq ən böyük ucalıqdır. İnsan vəzifəsi ilə, var-dövləti ilə deyil, məhz bu keyfiyyətləri ilə sayılıb seçiləndə, o, hamının gözündə müqəddəsləşir, hörməti-izzəti ilə seçilir.

...Dağ rayonlarının hamısına məxsus problemlər Gədəbəydə də var. Amma bu problemlər problem olaraq qalmır. Onlar öyrənilir, konkret tədbirlər planı hazırlanır, həyata keçirilməsi nəzarətə alınır. 2006-cı ilin noyabr ayının 1-də ölkə Prezidenti İlham Əliyev ilk dəfə bu rayona səfər edəndə problemlər daha çox idi. Amma indi tamamilə başqa mənzərədir. Əgər o zaman məktəb tikintisi, qaz, işıq təminatı, yol, körpü çəkilişi önə çəkilirdisə, indi su, kanalizasiya xətlərinin çəkilişi, turizmin inkişafı kimi daha qlobal işlər önə çıxır.

Gədəbəyə ilk dəfə qədəm qoyan hər bir qonaq gözəl, rahat yollarla yanaşı, suyu, kanalizasiyası, hər cür kommunikasiyası olan, özü də təbiəti, ab-havası heç nə ilə ölçülməyən bir bölgəyə, təbii ki, ikinci, üçüncü dəfə gəlməyə cəhd göstərəcək.

Hazırda Gədəbəydə gedən hər bir iş onu göstərir ki, dağlar qoynundakı rayon tezliklə tanınmaz olacaq. Adamlara, onların işinə münasibət dəyişib. İş adamlarına hərtərəfli şərait yaradılıb.

Səmimiyyət, qarşılıqlı hörmət bütün işlərin əsasında dayanır. Bütün bunlar problemlərin həllinə təbii ki, böyük təsir göstərir.

Firudin Məmmədov 8 ildir ki, Slavyanka bələdiyyəsinə rəhbərlik edir. Amma bəzi bələdiyyə sədrlərindən fəqli olaraq, təşəbbüskarlığı, fəallığı, adamlara isti münasibət ilə seçilir.

– Məmurun hörmətli, həm də onun işidir – deyə F.Məmmədov söhbət zamanı dedi, – əlini ağdan-qaraya vurmayıb, səliqə ilə geyinib, sakit gəzib camaat arasına çıxmaq hələ yaxşı məmur olmaq demək deyil. Əgər sənə etimad göstəriblərsə, gərək onu doğruldasan, adamların sosial problemləri ilə maraqlanasan, iş görəsən.

Mən demirəm ötən bu illərdə dağı dağ üstünə qoymuşuq. Amma hər halda 9 bələdiyyə üzvümüzün hər biri, zənnimizcə, öz vicdanı qarşısında təmizdir. Slavyanka kənd əhalisinin sayına görə rayon mərkəzindən sonra ikinci hesab edilir. Hazırda əhalinin sayı 4150 nəfəri keçib.

Gücümüz nəyə çatır, onu canla-başla görməyə çalışırıq. Təxminən 1 kilometr məsafədən içməli su çəkmişik. Adamların xeyir-şər məclislərini yola vermək üçün səyyar çadır almışıq. Bütün avadanlıqları ilə birlikdə. Əhalinin çox köməyinə gəlir.

Qış aylarında yolların təmizlənməsi, binaların qızdırılması, digər işlərlə müntəzəm məşğul oluruq. Təbii ki, dağ rayonunun problemləri həmişə olur. Bəzən bundan sui-istifadə edənlərə də rast gəlirik. Məsələn, Slavyankadan son bir ildə yuxarı orqanlara yazılan ərizələrin 50 faizi Maarif kənd sakini Dilşad Əliyevanın payına düşür. Bu faktı ona görə qeyd etdim ki, bəzən xoşagəlməz, həqiqətə uyğun olmayan adi bir söz işimizə az da olsa kölgə salır.

Digər məmur Alnabat kənd inzibati ərazi dairəsi üzrə nümayəndə Natiq Nağıyevlə söhbətimizdə də bu qənaətə gəldik ki, adamlar işləməyi bacarmaq, hörmət qazanmaq üçün təkcə səmimiyyət, sadəlik kifayət etmir. Gərək adamların sosial problemlərinin qayğısına qalasan, kömək əlini uzadasan. N.Nağıyev deyir ki, əvvəllər bu kənddən daha çox ərizə yazılırdı. Bir dəfə yığışıb təhlil etdik, onun səbəblərini öyrəndik. Məlum oldu ki, kiminsə səhlənkarlığı ucbatından sadə bir işin həllinin ləngiməsi yuxarı təşkilatlara gedib çıxır.

Tezliklə kəndarası yolları düzəltdik. Yaponiya səfirliyinin köməyi ilə təxminən 100 min ABŞ dolları dəyərində 7,5 kilometr məsafədən su xətti çəkib gətirdik, 50 tonluq su anbarı tikdik. Kənd investisiya layihəsi çərçivəsində 5,5 kilometr yol çəkdik. Mədəniyyət Evimizi yüksək səviyyədə təmir edə bilmişik. Təbii ki, rayon icra hakimiyyətinin köməyi olmadan bu işləri həyata keçirə bilməzdik. Kənd bələdiyyəsi ilə birgə işləyirik. Yerləşdiyimiz inzibati binanı da yüksək səviyyədə təmir etmişik. Amma problemlər, görüləsi işlərimiz hələ çoxdur. Rayon icra hakimiyyətinin başçısı Ramiz Yediyarovun bizim nümayəndəliyin hesabat yığıncağında iştirakından istifadə edib bir sıra problemlərin həllinin vacibliyini vurğuladıq. Məsələn, Kiçik Qaramurad kəndindəki körpü qəzalı vəziyyətə düşüb. Nəzərə alsaq ki, bu körpüdən 11 kəndin əhalisi istifadə edir, o zaman məsələnin ciddiliyi göz qabağındadır. Magistral qaz kəmərinin bizim kəndin yaxınlığından keçməsi də imkan verir ki, evlərə bu il qaz xətti çəkilsin. Ramiz müəllimə nəinki bizim kəndin, eləcə də digər kəndlərin camaatı çox inanır. Çünki son vaxtlar rayon icra hakimiyyəti ilə əhali arasında çox sıx əlaqə, səmimi münasibət yaranıb.

İcra nümayəndəsi adamlara kömək əli uzatmağı özünün mənəvi vəzifə borcu hesab etməlidir. Vaxtilə həbsdə olub, heç bir yerdə işləməyən, imkansız bir adama sosial yardım almaq üçün sənədlərini düzəldib müvafiq təşkilata təhvil verməkdə kömək edəndə, elə bildim dünyanı mənə bağışladılar.

El gözü tərəzidir

Qarayaxmalarla, böhtan, şərlə iş görməyə artıq adət etmiş bir sıra üzdəniraq müxalifət qəzetləri Gədəbəyi və onun icra başçısını da hədəfə götürüblər. Xəbər portallarının hansındasa oxudum ki, onların məqsədi Ramiz Yediyarovun gördüyü işlərə kölgə salmaqdır. Əslində çox dəqiq yanaşmadır. Çünki bir il əvvəl bu vəzifəyə təyin olunan R.Yediyarovun rəhbərliyi altında rayonda görülən böyük abadlıq, quruculuq, yenidənqurma işləri göz qabağındandır. Bəlkə də təzə başçı, necə deyərlər, əlini ağdan-qaraya vurmasaydı, rayon mərkəzinə daxil olan yolu genişləndirməsəydi, lüzumsuz, primitiv tikililəri başqa bir münasib yerə köçürməsəydi, maraqlı və həm də hamının razılığına səbəb olan planlarını açıqlamasaydı, “dəymə mənə, dəyməyim sənə” prinsipi tutsaydı, o zaman heç şər-böhtan da yazmazdılar. Amma bütün bunların heç biri rayonda başlanan çox böyük işləri yarımçıq qoymaq gücündə deyil, onlara kölgə sala bilməz. Gədəbəy əsl inkişaf dövrünə qədəm qoyub. Hara baxırsan iş gedir, yollar genişləndirilir, səkilər düzəldilir, binaların fasadları yenidən qurulur, park və xiyabanlar abadlaşdırılır, ucqar kəndlərdə məktəb binaları, digər sosial obyektlər inşa olunur. Artıq kartof emalı zavodu, Aşıq Musiqisi Mərkəzi, Məhkəmə, Statistika binaları tikilib istifadəyə verilib. Ölkə Prezidentinin sərəncamı ilə tikintisinə ilkin olaraq 3 milyon manat vəsait ayrılan Gədəbəy-Novosaratovka-Qaravəlilər yolunun 10 kilometri tikilib başa çatdırılıb. Heç bilirsiniz adamlar necə sevinir. Zarafat deyil, az qala 70 kəndin camaatı bu yoldan istifadə edir. Adamların üzündəki sevinci ötən yay Fındıqlı çayı üzərindəki körpünün açılışında iştirak edərkən də gördüm. Rayon icra hakimiyyəti aparatının vətəndaşların müraciəti və sənədlərlə iş şöbəsindən bizə ürəkaçan rəqəmlər göstərdilər. Məsələn, keçən il birbaşa rayon icra hakimiyyəti başçısının ünvanına 650-yə yaxın məktub daxil olub. Halbuki, ondan əvvəlki il bu rəqəm cəmi 508 olub. Demək inam, etimad artıb. 2012-ci ildə rayon icra hakimiyyətində qəbul olunan 2602 nəfər vətəndaşdan 2142 nəfərini birbaşa başçı özü qəbul edib. Başçının keçirdiyi səyyar qəbullara maraq artıb. Çünki işgüzar söhbət olur. Deyilənlər, səmərəli təkliflər kağız üzərində qalmır.

Qarşıda daha böyük işlər dayanır. Qeyd etdiyimiz kimi şəhərin su-kanalizasiya sistemi yenidən qurulacaq. Park və xiyabanlar abadlaşdırılacaq, yeniləri salınacaq. Gənclər Evinin, Bayraq meydanının, bir sıra məktəb və səhiyyə ocaqlarının tikintisi plandadır. Yeni yollar və körpülər inşa olunacaq. Rayon mərkəzi tezliklə öz görkəmini tamamilə dəyişəcək. Artıq bir sıra tikililər öz orijinallığı, gözəlliyi ilə diqqəti cəlb edir. Hiss olunur ki, rayon rəhbərliyinin özünün yüksək zövqü, işə yaradıcı yanaşma tərzi var.

...Və bir də ki, atalar demiş “el gözü tərəzidir”. Rayon rəhbərliyinin işini də, insanlarla rəftarını da adi, sadə camaatdan soruşun, biz heç nə demirik.

Hamlet QASIMOV

Xalq qəzeti.- 2013.- 21 aprel.- S. 6.