Nərimanov rayonunda birinci rübün nəticələri müzakirə olunmuşdur

Dünən Nərimanov Rayon İcra Hakimiyyətində keçirilən şura iclasında 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş yığıncaq keçirildi. Rayon icra hakimiyyəti aparatının işçiləri, şura üzvləri, idarə və təşkilat rəhbərlərinin iştirak etdikləri toplantının iştirakçıları öncə ulu öndər Heydər Əliyevin büstü önünə gül dəstəsi qoydular, ümummilli liderin xatirəsini ehtiramla yad etdilər.

Tədbiri giriş sözü ilə açan Nərimanov Rayon İcra Hakimiyyətinin başçısı Abdin Fərzəliyev aprel ayının 14-də Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlət başçısının nitqinin bəzi məqamlarına toxundu, ölkəmizin sosial-iqtisadi mənzərəsini əks etdirən konkret rəqəmləri bir daha diqqətə çatdırdı. Bildirildi ki, Prezident İlham Əliyevin ölkəmizin sosial-iqtisadi inkişafının bütün sahələrində əldə olunmuş nailiyyətlər və qarşıda duran vəzifələrlə bağlı dəyərli tapşırıq və tövsiyələri yerlərdə əsl fəaliyyət proqramı kimi qəbul olunmuşdur.

Məruzəçi qeyd etdi ki, ölkəmizdə aparılan uğurlu sosial-iqtisadi siyasət nəticəsində 2013-cü ilin ilk rübündə Bakı şəhərinin aparıcı rayonlarından olan Nərimanov rayonunun da hərtərəfli inkişafı üçün böyük işlər görülmüş və bu tədbirlər hazırda da uğurla davam etdirilir. Belə ki, cari ilin birinci rübünün yekunlarına görə, rayon iqtisadiyyatının əsasını təşkil edən sənayenin dinamik inkişafı davam etdirilmiş, bu müddət ərzində xidmətlər də daxil olmaqla 477,5 milyon manatlıq məhsul istehsal olunmuş və ötən ilin müvafiq dövrünə nisbətən 118,4 faiz artım əldə edilmişdir. Hesabat dövründə istehlakçılara 445,9 milyon manatlıq və ya bütün istehsalın 101,4 faizi qədər sənaye malları göndərilmişdir. İstehsal olunmuş sənaye məhsulunun həcmində dövlət sektorunun xüsusi çəkisi 91,4 faiz təşkil etmişdir. İlin ötən dövrü ərzində sənaye kompleksində işləyənlərin sayı 9627 nəfər təşkil etmiş, onların orta nominal əmək haqqı 17,4 faiz artaraq 448,4 manata çatmışdır. Bununla yanaşı, rayon ərazisində yeni müəssisələrin yaradılması, mövcud müəssisələrin fəaliyyətinin bərpa edilməsi nəticəsində bu ilin birinci rübündə 811 daimi iş yeri yaradılmışdır. Rüb ərzində bütün mənbələr hesabına əsas kapitala 14,7 milyon manatlıq investisiya qoyulduğunu diqqətə çatdıran natiq bildirdi ki, bu ilin ilk rübündə tikinti təşkilatları tərəfindən öz gücləri ilə yerinə yetirilmiş işlərin həcmi 184,6 milyon manat təşkil etmiş, əvvəlki ilin eyni dövrünə nisbətən 16,5 faiz artım əldə olunmuşdur. Bu sahədə çalışan işçilərin sayı isə 13002 nəfər olmuş və onların orta aylıq əmək haqqı 2,2 faiz artaraq 500,7 manata çatmışdır. Cari ilin yanvar-mart aylarında iqtisadiyyatın başqa sahələrində olduğu kimi, əhalinin həyat səviyyəsini xarakterizə edən əsas göstəricilərdən sayılan pullu xidmətlərin həcmi də xeyli artaraq 66,2 milyon manata çatmış, əvvəlki ilin müvafiq dövrünə nisbətən 7,2 faiz artım əldə edilmişdir. Hesabat dövründə, həmçinin rayon əhalisinə 16,9 milyon manatlıq nəqliyyat və 72,7 milyon manatlıq rabitə xidmətləri göstərilmişdir ki, bu da sözügedən sahələrdə 13 faiz və 2 dəfə artım deməkdir.

Daha sonra A.Fərzəliyev Nərimanov rayonunda həyata keçirilən abadlıq-quruculuq işlərindən bəhs etdi. Qeyd olundu ki, rayonun qısa zaman kəsiyində həm də geniş quruculuq məkanına çevrilməsinin ən ümdə səbəblərindən biri ölkəmizin bütün bölgələri kimi, bu rayona da ölkə Prezidenti İlham Əliyev tərəfindən xüsusi diqqət və qayğı göstərilməsidir. Belə ki, dövlət başçısı cari ilin birinci rübü ərzində iki dəfə Nərimanov rayonunda olmuş, yanvarın 31-də “Bakıelektrikşəbəkə” Açıq Səhmdar Cəmiyyətinin Nərimanov rayonundakı 110/35/6 kilovoltluq yarımstansiyasının, martın 7-də isə Azərbaycan Dövlət Rəssamlıq Akademiyasının yeni korpusunun açılış mərasimlərində iştirak etmişdir. Bütövlükdə isə 2013-cü ilin ilk üç ayında Gənclik meydanında yeraltı yol ötürücülərinin və yeraltı avtomobil dayanacağının inşası, metronun “Gənclik” stansiyasının ətrafında yerləşən binaların fasadlarının milli memarlıq üslubunda yenidən qurulması, Vaqif prospektinin genişləndirilməsi və Ziya Bünyadov prospektinin yenidən qurulması, eləcə də paytaxtın baş planına uyğun digər layihələrin həyata keçirilməsi davam etdirilmişdir. Natiq, həmçinin rayonun elektrik enerjisi, qaz və içməli su təchizatının daha da yaxşılaşdırılması sahəsində həyata keçirilmiş tədbirlərdən bəhs etdi, sakinlərin həyat səviyyəsinin artırılması ilə bağlı görülmüş işləri diqqətə çatdırdı.

Nərimanov Rayon İcra Hakimiyyəti tərəfindən xarici ölkələrlə əməkdaşlığın yaradılması və inkişaf etdirilməsi sahəsində də ilin ötən dövrü ərzində xeyli iş görüldüyünü vurğulayan natiq Azərbaycan Respublikası və Rusiya Federasiyası, xüsusilə Həştərxan vilayəti arasında son illər ərzində iqtisadi-siyasi və mədəni sahələrdə sıx dostluq və əməkdaşlıq əlaqələrinin gündən-günə genişləndirildiyini bildirdi. Qeyd olundu ki, Azərbaycan Respublikasının Prezidenti İlham Əliyevin tapşırığı, Heydər Əliyev Fondunun təşəbbüsü ilə Nərimanov Rayon İcra Hakimiyyəti tərəfindən son illər Həştərxan vilayətində bir sıra genişmiqyaslı layihələr həyata keçirilmiş və hazırda digər sosial layihələrin icrası uğurla davam etdirilir.

Məruzə ətrafında millət vəkili Rasim Musabəyov, Nərimanov Rayon İcra Hakimiyyəti başçısının 1 saylı Sahə İnzibati Ərazi Dairəsi üzrə nümayəndəsi Natiq Babayev və rayon sosial-müdafiə mərkəzinin direktoru Ağa Həsənov çıxış etdilər.

Hesabat yığıncağına yekun vuran Abdin Fərzəliyev bildirdi ki, Nərimanov rayonunun sosial-iqtisadi inkişafı, əhalinin həyat səviyyəsinin yaxşılaşdırılması, geniş abadlıq və quruculuq işlərinin aparılması, onlara göstərilən kommunal və digər xidmətlərin səviyyəsinin yüksəldilməsi istiqamətində işlər ilin qalan dövrü ərzində davam etdiriləcək, dövlət başçısı İlham Əliyevin Nazirlər Kabinetinin məlum iclasında qarşıya qoyduğu vəzifələrin icrası naminə bütün imkanlar səfərbər olunacaq.

Mirbağır YAQUBZADƏ

Xalq qəzeti.- 2013.- 24 aprel.- S. 9.