Binəqədi rayonunda cari ilin birinci rübünə yekun vurulmuşdur

“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda qarşıya qoyulan vəzifələrin yerinə yetirilməsi nəticəsində paytaxtın, Bakıətrafı qəsəbələrin sosial-iqtisadi siması görülən abadlıq işləri nəticəsində xeyli dəyişmiş, gözəlləşmişdir.

Paytaxt və ətraf qəsəbələrin inkişafı ilə bağlı Dövlət Proqramının qəbulundan ötən müddət ərzində əhalinin qaza, suya, elektrik enerjisinə olan tələbatının ödənilməsi, küçə və məhəllədaxili işıqlandırma sistemlərinin qurulması, ictimai nəqliyyatın fasiləsiz işləməsi, sosial təyinatlı obyektlərin - məktəblərin, uşaq bağçalarının, xəstəxanaların, mədəniyyət evlərinin tikintisi və bərpası, müasir avadanlıqla təchiz edilməsi ilə bağlı mühüm tədbirlər həyata keçirilmişdir.

Son bir il ərzində Binəqədi rayonunda da tikinti-quruculuq, abadlıq işləri geniş vüsət almışdır. Prezident İlham Əliyevin aprelin 22-də Binəqədi rayonunun Biləcəri qəsəbəsindəki mədəniyyət-istirahət parkının əsaslı bərpa və yenidənqurmadan sonra açılışında iştirakı, mərasimdə dövlət başçımızın rayon barədə dedikləri bunun bariz ifadəsidir.

Parkla tanışlıqdan sonra qəsəbə ictimaiyyətinin nümayəndələri ilə görüşən ölkə Prezidenti demişdir ki, Bakı şəhərinin hər bir yerində çox böyük quruculuq işləri aparılır. Çox şadam ki, Binəqədi rayonunda son vaxtlar çox böyük işlər görülməyə başlanmışdır. Bu, onu göstərir ki, nəinki Bakının, ölkəmizin hər bir yerində iş görmək mümkündür və lazımdır. Sadəcə, iradə olmalıdır, hər bir insanın öz doğma Vətəninə məhəbbəti və əlbəttə ki, peşəkarlıq yüksək səviyyədə olmalıdır... Binəqədi kimi böyük rayonun inkişafı üçün xüsusi tədbirlər planı icra edilir. Bu rayonun planlı şəkildə inkişafı əlbəttə ki, bütün problemlərin həlli üçün imkan yaradacaqdır...

Binəqədi Rayon İcra Hakimiyyəti başçısı yanında Şuranın 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağında da bu barədə ətraflı danışılmışdır. Rayonun sənaye, təhsil, səhiyyə, mədəniyyət, xidmət sahələrinin, hüquq-mühafizə orqanlarının, eləcə də ictimaiyyət nümayəndələrinin iştirak etdikləri tədbiri rayon icra hakimiyyətinin başçısı Xaləddin İsgəndərov açaraq Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına həsr olunmuş geniş iclasında Prezident İlham Əliyevin proqram xarakterli nitqinin bəzi məqamlarına toxunmuşdur. Natiq son illər ərzində ölkə iqtisadiyyatında müşahidə olunan iqtisadi artımın sözügedən dövrdə də davam etməsini müsbət hal kimi qiymətləndirmişdir. Bu, Binəqədi rayonunda da özünü qabarıq büruzə vermişdir.

Hesabat məruzəsi ilə çıxış edən rayon icra hakimiyyəti başçısının müavini İlqar Süleymanov bildirmişdir ki, birinci rübdə rayonda bütün sahələr üzrə yüksək makroiqtisadi göstəricilər əldə edilmişdir: sənaye sahəsində 2013-cü ilin yanvar-mart aylarında 32 milyon 979 min manatlıq və ya keçən ilin müvafiq dövründən 0,2 faiz çox sənaye məhsulu istehsal edilmiş və xidmətlər göstərilmişdir.

2013-cü ilin yanvar-mart aylarında Binəqədi rayonunda iqtisadi və sosial sahələrin inkişafı üçün maliyyə mənbələrindən əsas kapitala 1 milyon 459 min manat məbləğində investisiya yönəldilmişdir ki, onlardan 259 min manatı tikinti-quraşdırma işlərinə sərf edilmişdir. Bu dövrdə tikinti-quraşdırma təşkilatlarının öz gücləri ilə yerinə yetirdikləri podrat işlərinin həcmi 60 milyon 376 min manat olmuş və əvvəlki ilin müvafiq dövrünə nisbətən 2,1 dəfə artmışdır.

Tədbirdə digər natiqlər də birinci rübdə ölkənin sosial-iqtisadi inkişafında Binəqədi rayonunun mühüm rol oynadığını vurğulamışlar.

Hesabat yığıncağına yekun vuran rayon icra hakimiyyətinin başçısı Xaləddin İsgəndərov Nazirlər Kabinetinin bu ilin birinci rübünün yekunlarına həsr olunmuş iclasında ölkə Prezidenti İlham Əliyevin proqram xarakterli yekun nitqindən irəli gələn vəzifələrin icrası ilə bağlı görüləcək işlərdən, həmçinin rayonda həllini gözləyən bir sıra məsələlərdən söhbət açmış, bununla bağlı müvafiq qurumların rəhbərlərinə konkret tapşırıqlar vermişdir.

Yığıncaqda Milli Məclisin deputatları Madər Musayev və Rafael Cəbrayılov iştirak etmişlər.

Vaqif BAYRAMOV

Xalq qəzeti.- 2013.- 24 aprel.- S. 9.