Samux: yeni ünvanlar inkişafın yeni mərhələsindən xəbər verir

Gəncənin 5-6 kilometrliyində olan Samuxun inkişafını hiss etməmək, görməmək mümkün deyil. Vaxtaşırı olaraq bu rayonda sosial obyektlər, istehsal sahələri, yeni park və xiyabanlar, hətta Samuxun tarixində ilk dəfə olaraq çoxmərtəbəli yaşayış binaları tikilib istifadəyə verilir. Rayon icra hakimiyyətinin başçısı Alı Qocayevlə bu mövzuda söhbət edərkən dedi:

-Azərbaycan Respublikasının Prezidenti cənab İlham Əliyev Samuxun daha da inkişaf etməsi üçün daim diqqət və qayğı göstərir. Elə keçən il ölkə başçısının 10 aprel tarixli sərəncamı dediklərimin bariz nümunəsidir. Məhz həmin sərəncamla rayona ayrılmış vəsait hesabına Samuxun 17 min nəfər əhalisinin yaşadığı 6 yaşayış məntəqəsini birləşdirən Gəncə-Sərkar-Qarayeri-Qədilli avtomobil yolunun tikintisinə başlanmış və işlər qısa müddətdə başa çatdırılaraq əhalinin istifadəsinə verilmişdir.

Rayon icra hakimiyyəti başçısının dediklərinə belə bir faktı da əlavə edək ki, adını çəkdiyimiz yolun Sərkar, Ziyadlı, Qovlarsarı kəndlərindən və Qarayeri qəsəbəsindən keçən hissələrinin kənarlarında geniş abadlıq işləri aparılmışdır. Yol kənarlarındakı tikililər qaydaya salınmış, hörgü, suvaq, rəngləmə işləri aparılmış, bardürlər düzülmüş, ictimai yaşayış evlərinin qarşısında çiçək və bəzək kolları əkilmişdir. Qarayeri qəsəbəsində yolun kənarında 800 metr səki salınmış, dairəvi hərəkət üçün xüsusi dairə inşa olunmuş, çil-çıraq quraşdırılmışdır. Qəsəbənin mərkəzi hissəsində ayrıca istirahət parkı yaradılmış, bulaq tikilmiş və işıqlandırma sistemi quraşdırılmışdır.

Samuxun girəcəyində olan Heydər Əliyev parkını indi tanımaq olmur. Çünki bu park tamamilə yenidən qurulmuş və yeni tikililəri ilə hamının diqqətinə, marağına səbəb olmuşdur. Tikintisinə ötən ilin noyabrında başlanılmış Heydər Əliyev mərkəzi artıq hazırdır. Kafe, oyun zalı, çay evi parkın əsl mədəniyyət və istirahət guşəsinə çevrilməsi üçün yaxşı tikililərdir. Yaşıllıqların suvarılması üçün xüsusi çiləyici qurğular quraşdırılmışdır. Elektrik təchizatı sistemi yenidən qurulub, meydanın və gəzinti yollarının kənarlarına mərmər bardürlər düzülüb. Diqqətçəkən məqamlardan biri də budur ki, parkın sahəsi genişləndirilmiş, şəhərin Heydər Əliyev prospektinin yenidən qurulması layihəsinə uyğun olaraq üç ədəd yeni parkın salınması başa çatdırılmışdır. Bu parklarda adamların səmərəli istirahət etməsi üçün hər cür şərait yaradılmışdır. Burada Heydər Əliyev bulağı, fəvvarələr inşa edilmiş, yaşıllıqlar və gəzinti üçün yollar salınmış, işıqlandırma və su sistemi quraşdırılmışdır. Prospektin işıqlandırma sistemi də yenidən qurulmuşdur.

Rayonun ayrı-ayrı obyektlərində, küçələrdə görülən işlərlə yaxından tanış olduqda, zövqlülük daha qabarıq hiss olunur. Adi bir bulaq kompleksi də, rayonun ad göstəricisini əks etdirən guşə də zövqlülüyünə görə seçilir. Təbii ki, orijinallığı, müasirliyi də öz yerində. Hiss olunur ki, rayon rəhbərliyi, elə icra hakimiyyətinin başçısı Alı Qocayev bu işlərin demək olar ki, hamısına özü nəzarət edir, məsləhətlərini, göstərişlərini verir. Elə bu zövqlülük də işə münasibətdən yaranır. Rayon mərkəzindəki küçə və məhəllələr bir-birinin ardınca abadlaşdırılır, evlərin fasadlarına və hasarlara aqlay vurulur, əlavə hörgü işləri aparılır, kommunikasiya xətləri qaydaya salınır, yollar genişləndirilir, arxlar çəkilir, yararsız, primitiv tikililər sökülərək yeniləri ilə əvəz olunur. Artıq Arif Nəbiyev, 28 may, N.Nərimanov, Tofiq İsmayılov küçələri, Kolayır prospekti öz görkəmini xeyli dəyişdirmişdir. Lakin bu işlər hələ davam etdirilir.

Rayon mərkəzi ərazisində “Dül-dül” adlanan ziyarətgahın yanında yerləşən qəbiristanlıqda abadlıq işləri aparılmış, onun ətrafına hasar çəkilmişdir. Bundan başqa şəhər - Yenikənd yolunun sol tərəfində yarım kilometrdən çox məsafədə dekorativ hasar çəkilmişdir.

Bir sıra respublika və yerli əhəmiyyətli yollarda asfalt salınmış, təmir-bərpa işləri aparılmış, çınqıl materialları tökülmüşdür.

Rayonda müxtəlif inzibati binaların tikilib istifadəyə verilməsi Samuxun görkəmini tədricən dəyişir. Artıq rayon prokurorluğunun yeni inzibati binası inşa edilərək istifadəyə verilmişdir. Ən ucqar kəndlərdə də sosial obyektlərin inşasına diqqət yetirilir. Burunqovaq kəndində icra nümayəndəliyinin və kənd bələdiyyəsinin yeni inzibati binası artıq istifadəyə verilmişdir.

Bir məsələni qeyd edək ki, son 9 ildə Samuxda 15 yeni məktəb binası inşa edilmiş, 14 məktəbdə, 4 uşaq bağçasında əsaslı təmir işləri aparılmışdır. Lakin keçən il yeni tikilən binaların sayı əvvəlki illərdən fərqli olmuşdur. Belə ki, 2012-ci ildə rayonda şəhər 2 saylı tam orta məktəbi üçün 360 şagird yerlik, Lək kənd tam orta məktəbi üçün 220 şagird yerlik, Poylu və Salahlı kənd məktəbləri üçün 180 yerlik, Qiyaslı məktəbi üçün 80 şagird yerlik yeni məktəb binaları tikilib istifadəyə verilmiş, şəhər 1 saylı uşaq bağçası əsaslı təmirdən sonra istismara buraxılmışdır.

Aşağı Ağasıbəyli kəndində yerləşən stadion yenidən qurulmuş, idmançılar üçün üç otaqdan ibarət, həm də avadanlıqlarla təchiz olunmuş soyunub-geyinmə otağı inşa edilmişdir. Stadionun ətrafı hasarlanmış, 100 ədəd müasir oturacaq quraşdırılmışdır.

Rayonda istehsal sahələrinin yaradılmasına xüsusi fikir verilir. İstixana kəndi ərazisində 3 hektar sahədə faraş meyvə-tərəvəz istehsal edəcək “Aqrikola” MMC İstixana kombinatı fəaliyyətə başlamışdır. Hazırda burada 30 nəfər daimi işlə təmin edilmişdir. Müəssisə tam işə düşdükdə işçilərin sayı 100 nəfərə çatacaqdır.

Rayonda “Aqroenerji” kompleksinin yaradılması da nəzərdə tutulur ki, onun da ümumi dəyəri 94 milyon manat təşkil edir. Bu isə 1000 nəfərin işlə təmin olunması deməkdir.

Qeyd edək ki, həyata keçirilən tədbirlər nəticəsində keçən il 747 iş yeri açılmışdır ki, onun da 486-sı daimidir. Bütövlükdə 2004-2012-ci illərdə Samuxda 4467 daimi iş yeri açılmışdır.

Təbii ki, rayonun iqtisadiyyatının əsasını aqrar sahə təşkil etdiyindən bu məsələ daim diqqət mərkəzindədir. Ötən il sahələrdən 30 min tona yaxın taxıl məhsulu yığılıb, məhsuldarlıq hər hektardan 33 sentnerə çatıb. Əslində yaxşı göstəricilərdir. Lakin bu, hələlik istənilən səviyyə deyil. Buna görə taxılçılığın, eləcə də kənd təsərrüfatının digər sahələrinin, o cümlədən üzümçülüyün inkişafı üçün kompleks tədbirlər görülür.

Samuxda əhalinin qaz, su, elektrik enerjisinə olan tələbatını tam dolğunluğu ilə ödəmək üçün bir sıra layihələr həyata keçirilir.

Hazırda rayonda 12 min 709 nəfər abonent təbii qazdan istifadə edir ki, bu da ötən illə müqayisədə 526 abonent, 2003-cü illə müqayisədə 3,4 dəfə çoxdur.

Elektrik enerjisi, su təchizatında bir sıra texniki-təşkilati tədbirlər həyata keçirilmişdir. Rayon icra hakimiyyətinin başçısı Alı Qocayev söhbət zamanı dedi ki, bu il şəhərin kanalizasiya və su sisteminin qurulması ilə bağlı nəzərdə tutulan iri layihənin icrasına başlanacaqdır. Rayon rəhbəri onu da xüsusi vurğuladı ki, əvvəlki layihədə yalnız rayon mərkəzi olan Nəbiağalı şəhərində su və kanalizasiya xəttinin çəkilməsi nəzərdə tutulurdusa, biz ətraf bir neçə kəndin də həmin problemini həll etməyi nəzərdə tutmuşuq.

Təhsil, səhiyyə, mədəniyyət sahələrinin maddi-texniki bazasının möhkəmləndirilməsi diqqət mərkəzindədir. Qəza vəziyyətində olan Əhmədbəyli kənd orta məktəbi üçün 360 yerlik, Qarabağlar orta məktəbi üçün 180 şagird yerlik yeni məktəb binalarının tikintisi, Alabaşlı, Qırmızı Samux qəsəbə və Zazalı kənd orta məktəblərinin əsaslı təmir olunması nəzərdə tutulur.

Bu il rayonun qəsəbə və kəndlərində bir neçə uşaq bağçasının açılması, Qarabağ müharibəsi əlilləri və şəhid ailələri üçün çoxmənzilli yaşayış binasının, səhiyyə və mədəniyyət ocaqlarının tikintisi və əsaslı təmiri sahəsində işlər aparılır.

...Samuxun inkişafı sürətlə gedir. Burada aparılan işlər onu göstərir ki, Samux tezliklə gözəl, füsunkar, çoxlu park və xiyabanları, abad kənd və qəsəbələri, geniş yolları olan bir rayona çevriləcək. Kürün o tayındakı kəndlərin də tezliklə qazlaşdırılması nəzərdə tutulur. Bu isə adamların daha yaxşı, rahat yaşamasına imkan verəcəkdir.

Hamlet QASIMOV

Xalq qəzeti.- 2013.- 25 aprel.- S. 10.