Göygöl: quruculuq dinamikası yüksəkdir

Göygöl rayonunda ilin bütün fəsillərində işin ahəngi gurdur. Özü də aparılan quruculuq işlərinin miqyası, inkişafın və yüksəlişin dinamikası təkcə rayon mərkəzini əhatə etmir. Tikinti-abadlıq bütün yaşayış məntəqələrində eyni sürətlə və keyfiyyətlə aparılır. Ancaq bu günlər rayona səfərimiz zamanı gördüklərimiz, şahidi olduqlarımız və eşitdiklərimiz bizdə daha böyük təəssürat, xoş duyğular yaratdı. Bütün sahələrdə yüksək mütəşəkkiliyin, böyük ruh yüksəkliyinin və əmək coşğunluğunun şahidi olduq. Bəli, bu gün Göygöl şəhərinin elə bir küçə və prospekti, park və xiyabanı yoxdur ki, orada əsaslı bərpa və yenidənqurma işləri aparılmasın. Yeni səkilər, yaşıllıq zolaqları salınır, qaz, işıq, su xətləri dəyişdirilir, müasir işıqlandırma sistemi quraşdırılır.

Göygöl Rayon İcra Hakimiyyətinin başçısı Arif Seyidov mövcud vəziyyəti, görüləcək işlərin miqyasını, adamların əhval-ruhiyyəsini, mənəvi-psixoloji mühiti qiymətləndirərək dedi:

- İndi rayonumuzda elə bir əmək kollektivi, idarə, müəssisə və təşkilat yoxdur ki, xalqımızın böyük oğlu ulu öndər Heydər Əliyevin anadan olmasının 90 illik yubileyini bu böyük şəxsiyyətin adına, əməl və ideyalarına layiq nailiyyətlərlə qarşılamağa çalışmasın. Bu gün bütünlüklə rayonumuzda, ayrı-ayrı kollektivlərdə müşahidə olunan fəallığın, ruh yüksəkliyinin və mütəşəkkilliyin kökünü məhz burada axtarmaq lazımdır.

Göygöl şəhərinin küçə və prospektləri ilə addımlayırıq. Hər yerdə abadlıq, gözəllik və yeniliklə rastlaşırıq. Həqiqətən, son illər Göygöl şəhəri də yaraşıqlı olmuşdur. Ümumiyyətlə, ötən müddət ərzində rayonda istehsal və xidmət sahələrinin genişləndirilməsi, sosial obyektlərin tikilməsi, abadlıq və quruculuq işlərinin aparılması istiqamətində həyata keçirilən tədbirlər davam etdirilmiş, iqtisadiyyatın dinamik inkişafı təmin olunmuşdur. Hazırda Gölgöl şəhərində 7 mərkəzi küçə abadlaşdırılır. Binaların fasadlarına üzlük piltələr çəkilir, evlərin dam örtükləri dəyişdirilərək əsaslı təmir olunur. Göygöl şəhər mədəniyyət və istirahət parkı genişləndirilərək yenidən qurulur, Dövlət Bayrağı meydanı və muzeyi tikilir, ətrafında abadlıq işləri aparılır.

Ötən yay güclü leysan yağışı nəticəsində əmələ gələn sel suları yaşayış evlərinin zirzəmilərinə, bir sıra obyektlərə və həyətyanı sahələrə dolmuşdu. Sel sularının təsirindən Göygöl-Toğana magistral avtomobil yolunun Göygöl şəhərindən çıxan hissəsi dağılmış, Köşkü və Topalhəsənli kənd yolları daş və çınqılla bağlanmışdı. Gələcəkdə sel sularının vura biləcəyi ziyanın qarşısını almaq üçün bütün zəruri tədbirlər görülmüşdür. Belə ki, dağlardan əmələ gələn sel sularının Göygöl şəhərinə daxil olmasının qarşısını almaq məqsədilə yeni tikilməkdə olan idman kompleksinin üst tərəfində eni 7 metr, dərinliyi 2,5 metr olan 1 km uzunluğunda kanal qazılmışdır. Rayonda ekoloji vəziyyəti yaxşılaşdırmaq məqsədilə bu il də ağacəkmə kampaniyası davam etdirilmişdir. Şəhər, qəsəbə və kəndlərdə, park və xiyabanlarda, yol kənarlarında 7 mindən çox ağac və bəzək kolları əkilmişdir.

“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda Göygöl rayonu üzrə 15 tədbir nəzərdə tutulmuşdur. Onlardan 2-si yerinə yetirilmiş, 15-nin icrası davam etdirilir. 2012-ci ildə Göygöl şəhərinin Turan Qurbanov, Xəlil Rza, Əlyağa Şıxlınski, Mola Pənah Vaqif və Hüseyn Cavid küçələrinə və Bayraq meydanına gedən yola 32 min 309 kvadratmetr asfalt örtük salınmış və səki daşı düzülmüşdür.

Qarabağ müharibəsi əlilləri və şəhid ailələri üçün 36 mənzilli yaşayış evi, Dövlət Sosial Müdafiə Fondunun və Milli Təhlükəsizlik Nazirliyinin Göygöl rayon şöbələri üçün inzibati binalar, Olimpiya İdman Kompleksi, Heydər Əliyev Mərkəzi, Gənclər Mərkəzi, Uşaq Əyləncə Mərkəzi üçün binalar, “Göygöl” şərabının istehsal sahəsini genişləndirmək üçün spirt zavodu tikilir.

2012-ci ildə 58,2 milyon manat əsas kapitala investisiya qoyulmuş, bunun 56 milyon 556,3 min manatı tikinti-quraşdırma işlərinə yönəldilmişdir. Azərbaycan Respublikasının Prezidenti İlham Əliyevin ayırdığı vəsait hesabına səkkiz min nəfər əhalinin yaşadığı 6 yaşayış məntəqəsini birləşdirən, 10,5 kilometr uzunluğunda Xaqani-Cümşüdlü-Haçaqaya avtomobil yoluna asfalt örtük salınmışdır. Yolun mühafizə zolağına düşən elektrik və rabitə dayaqlarının yeri dəyişdirilmiş, yol kənarında olan görkəmsiz ticarət obyektləri əsaslı təmir olunmuşdur.

Ölkədə avtomobil yolları şəbəkəsinin yenidən qurulması və bərpası istiqamətində həyata keçirilən iri layihələr sırasında investisiyalar hesabına hazırda tikintisi davam edən Bakı-Qazax avtomobil yolunun rayon ərazisindən keçən 36 kilometr hissəsində yenidənqurma və bərpa işləri davam etdirilir. Ümumiyyətlə, son doqquz il ərzində 7379 yeni iş yeri açılmışdır ki, onun da 5068-i daimidir. Sahibkarlıq subyektlərinin yaradılmasına və fəaliyyət göstərməsinə, kiçik və orta sahibkarlığın inkişafına əlverişli şərait yaradılmış, nəticədə 2012-ci ilin yekunlarına görə rayonda sahibkarların sayı 2467-yə çatmışdır. Sahibkarlığa Kömək Milli Fondunun xətti ilə sahibkarlıqla məşğul olan 68 hüquqi və fiziki şəxsə 1065 min manat güzəştli kredit verilmişdir.

2012-ci ildə iqtisadiyyatın əsas sahələrində istehsal olunmuş məhsul və xidmətlərin ümumi həcmi faktiki qiymətlərlə 143 milyon 191,5 min manata çatmışdır. Bunun 110,1 milyon manatı istehsal sahələrini, 33,4 milyon manatı xidmət sahələrini təşkil etmişdir. Rayonda fəaliyyət göstərən 25 sənaye müəssisəsi bütövlükdə 12 milyon 284,5 min manat dəyərində məhsul istehsal etmiş, qeyri-dövlət sektorunun xüsusi çəkisi 54,6 faiz olmuşdur. 2012-ci ildə 2050 nəfər kənd təsərrüfatı məhsulları istehsalçılarına yanacaq və motor yağlarına, buğda əkininə, toxum istehsalına və mineral gübrələrə görə dövlət büdcəsindən 1,1 milyon manat yardım verilmişdir. Kənd təsərrüfatı məhsulları istehsalçılarına dövlət dəstəyinin nəticəsi olaraq kənd təsərrüfatı məhsullarının istehsalı 7,6 faiz artmışdır. Əvvəlki illə müqayisədə 2012-ci ildə 1756,1 min manat çox olmaqla, 41306,7 min manat dəyərində kənd təsərrüfatı məhsulları istehsal edilmişdir, bunun da 99,3 faizi qeyri-dövlət sektorunun payına düşür.

İlin bu çağlarında təbiət Göygölə özgə gözəllik, əlvan bir büsat gətirir. İnsan əlinin vurduğu təkrarsız naxışlar isə bu gözəlliyi bir az da artırır.

Ziyəddin SULTANOV

Xalq qəzeti.- 2013.- 25 aprel.- S. 10.